Umiujaq

ᑐᑭᖓ: ᐅᒥᐊᕐᔪᔮᕐᑐᖅ
ᐃᓄᑦᑕᖏᑦ: 390


Umiujakᑖᓐᓇ ᓄᓇᓕᐅᔪᖅ ᐃᓂᖃᕐᑐᖅ ᐳᓯᙵᔫᑉ ᐅᒥᐅᕐᔪᔮᕐᑑᑉ ᐊᑖᓂ ᐅᒥᐅᔭᕐᒧᑦ ᓄᐃᕕᐅᓯᒪᔪᖅ. ᑖᑦᓱᒪ ᓄᓇᓕᐅᑉ ᐊᕙᓗᖓ ᑕᑯᒥᓇᕐᑐᒪᕆᐅᔪᖅ ᐊᑦᔨᒌᖏᑑᓂᖃᕐᓱᓂᓗ. ᑕᒪᓐᓇ ᕿᒥᕐᕈᓱᒍ ᐱᐅᔪᒻᒪᕆᐅᔪᖅ ᐱᓱᕝᕕᒋᑦᓱᒍ ᖃᖅᑲᖃᓪᓗᐊᖏᓐᓂᑯᖓᓄᑦ ᑕᓯᖃᓪᓗᐊᖏᓐᓂᑯᖓᓄᓪᓗ.

ᑕᓯᐅᔭᖅ ᐃᓂᖃᕐᓱᓂ 15 ᑭᓚᒦᑕᓂᒃ ᐅᖓᓯᓐᓂᖃᕐᑐᒥᒃ ᓄᓇᓕᓐᓂᑦ ᐊᖏᔪᒻᒪᕆᐊᓗᒻᒥᒃ ᑲᖏᕐᓲᓱᓂ ᐃᒪᖃᕐᑐᖅ. ᑕᓐᓇ ᑕᓯᐅᔭᕐᔪᐊᒧᑦ ᐊᑦᑐᐊᓂᖃᕐᑐᖅ ᓯᑯᕐᔪᐊᒧᑦ ᐃᑎᕐᓴᓕᐅᕐᑕᕕᓂᕐᒧᑦ ᑭᕕᓕᓂᕐᒦᓱᓂ. ᓲᖑᔪᒥᒃ ᐃᖏᕐᕋᓂᖃᕋᒥ, ᐃᒪᖓ ᓯᑯᒍᓐᓇᓲᖑᖏᑐᖅ ᐅᑭᐅᖑᓕᕋᓗᐊᕐᒪᑦ. ᑕᓯᐅᔭᐅᑉ ᓯᑦᔭᖏᑦ ᐊᑐᐊᕐᓂᖓᓃᑦᑐᖅ ᓯᐅᕂᓐᓇᐅᔪᖅ ᐃᓐᓈᕈᖃᕐᓱᓂᓗ. ᐊᒥᓱᓄᑦ ᑕᓯᐅᔭᖓ ᑰᕝᕕᐅᒥᔪᖅ ᐃᒪᖓ ᐳᔪᕐᑐᒐᓚᐅᓲᖅ ᑭᓯᐊᓂ ᐱᕈᕐᕕᐅᓲᖑᑦᓱᓂ ᓄᑎᓪᓕᓄᓪᓗ ᑲᕕᓯᓕᓐᓄᓗ ᐳᐃᔨᓄᓪᓗ ᕿᓚᓗᒐᕐᓄᓗ. ᑖᓐᓇ ᐅᖅᑯᐊᓕᓂᕐᒦᑐᖅ ᑕᕆᐅᒥᒃ ᐊᕙᑎᖃᕐᑐᖅ ᓇᐸᕐᑐᖃᕐᒥᔪᖅ ᐊᑦᔨᒌᖏᑐᓂᒃ ᑎᖓᐅᔭᒥᒃ ᐱᑕᖃᑦᓯᐊᖏᑦᑐᓚᕿᑎᑦᓯᓱᑎᒃ ᑕᒫᓂ ᓄᓇᖓᓂ. ᓯᑦᔭᖓᑕ ᓯᕿᓂᖓᓂ ᑕᑯᔭᐅᔪᖃᕈᓐᓇᓲᖑᖏᓐᓇᑐᖅ ᖃᑦᓴᓐᐯᒃᑯᑦ ᓂᐅᕕᕐᓂᐊᕕᕕᓂᖓᓂᒃ ᐃᐱᕂᓐᓇᑕᐅᒪᓕᕐᑐᒥᒃ.

ᑕᓯᐅᔭᐅᑉ ᐃᓐᓈᕈᖏᓐᓃᓱᓂ ᑕᓯᐅᔭᕐᔪᐊᑉ ᐃᒪᖓ ᑕᑯᑦᓴᐅᔪᖅ ᐊᒻᒪᓗ ᐸᑎᕐᑑᑉ ᕿᑭᕐᑕᖏᑦ. ᐊᒥᓱᓂᒃ ᐊᑦᔨᒌᖏᑐᓂᒃ ᑎᒻᒥᐊᑕᖃᕐᑐᖅ ᒪᑯᓂᖓ ᑑᓪᓕᓂᒃ, ᒥᑎᕐᓂᓗ ᑭᒡᒐᕕᓐᓂᓗ ᐅᐱᕐᖔᑯᑦ ᐅᖅᑯᐊᓕᓂᕝᕕᖃᓲᓂᒃ ᐅᓪᓗᓕᐅᕐᕕᖃᓲᓂᓪᓗ. ᕿᑭᕐᑌᑦ ᑰᑦᔪᐊᕌᐱᐅᑉ ᓴᓂᐊᓃᑦᑐᑎᑐᑦ, ᐸᑎᕐᑑᑉ ᕿᑭᕐᑕᖏᑦ ᐃᒪᐅᑉ ᐃᖅᑲᖓᓂᒥᐅᑕᕐᓂᒃ ᐱᑕᖃᕐᒥᔪᖅ. ᑕᒫᓂ ᐃᓐᓈᕈᖏᑦ ᐳᕐᑐᔪᐊᒻᒥᔪᑦ ᐃᒪᖏᑦ ᐃᑎᓂᖃᕈᓐᓇᓱᑎᒃ 110 ᒦᑕᓂᒃ ᓱᖅᑳᑎᕈᑎᓂᒃ. ᐅᒥᐅᔭᐅᑉ ᑕᕐᕋᖓᓂ 30 ᑭᓚᒦᑕᓂᒃ ᐅᖓᓯᓐᓂᓕᒻᒥᒃ ᐸᑎᕐᑑᑉ ᑰᖓᓂ ᖁᕐᓗᑐᕐᑕᖃᕐᑐᖅ 30 ᒦᑕᓂᒃ ᓱᖅᑲᑎᕈᑎᓂᒃ ᐳᕐᑐᓂᓕᒻᒥᒃ. ᑖᑦᓱᒪ ᑰᑉ ᐹᖓ ᐱᐅᔪᒻᒪᕆᐅᓲᖅ ᐃᖃᓗᓐᓂᐊᑎᓄᓪᓗ ᐱᓱᕋᔭᕐᑎᓄᓪᓗ.

ᐃᓂᖃᕐᓱᓂ 160 ᑭᓚᒦᑕᓂᒃ ᐅᖓᓯᓐᓂᓕᒻᒥᒃ ᑰᑦᔪᐊᕌᐱᐅᑉ ᑕᕐᕋᖓᓂ, ᐅᒥᐅᔭᖅ ᓄᐃᑕᐅᓯᒪᔪᖅ 1986-ᒥ. ᔦᒥᔅᐯᑉ ᑰᖓᓂᓗ ᑰᑦᔪᐊᕌᐱᐅᑉ ᑰᖓᓂᓗ ᐃᑯᒪᓕᐅᕐᕕᖃᕈᒪᓯᒪᓂᖓᓄᑦ, ᐃᓄᐃᑦ ᐊᖏᖃᑎᒌᒐᓱᐊᕈᑎᖃᕐᓱᑎᒃ 1975-ᒥ ᑖᒃᑯᓂᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓂᒃ ᓄᐃᑦᓯᓚᐅᔪᑦ ᐃᓄᐃᑦ ᑰᑦᔪᐊᕌᐱᒻᒥᐅᑦ ᓄᑦᑎᕈᓐᓇᕕᖃᕐᑎᑕᐅᓂᖓᓂᒃ ᑕᓯᐅᔭᒧᑦ. 198<<2""-ᒥ, ᓂᕈᐊᕐᓂᖃᕐᑎᓯᓂᒃᑯᑦ ᑐᑭᑖᓚᐅᕐᓯᒪᔪᑦ ᓄᑖᒥᒃ ᓄᓇᓕᑦᑖᕈᒪᓕᕐᓱᑎᒃ ᐱᐅᓕᓂᐊᕈᑎᑦᓴᒥᓄᑦ ᐱᐅᓯᑐᖃᕐᒥᓂᒃ ᓄᓇᒥ ᐃᖃᓗᐃᓪᓗ ᐆᒪᔪᐃᓪᓗ ᑲᑉᐱᐊᓇᕐᑐᒦᖏᓂᕐᓴᒦᑦᑐᒥᒃ. ᑌᑦᓱᒪᓂᑕᕐᓂᒃ ᐱᕈᕐᕕᐅᒍᓐᓇᑐᓂᓪᓗ ᓄᓇᐅᓪᓗ ᐊᑐᕐᑕᐅᓂᖏᓐᓄᑦ ᖃᐅᔨᓴᕐᓂᖃᕇᑐᐊᕋᒥᒃ ᐅᒥᐅᔭᐅᑉ ᓄᓇᓕᖓ ᓴᓇᔭᐅᒋᐊᓯᔪᕕᓂᖅ 1985-ᒥ ᐱᔭᕇᕐᑕᐅᓱᓂᓗ ᑏᓯᒻᐱᕆ 1986-ᒥ. ᐃᓪᓗᐃᑦ ᓴᓇᔭᐅᓂᖃᕐᑎᓗᒋᑦ ᑰᑦᔪᐊᕌᐱᒻᒥᐅᑦ ᐃᓄᖏᑦ ᐅᒥᐅᔭᕐᒨᕈᒪᔪᕕᓃᑦ ᑐᐱᕐᒥᐅᖑᒋᐊᖓᓚᐅᔪᑦ ᐅᑕᖅᑭᓱᑎᒃ ᓯᕗᓂᑦᓴᒥ ᓄᓇᓕᑦᓴᒥᓂᒃ. ᑕᑯᒥᓇᕐᑐᖁᑎᖏᑦ

  •     ᑕᓯᕐᔪᐊᖅ ᐱᖓᔪᒋᔭᐅᑦᓱᓂ ᐊᖏᓂᕐᐸᐅᖃᑕᐅᔪᖅ ᑯᐯᒻᒥ
  •     ᐳᐃᔨᑦᑕᓕᒃ ᑕᓯᖅ ᐊᒻᒪᓗ ᒥᑦᓴᐅᓂᕐᓴᒦᑦᑐᖅ ᓴᐳᒻᒥᓂᖃᓲᖅ ᐳᐃᔨᓂᒃ ᐃᒪᑦᓯᐊᒥᐅᑕᕐᓂᒃ
  •     ᐆᒪᔪᕐᓂᒃ ᑕᑯᑦᓴᑕᓕᒃ
  •     ᓄᐊᑕᐅᓯᒪᔪᖃᕐᑐᖅ ᓴᓇᕐᕈᑎᑐᖃᕐᓂᒃ ᐃᓪᓗᒥᐅᑕᕐᓂᓗ ᑌᑦᓱᒪᓂᑕᕐᓂᓗ ᓇᓂᔭᐅᓯᒪᔪᓂᒃ ᑐᓂᕐᑕᓂᐊᕐᓂᖃᕐᑎᓗᒍ ᓄᓇᓖᑦ ᓴᓇᔭᐅᓂᖃᓚᐅᕐᑎᓇᒍ ᓄᐃᑕᑎᑕᐅᔪᓂᒃ ᑲᕙᒫᐱᒃᑯᑦ ᐊᓪᓚᕕᖓᓂ.