ᐋᑕᒥ ᑎᓖᓪ ᐊᓚᑯ

  • ᐋᑕᒥ ᑎᓖᓪ ᐊᓚᑯ

    ᐊᕙᑎᓕᕆᓂᕐᒥᒃ, ᐆᒪᔪᓕᕆᓂᕐᒥᒃ, ᖃᐅᔨᓴᕐᓂᒥᓪᓗ ᐱᒍᑦᔨᕕᒃ (DEWR)

    1-819-964-2925

    Head Office: Kuujjuaq P.O. Box 179 Kuujjuaq, Quebec J0M 1C0

ᐋᑕᒥ ᑎᓖᓪ-ᐊᓚᑯ ᐃᓅᓕᕐᓯᒪᕗᖅ ᔫᓂ 28, 1981-ᒥ. ᐳᕐᑐᓂᕐᓴᒥᒃ ᐃᓕᓐᓂᐊᕆᕈᑎᑖᓚᐅᕐᓯᒪᕗᖅ 1999-ᒥ ᐃᑯᓯᒃ ᐃᓕᓐᓂᐊᕕᒻᒥ ᐊᖏᕐᕋᒥᓂ ᓴᓪᓗᓂ. ᐋᑕᒥ ᐱᓇᓱᓚᐅᔪᖅ ᓄᓇᒥᐅᓂ ᕃᒃᓚᓐ ᐅᔭᕋᓐᓂᐊᕕᒻᒥ ᐱᓇᓱᕝᕕᖃᕐᓱᓂ ᑮᕕᑦ ᓄᕗᒻᒥᐅᑯᓐᓂᒃ, ᐊᕐᕌᒍᓯ ᓯᑕᒪᐅᔪᖕᖏᒐᕐᑐᓂ ᐱᓇᓱᑦᑐᓕᕆᕕᒻᒥ ᐊᑕᐅᑦᓯᑯᕐᑎᓯᔨᐅᑦᓱᓂ, ᑭᖑᓂᐊᒍᑦ ᐱᓇᓱᓯᓚᐅᔪᒻᒥᔪᖅ ᐃᓘᓐᓈᓄᑦ ᐊᖓᔪᕐᖃᐅᕕᖃᕐᓱᓂ ᐃᑎᕐᓴᒥ ᐅᔭᕋᓐᓂᐊᑐᓂ ᑕᒪᓐᓇ ᐱᓇᓱᓚᐅᔪᔭᖓ ᐊᕐᕌᒍᓂ ᐱᖓᓱᓂ. ᒪᑭᕝᕕᒧᑦ ᐱᓇᓱᑦᑎᐅᓚᐅᕋᓂ, ᐋᑕᒥ ᖃᒥᑎᕆᔨᓄᑦ ᐃᓚᐅᓚᐅᔪᖅ, ᐱᓂᕐᓗᑐᖃᕐᒪᓗ ᐋᓐᓂᑐᖃᕐᒪᓘᓐᓃᓗ ᑲᒪᖃᑕᐅᕙᒻᒥᓱᓂ ᓄᓇᓕᒻᒥᓂ.

ᐋᑕᒥ ᒪᑭᕝᕕᒧᑦ ᐃᓚᐅᓯᓚᐅᔪᕗᖅ ᐅᐱᕐᖓᓴᖓᓂ 2011 ᐳᕐᑐᓂᕐᓴᒥ ᐃᑲᔪᕐᑎᐅᓯᑦᓱᓂ ᑌᑦᓱᒪᓂ ᐊᖓᔪᕐᖄᑉ ᑐᖓᓕᕆᓚᐅᔪᔭᖓᓄᑦ ᔮᓂ ᐱᑕᒧᑦ. ᑕᒡᒐᓂ ᐱᓇᓱᑦᓱᓂ, ᑐᑭᓯᒪᔭᕐᑖᓯᐊᓯᓚᐅᔪᕗᖅ ᓂᕐᔪᑎᓕᕆᓂᑎᒍᑦ ᖃᓄᐃᓕᖓᒍᑕᐅᔪᓂᒃ ᐊᒥᓱᐃᓂᓪᓗ ᓵᖕᖓᓯᒍᑎᐅᒋᐊᓕᓐᓂᒃ ᐃᓕᖓᑦᓱᑎᒃ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᓄᑦ ᐱᑦᔪᔨᕕᒻᒧᑦ ᐱᓇᓱᑦᑕᐅᒋᐊᖃᕐᐸᓱᑎᒃ ᐃᓄᑐᐃᓐᓇᖏᓐᓄᑦ ᓄᓇᕕᐅᑉ. ᑕᑯᑦᓴᐅᓂᖃᑦᓯᐊᐳᓪᓗ ᐃᓗᖏᕐᑐᓱᓂ ᓄᓇᕕᒻᒥᐅᓂᒃ ᑐᓴᐅᒪᔭᐅᑎᑦᓯᓯᐊᕋᓱᖏᓐᓇᓲᖑᓂᖓᓗ ᑭᒡᒐᑐᕐᑕᖃᑦᓯᐊᕋᓱᖏᓐᓇᓂᖓᓗ ᓄᓇᓕᓕᒫᓂ, ᑲᓇᑕᓕᒫᒥ ᐊᒻᒪᓗ ᓯᓚᕐᔪᐊᓕᒫᒥ ᐅᑯᑎᒎᓇ ᐱᓇᓱᑦᑕᖏᑦ ᐃᓚᖃᕐᑎᓗᒋᑦ ᐅᑭᐅᕐᑕᑐᒥᐅᑦ ᓄᓇᖁᑎᖏᓐᓂ, ᓇᓄᓕᕆᓂᕐᓂ, ᓂᕐᔪᑎᓂᒃ ᓄᖑᐃᓐᓇᑎᑦᓯᑌᓕᓂᕐᒥᒃ ᐱᓇᓱᕝᕕᒥ ᐊᒻᒪᓗ ᐊᒥᓱᐃᓂ ᑲᑎᖕᖓᓂᕐᔪᐊᓂ ᑲᕙᒪᐅᔪᓂᓪᓗ ᑲᓇᑕᐅᑉ ᓯᓚᑎᖓᓃᑦᑐᓂᒃ ᐊᐅᓚᑦᓯᖃᑕᐅᓇᓱᓐᓂᑯᑦ.

ᒫᓐᓇᓗ ᐃᓚᐅᔫᖃᑕᐅᕗᖅ ᒪᙯᑦᑐᓕᕆᓂᕐᓄᓗ ᐃᖃᓗᓐᓂᐊᑐᓕᕆᓂᕐᓄᓗ ᒥᑭᒋᐊᕐᓂᐊᑐᓕᕆᓂᕐᓄᓗ ᐊᑕᐅᑦᓯᑯᕐᑎᓯᓂᕐᒥᒃ ᑲᑎᖕᖓᔨᓄᑦ ᐃᓚᐅᕕᑐᖃᕆᕙᑦᑕᒥᓄᑦ ᐊᕐᕌᒍᓂ ᓯᑕᒪᐅᔪᕐᑐᓂᒃ ᑲᑎᖕᖓᔨᓄᓪᓗ ᓯᕗᓕᕐᑎᐅᕕᒋᑦᓱᒋᑦ 2013-ᒥᓗ 2017-ᒥᓗ. ᓇᓪᓕᖁᐊᕆᔭᐅᑦᓱᓂ ᑲᑎᖕᖓᔨᓄᑦ-ᓯᕗᓕᕐᑎᐅᖃᑕᐅᒻᒥᔪᖅ ᐅᖓᕙᒥ ᑐᑦᑐᓕᕆᓂᕐᒥᒃ ᑲᑎᖕᖓᔨᐅᕕᓕᓐᓄᑦ.

ᒫᓐᓇᓗᑦᑕᐅᖅ ᑲᑎᖕᖓᔨᐅᖃᑕᐅᒋᕗᖅ ᑕᕐᕋᒥᒃ ᐸᕐᓇᕈᑎᓕᓐᓄᑦ, ᑲᑐᑦᔨᖃᑎᒌᑦᓱᑎᒃ ᑲᒪᒋᔭᖃᕐᑎᐅᓂᕐᒥᒃ ᑲᑎᖕᖓᔨᓄᑦ ᑐᕐᙰᑦ ᖃᕐᖄᓗᖏᑕ ᒥᕐᖑᐃᓯᕐᕕᖓᓂ ᐊᒻᒪᓗ ArcticNet/ᐋᒃᑎᒃᓂᐊᑦᑯᓐᓂ. ᒫᓐᓇᖃᒻᒥᐅᓂᕐᐸᐅᑎᓪᓗᒍ, ᔪᔦ 2017-ᒥ ᐋᑕᒥ ᑎᒃᑯᐊᑕᐅᓂᖃᓚᐅᔪᒋᕗᖅ ᐊᕐᕌᒍᓂ ᓯᑕᒪᓂ ᓂᕈᐊᕐᑕᐅᒪᕕᒋᓂᐊᓕᕐᑕᒥᓄᑦ ᐃᓚᐅᔫᖃᑕᐅᓗᓂ ᓇᓄᕐᓂᒃ ᖃᐅᔨᒪᔮᖃᕐᓂᓄᑦ ᑲᓇᑕᒥ, ᑕᒡᒐᓂ ᐊᑑᑎᓯᒪᔭᒥᓂᒃ ᐃᓕᖓᔪᓂᒃ ᐅᑭᐅᕐᑕᑐᒥ ᖃᐅᔨᓴᕐᓂᓅᓕᖓᔪᓄᑦ ᐃᑲᔪᕐᓯᕕᒋᓚᖓᔭᒥᓂ.

Aᐋᑕᒥ ᓄᓇᓕᒻᒥᓂ ᓴᓪᓗᓂ ᓲᓱᒋᔭᐅᓂᖃᑦᓯᐊᑐᖅ, ᒫᓐᓇᓕ ᑰᒃᔪᐊᒥᐅᖑᔪᖅ ᐱᖃᑎᒥᓂᒃ ᕕᑦᑐᔨᐊᒥ ᐁᑉᐸᖃᕐᓱᓂ ᕿᑐᕐᖓᖏᓐᓂᓗ ᓓᓇᔅᒥᓪᓗ ᓗᐄᔅᒥᓪᓗ. ᐱᒐᓱᑦᓯᒪᔭᓕᒫᒥᓂ ᐋᑕᒥ ᐱᔪᓐᓇᑕᖃᑦᓯᐊᐳᖅ ᐅᖃᐅᓯᕐᓂᓗ ᐱᖓᓱᓂ ᐅᖄᒍᓐᓇᓯᐊᕐᖁᖅ (ᐃᓄᒃᑎᑐᑦ, ᒍᐃᒍᐃᑎᑐᑦ ᖃᓪᓗᓈᑎᑐᓪᓗ), ᑐᓴᕐᓂᔮᕐᑎᓯᒍᑎᓂᓪᓗ ᐱᖕᖑᐊᕈᓐᓇᓯᐊᕐᓱᓂ.

ᓂᕈᐊᕐᑕᐅᒪᕕᒻᒥᓂ ᒪᑭᕝᕕᒥ, ᐋᑕᒥ ᐃᓗᖏᕐᑑᑎᖃᑦᓯᐊᐳᖅ ᓱᕐᖁᐃᑐᒥᒃ ᑭᒡᒐᑐᕐᑕᐅᓂᖃᑦᓯᐊᖁᑦᓱᒋᑦ ᓄᓇᕕᒻᒥᐅᑦ ᐃᓕᖓᔪᓂᒃ ᐃᓗᕐᖁᓯᕐᒥᓄᑦ ᓄᓇᒧᓪᓗ ᓄᓇᕕᐅᓪᓗ ᐱᑦᓴᖑᕆᐊᓪᓚᒍᓐᓇᑐᓂᒃ ᐱᑦᓴᑖᕐᕕᓴᖁᑎᖏᓐᓂᒃ. ᐋᑕᒥ ᑐᑭᒧᐊᑦᑎᓯᔨᐅᖃᑦᑕᓯᒪᕗᖅ ᐅᑯᓇᓂ: ᐃᓄᐃᑦ, ᕘᔅ ᐃᐊ, ᓄᓇᕕᒻᒥ ᐱᓕᐊᕕᓃᑦ, ᖃᓪᓗᑎᒃ ᐱᓇᓱᒐᑦᓴᓕᕆᕕᒻᒥ, ᓄᓇᕕᒻᒥ ᓄᓇᖕᖑᐊᓕᕆᕕᒻᒥ, ᓄᓇᓯᐊᓪᑯᓐᓂ ᐊᒻᒪᓗ ᑲᐅᑕᖅ ᓴᓇᔨᓂ.