ᐃᓘᓐᓈᒎᕐᑐᒥᒃ ᑐᑭᓯᒪᐅᑎᑦᓴᖅ ᒪᑭᕝᕕᐅᑉ ᐱᒍᑦᔨᐅᑎᖓᓄᑦ ᑖᒃᓯᓕᕆᔨᖃᕐᑎᓯᒍᑎᖓᓄᑦ ᐃᓕᖓᔪᒥᒃ

ᑐᕌᕐᓂᖏᑦ

ᒪᑭᕝᕕᐅᑉ ᑖᒃᓯᓕᕆᔨᖃᕐᑎᓯᓂᖓᓄᑦ ᐱᒍᑦᔨᐅᑎᖓ ᐊᐅᓚᑕᐅᔪᖅ ᑮᓇᐅᔭᓕᕆᔨᒻᒪᕆᐅᑉ ᐊᓪᓚᕕᖓᑕ ᐊᑖᓂ.

ᓄᐃᑕᐅᓚᕐᓯᒪᒻᒪᓂᑦ 1993-ᖑᑎᓪᓗᒍ, ᒪᑭᕝᕕᐅᑉ ᑖᒃᓯᓕᕆᔨᖃᕐᑎᓯᓂᖓᓄᑦ ᐱᒍᑦᔨᐅᑎᒃ ᐊᑕᐅᓯᕐᒥᒃ ᑐᕌᕐᓂᖃᖏᓐᓇᓕᒫᕐᑐᖅ ᑌᒪᖕᖓᓂᑦ: ᐃᑲᔪᕐᓯᔨᐅᓂᕐᒥᒃ ᐃᓚᐅᔫᒍᑎᓕᓐᓂᑦ ᑖᒃᓰᔭᕐᑕᐅᒍᑎᖏᑦᑕ ᓯᑯᑦᓴᔭᖏᓐᓂᑦ.

ᐊᕐᕌᒍᑕᒫᑦ ᑖᒃᓰᔭᕐᑕᐅᒍᑏᑦ ᐱᓇᓱᐊᕐᑕᐅᓂᖏᑎᒍᑦ, ᐃᓚᐅᔫᒍᑎᓖᑦ ᐃᑲᔪᕐᓯᒪᔭᐅᓲᑦ ᐊᑕᐅᓯᐅᖕᖏᑐᑎᒍᑦ. ᒪᑭᕝᕕᐅᑉ ᑖᒃᓯᓕᕆᔨᖃᕐᑎᓯᓂᖓᓄᑦ ᐱᒍᑦᔨᐅᑎᒃ ᐃᑲᔪᕐᓯᓚᕆᓲᖅ ᐃᓚᐅᔫᒍᑎᓖᑦ ᐅᑎᕐᕕᐅᓐᓇᑎᑦᓱᒋᑦ ᑮᓇᐅᔭᓄᑦ ᓲᕐᓗ ᐅᑭᐅᕐᑕᑐᒥᐅᖑᓂᕐᒧᑦ ᐅᑎᕐᕕᐅᒍᑏᑦ, ᑐᕌᖓᓗᐊᖕᖑᐊᑐᖅ ᓇᐅᓕᒫᓄᑦ ᐅᖓᓯᑦᑐᒥᐅᓄᑦ. ᐃᒻᒥᒎᓈᕐᑎᑐᑦ ᐃᓄᐃᑦ ᖃᓄᐃᑦᑐᒦᓐᓂᖏᑦ ᒪᓕᑦᓱᒍ, ᑮᓇᐅᔦᑦ ᐅᓄᕐᓂᖃᕈᓐᓇᓲᑦ $8,000-ᓂᑦ ᐊᕐᕌᒍᑕᒫᑦ ᑖᒃᓰᔭᕐᑕᐅᓕᕈᑎᒃ. ᐱᒻᒪᕆᐅᒍᑎᖓᑕ ᐃᓚᖓ ᑖᒃᓰᔭᕐᑕᐅᖃᑦᑕᕆᐊᖃᕐᓂᒧᑦ ᒪᑯᐊ, ᑮᓇᐅᑦᔭᓴᓪᓗᐊᖏᑦᑐᓄᑦ ᑖᒃᓰᔭᕐᑕᐅᓂᕐᒧᑦ ᐅᑎᕐᕕᐅᑏᑦ, GST, ᐊᒻᒪᓗ ᕿᑐᕐᖏᐅᒍᑏᑦ. ᐅᓇ ᓀᓪᓕᑎᕐᓯᒪᔪᖅ ᑐᑭᓯᓇᕐᑎᓯᒍᑎᒃ ᓱᓀᑦ ᐊᕝᕕᐊᓗᑕᐅᒍᓐᓇᒪᖔᑕ, ᑲᔪᓯᑎᑦᓯᓯᐊᕈᑎᐅᒍᓐᓇᒪᖔᑕ ᐊᒻᒪᓗ ᓯᕗᓂᕐᒥ ᑐᕌᕐᓂᓕᐊᖑᓂᐊᕐᑐᐃᑦ ᒪᑭᕝᕕᐅᑉ ᐱᒍᑦᔨᐅᑎᖓᓅᓕᖓᔪᒧᑦ ᑖᒃᓯᓕᕆᔨᖃᕐᑎᓯᓂᕐᒧᑦ.

ᐃᓱᐃᓗᑌᑦ

ᖃᐅᔨᒪᓂᖅ

ᑖᒃᓯᓕᕆᓂᖅ ᓇᐅᓕᒫᓄᑦ ᑐᑭᓯᒪᔭᐅᓪᓗᐊᖏᑦᑐᖅ, ᐊᑦᔨᒌᖕᖏᑐᐃᑦ ᒪᓕᒉᑦ ᑐᑭᓯᒪᔭᐅᒋᐊᖃᕐᓂᖏᓐᓄᑦ ᓯᑯᑦᓴᔭᓕᕆᒍᑎᐅᒋᐊᓕᑦ ᑖᒃᓰᔦᓂᕐᒨᓕᖓᔪᖅ. ᒪᑭᕝᕕᒃ ᐅᐱᒍᓲᑎᓕᒃ ᐱᒍᑦᔨᒍᓐᓇᕆᐊᒥᓂᒃ ᑖᒃᓯᓕᕆᔨᓂᒃ ᐃᓕᓐᓂᐊᑎᑦᓯᔨᐅᓂᕐᒧᑦ ᐱᓇᓱᑦᑎᑖᕐᓂᒧᓪᓗ ᐃᓚᐅᔫᒍᑎᓕᓐᓂᒃ ᓄᓇᓕᓕᒫᓂᑦ ᐱᓯᒪᔪᓂᒃ. ᐱᔭᕆᐊᑐᔫᒐᓗᐊᕐᑎᓗᒍ ᐃᓕᓐᓂᐊᑎᑦᓯᓂᖅ ᐃᓗᓕᕆᑦᑑᓱᓂ ᑐᑭᓯᒪᔭᐅᒋᐊᓕᓐᓂᒃ ᐃᓚᖓᓂᓪᓗ ᑖᒃᓯᓕᕆᔨᖕᖑᒋᐅᕐᑐᓂᒃ, ᒪᑭᕝᕕᒃ ᑮᓇᐅᔭᖃᕐᑎᓯᓲᖅ ᑕᒡᒎᓇ $600,000 ᐅᖓᑖᓃᑦᑐᓂᒃ ᐊᕐᕌᒍᑕᒫᑦ ᐱᓇᓱᑦᑎᑖᖑᔪᑦ ᐃᓕᓐᓂᐊᑎᑕᐅᒍᑎᑦᓴᖏᓐᓄᑦ, ᐱᓇᓲᑎᑦᓴᖏᓐᓄᑦ ᓴᐳᒻᒥᔭᐅᒍᑎᑦᓴᖏᓐᓄᓗ ᐱᕕᖃᕐᑎᓯᒍᑎᒋᓂᐊᕐᑕᖏᓐᓄᑦ ᐱᐅᓂᕐᐹᒥᒃ ᐱᒍᑦᔨᓂᕐᒥᒃ.

ᐅᖓᓯᓕᕇᑦᑐᓂᒃ ᐱᒍᑦᔨᓂᖅ

ᐊᓯᖏᑦ ᑖᒃᓯᓕᕆᔩᑦ ᐱᑕᖃᕋᓗᐊᕐᑎᓗᒋᑦ, ᒪᑭᕝᕕᐅᑉ ᐱᒍᑦᔨᐅᑎᖓ ᑖᒃᓯᓕᕆᔨᖃᕐᓂᒧᑦ ᐊᕝᕕᐊᓗᑕᓄᑦ ᐊᕙᓗᔭᐅᒪᓲᖑᒻᒥᔪᖅ ᐅᖓᓯᓕᕇᑦᑐᓂᒃ ᐱᒍᑦᔨᒋᐊᖃᕋᒥ ᐃᓚᐅᔫᒍᑎᓕᓐᓂᑦ. ᐃᓚᐅᔫᒍᑎᓖᑦ ᐅᖓᓯᓕᕇᑦᑐᓃᒻᒪᑕ ᓄᓇᓕᓐᓂ 14-ᓂᑦ ᓄᓇᕕᒻᒥ, ᐱᓇᓱᐊᕈᑎᐅᒋᐊᓖᑦ ᑖᒃᓰᔦᒍᑎᓄᑦ ᐊᕝᕕᐊᓗᑕᖃᓲᖑᒻᒥᔪᑦ. ᑖᒃᓯᓕᕆᕖᑦ ᐱᖓᓲᒻᒪᑕ ᒪᓐᑐᔨᐊᒥ, ᐃᓄᒃᔪᐊᒥ, ᐳᕕᕐᓂᑐᒥᓪᓗ ᐱᒍᑦᔨᒍᓐᓇᓯᐊᕐᑐᑦ ᐃᓚᐅᔫᒍᑎᓕᓐᓂᑦ ᐃᓚᖏᑎᒍᑦ ᐱᑐᑦᓯᒪᐅᑎᒧᑦ ᐱᑐᑦᓯᒪᖕᖏᑐᓂᑦ.

ᖃᓄᓪᓗᐊᑎᒋᒃ ᓯᕕᑐᓂᖓ

ᐊᒥᓱᑦ ᐱᓇᓱᐊᕋᑦᓴᓕᐊᖑᒪᔪᑦ ᓴᓂᐊᓂ, ᒪᑭᕝᕕᐅᑉ ᐱᒍᑦᔨᐅᑎᖓ ᑖᒃᓯᓕᕆᔨᖃᕐᑎᓯᓂᕐᒧᑦ, ᐅᓪᓗᓕᐅᕐᑕᐅᒪᓲᑦ ᐁᕆᓕ 30-ᐅᓕᕐᐸᑦ ᑕᑕᕐᓴᑕᐅᒪᒋᐊᖃᕐᓂᖏᑦ ᑖᒃᓰᓄᑦ ᓯᑯᑦᓴᔦᑦ ᐃᓘᓐᓇᑲᓵᖏᓐᓄᑦ ᐃᓚᐅᔫᒍᑎᓕᓐᓄᑦ (ᔫᓂ 15-ᖑᓕᕐᐸᑦ ᓇᒻᒥᓂᖅ ᐱᓇᓱᐊᕐᕕᓕᓐᓄᑦ) ᑭᖑᕙᕐᑐᐃᓗ ᓯᑎᔪᑲᓪᓚᓂᒃ ᓱᕐᕋᑕᐅᒍᑎᖃᕈᓐᓇᓱᑎᒃ ᓈᒻᒪᖏᑦᑐᒥᒃ. ᑎᒥᐅᔪᓕᒫᑦ ᓴᕐᕿᑎᑦᓯᒋᐊᖃᓲᑦ ᑖᒃᓯᓅᓕᖓᔪᓂᒃ ᐊᓪᓚᖁᑎᓂᒃ ᐱᓇᓱᑦᑎᒥᓄᑦ ᕕᕗᐊᕆ 28-ᒥ, ᑌᒣᒻᒪᑦ ᑕᒪᓐᓇ ᐱᕕᑭᑦᑑᑎᑦᓯᒍᓐᓇᑐᖅ ᑕᕐᖀᓄᑦ ᒪᕐᕉᓄᑦ ᑖᒃᓰᑦ ᑕᑕᕐᓴᒐᖏᓐᓂᑦ ᑕᑕᕐᓭᒋᐊᖃᕐᒪᑕ ᐃᓚᐅᔫᒍᑎᓖᑦ. ᐃᓚᖓ ᐊᕝᕕᐊᓗᑕᐅᓲᖅ, ᑖᒃᓯᓕᕆᔨᕗᑦ ᒪᑭᕝᕕᒥ ᓱᓇᒥᑦᑐᓂᒃ ᓯᑯᑦᓴᔭᓂᒃ ᑐᓂᔭᐅᓯᒪᓲᖑᖕᖏᓂᖏᑦ ᓯᑯᑦᓴᔭᓕᒫᑦ ᑕᑕᕐᓴᑕᐅᒻᒣᑑᓚᕿᓱᑦ. ᖃᐅᔨᒪᒐᑦᑕ ᐱᕕᑭᑦᑑᓂᖓ ᐱᑦᔪᑎᒋᑦᓱᒍ ᑕᑕᕐᓴᑕᐅᒪᒋᐊᖃᕐᓂᖏᓐᓄᑦ ᐅᓪᓗᖓ ᐃᓱᓕᕝᕕᒃ ᒪᓕᓪᓗᒍ, ᒪᑭᕝᕕᐅᑉ ᑖᒃᓯᓕᕆᔨᖏᑦ ᐱᓇᓱᐊᕆᐊᓕᒻᒥᓂᒃ ᑲᔪᓯᑎᑦᓯᒍᓐᓇᓯᐊᓲᑦ ᐁᕆᓕ 30 ᑎᑭᓚᐅᕐᑎᓇᒍ.

ᖃᓄᓪᓗᐊᑎᒋᒃ ᐊᒥᓲᓂᖏᑦ ᐱᒍᑦᔭᐅᓲᑦ

ᐱᒍᑦᔨᐅᑎᐅᑉ ᐱᔭᕆᐊᑐᔫᓂᕐᐹᖑᒍᑎᖓ, ᒪᑭᕝᕕᐅᑉ ᑖᒃᓯᓕᕆᕕᖓ ᐊᖏᓂᕐᐸᐅᕗᖅ ᑲᓇᑕᒥ ᑖᒃᓯᓕᕆᔨᓂᑦ. ᐊᕐᕌᒍᑕᒫᑦ, 6,000 ᐅᖓᑖᓃᑦᑐᓂᒃ ᑕᑕᕐᓭᓲᖑᒐᒥ ᑖᒃᓯᓕᕆᐅᑎᓂᑦ. ᑲᔪᓯᑦᓯᐊᕈᓐᓇᓲᖑᕗᖅ ᐱᓪᓗᑯᒋᐊᓕᑎᒍᑦ ᐸᕐᓇᑕᐅᒪᑦᓯᐊᒪᑦ ᑲᔪᓯᑦᓯᐊᑐᒥᓪᓗ ᐱᓇᓱᐊᕐᕕᐅᓱᓂ ᐱᒍᑦᔨᓂᒃᑯᑦ ᐃᓚᐅᔫᒍᑎᓕᓐᓂᑦ ᐃᑉᐱᒋᑦᓯᐊᖏᓐᓇᓱᒋᓪᓗ ᓯᑯᑦᓴᔦᑦ ᐱᓇᓱᐊᕐᑕᐅᒋᐊᓕᑦ. ᑖᓐᓇ ᐱᒍᑦᔨᐅᑎᒃ ᐅᐱᒍᓲᑎᓕᒃ ᐱᒍᑦᔨᓯᐊᕐᓂᒥᓂᒃ 6,000 ᐅᖓᑖᓃᑦᑐᓂᒃ ᐱᒍᑦᔨᕙᑦᑕᒥᓂᒃ.

ᐱᒍᓐᓇᓯᔭᐅᓯᒪᔪᑦ

ᐱᒋᐊᓕᕐᓂᒪᓂᑦ, ᐱᒍᑦᔨᓂᖅ ᐊᑕᐅᓯᐅᖕᖏᑐᓂᒃ ᐊᑦᔨᒌᖕᖏᑐᓂᓪᓗ ᐱᒍᓐᓇᓯᒍᑎᐅᓯᒪᓕᕐᑐᖅ ᐊᑑᑎᔭᐅᓚᐅᕐᓯᒪᖕᖏᑐᓂᒃ. ᐱᒍᓐᓇᓯᔭᐅᒍᑎᐅᓯᒪᓂᕐᐹᖑᔪᑦ ᐃᓚᐅᔫᒍᑎᓖᑦ ᑮᓇᐅᔭᓄᑦ ᐅᑎᕐᕕᐅᖃᑦᑕᓂᖏᑦ ᐊᒻᒪᓗ ᐱᓇᓱᑦᑏᑦ ᑖᒃᓰᔭᕐᑐᓕᕆᔩᑦ ᖃᐅᔨᒪᐅᓯᕐᑖᓯᒪᓂᖏᑦ ᐱᓇᓱᒐᕐᒥᓂᑦ.

ᐊᑌᓐᓇᑐᒥᒃ ᐊᔪᐃᓐᓇᐅᔭᐅᓂᖓᒍᑦ, ᐱᒍᑦᔨᕕᒃ ᑐᓴᐅᒪᑎᑦᓯᔨᐅᓲᖅ ᖃᐅᔨᒪᔭᐅᒋᐊᓕᓐᓂᒃ ᓱᓀᑦ ᐱᕙᓪᓕᖁᑕᐅᒍᓐᓇᒪᖔᑕ ᑮᓇᐅᔭᓄᑦ ᐅᑎᕐᕕᐅᒍᑎᐅᒍᓐᓇᑐᑦ ᑕᒣᓐᓄᑦ ᑲᕙᒪᐅᔫᓐᓄᑦ ᑲᔪᖏᕐᓴᖏᓐᓇᓱᒋᓪᓗ ᐃᓚᐅᔫᒍᑎᓖᑦ ᑖᒃᓰᔭᕐᑕᐅᒍᑎᒋᒋᐊᓕᒻᒥᓂᒃ ᑕᑕᕐᓴᖁᑦᓱᒋᑦ. ᐊᕐᕌᒎᖃᑦᑕᓯᒪᓕᕐᑐᓂ, ᐃᓚᐅᔫᒍᑎᓖᑦ ᓄᓇᕕᒻᒥᐅᑦ ᐅᑎᕐᕕᐅᒍᑎᖏᑦ ᑮᓇᐅᔦᑦ ᐅᓄᕐᓂᖏᑦ ᒥᓕᐊᓐᑖᓓᑦ ᐅᖓᑖᓂᓯᒪᓕᕐᑐᑦ.

ᐊᕐᕌᒎᓚᐅᕐᑐᒥ, ᒪᑭᕝᕕᒃ ᐱᓇᓱᐊᖃᑎᖃᓪᓚᕆᑦᓯᒪᔪᖅ ᑲᕙᒪᑐᖃᒃᑯᓂᑦ ᑯᐯᓪᓗ ᑲᕙᒪᖓᓂᑦ. ᑯᐯᒃ ᑲᕙᒪᖓᑕ ᑖᒃᓯᓕᕆᕕᖓ ᐃᓚᐅᕕᖃᓚᐅᔪᖅ 2018 ᐊᕐᕌᒍᖓᑕ ᑖᒃᓯᓕᕆᕕᖓᓂᑦ ᐃᓕᓐᓂᐊᑎᑦᓯᖃᑎᐅᓂᒃᑯᑦ ᐱᓇᓱᑦᑎᓂᒃ ᓴᐳᒻᒥᒋᐊᓪᓛᓂᒃᑯᓗ. ᒫᓐᓇᐅᔪᖅ, ᑯᐯᒃ ᑲᕙᒪᖓᑕ ᑖᒃᓯᓕᕆᕕᖓ ᐱᓇᓱᐊᕐᑐᖅ ᐋᕐᕿᕈᑎᑦᓴᓯᐅᕐᓱᓂ ᐃᑲᔪᕐᓯᒍᑎᐅᓂᐊᕐᑐᓂᒃ ᓄᓇᕕᒻᒥᐅᓂᒃ ᐅᑎᕐᕕᐅᒍᑎᑦᓴᖏᓐᓄᑦ ᑮᓇᐅᔭᓂᑦ.

ᐱᒍᓐᓇᓯᓯᒪᓃᑦ ᑮᓇᐅᔭᑎᒍᑐᐃᓐᓇᐅᖏᓪᓚᖅ ᑭᓯᐊᓂᓕ, ᐱᓇᓱᑦᑏᑦ ᑖᒃᓯᓕᕆᔩᑦ ᒪᑭᕝᕕᐅᑉ ᐱᒍᑦᔨᐅᑎᖓᓂᑦ ᐱᓇᓱᑦᑐᑦ ᐃᓕᓐᓂᐊᑎᑕᐅᓂᖃᓲᑦ ᐱᔪᓐᓇᓯᕙᓪᓕᐊᑎᑕᐅᑦᓱᑎᒃ ᖃᐅᔨᒪᐅᓯᕐᑖᓂᒃᑯᑦ ᑖᒃᓯᓕᕆᓂᕐᒥᒃ. ᐊᒻᒪᓗᒋᐊᓪᓚᖅ, ᐃᓕᓐᓂᐊᑎᑦᓯᒍᓐᓇᓯᖃᑦᑕᓂᐊᕐᒪᑕ ᓄᓇᕐᖃᑎᒥᓂᑦ ᑖᒃᓯᓕᕆᓂᕐᒥᒃ ᐱᕙᓪᓕᖁᑎᑖᕆᒍᓐᓇᑕᓕᒫᖏᓐᓂᓗ ᑐᑭᓯᒪᒍᓐᓇᓯᓂᐊᕐᒪᑕ.

ᓯᕗᓂᕐᒥᒃ ᑐᕌᕐᓂᓕᐊᖑᔪᑦ

ᒪᑭᕝᕕᐅᑉ ᑖᒃᓯᓕᕆᔨᖃᕐᑎᓯᓂᖓᓄᑦ ᐱᒍᑦᔨᐅᑎᒃ ᕿᒥᕐᕈᖏᓐᓇᖃᑦᑕᓂᐊᕐᑐᖅ ᓇᓪᓕᐊᒍᑦ ᐱᐅᓯᐅᒥᑎᑕᐅᒍᓐᓇᒪᖔᑦ ᐃᓚᐅᔫᒍᑎᓕᓐᓄᑦ ᑖᓐᓇ ᐱᒍᑦᔨᐅᑎᒃ. ᖃᓄᕐᑑᕈᑎᐅᔪᖅ ᓇᓪᓕᐊᒍᑦ ᐃᓱᐃᓗᑕᖃᖕᖏᓂᕐᓴᐅᒐᔭᕐᒪᖔᑦ. ᐱᓇᓱᐊᕈᑎᐅᑦᓱᓂᓗ ᑐᓴᐅᒪᑎᑦᓯᒍᑎᑦᓴᓅᓕᖓᔪᑦ ᖃᓄᓪᓗᐊᑎᒋᒃ ᑕᒪᓐᓇ ᐱᒻᒪᕆᐅᓂᖃᕐᒪᖔᑦ.

ᐃᓱᓕᒍᑎᒃ

ᐃᓱᓕᒋᐊᕈᑎᒋᓗᒍ, ᒪᑭᕝᕕᐅᑉ ᑖᒃᓯᓕᕆᔨᖃᕐᑎᓯᓂᖓᓄᑦ ᐱᒍᑦᔨᐅᑎᒃ ᐊᑑᑎᖃᕐᓱᓂ ᐱᒍᑦᔨᐅᑎᐅᕗᖅ ᓄᓇᕕᒻᒥᐅᓄᑦ. ᐱᒍᑦᔨᐅᑎᒃ ᐊᔪᐃᓐᓇᐅᔨᒍᑎᖃᖏᓐᓇᓂᐊᕐᑐᖅ ᐃᓚᐅᔫᒍᑎᓖᑦ ᐱᕙᓪᓕᓇᕐᓂᐹᒥᒃ ᐱᒍᑦᔭᐅᓯᐊᖁᓪᓗᒋᑦ. ᒪᕐᕉᓂᒃ ᖃᐅᑕᒫᕐᓯᐅᑏᓐᓂᒃ ᐱᓇᓱᑦᑎᓕᒃ, ᒥᐊᔨ ᐃᓄᒃᐸᒃ ᐃᓄᒃᔪᐊᒥ ᐊᒻᒪᓗ ᓖᓴ ᐅᙯᑦᑐᖅ ᐳᕕᕐᓂᑐᒥ ᐊᑐᐃᓐᓇᐅᖏᓐᓇᓕᒫᕐᑑᒃ ᐊᕐᕌᒎᑉ ᐃᓗᐊᓂ ᐊᐱᕐᓲᑎᑦᓴᖃᕈᑦᓯ ᑖᒃᓯᓕᕆᓂᐅᑉ ᒥᑦᓵᓄᑦ.

 

ᖃᐅᔨᒋᐊᕐᕕᐅᒍᓐᓇᕕᖏᑦ

ᓖᓴ ᐅᙯᑦᑐᖅ

ᑖᒃᓰᔭᕐᑐᓕᕆᓂᕐᒥᒃ ᐱᒍᑦᔨᔨ

ᒪᑭᕝᕕᒃ

ᐳᕕᕐᓂᑐᖅ

J0M 1P0

ᐅᖄᓚᐅᑎᒃ: (819) 988-2736

ᐅᖄᓚᐅᑎᒃ ᐊᑭᖃᖕᖏᑐᖅ: 1-866-988-2736

ᓱᑲᑦᑐᑰᕈᑎᒃ: 819-988-2157

 

ᒥᐊᔨ ᐃᓄᒃᐸᒃ

ᑖᒃᓰᔭᕐᑐᓕᕆᓂᕐᒥᒃ ᐱᒍᑦᔨᔨ

ᒪᑭᕝᕕᒃ

ᐃᓄᒃᔪᐊᒃ

J0M 1M0

ᐅᖄᓚᐅᑎᒃ: (819) 254-8021

ᐅᖄᓚᐅᑎᒃ ᐊᑭᖃᖕᖏᑐᖅ: 1-888-254-8021

ᓱᑲᑦᑐᑰᕈᑎᒃ: 819-254-8341