ᐊᑦᔨᖑᐊᓕᒫᑦ ᐊᑦᔨᓕᐊᕕᓃᑦ ᑳᓴᓐ ᑕᒍᓐᓈᒧᑦ

ᓄᓇᕕᒻᒥ ᑮᓇᐅᔭᓕᐅᕋᓱᐊᕐᑏᑦ ᐊᒻᒪᓗ ᐱᐅᓯᑐᖃᕐᒥᓂᒃ ᑕᑯᑦᓴᐅᑎᑦᓯᓂᖃᓕᓚᐅᔪᒋᕗᑦ ᑕᕝᕙᓂ ᐊᕐᕌᒍᒥ ᐅᑭᐅᕐᑕᑐᒥᐅᑦ ᐊᑦᓴᓃᑦ ᓚᔭᐅᓲᖅ ᑲᑎᒪᒍᑕᐅᑎᓪᓗᒍ ᐋᑐᒍᐊᒥ.

ᐊᕗᑦᓂᑎᐅᑉ ᑕᕐᕿᖓᓂ ᕕᐳᐊᕆ 5-ᒥᑦ 8-ᒧᑦ, ᓴᐅᓴᓃᑦᑐᐃᑦ ᑭᒡᒐᑐᕐᑏᑦ ᐳᓛᕆᐊᕐᓯᒪᔪᐃᓪᓗ ᑲᑎᓚᐅᔪᑦ ᓵ  ᑲᑎᑦᑕᕕᒻᒥ  Shaw  Centre-ᒍᓂᕋᕐᑕᐅᔪᒥ  ᐋᑐᒍᐊᒥ, ᓴᓇᓂᒃᑯᑦ ᐱᖁᑎᓕᐅᕐᓂᒨᓕᖓᔪᓂᒃ ᑲᑎᒪᓂᐊᕈᓯᖃᕐᑎᑕᐅᖃᑦᑕᓚᐅᔪᑦ, ᐅᖄᖃᑎᒌᖃᑦᑕᓱᑎᓪᓗ ᐊᒻᒪᓗ ᐱᐅᓯᑐᖃᕐᓅᓕᖓᔪᓂᒃ ᓱᓇᓱᐊᕐᑎᑕᐅᖃᑦᑕᓚ- ᐅᔪᒻᒥᔪᑦ, ᓯᕿᓂᐅᑉ ᓄᐃᕕᐊᓂ ᐅᑭᐅᕐᑕᑐᒥᐅᑦ ᑕᑯᑦᓴᐅᑎᑕᐅᕙᓪᓗᑎᓪᓗᒋᑦ.

ᒪᑭᕝᕕᒃᑯᑦ ᑯᐊᐳᕇᓴᖓ ᑕᑯᑦᓴᐅᑎᑦᓯᕕᖃᓚᐅᔪᖅ ᑕᐅᕐᓯᖃᑦᑕᐅᑎᓂᒃᑯᑦ ᑕᑯᑦᓴᐅᑎᑦᓯᕕᐅᔫᑉ ᓇᑎᖓᓂ, ᑎᒥᐅᔪᖁᑎᒥᓂᒃ ᐊᒥᓱᐃᑦ ᑕᑯᑦᓴᐅᑎᑦᓯᓂᖃᕐᑎᓗᒋᑦ ᑕᑯᑦᓴᐅᑎᑕᖏᑦ ᐃᓚᖃᓚᐅᔪᑦ ᐅᑯᓂᖓ: ᓄᓇᕕᒻᒥ ᓄᓇᓕᕆᔨᓂᒃ, ᑲᐅᑕᖅ ᓴᓇᔩᑦ, ᓄᓇᕕᒻᒥ ᒥᕐᖁᓕᓕᕆᕕᒃ, ᐅᑭᐅᕐᑕᑐᒧᑦ ᐅᒥᐊᕐᔪᐊᑯᑦ ᐅᓯᑲᑦᑕᖅᑏᑦ, ᐃᓄᐃᑦ ᖃᖓᑦᑕᔫᓕᕆᔨᖏᑦ, ᐊᒻᒪᓗ ᑲᓀᑎᐊᓐ ᓄᐊᑦᑯᑦ. ᓴᓇᖕᖑᐊᑏᑦ ᑕᑯᒥᓇᕐᑐᓕᐅᕐᑏᑦ ᒥᕐᓱᑎᓪᓗ ᐊᒻᒪᓗ ᐃᓄᐃᑦ ᐱᐅᓯᑐᖃᖏᓐᓅᓕᖓᔪᓂᒃ ᓴᓇᔭᕕᓂᕐᒥᓂᒃ ᓂᐅᕐᕈᓭᓚᐅᔪᒻᒥᔪᑦ, ᐊᒻᒪᓗ ᑕᑯᓂᐊᕐᓯᒪᑦᓱᑎᒃ ᐳᓛᕆᐊᕐᓯᒪᔪᐃᑦ ᖃᓄᐃᑦᑐᑐᐃᓐᓇᓂᒃ ᓄᐃᑕᑎᑕᖏᓐᓂᒃ ᖃᓄᐃᓗᕐᒪᖔᑕᓗ ᑕᑯᓐᓇᐅᔮᕐᑎᑕᐅᒍᓐᓇᖃᑦᑕᓚᐅᔪᒻᒥᔪᑦ. ᓄᓇᕕᒻᒥᐅᑦ ᐅᓐᓄᖁᑎᖃᕐᑎᓗᒋᑦ ᓄᓇᕕᒻᒥᐅᑦ ᑐᓴᕐᓂᔮᕐᑎᓯᔩᑦ ᙯᖁᔭᐅᓯᒪᔪᓂᒃ  ᑭᓯᐊᓂ  ᑐᓴᕐᓂᔮᕐᑎᓯᓂᖃᓚᐅᔪᒻᒥᔪᑦ,  ᐊᕗᓐᓂᑎᐅᑉ  ᑕᕐᕿᖓᓂ  ᕕᐳᐊᕆ  7-ᒥ,  ᑯᐯᒃ ᑕᕐᕋᖓᓂᒥᐅᑦᑐᓴᕐᓂᔮᕐᑎᓯᓂᖃᕐᑎᓗᒋᑦ.

ᑭᒡᒐᑐᕐᑏᑦ ᐅᓛᕈᒥᑕᕐᑎᑕᐅᓂᖃᓚᐅᔪᒻᒥᔪᑦ ᐅᖄᕕᐅᒋᐊᕐᑐᓯᒪᑦᓱᑎᒃ ᒪᑭᕝᕕᐅᑉ ᐊᖓᔪᕐᖄᖓᓄᑦ ᓵᓕ  ᒍᐊᑦᒧᑦ  ᐊᕗᓐᓂᐅᑦ  ᑕᕐᕿᖓᓂ  ᕕᐳᐊᕆ  6-ᒥ. ᐅᖄᓚᐅᔪᖅ ᐃᒣᓗᕐᓱᓂ:

ᐅᑭᐅᕐᑑᑉ ᖁᑦᓯᑐᖓ ᐊᒥᓱᐃᓕᕿᖓᑎᓪᓗᒍ ᓄᓇᖁᑎᒋᔭᐅᕗᖅ, ᑲᓇᑕᒥ ᐃᓚᒋᔭᐅᑎᓪᓗᒋᑦ ᐅᑯᐊ: ᐃᓄᕕᐊᓗᐃᑦ,  ᓄᓇᕗᑦ,  ᓄᓇᑦᓯᐊᕗᑦ  ᐊᒻᒪᓗ  ᓄᓇᕕᒃ ᐊᓂᕐᕋᒋᑦᓱᒍ ᓄᓇᒋᔭᕋ. ᑭᓯᐊᓂ ᐃᓄᑐᐃᓐᓇᐅᓱᑕ ᐊᑕᐅᓰᒍᔪᒍᑦ ᐊᕕᑦᑐᓯᒪᑎᑕᐅᔪᐊᓘᔮᕋᓗᐊᕐᓱᑕ ᓄᐃᑕᖕᖏᑐᓄᑦ ᐊᕕᑦᑐᓯᒪᑎᑕᐅᒻᒪᑕ ᓄᓇᒋᔭᕗᑦ.

ᐅᖄᒋᐊᓯᓚᐅᕐᓇᖓ, ᐃᕐᖃᐅᒪᑦᓯᒍᒪᕗᖓ ᐱᐊᓪ ᑭᐊᒻᑉ-ᒥᒃ ᐃᓅᒍᓐᓀᖃᒻᒥᓚ-ᐅᕐᓂᖓᓂᒃ, ᓗᕋᐃᓐ ᐳᕈᒃ ᐊᖑᑎᒋᓚᐅᕐᑕᖓᓂᒃ. ᐱᐊᓪ ᒪᑭᕝᕕᑯᓐᓂ ᐱᓇᓱᑦᑎᓄᑦ ᐃᓚᒋᔭᐅᔪᕐᑎᑐᑦ ᐃᓚᒋᔭᐅᓚᐅᔪᕗᖅ 1975-ᒥᓂᑦ. ᑕᕐᕋᒥᐅᓄᑦ ᐃᓄᓐᓄᓗ ᐱᖃᑎᒋᔭᐅᓪᓚᕆᓚᐅᔪᑦᓱᓂ/ᐃᓚᓐᓈᕆᔭᐅᓪᓚᕆᓚᐅᔪᑦᓱᓂ ᐊᒻᒪᓗ ᓇᒻᒥᓂᖅ ᐱᖃᑎᒋᓚᐅᔪᒻᒥᔭᕋ. ᐯᖕᖑᖏᔭᐅᔪᒻᒪᕆᐅᓕᕆᕐᑐᖅ.

(ᑲᑎᒪᔪᐃᑦ ᓂᐯᑦᑑᑫᓐᓇᓂᖃᓚᐅᔪᑦ)

ᐅᓪᓗᒥ ᐅᖄᒍᒪᔭᒃᑲᓂᒃ ᑐᓴᕐᑎᓯᒍᑎᖃᕈᒪᕗᖓ ᓄᓇᕕᒻᒥᐅᑦ ᐃᓄᐃᑦ ᐃᒻᒥᓂᕐᓱᒐᓱᐊᕈᑎᒋᔭᒥᓂᒃ ᐱᕙᓪᓕᐊᒍᑎᖃᕐᓂᑎᓐᓂᒃ. ᖃᓄᕐᑑᕈᑎᓕᒫᕗᑦ ᑐᑭᑖᕈᑎᒋᔭᓕᒫᕗᓪᓗ, ᐊᒻᒪᓗ ᕿᒥᕐᕈᓯᐊᕋᓱᐊᒻᒪᕆᑦᓱᑕ ᐱᓇᓱᐊᖃᑦᑕᑕᑦᑎᓂᒃ ᖃᓄᐃᓕᖓᐅᑎᖃᓕᕐᒪᖔᑦᑕ ᐅᓂᒃᑳᑫᓐᓇᓚᖓᕗᖓ.

ᐃᓄᑐᐃᓐᓇᐅᔪᒍᑦ ᐱᔪᓐᓇᐅᑎᒋᔭᑦᑎᓂᒃ ᐊᓂᕐᕋᒋᑦᓱᒍ ᓄᓇᒋᔭᑦᑎᓂ ᐊᐅᓚᑦᔭᕆᐊᒍᑎᖃᓕᕐᓂᑎᓐᓂᒃ, ᐅᑭᐅᕐᑕᑑᑉ ᓄᓇᖏᓐᓂ, ᐃᒪᖏᓐᓂ, ᓯᑯᖏᓐᓂᓗ ᐊᒻᒪᓗ ᕿᓚᖏᓐᓂ, ᐊᒻᒪᓗ ᑮᓇᐅᔭᓕᐅᕋᓱᐊᕐᓂᑎᒍᑦ ᐱᕙᓪᓕᐊᒐᓱᐊᕈᑎᖃᕐᐸᓱᑕ.

ᓄᓇᕕᒻᒥ ᑮᓇᐅᔭᑎᒍᑦ ᐃᒻᒥᓂᕐᓱᕈᓐᓇᐅᑎᑦᓴᓂᒃ ᓯᕗᒧᐊᕋᓱᐊᕈᑎᖃᕐᓱᑕᓗ ᐱᓇᓱᐊᕐᐸᐳᒍᑦ.

• ᐊᖓᔪᕐᖃᐅᕕᖃᕈᓐᓇᓯᒐᓱᐊᕐᓂᒧᑦ ᐊᐅᓚᑦᔭᕆᐊᒍᑎᖃᕋᓱᐊᕐᓂᕗᑦ ᐃᓚᖃᕐᑐᑦ ᑮᓇᐅᔭᓕᐅᕋᓱᐊᕐᓂᑯᑦ ᐱᓇᓱᐊᕈᑎᑦᓴᑎᓐᓂᒃ, ᓇᒻᒥᓂᖅ ᒪᑭᑕᒐᓱᐊᕈᑎᑦᓴᑎᓐᓂᒃ, ᐊᒻᒪᓗ ᐊᖏᔪᒻᒪᕆᐊᓗᓐᓂᒃ ᐱᕕᑦᓴᐅᒍᓐᓇᑐᓂᒃ ᐱᑕᖃᕐᓱᓂ ᑌᒣᒻᒪᑦ.
• ᓴᖑᑎᑦᓯᒋᐊᕐᓯᒪᓕᕐᑐᒍᑦ ᓇᒻᒥᓂᖅ ᐊᑑᑎᒍᒪᔭᑦᑎᓂᒃ ᓄᐃᑦᓯᕕᖃᖃᑦᑕᖔᓯᑦᓱᑕ ᐊᓯᖏᓐᓂᒃ ᑲᕙᒪᓐᓂᒃ ᐊᒻᒪᓗ ᓇᒻᒥᓂᖅ ᕿᓂᖔᖃᑦᑕᓯᑦᓱᑕ ᓱᓀᑦ ᐱᒍᓇᐅᒻᒪᖔᑕ, ᑌᒣᒍᒪᑐᐊᕈᑦᑕ ᐃᒻᒪᖄ ᐅᖃᖃᑎᒌᒍᑎᖃᕆᐊᖃᓕᕐᑐᒍᑦ ᓄᐃᑦᓯᒐᓱᐊᕈᑎᑦᓴᖏᓐᓂᒃ ᐃᓄᐃᑦ, ᑕᐅᕐᓰᖃᑦᑕᐅᑎᒍᑎᑦᓴᖏᓐᓂᒃ ᐃᓄᐃᑦ ᐊᓂᕋᒋᑦᓱᒍ ᓄᓇᒋᔭᒥᓂ ᐊᒻᒪᓗ ᓯᓚᕐᔪᐊᒥ ᑕᐅᕐᓰᖃᑦᑕᐅᑎᓂᐅᓲᓂᒃ ᐊᑦᑕᕈᓱᖕᖏᓂᕐᓴᐅᓗᑕ ᓲᖑᓯᐅᒥᒋ- ᐊᕐᓯᒪᓗᑕᓗ ᓯᕗᓕᖔᖃᑦᑕᓗᑕᑌᒣᒍᒪᓕᕐᑐᒍᑦ.
• ᑲᓇᑕ ᓄᓇᕕᒻᒥᒃ ᑲᒪᒋᔭᖃᖕᖏᓗᐊᑦᓯᐊᒪᑦ, ᐊᒻᒪᓗ ᐃᓄᐃᑦ ᑲᑎᒋᐊᑦᓯᐊᖔᕆᐊᖃᓕᕐᓱᑎᒃ ᓇᒻᒥᓂᖅ ᑲᒪᒋᔭᖃᕆᐊᑦᓯᐊᑐᐃᓐᓇᓗᑎᒃ, ᐊᒻᒪᓗ ᕿᓂᓕᕐᓱᑕ ᑮᓇᐅᔭᒻᒪᕆᑎᒍᑦ ᓯᕗᓂᑦᓴᓕᐅᕐᓂᒧᑦ ᑐᖕᖓᕕᓕᐅᕈᑎᑦᓴᐅᒐᔭᕐᑐᓂᒃ.
• ᐅᒥᐊᕐᔪᐊᓄᑦ ᐄᒐᕐᕕᓂᒃ ᑭᖕᖒᒪᑦᓯᔪᒍᑦ, ᐱᐅᓂᕐᓴᓂᓪᓗ ᖃᖓᑦᑕᔪᕐᓂ- ᐊᕕᑦᑖᕆᐊᖃᕐᓱᑕ/ᑎᒻᒥᔪᕐᓂᐊᕕᑦᑖᕆᐊᖃᕐᓱᑕ, ᓄᑖᓂᓪᓗ ᒥᕝᕕᑖᕆ- ᐊᖃᕐᓱᑕ ᓅᑕᐅᒋᐊᖃᑐᐊᕐᐸᑕᓗ ᐊᓯᐊᓄᑦ ᓅᖃᑦᑕᓗᒋᑦ ᐊᒻᒪᓗ ᑐᓴᐅᒪᖃᑦᑕᓕᕆᐅᑎᓂᒃ ᐃᓱᕐᕉᑎᑖᕆᐊᖃᕐᓱᑕ ᐊᒻᒪᓗ ᐃᓪᓗᐃᓂᐊᕐᓱᑕ.
• ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ ᑕᕐᕋᒥᐅᑦ ᐊᕐᓱᕈᓐᓇᑐᒃᑰᓕᕐᖁᑦ – ᒥᕝᕕᖁᑎᕗᑦ ᐃᓗᕐᓴᖑᕐᐸᓕᐊᓕᕐᓂᖏᓐᓄᑦ ᐊᒻᒪᓗ ᐊᑦᑕᓇᕐᓯᕙᓪᓕ- ᐊᑐᐃᓐᓇᓕᕐᓱᑎᒃ ᑕᒪᒃᑯᐊ ᑲᒪᒋᔭᐅᑦᓴᐅᑎᒋᒋᐊᖃᓕᕐᑐᑦ. ᑕᒪᓐᓇ ᒥᕝᕕᓅᓕᖓᔪᖅ ᐊᑕᐅᓯᑐᐃᓐᓇᖅ ᐆᑦᑐᕋᐅᑎᐅᔪᖅ ᓯᓚᐅᑉ ᐊᓯᑦᔨᕙᓪᓕ- ᐊᓂᖓᓄᑦ ᐊᓯᑦᔨᕈᑕᐅᕙᓪᓕᐊᔪᓄᑦ ᑕᕐᕋᒥ.
• ᐃᓄᐃᑦ ᓄᓇᕕᒻᒥᐅᑦ ᓯᓚᑐᔪᒻᒪᕆᐅᒐᒥᒃ ᓲᖑᔪᑲᓪᓚᓂᒃ ᐱᓇᓱᖃᑎᑦᓴᑖᕈᓐᓇᖁᑦ ᐃᑲᔪᕐᑎᒋᕙᑦᑕᑎᓐᓂᒃ ᐅᑭᐅᕐᑕᑐᓕᒫᑉ ᖁᑦᓯᑐᖓᓂ.
• ᒪᑭᕝᕕᒃ ᒪᕐᕈᐃᓂᒃ ᐱᒍᓐᓇᓯᐊᕐᑑᓂᒃ ᖃᖓᑦᑕᔫᖁᑎᖃᕐᒪᑦ: ᑲᓀᑎᐊᓐ ᓄᐊᒃᑯᓂᒃ ᓄᑖᒥᒃ (ᐃᓚᒋᓕᐅᑎᔭᐅᕐᖃᒥᓚᐅᔪᑦ ᕘᔅ ᐃᐊᑯᓐᓄᑦ) ᐊᒻᒪᓗ ᐃᓄᐃᑦᖃᖓᑦᑕᔫᖏᓐᓂᒃ.
• ᐃᓱᒪᒋᔭᖃᕈᒪᒐᓗᐊᕐᑐᖓ ᐃᓄᓐᓄᑦ ᓇᒻᒥᓂᕆᔭᐅᓗᓂᒃ ᐊᑕᐅᓰᓂᒃ ᖃᖓᑦᑕᔫᖃᕈᓐᓇᓯᖁᔨᑦᓱᖓ ᐃᓄᐃᑦ ᓄᓇᖁᑎᒋᔭᓕᒫᖏᓐᓂ – ᐅᐸᑦᑕ- ᐅᒍᓐᓇᑐᓄᑦ ᐃᓚᒋᔭᐅᓕᕐᑎᓗᒋᑦ ᐅᑯᐊ, ᐊᓛᔅᑲ, ᐊᑯᑭᑦᑐᖅ, ᕋᓴ ᐊᒻᒪᓗ ᓇᒧᑐᐃᓐᓇᖅ ᐊᓯᖏᓐᓄᒐᓴᒃ ᐅᐸᒍᓐᓇᓯᖁᓇᕐᓱᑎᒃ.
• ᓄᓇᓕᕗᑦ ᑎᑭᑦᑕᑕᐅᒍᓐᓇᖃᑦᑕᓯᒪᔪᑐᖃᐅᒐᓗᐊᑦ ᐅᑭᐅᕐᑕᑐᒥ ᐃᒣᑦ, ᓄᓀᓪᓗ, ᐊᒻᒪᓗ ᑕᕆᐅᑉ ᓯᑯᖏᑦ ᖁᓚᐅᑦᓱᒋᑦ, ᐊᒻᒪᓗ ᒫᓐᓇ/ᑕᒐᑕᒐ ᐅᓪᓗᒥᐅᓕᕐᑐᖅ ᐊᑦᔨᐅᔭᒍᓐᓀᒪᑦ ᕿᓚᑎᒍᑦ ᓇᒧᑐᐃᓐᓈᕈᓐᓇᓲᒍᓕᕐᓱᑕ.
• ᖃᖓᑦᑕᔫᖁᑎᕗᑦ/ᑎᒻᒥᔫᖁᑎᕗᑦ ᐱᒐᓱᐊᕐᑕᒥᓂᒃ ᐱᒍᓐᓇᓯᑦᓯ- ᐊᖃᑦᑕᓯᒪᓂᕐᒥᓄᑦ ᐊᓯᖏᓐᓂᒃ ᐱᒍᓐᓇᓯᒍᓐᓇᑐᑦᓴᐅᒋᕗᑦ.
• ᐆᑦᑐᕋᐅᑎᒋᓗᒍ, ᐅᒥᐊᕐᔪᐊᑯᑦ ᐅᓯᑲᑦᑕᑎᖁᑎᖃᖃᑕᐅᒐᑦᑕ ᓇᒻᒥᓂᖃᖃᑕ- ᐅᑦᓱᑕ ᐅᒥᐊᕐᔪᐊᓂᒃ ᐅᓯᑲᑦᑕᖅᑎᓂᒃ ᓂᐋᔅᑯᓐᓂᒃ, ᕿᑎᕐᖃᓗᐊᖏᓐᓂᒃ ᐱᖃᖃᑕᐅᑦᓱᑕ, ᐊᒻᒪᓗ ᐅᖓᑖᓄᒋᐊᓪᓚᒃ ᐱᒍᓐᓇᓂᖃᑦᓯᐊᓱᑕ.
• ᓄᓇᕕᒻᒥᓕ, ᒪᑭᕝᕕᐅᑉ ᐋᕐᕿᓯᒪᓂᖓ ᐊᑦᔨᒋᔭᐅᖕᖏᒪᕆᑉᐳᖅ ᐃᓅᖃᑎᒋᔭᑦᑕ ᐋᕐᕿᓱᕐᓯᒪᒍᓯᖏᓐᓄᑦ. ᒪᑭᑉᐸᓕᐊᑎᑦᓯᒐᓱᐊᕐᓂᑯᑦ ᐱᕈᕐᐸᓕᐊᑎᑦᓯᒐᓱᐊᕐᑎᖃᕐᑐᒍᑦ ᐊᒻᒪᓗ ᐱᓂᐊᕐᓂᓕᕆᓂᒃᑯᑦ ᓲᕐᓗ ᐃᓪᓗᑐᑦ ᒪᕐᕉᓂ ᑕᓕᖃᑦᓯᐊᑐᒍᑦ ᑕᕝᕙᓂᑦᓭᓇᖅ ᑎᒥᐅᔪᒥ.
• ᑕᒪᓐᓇ ᐃᒫᒃ ᑐᑭᓕᒃ, ᑮᓇᐅᔭᓕᐅᕋᓱᐊᕈᑎᓂᒃ ᑲᒪᒋᔭᖃᑦᓴᐅᑎᒋᒍᓐᓇᓯ- ᐊᕐᑐᒍᑦ ᐱᒐᓱᐊᕈᒪᓂᖃᑦᓯᐊᓱᑕᓗ.
• ᐊᖏᕈᑦᑕ ᑭᓯᐊᓂ ᐊᐅᓚᑦᔭᕆᐊᕐᑎᓯᒍᓐᓇᑐᒍᑦ ᑎᒥᐅᔫᓂᑎᒍᑦ — ᑐᑦᑕᕕ- ᐅᒍᓐᓇᑐᑐᐊᖅ ᑎᒥᖁᑎᒋᔭᕗᑦ ᐊᒻᒪᓗ ᑮᓇᐅᔭᓕᐅᕋᓱᐊᕈᒪᐅᑎᐅᔪᓂᒃ ᐱᕕᑦᓴᖃᕐᑎᓯᒍᓐᓇᓱᑕ ᓄᓇᓕᓕᒫᓂ ᐊᖓᔪᕐᖃᐅᕕᖃᕐᓂᑎᓄᑦ.
• ᐅᒃᑯᐃᖓᕐᕕᖃᑦᓯᐊᑐᒍᑦ ᑮᓇᐅᔭᓕᐅᕋᓱᐊᖃᑎᐅᒍᒪᑐᐊᕈᑦᑕ ᐊᒻᒪᓗ ᕿᓚᓈᕆᔭᖃᑦᓯᐊᓱᑕ ᓄᑖᓂᒃ ᐱᓇᓱᐊᖃᑎᒋᒍᓐᓇᑕᑦᑎᓂᒃ ᑮᓇᐅᔭᓕᐅᕋᓱ- ᐊᕐᑎᓂᒃ ᑲᓇᑕᒥ ᐊᒻᒪᓗ ᓯᓚᕐᔪᐊᒥ.
• ᓯᕗᒧᐊᕋᓱᐊᓕᕐᑎᓗᑕ, ᑲᓇᑕᐅᑉ ᑲᕙᒪᒃᑯᖏᓐᓄᑦ ᑲᔪᓯᔭᐅᑎᑦᓯᒐᓱᐊᕐᐳᒍᑦ ᑭᓪᓕᖃᑦᓯᐊᓗᑎᒃ ᑲᔪᓯᑎᑦᓯᒍᑎᒋᒐᔭᕐᑕᖓᓂᒃ ᒪᓕᒐᕐᒥᒃ ᐃᓄᐃᑦ ᑮᓇᐅᔭᓕᐅᕋᓱᐊᕈᓐᓇᐅᑎᑦᓴᖏᑦ ᐱᑦᔪᑎᒋᓗᒋᑦ.
• ᐊᒻᒪᓗ, ᕿᓂᖃᑦᑕᒥᑦᓱᑕ ᐱᕕᑦᓴᐅᒍᓐᓇᑐᐃᓐᓇᕆᐊᓕᓐᓂᒃ ᓯᓚᑎᑦᑎᓂᒃ ᐱᓯᒪᔪᓂᒃ, ᓇᔪᕐᑕᑎᓐᓂᓗ, ᖃᓄᐃᓘᖃᑎᒌᒍᓐᓇᒪᖔᑦᑕ ᑲᑐᑦᔨᓗᑕ.

2015-ᒍᑎᓪᓗᒍ, ᐱᓇᓱᖃᑎᒋᑦᓱᒋᑦ ᐱᖁᔭᓕᐅᕐᑎᖃᑎᒃᑲᓗ ᐱᖁᔭᓕᐅᕐᕕᒥ ᑐᓴᕐᑎᓯᐅᑎᓕᐅᕐᓯᒪᔪᒍᑦ ᐊᖓᔪᕐᖃᐅᕕᖃᕐᓗᑕ ᐃᒻᒥᓂᕐᓱᕈᒪᐅᑎᒋᔭᑦᑎᓂᒃ ᐊᔪᕐᓴᓂᖃᕈᓐᓀᓗᑕ ᓲᖑᔫᓂᖃᕐᓗᑕᓗ ᐅᑭᐅᕐᑕᑐᒥ ᐃᒻᒥᓂᕐᓱᕈᓐᓇᓯᖁᓪᓗᑕ ᐊᒻᒪᓗ ᐅᓐᓂᑑᑎᓕᐅᓚᐅᔪᒻᒥᔪᒍᑦ ᑲᓇᑕᐅᑉ ᑲᕙᒪᖓ ᑮᓇᐅᔭᖃᕐᑎᓯᑦᓯᐊᓗᓂ ᑲᒪᒋᔭᖃᑦᓯᐊᕈᑎᑦᓴᖏᓐᓂᒃ ᑕᕐᕋᒥᐅᓂᒃ ᓄᓇᓕᓐᓂᒃ ᐆᒻᒪᖁᑎᑦᓴᓕᐅᕋᓱᐊᕐᓂᑯᑦ ᑮᓇᐅᔭᖃᕐᑎᓯᖁᑦᓱᒋᑦ.

ᖁᕕᐊᓱᑦᓱᖓ ᐅᐱᒍᓱᑉᐳᖓ  ᐊᔪᐃᓐᓇᓱᒋᑦ  ᐱᕙᓪᓕᐊᔭᐅᑎᒐᓱᐊᕐᑕᕗᑦ ᑕᕐᕋᒥ ᐃᓕᑕᕆᔭᐅᓂᖃᕐᒪᑕ ᑲᓇᑕᐅᑉ ᑲᕙᒪᖓᓄᑦ ᓈᒻᒪᓈᕐᓯᒪᑦᓯᐊᓱᓂᓗ ᐅᕙᑦᑎᓄᑐᐃᓐᓇᐅᖏᑦᑐᖅ, ᑭᓯᐊᓂ ᑮᓇᐅᔭᑎᒍᑦ ᒪᑭᑉᐸᓕᐊᒍᑕᐅᑦᓯᐊᓗᑎᒃ ᐱᕈᕐᐸᓕᐊᒍᑕᑦᓯᐊᕈᓐᓇᓚᖓᒻᒪᑕ ᑲᓇᑕᒧᑦ.

ᐱᖁᔭᓕᐅᕐᑏᑦ ᓄᓇᓕᖁᑎᑦᑎᓂᒃ ᐊᔪᕐᓴᕈᓐᓀᓗᑎᒃ ᓲᖑᔫᒍᓐᓇᓂᖏᓐᓂᒃ ᑐᑭᓯᓯᒪᑦᓯᐊᑐᑦ ᑲᓇᑕᐅᑉ ᑲᕙᒪᒃᑯᖏᑦ ᑲᔪᓯᑎᑦᓯᒍᓐᓇᑐᐊᕐᐸᑕ ᐃᓄᐃᑦ ᐃᒻᒥᓂᕐᓱᓗᑎᒃ ᐊᖓᔪᕐᖃᐅᕕᖃᕈᑎᑦᓴᖏᓐᓂᒃ ᐅᑭᐅᕐᑕᑐᒥ. ᐱᖁᔭᓕᐅᕐᑏᑦ ᑕᒪᒃᑯᓂᖓ ᑐᓴᕐᑎᓯᒍᑎᓕᐅᕐᓯᒪᒻᒪᑕ, ᐊᒻᒪᓗ ᐊᓯᐊᒍᓪᓗ ᖃᓄᕐᑑᖁᔭ- ᐅᓯᒪᒐᓗᐊᕋᒥᒃ ᑲᓇᑕᐅᑉ ᑲᕙᒪᖓ ᐅᑭᐅᕐᑕᑐᒥᐅᑦ ᐱᒻᒪᕆᐅᑦᓱᑎᒃ ᐃᓱᕐᕉᑎᑦᓴᖏᓐᓂᒃ ᑮᓇᐅᔭᕐᑐᕈᑎᖃᕋᓱᐊᕐᓯᒪᒐᑎᒃ ᐊᒻᒪᓗ ᐃᓄᓐᓂᒃ ᐱᒍᑦᔨᓯ- ᐊᖕᖏᑑᑐᐃᓐᓇᖏᓐᓈᓱᑎᒃ.

ᐃᓘᓐᓇᓯᐊᖏᓐᓂᒃ ᑖᒃᓰᔭᕈᑕᐅᒋᐊᓕᓕᒫᓂᒃ ᑖᒃᓰᔭᕐᑎᐅᒐᑦᑕ, ᓲᓱᒋᔭᐅᑦᓯ- ᐊᕆᐊᖃᕐᐳᒍᑦ, ᐊᒻᒪᓗ ᐱᑦᓯᐊᕕᐅᓗᑕ ᑲᒪᒋᔭᐅᑦᓯᐊᕈᒪᑦᓱᑕ.

ᐊᕙᑏᒃ ᒪᕐᕉᒃ ᓈᓯᒪᓕᕐᖁᑦ ᐊᑎᓕᐅᕈᑎᖃᓚᐅᕐᓯᒪᑎᓪᓗᑕ ᔦᒥᔅ ᐯᒥ ᑯᐯᒃᑯᓗ ᑕᕐᕋᖓᓂ ᐊᖏᖃᑎᒌᓐᓂᐅᓯᒪᔪᒥᒃ ᑲᓇᑕᐅᑉ ᑲᕙᒪᖓ ᐊᑎᓕᐅᖃᑕᐅᓯᒪᒻᒥᔪᖅ, ᐊᒻᒪᓗ ᓇᒻᒥᓂᖅ ᐅᕙᒍᑦ ᑮᓇᐅᔭᖃᕐᑎᓯᕙᑦᓱᑕ ᑲᔪᓯᑎᑕᐅᒍᑎᒋᒋᐊᓕᖏᓐᓂᒃ ᐊᑐᓕᕐᑎᑕᐅᑎᑦᓯᒐᓱᐊᖃᑦᑕᓯᒪᔪᒍᑦ ᐊᖏᖃᑎᒌᒍᑎᒋᓯᒪᔭᑦᑎᓃᑦᑐᓂᒃ ᐊᓯᖏᑦ ᓄᓇᓖᑦ ᑮᓇᐅᔭᓂᒃ ᐊᒥᓱᑲᓪᓚᒪᕆᐊᓗᓐᓂᒃ ᐁᑦᑐᑕᐅᖃᑦᑕᓯᒪᑎᓪᓗᒋᑦ ᑲᓇᑕ- ᐅᑉ ᑲᕙᒪᖓᓄᑦ, ᑭᓯᐊᓂ ᓲᖑᔪᑲᓪᓛᓗᓐᓂᒃ ᑮᓇᐅᔭᓕᐅᕋᓱᐊᕈᑎᑦᓴᓂᒃ ᐱᕈᕐᐸᓕᐊᑎᑦᓯᓯᒪᔪᒍᑦ ᐊᒻᒪᓗ ᓯᕗᒧᐊᕈᑎᖃᖃᑦᑕᓯᒪᑦᓱᑕ ᑲᓇᑕᐅᑉ ᑲᕙᒪᖓ ᑭᖑᕙᕐᓯᒪᔪᐊᓗᖃᑦᑕᕋᓗᐊᕐᒪᑦ ᐃᑲᔪᕐᓯᒪᐅᑎᒋᒋᐊᓕᒻᒥᓂᒃ.

ᒪᑭᕝᕕᒃ ᐊᑎᓕᐅᕈᑎᖃᓚᐅᔪᒻᒥᔪᖅ ᑐᑭᓯᒪᖃᑎᒌᒍᑎᒋᓗᒋᑦ ᑐᖕᖓᕕ- ᐅᓚᖓᔪᓂᒃ ᐊᖏᖃᑎᒌᒐᓱᐊᓕᕈᑦᑕ ᑌᓐᓇ ᐊᖏᖃᑎᒌᒍᑕᐅᓚᐅᕐᓯᒪᔪᖅ ᓄᑕᐅᓯᓪᓕᑎᕐᓗᒍ ᑲᕙᒪᐅᑉ ᑭᒡᒐᑐᕐᑎᖏᑦ ᐱᓇᓱᐊᖃᑎᒋᓗᒋᑦ, ᑭᓯᐊᓂ ᐅᑕᕐᕿᑐᐃᓐᓇᓚᖓᑦᔭᖏᑦᑐᒍᑦ ᑲᓇᑕᐅᑉ ᑲᕙᒪᖓᓄᑦ ᐊᖏᕐᑕᐅᓯᑐᐃᓐᓇᓗᑕ ᑭᓯᐊᓂ, ᓯᕗᒧᐊᒋᐊᓪᓚᑐᐃᓐᓇᓚᖓᔪᒍᑦ ᐊᒻᒪᓗ ᑲᓇᑕᐅᑉ ᑲᕙᒪᖓ ᐱᓇᓱ- ᐊᕈᑎᒋᔭᑦᑎᓂᒃ ᐊᖑᒻᒪᑎᒐᓱᐊᖔᕆᐊᖃᓚᖓᔪᖅ ᐅᕙᑦᑎᓂᒃ.

ᐅᑭᐅᕐᑕᑐᒥ ᐊᖓᔪᕐᖃᐅᕕᖃᕈᓐᓇᓯᒍᓐᓇᓂᕐᒥᒃ ᐅᒃᑯᐃᓯᒍᓐᓇᑐᑑᕗᒍᑦ. ᑲᓇᑕ- ᐅᑉ ᑲᕙᒪᖓ ᐊᒻᒪᓗ ᖁᑦᓯᑐᒥ ᐅᑭᐅᕐᑕᑐᒥᐅᑦᐅᖃᒻᒪᕆᐅᑎᖃᕈᓐᓇᑐᑑᑦᓱᑎᒃ ᐊᖓᔪᕐᖃᐅᕕᖃᕈᓐᓇᓂᕐᒥᓂᒃ ᐃᓄᐃ ᐅᑭᐅᕐᑕᑐᒥᐅᒍᓯᒪᔪᑐᖄᓗᒻᒪᑕ ᐊᕐᕌᒍᒐᓴᕐᔪᐊᓂ ᐊᒥᓱᓂ, ᓄᓀᑦ ᐊᑯᓂᒻᒪᕆᐊᓗᒃ “ᐊᕕᑦᑐᑕᐅᓯᒪᓚᐅᕐᑎᓇᒋᑦ” ᓱᓕ. ᐊᒻᒪᓗ ᐱᖃᕐᓂᕋᒍᓐᓇᓱᑎᒃ “ᓇᔪᓪᓚᕆᑦᑕᒥᓂ” ᐅᑭᐅᕐᑕᑑᑉ ᓄᓇᖏᓐᓂᒃ ᐃᓄᓐᓂᒃ ᑭᓯᐊᓂ ᐱᓇᓱᖃᑎᖃᑐᐊᕈᑎᒃ ᐱᓇᓱᐊᕈᒪᔭᒥᓂᒃ ᑲᔪᓯᑎᑦᓯᒍᓐᓇᒪᑕ. 

ᑌᒪᖕᖓᓂᐊᓗᒃ ᐃᓄᐃᑦ ᓇᒻᒥᓂᖅ ᐃᓅᓯᕐᒥᓂᒃ ᐊᐅᓚᑦᓯᒍᓐᓇᓂᖃᖃᑦᑕᓯᒪᕗᑦ, ᓄᓇᒋᔭᕗᑦ ᑕᒫᓂᒥᐅᑦᓴᔭᐅᖕᖏᑐᓄᑦ ᐊᐅᓚᑕᐅᓯᓚᐅᕐᑎᓇᒍ ᓱᓕ, ᐊᒻᒪᓗ ᐃᒻᒥᓂᕐᓱᒍᓐᓇᓯᐊᖃᑦᑕᓯᒪᑦᓱᑕ. ᕿᓂᕐᐳᒍᑦ ᖃᓄᖅ ᓇᒻᒥᓂᖅ ᐃᓅᓯᕐᑎᓂᒃᐊᐅᓚᑦᓯᒍᓐᓇᕋᔭᕐᒪᖔᑦᑕ ᐃᓄᐃᑦ ᐱᐅᓯᑐᖃᖏᑦ ᓲᓱᒋᔭᐅᑦᓯᐊᑎᓪᓗᒋᑦ ᐊᒻᒪᓗ 

ᐃᓄᐃᑦ ᐅᖃᐅᓯᖓ ᓲᓱᒋᔭᐅᑦᓯᐊᑎᓪᓗᒍ ᐊᒻᒪᓗ ᕿᒻᒪᖁᐊᕆᔭᐅᓯᒪᔪᐃᑦ ᑕᕐᕋᒥᐅᓄᑦ ᐃᓄᓐᓄᑦ ᓲᓱᒋᔭᐅᑦᓯᐊᒥᑎᓪᓗᒋᑦ.

ᑕᐅᑐᕐᖂᓇᕐᓂᑯᑦ ᑕᑯᓐᓇᓯᐊᕐᐳᒍᑦ ᓯᕗᒧᐊᕈᑎᒋᒍᒪᔭᑦᑎᓂᒃ. ᐃᓄᐃᑦ ᐊᑕᐅᓯᐅᓕᕿᖓᒍᓐᓇᓴᓚᐅᕐᐸᑕ ᐱᕈᕐᐊᓕᐊᒍᑎᒋᒍᒪᔭᑦᑎᓂᒃ. ᐃᓄᐃᑦ ᓯᕗᓕ- ᐅᕐᑎᐅᒋᐊᖃᕐᐳᑦ ᐅᑭᐅᕐᑕᑐᒥ. ᓇᐅᑐᐃᓐᓇᓄᑦ ᐊᐅᓚᑕᐅᒍᓐᓀᓗᑕ, ᑭᓇᒃᑯᓂᓪᓗ ᐃᑲᔪᕐᑎᖃᓚᖓᒻᒪᖔᑕ ᐃᑲᔪᕐᑎᒋᒍᓐᓇᑐᕆᔭᑦᑎᓂᒃ, ᑐᑭᑖᖃᑎᖃᕈᓐᓇᓗᑕᓗ ᐃᑲᔪᕐᑎᒋᔭᑦᑎᓂᒃ ᓇᒻᒥᓂᖅ ᓯᕗᓂᑦᓴᕆᔭᑦᑎᓂᒃ ᓯᕗᓂᑦᓴᓕᐅᕈᑎᖃᕐᓗᑕ.

ᓇᑯᕐᒦᒃ