ᐅᔩᑕ ᓄᕙᓕᖕᖓᖅ

  • ᐅᔩᑕ ᓄᕙᓕᖕᖓᖅ

    ᒪᑭᕝᕕᐅᑉ ᐊᓪᓚᑎᒻᒪᕆᖓ

ᐅᔩᑕ ᓄᕙᓕᖕᖓᖅ ᓂᕈᐊᕐᑕᐅᓚᐅᔪᕗᖅ ᐳᕐᑐᓂᕐᓴᐅᑉ ᐃᓂᖓᓄᑦ ᒪᑭᕝᕕᒥ ᐊᓪᓚᑎᒻᒪᕆᐅᓚᖓᓕᕐᓱᓂ ᔮᓄᐊᕆ 17, 2019ᖑᑎᓪᓗᒍ. ᐅᔩᑕ ᐃᓅᓕᕐᓯᒪᔪᖅ ᐳᕕᕐᓂᑐᒥ 1959-ᖑᑎᓪᓗᒍ, ᐳᕐᑐᓂᕐᓴᒥᓪᓗ ᐃᓕᓐᓂᐊᒐᕐᒥᓂᒃ ᐱᔭᕇᕐᓯᒪᕗᖅ ᐃᓕᓴᖑᑦᓱᓂ ᐋᑐᒑᒥ.

ᐊᓪᓚᑎᒻᒪᕆᐅᕕᒻᒥᓂ ᐅᔩᑕ ᑲᒪᔨᐅᕗᖅ ᐊᓪᓚᕕᖁᑎᖏᓐᓂᒃ ᒪᑭᕝᕕᐅᑉ ᑰᒃᔪᐊᒥ, ᐃᓄᑦᔪᐊᒥ, ᒪᓐᑐᔨᐊᒥ, ᑯᐯᒃ ᓯᑎᒥ ᐊᒻᓗ ᐋᑐᒑᒥ. ᑲᒪᒋᔭᖃᑦᓯᐊᓲᖅ ᓱᕐᖁᐃᑐᒥᒃ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᖏᓪᓗ ᐊᒻᒪᓗ ᓄᓇᓕᓐᓂ ᑭᒡᒐᑐᕐᑏᑦ ᑲᑎᖕᖓᓂᖏᓐᓂᒃ ᑲᔪᓯᑎᑦᓯᓂᖃᑦᓯᐊᓱᓂ, ᑲᒪᒋᔭᖃᕐᐸᓱᓂᓗ ᐊᐅᓚᑕᐅᒋᐊᓕᓐᓂᒃ ᐃᓕᖓᑦᓱᑎᒃ ᐃᖏᕐᕋᑎᑕᐅᓂᖏᓐᓄᑦ ᒪᑭᕝᕕᐅᑉ ᐊᓪᓚᕕᖁᑎᖏᑕ, ᐃᓚᐅᑎᓪᓗᒋᑦ ᐆᒻᒪᑎᒥᒍᑦ ᑎᒍᒥᐊᓪᓚᕆᑦᑕᖏᑦ – ᐅᖃᐅᓯᐅᑉ ᐁᑉᐹᓄᑦ ᓄᑦᑎᕆᓃᓪᓗ ᑐᓵᔨᐅᓃᓗ.

ᐃᓅᓯᓕᒫᒥᓂ ᐅᔩᑕ, ᑌᒪᖕᖓᑦ ᓯᑕᒪᐅᔪᕐᑐᓂᒃ ᐅᑭᐅᖃᓕᓚᐅᕐᓯᒪᒐᒥᓂᑦ, ᐱᓇᓱᐊᕐᐸᑐᖅ ᑐᓵᔨᐅᑦᓱᓂ ᑭᖑᓂᒋᐊᖓᒍᑦ ᐅᖃᐅᓯᐅᑉ ᐁᑉᐹᓄᑦ ᓄᑦᑎᕆᖃᑦᑕᓯᓚᐅᔪᒻᒥᔪᖅ, ᓱᕐᖁᐃᑐᒥᒃ ᓄᓇᕕᒻᒥᐅᑦ ᐊᑕᐅᓯᕐᒥᒃ ᐅᖃᐅᓯᓕᖁᑎᖏᑦ ᑐᑭᓯᒪᑦᓯᐊᖁᑦᓱᒋᑦ ᓯᓚᕐᔪᐊᒥᓐᓂᒃ ᐊᕙᑎᒥᓐᓃᑐᓂᒃ. ᐊᑖᑕᒥᓂᒃ ᐃᑲᔪᕐᓱᓂ ᐱᓇᓱᖃᑕᐅᖃᑦᑕᓯᓚᐅᕐᓯᒪᔪᖅ ᐊᑖᑕᖓ ᐃᖃᓗᓐᓂᐊᑎᓂᒃ ᒪᙯᑎᑦᓯᔨᐅᑎᓪᓗᒍ, ᑲᔪᓯᓚᐅᔪᕗᕐᓗ ᐱᓇᓱᒐᖃᕐᓂᓕᒫᒥᓂ ᐅᖃᐅᓯᐅᑉ ᐁᑉᐹᓄᑦ ᓄᑦᑎᕆᔨᐅᑦᓱᓂᓗ/ᑐᓵᔨᐅᑦᓱᓂᓗ. ᑕᒐᑕᒐᓕ ᒪᑭᕝᕕᒧᑦ ᐊᓪᓚᑎᒻᒪᕆᐅᓕᕐᓱᓂ ᑲᒪᔨᐅᕙᓕᕐᖁᖅ ᐅᖃᐅᓯᐅᑉ ᐁᑉᐹᓄᑦ ᓄᑦᑎᕆᔨᓂᓪᓗ ᐊᒻᒪᓗ ᑐᓵᔨᓂᒃ ᒪᑭᕝᕕᐅᑉ ᐱᓇᓱᑦᑎᕙᑦᑕᖏᓐᓂᒃ ᐊᓪᓚᖁᑎᓕᐊᒥᓂᒃ ᐊᒻᒪᓗ ᐊᑐᐊᒐᑦᓴᓕᐊᒥᓂᒃ, ᐃᓚᐅᒻᒥᑎᓪᓗᒋᑦ ᑐᓴᔩᑦ ᑲᑎᖕᖓᓂᑦᑎᓂ ᐱᓇᓱᑦᑎᕙᑦᑕᕗᑦ.

ᐱᓇᓱᒐᖃᕐᑎᐅᓂᕐᒥᒃ ᐱᕙᓪᓕᐊᒋᐊᖕᖓᓯᓚᐅᕐᓯᒪᔪᖅ ᐳᕕᕐᓂᑑᑉ ᐃᓕᓭᕕᖓᓂ ᐃᓕᓭᔨᐅᓯᑦᓱᓂ 1990 ᐱᒋᐊᕐᖃᒥᐅᑎᓪᓗᒋᑦ, ᐊᕐᕌᒎᓐᓂ ᒪᕐᕉᓂ, ᐱᓇᓱᓚᐅᕐᓯᒪᒻᒥᓱᓂᓗ ᓄᓇᓖᑦ ᑲᕙᒫᐱᒃᑯᖏᓐᓂ ᐳᕐᑐᓂᕐᓴᒥᒃ ᐊᓪᓚᑎᐅᑦᓱᓂ ᐊᕐᕌᒍᓕᒫᒥ ᐱᓇᓱᖃᑕᐅᑦᓱᓂ ᑲᑎᖕᖓᔩᑦ ᓯᕗᓕᕐᑎᖓᓄᑦ ᑐᓵᔨᒋᔭᐅᑦᓱᓂᓗ ᑖᑦᓱᒧᖓ ᓯᕗᓕᕐᑎᒧᑦ. 1993-ᒥ ᐱᓇᓱᐊᓯᓚᐅᔪᒻᒥᔪᖅ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ, ᑕᒐᑕᒐ ᐊᑦᓯᕋᐅᑎᑖᕐᖃᒥᓕᕐᑐᒧᑦ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ, ᐊᓪᓚᑎᐅᑦᓱᓂ, ᐳᕐᑐᓂᕐᓴᒥᒃ ᐊᓪᓚᑎᐅᓯᓚᐅᔪᒻᒥᔪᖅ ᑭᖑᓂᐊᒍᓪᓗ ᑐᓵᔨᐅᓯᑦᓱᓂ ᐅᖃᐅᓯᐅᓪᓗ ᐁᑉᐹᓄᑦ ᓄᑦᑎᕆᔨᖕᖑᓱᓂ, ᐃᓕᓴᕐᓂᓕᕆᕕᒻᒧᑦ ᐸᐸᑦᓯᔨᑖᖑᓕᓚᐅᔪᔪᖅ ᑭᖑᓂᐊᒍᑦ.

2000 ᐊᕐᕌᒍᖓ ᕿᑎᕐᖃᕉᑎᑎᓪᓗᒍ ᐅᔩᑕ ᑲᔪᓯᒃᑫᔨᑖᖑᓚᐅᔪᕗᖅ ᐃᓚᒌᓴᒃᑯᓄᑦ ᐊᕐᕌᒍᕐᓂᓗ ᑕᓪᓕᒪᓂ ᑕᒃᒐᓂ ᐱᓇᓱᒐᖃᓚᐅᔪᕗᖅ, ᑲᒪᔨᒋᔭᐅᑦᓱᓂ ᐊᖏᔪᒻᒪᕆᒻᒥᒃ ᑮᓇᐅᔭᑎᒍᓪᓗ ᐃᓅᑦᔪᓯᑎᒍᓪᓗ ᒪᑭᑕᒐᓱᒍᑎᑎᒍᑦ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᔪᒥᒃ ᓄᓇᕕᖕᒥ.

ᑭᖑᓂᐊᒍᑦ ᐱᓇᓱᑦᑎᐅᓕᓚᐅᔪᒻᒥᔪᖅ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ ᑐᓵᔨᐅᑦᓱᓂ ᐅᖃᐅᓯᐅᓪᓗ ᐁᑉᐹᓄᑦ ᓄᑦᑎᕆᔨᐅᑦᓱᓂ ᐊᕐᕌᒎᓐᓂ ᒪᕐᕉᓂ ᐱᓇᓱᐊᓕᓚᐅᔪᒻᒥᔭᒥᓂᒃ ᐅᑎᓚᐅᖕᖏᓂᕐᒥᓂ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᑲᔪᓯᒃᑫᔨᒧᑦ ᐃᑲᔪᕐᑎᐅᓯᑦᓱᓂ ᑎᑭᐅᑎᑦᓱᒍ ᓂᕈᐊᕐᑕᐅᓂᕆᓚᐅᕐᑕᖓ ᒪᑭᕝᕕᒧᑦ ᐊᓪᓚᑎᒻᒪᕆᐅᓚᖓᓕᕐᓱᓂ ᓂᕈᐊᕐᑕᐅᓂᖃᓚᐅᔪᒐᒥ ᔮᓄᐊᕆ 2019-ᒥ.

ᑌᒪᓕ ᐃᓄᒃᑎᑐᑦ ᐅᖃᐅᓯᕐᒥᒃ ᐃᓅᓯᓕᒫᒥᓂ ᐊᖏᔪᕐᔪᐊᖑᑎᑦᓯᒐᒥ, ᐅᔩᑕ ᐃᓚᐅᖃᑦᑕᓯᒪᒋᕗᖅ ᑲᑎᖕᖓᔨᓄᑦ ᐃᓕᖓᔪᓄᑦ ᐱᕙᓪᓕᐊᑎᑦᓯᒍᑎᖃᕐᓂᒧᓪᓗ ᐊᓯᐅᑎᑦᓯᑌᓕᓂᕐᒧᓗ ᐃᓄᒃᑎᑐᑦ ᐅᖃᐅᓯᕐᒥᓂᒃ. 1990-ᓂ ᑲᑎᖕᖓᔩᑦ ᐃᓚᐅᔫᖃᑎᒌᑕᓖᑦ ᐱᓯᒪᔪᓂᒃ ᓄᓇᕕᐅᑉ ᐱᓇᓱᒐᖃᕐᕕᖁᑎᖏᓐᓂᑦ ᐃᓕᖓᑦᓱᑎᒃ ᐃᓗᕐᖁᓯᐅᓪᓗ ᐅᖃᐅᓯᐅᓪᓗ ᐱᕙᓪᓕᐊᑎᑕᐅᒍᑎᖃᕐᓂᖏᓐᓄᑦ ᓄᐃᑦᓯᒍᑎᖃᓚᐅᔪᒋᕗᑦ ᐃᓄᒃᑎᑐᑦ ᐅᖃᐅᓯᐅᑉ ᐊᓪᓚᐅᑎᐊᓗᒻᒧᑦ ᐊᓪᓚᒍᑎᑦᓴᔭᖓᓂᒃ, ᐊᑦᓯᕋᐅᑎᓕᒻᒥᒃ ᐁᐯᓄᓇᕕᒃ, ᑖᓐᓇ ᐊᓪᓚᒍᓐᓇᐅᑎᓕᐊᖅ ᐅᑎᕐᑎᓯᓂᕐᑕᖃᓚᐅᔪᕗᖅ ᓯᑕᒣᖓᓐᓂᒃ ᐃᓄᒃᑎᑐᑦ ᓄᓇᕕᒻᒥ ᐊᓪᓚᒍᓯᑐᖃᖓᓐᓂᒃ, ᐅᔩᑕ ᐃᓚᒋᔭᐅᓚᐅᔪᔪᖅ ᑖᒃᑯᓄᖓ ᑲᑎᖕᖓᔨᓄᑦ ᓴᕐᕿᑎᑦᓯᓂᖃᓚᐅᔪᔪᓄᑦ ᑖᑦᓱᒥᖓ ᖃᕆᑕᐅᔭᒃᑯᑦ ᐊᓪᓚᒍᑎᑦᓴᔭᒥᒃ, ᑲᑎᕕᒃ ᐃᓕᓐᓂᐊᓂᓕᕆᓂᕐᒥᒃ ᑕᒃᒐᓂ ᐅᔩᑕ ᑭᒡᒐᑐᓚᐅᔪᔪᖅ.

ᑲᓇᑕᓖᒫᒧᓕᖓᔪᓄᑦ, ᐅᔩᑕ ᐃᓚᐅᔫᖃᑕᐅᓚᐅᔪᒋᕗᖅ ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅᒥ ᐱᓇᓱᒍᑎᖃᓕᕐᑐᓄᑦ ᑖᒃᑯᐊ ᐱᓇᓱᓚᐅᔪᒻᒪᑕ ᓄᐃᑦᓯᓇᓱᑦᓱᑎᒃ ᐊᑕᐅᓯᐅᓕᖓᓪᓚᕆᑦᑐᒥᒃ ᐊᓪᓚᒍᓯᕐᒥᒃ ᐃᓄᐃᑦ ᐅᖃᐅᓯᖓᑎᒍᑦ. ᑖᒃᑯᐊ ᐃᓄᒃᑐᑦ ᐊᑕᐅᓯᖅ ᑎᑎᕋᐅᓯᑦᓴᓕᐅᕋᓱᑦᑐᑦ ᑎᓕᔭᐅᓯᒪᒍᑎᖃᕐᒪᑕ ᖃᐅᔨᓴᖁᔭᐅᑦᓱᑎᒃ ᓇᓗᓀᕆᓗᑎᓪᓗ ᐅᖄᓂᒃᑰᑐᓂᒃ ᐃᓄᒃᑐᑦ ᑕᒐᑕᒐᓗ ᐃᓄᒃᑐᑦ ᐊᑐᓂᑦ ᐅᖃᐅᓯᕐᓂᒃ ᑕᒐᑕᒐ ᐊᑐᕐᑕᐅᔪᓂᒃ, ᐅᖃᐅᑦᔨᒋᐊᕈᑎᓂᓪᓗ ᐃᒣᓕᖓᖁᔨᓕᕐᖁᒎᕈᑎᓂᒃ ᐃᓄᒃᑐᑦ ᐊᓪᓚᒍᓯᑦᓴᒥᒃ ᐱᔪᓇᐅᓂᕐᐹᒥ ᓯᕗᒧᑦ ᐃᓄᒃᑐᑦ ᐊᑐᕐᑕᐅᔪᑦᓴᖁᑎᒋᓕᕐᑕᒥᓂᒃ ᐅᓇᑕᒃᑳᕈᑎᓕᐅᕐᓗᑎᒃ ᐃᓄᐃᑦ ᐊᓪᓚᒍᓯᖏᑎᒍᑦ ᐃᓄᑐᐃᓐᓇᓄᑦ ᑲᔪᓯᑎᑕᐅᓂᖃᑦᓯᐊᕈᓇᐅᓂᕐᐹᒥᒃ ᓯᕗᓂᑦᓴᑎᓐᓂ.

ᐅᔩᑕ ᑐᐊᕚᓪ, ᑯᐯᒃᒥᐅᖅ ᐁᑉᐸᖃᕐᓱᓂ ᐸᓂᖕᒥᓂᒃ ᐊᓕᓴᒥᒃ. ᐅᖃᐅᓯᕐᒥᒃ ᐱᒻᒪᕆᐅᑎᑦᓯᓂᕐᒥ ᓴᓂᕌᒍᑦ, ᐅᔩᑕ ᑲᑕᑦᔭᕆᐅᕐᓯᒪᑦᓯᐊᒥᔪᖅ, ᑲᑕᑦᔭᕆᐊᒥᒃ ᐃᓕᓯᒪᒐᒥ ᑲᑕᑦᔭᓯᑎᒻᒪᕆᖁᑎᒋᓯᒪᔭᖏᓐᓂᒃ ᐳᕕᕐᓂᑑᑉ, ᑕᒪᑐᒥᖓ ᐃᓕᑦᓯᓯᒪᔪᖅ ᐃᓕᓵᖑᑦᓱᓂ ᐳᕕᕐᓂᑐᒥ.