ᒫᑭ ᐃᒪᕐᓚᒃ

  • ᒫᑭ ᐃᒪᕐᓚᒃ

    ᐊᖓᔪᕐᖄᑉ ᑐᖓᓕᖓ ᒪᑭᑉᐸᓕᐊᓂᕐᒥᒃ ᐱᕈᕐᐸᓕᐊᑎᑦᓯᓂᕐᒧᑦ ᐊᓪᓚᕕᖓᓂᑦ

ᒫᑭ ᐃᒪᕐᓚᒃ ᓂᕈᐊᕐᑕᐅᓚᐅᔪᖅ ᒪᑭᕝᕕᒧᑦ ᐊᖓᔪᕐᖄᑉ ᑐᖓᓕᖓᓄᑦ ᒪᑭᑉᐸᓕᐊᓂᕐᒥᒃ ᐱᕈᕐᐸᓕᐊᑎᑦᓯᓂᕐᒧᑦ ᐊᓪᓚᕕᖓᓂᑦ ᔭᓄᐊᕆ 17, 2019-ᒥ. ᐃᓅᓕᕐᑐᕕᓂᖅ ᖁᓕᓪᓗ ᒪᕐᕈᓗ ᒣᓕᓂᑦ ᐅᖓᓯᓐᓂᓕᒻᒥᒃ ᑲᖏᕐᓱᐊᓗᒃᔪᐊᑉ ᓄᓇᓕᖓᑕ ᑰᑉ ᐹᖓᓂᑦ 1961-ᖑᑎᓪᓗᒍ ᖃᑦᓴᓐ ᐯᒃᑯᑦ ᓂᐅᕕᕐᓂᐊᕕᖃᕐᕕᕕᓂᖓᓂᑦ. ᐊᕐᕌᒍᓂᑦ ᐊᒥᓱᓂᑦ ᐱᒍᑦᔨᓯᒪᓕᕐᓂᖓ ᐃᓘᓐᓈᒍᑦ ᓄᓇᓕᒻᒥᓂᑦ ᓄᓇᕕᒻᒥᓗ ᒪᑭᕝᕕᒧᑦ ᓇᑦᔭᑕᖏᑦ.

ᐃᒪᕐᓚᒃ ᐋᑐᕚᒥ ᐃᓕᓐᓂᐊᓯᒪᔪᖅ, ᐊᓂᕐᕋᖑᐊᖃᕐᓱᓂ ᐃᓚᒥᑕ ᐃᓚᓐᓈᖏᓐᓂᑦ ᐱᓇᓱᑦᑎᐅᓚᐅᕐᑐᕕᓂᕐᓂᒃ ᖃᑦᓴᓐ ᐯᒃᑯᓂᑦ ᒫᑭᐅᑉ ᐊᑖᑕᖓᑕ ᐱᓇᓱᕝᕕᒋᓚᐅᕐᑕᕕᓂᖓᓂᑦ ᑲᖏᕐᓱᐊᓗᒃᔪᐊᑉ ᓯᕿᓂᖓᓂᑦ. ᑌᒪ ᑲᖏᕐᓱᐊᓗᒃᔪᐊᑉ ᐃᓕᓐᓂᐊᕕᖓᓂᑦ ᐱᓇᓱᒐᕐᑖᓯᒻᒥᓱᓂ ᐊᓪᓚᑎᐅᓂᕐᒥᒃ/ᑭᐅᔨᐅᓂᕐᒥᒃ. ᑭᖑᓂᖓᒍᑦ, ᐃᓕᓐᓂᐊᕕᒻᒥ ᑲᒪᔨᒻᒪᕆᐅᓯᒻᒥᓱᓂ ᐊᕐᕌᒍᓄᑦ ᖁᓕᓄᑦ, 1983-ᒥᑦ 1993-ᒧᑦ.

ᒫᑭ ᓂᕈᐊᕐᑕᐅᔪᕕᓂᖅ ᑲᖏᕐᓱᐊᓗᒃᔪᐊᑉ ᓄᓇᓕᖓᑕ ᑲᕙᒫᐱᖓᑕ ᑲᑎᖕᖓᔨᖏᓐᓄᑦ 1986-ᖑᑎᓪᓗᒍ, ᐊᓱᐃᓛ ᐃᓕᓐᓂᐊᕕᒻᒥ ᑲᒪᔨᒻᒪᕆᐅᓂᕐᒥᓂᒃ ᐲᕆᐊᖃᓯᑦᓱᓂ ᓂᕈᐊᕐᑕᐅᒐᒥ ᓄᓇᓕᒻᒥᓂ ᓯᕗᓕᕐᑎᐅᓂᕐᒧᑦ 1993-ᖑᑎᓪᓗᒍ, ᓯᕗᓕᐅᕐᑎᐅᓯᒪᔪᖅ 1993-ᒥᑦ 2001-ᒧᑦ. ᑖᒃᑯᓇᓂ ᐊᕐᕌᒍᓂᑦ, ᓄᓇᓕᒻᒥ ᑭᒡᒐᑐᕐᑎᐅᓯᒪᒻᒥᔪᖅ ᑲᑎᖕᖓᔨᐅᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ. ᓂᕈᐊᕐᑕᐅᓯᒪᓂᕐᒥᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐅᖃᕐᑎᒋᔭᐅᓯᒪᒻᒥᔪᖅ ᐊᕐᕌᒍᓄᑦ ᖃᑦᓯᒐᓚᓐᓄᑦ ᓂᕈᐊᕐᑕᐅᓯᒻᒥᓱᓂ ᐊᖓᔪᕐᖄᑉ ᑐᖓᓕᖓᓄᑦ. ᑎᒃᑯᐊᑕᐅᖃᑦᑕᓯᒪᔪᖅ ᐊᑦᔨᒌᖕᖏᑐᓄᑦ ᑲᑎᖕᖓᔨᐅᕕᓐᓄᑦ ᑭᒡᒐᑐᕐᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ, ᓄᐃᑕᐅᑎᓪᓗᒋᒃ ᑲᑎᕕᒃ ᐃᓪᓗᓕᕆᔨᕐᔪᐊᑯᑦ ᐊᒻᒪᓗ ᓄᓇᕕᒻᒥ ᐅᔭᕋᓐᓂᐊᓂᕐᒥᒃ ᑮᓇᐅᔭᖃᕐᑎᓯᔩᑦ ᑎᒥᐅᔪᖁᑎᖓ. ᓂᕈᐊᕐᑕᐅᓯᒪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐊᖓᔪᖄᖓᓄᑦ ᓅᕕᒻᐱᕆ 2006-ᒥ 2015 ᑎᑭᑦᓱᒍ. ᓯᕗᓪᓕᐸᐅᑦᓱᓂ ᐊᕐᓇᐅᓱᓂ ᓯᕗᓕᕐᑎᐅᓯᒪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ.

ᒫᑭ ᓯᕗᓕᕐᑎᐅᓯᒪᔪᖅ 1999-ᒥ ᓯᑑᔪᐊᓗᖃᕐᑎᓗᒍ ᐃᓅᒍᓐᓀᑐᖃᓚᕿᑦᓱᓂ ᖁᓕᐅᖕᖏᒐᕐᑐᓂᒃ. 2003-ᖑᑎᓪᓗᒍ ᒫᑭ ᓴᕝᕕᒥᐅᑕᕐᑖᓯᒪᔪᖅ ᑲᓇᑕᒥ ᐊᑕᓂᐊᓘᑉ ᑭᒡᒐᑐᕐᑎᖓᓄᑦ ᑐᓂᔭᐅᑦᓱᓂ. ᑖᓐᓇ ᓴᕝᕕᒥᐅᑕᖅ ᑐᓂᔭᐅᓲᖅ ᑲᓇᑕᒥᐅᓄᑦ ᐃᓕᑕᕐᓯᒍᑎᐅᑦᓱᓂ ᐊᑯᓓᑦᑐᒥᒃ ᐱᒍᓐᓇᓯᓯᒪᔪᓄᑦ ᐱᒍᑦᔨᓂᖃᓪᓚᕆᑦᓯᒪᔪᓄᓪᓗ ᐃᖃᑎᒥᓂᑦ ᓄᓇᓕᒻᒥᓂ, ᐅᕝᕙᓘᓐᓃᑦ ᑲᓇᑕᒧᑦ.

ᒫᑭ ᓯᕗᓕᖃᑎᐅᓯᒪᔪᖅ ᒪᑭᕝᕕᒧᑦ ᐊᓯᖏᓐᓄᓗ ᓄᓇᕕᒻᒥ ᓯᕗᓕᕐᑎᐅᒥᔪᓄᑦ ᐸᕐᓇᓯᒪᐅᑎᓕᕆᓂᐅᑉ ᐱᓇᓱᐊᕐᑕᐅᓂᖓᓂᑦ ᖃᐅᔨᒋᐊᕐᕕᖃᕐᓂᒧᑦ ᓄᓇᓕᓕᒫᓂᑦ ᖁᓕᓪᓗ ᓯᑕᒪᓂᑦ, ᓯᓵᓯᐱᐅᑉ ᓄᓇᓕᖓ, ᑳᒍᐊᒍᐊᑦᓯᑲᒫᑉ ᓄᓇᓕᖓ ᐊᒻᒪᓗ ᑲᑎᓯᓯᒪᑦᓱᓂ ᐅᓪᓗᐃᓇᕐᒧᑦ ᐊᑕᐅᓯᕐᒧᑦ ᑯᐯᒃ ᑲᕙᒪᖓᑕ ᑐᕐᖃᑌᔨᖏᓐᓂᑦ ᑯᐯᒃ ᓯᑎᒥ. ᐸᕐᓇᓯᒪᐅᑎᓕᕆᓂᕐᒧᑦ ᖃᐅᔨᒋᐊᕐᕕᖃᕐᓂᒧᑦ ᑐᓴᕐᑎᓯᒍᑎᒃ ᓴᕐᕿᑕᐅᓚᐅᔪᖅ 2013-ᖑᑎᓪᓗᒍ.

ᒫᑭ ᑲᑎᑎᑕᐅᓯᒪᔪᖅ ᔮᓐ ᓗᑐᒃᒧᑦ, ᐱᖓᓱᓂᒃ ᑭᑐᕐᖓᓕᒃ, ᓯᑕᒪᐅᔪᕐᑐᓂᓪᓗ ᐃᕐᖑᑕᖃᕐᓱᓂ. ᐱᕕᖃᓕᑐᐊᕋᒥ, ᒫᑭ ᐊᓕᐊᒋᔭᓕᒃ ᒥᕐᓱᓂᕐᒥᒃ, ᓄᓇᒦᓐᓂᒥᒃ, ᐊᑐᐊᕐᓯᓂᕐᒥᒃ, ᐊᐅᓚᓴᕐᓂᒥᒃ ᓄᓂᕙᓐᓂᒥᓪᓗ.