ᓵᓕ ᒍᐊᑦ

  • ᓵᓕ ᒍᐊᑦ
    President
    Makivik Executive
  • Head Office: Kuujjuaq P.O. Box 179 Kuujjuaq, Quebec J0M 1C0 (819) 964.2925 1.877.625.484

ᓵᓕ ᒍᐊᑦ ᓂᕈᐊᕐᑕᐅᓚᐅᔪᕗᖅ ᔭᓄᐊᕆ 2018-ᒥ ᒪᑭᕝᕕᒥ ᐊᖓᔪᕐᖄᒪᕆᐅᓚᖓᓕᕐᑎᓗᒍ ᑖᓐᓇᓗ ᓂᕈᐊᕐᑕᐅᓂᖓ ᐱᖓᑦᓯᐅᑎᖏᓯᕚ ᒪᑭᕝᕕᒃ ᐊᕐᕌᒍᓂ 40 ᓴᕐᕿᔮᓕᕐᓂᒥᓂᒃ ᓇᓪᓕᐅᑎᓂᖃᕐᑎᓗᒍ. ᒪᑭᕝᕕᒃ ᐱᒋᐊᖕᖓᓯᑎᓪᓗᒍ ᓵᓕ ᐊᖓᔪᕐᖄᖑᓚᐅᕐᓯᒪᔪᖅ 1978-ᒥᑦ ᑎᑭᑦᓱᒍ 1982, ᐊᖓᔪᕐᖄᖑᒋᐊᓪᓚᓯᓚᐅᕐᓯᒪᒻᒥᓱᓂ 1988-ᒥᑦ ᑎᑭᑦᓱᒍ 1994. ᐊᖓᔪᕐᖄᖑᓚᐅᕐᓯᒪᒻᒥᓱᓂ ᐃᓄᐃᑦ ᑕᑐᑦᔨᖃᑎᒌᓐᓂᖓᓄᑦ ᑯᐯᒃ ᑕᕐᕋᖓᓂ ᓯᕗᓕᕐᑎᐅᓚᐅᕐᓯᒪᒻᒥᓱᓂ ᐊᖏᖃᑎᒌᒍᑎᑖᕋᓱᑦᑎᓗᒋᑦ ᐊᑎᓕᐅᖃᑎᒌᒍᑕᐅᓚᕐᑐᒥᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ.

ᓵᓕ ᒍᐊᑦ ᑎᒃᑯᐊᑕᐅᓚᐅᕐᓯᒪᕗᖅ ᑲᓇᑕᒥ ᐱᖁᔭᓕᐅᕐᑎᓄᑦ ᐃᓚᐅᓚᖓᓕᕐᑎᓗᒍ ᑎᓕᔭᐅᒍᑎᒋᓯᒪᔭᒥᓂᒃ ᑲᓇᑕᐅᑉ ᑲᕙᒪᖓᑕ ᑲᕙᒪᑐᖃᒃᑯᑦ ᐊᖓᔪᕐᖄᒪᕆᒋᓯᒪᔭᖓᓄᑦ ᐱᐋᕐ ᐃᓪᓕᐋᑦ ᑐᕈᑑᒧᑦ. ᐱᖁᔭᓕᐅᕐᑎ ᓵᓕ ᒍᐊᑦ ᑭᒡᒐᑐᕐᑐᖅ ᑯᐯᒃ ᓄᓇᓕᕐᓚᖓᓂᒃ ᐱᖁᔭᓕᐅᕐᑏᓗ ᐊᕕᑦᑐᓯᒪᓂᖃᕐᕕᐊᓂᒃ ᐃᖕᑯᒪᓐᒥᒃ. ᑲᓇᑕᐅᑉ ᐱᖁᔭᓕᐅᕐᕕᖓᓂ ᐱᑦᔪᔭᖃᓕᕐᑐᖅ ᔭᓄᐊᕆ 16, 1984-ᒥᓂᑦ.

ᐊᕐᕌᒍᓂ ᐊᒥᓱᓂ ᐃᓚᐅᖃᑦᑕᓯᒪᓕᕐᑐᖅ ᐱᖁᔭᓕᕆᓂᕐᒥᒃ ᐱᓇᓱᖃᑎᒌᒍᑎᓕᓐᓄᑦ ᐃᓚᐅᑎᓪᓗᒋᑦ ᑲᓇᑕᒥᐅᓪᓗ-ᕉᓯᐊᒥᐅᓪᓗ ᐱᖁᔭᓂᒃ ᐱᓇᓱᖃᑎᒌᒍᑎᖃᕐᑐᑦ ᐊᒻᒪᓗ ᑲᓇᑕᐅᓪᓗ-ᒥᒃᓯᑰᓪᓗ ᐱᖁᔭᓕᕆᕕᓐᓄᑦ ᑲᑐᑦᔨᖃᑎᒌᑦᑐᖁᑎᖏᑦ. ᓵᓕ ᑭᓯᐊᒐᖃᕐᓂᓴᐅᔪᖅ ᓄᓇᓕᑐᖃᐅᔪᓄᑦ ᐃᓕᖓᔪᓂᒃ. ᐱᓪᓗᑯᒋᐊᓖᑦ ᐅᓇᒻᒥᒋᔭᖏᑦ ᐊᓕᐊᒋᔭᖏᓪᓗ ᐃᓚᖃᑐᑦ ᒪᙯᓐᓂᒥᒃ, ᐃᖃᓗᓐᓂᐊᓂᕐᒥᒃ, ᐊᒻᒪᓗ ᕿᖕᒥᑐᐃᓐᓇᓂᒃ ᕿᒧᑦᓯᓴᓕᐅᕐᐸᓱᓂ ᐱᒋᐅᕐᓴᐸᑦᓱᒋᓪᓗ.

ᓵᓕ ᒍᐊᑦ ᐊᑦᔨᒌᑦᑎᖏᑦᑐᒪᕆᑦᑎᒍᑦ ᐱᕙᓪᓕᐊᓯᒪᓂᖏᑦ ᐃᓚᖃᕐᐳᑦ ᑕᒪᖏᓐᓂᒃ ᐊᑑᑎᔭᖃᖃᑦᑕᓯᒪᓂᕐᒥᒃ ᐃᓄᓕᒫᓄᓕᖓᔪᓂᓪᓗ ᐃᒻᒥᓅᓕᖓᑐᐃᓐᓇᓂᕐᓴᓂᒃᓗ. ᓵᓕ ᒪᙯᑎᐅᔪᖅ ᐱᓇᓱᒐᖃᕐᒥᓪᓗ ᐱᒐᓱᐊᕐᑎᐅᓱᓂ. ᐃᒻᒥᓅᓕᖓᑐᐃᓐᓇᓂᕐᓴᓂᒃ ᐱᕙᓪᓕᐊᑎᑦᓯᒍᑎᖃᕐᓯᒪᔪᑦ ᐱᑦᔪᔨᑦᓱᓂ ᐅᑯᓂᖓ: ᑕᕐᕋᒥ ᐱᓇᓱᑦᑎᐅᓱᓂ ᐃᓄᓕᕆᔨᑐᖃᒃᑯᓂ (1969-1979); ᐱᒋᐊᖕᖓᑎᑦᓯᓱᓂ ᐊᖓᔪᕐᖄᒪᕆᒋᔭᐅᓯᒪᔪᖅ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ ᑯᐯᒃ ᑕᕐᕋᖓᓂ (1972-1978); ᐱᒋᐊᖕᖓᑎᑦᓯᓱᓂ ᐊᖓᔪᕐᖄᒪᕆᐅᓯᒪᔪᖅ ᒪᑭᕝᕕᒧᑦ (1978-1982), ᑖᒃᑯᓇᓂ ᒪᑭᕝᕕᑯᓐᓂ ᑮᓇᐅᔭᓕᕆᔨᒋᔭᐅᓯᒪᒻᒥᔪᖅ (1987-88) ᐊᖓᔪᕐᖄᒪᕆᐅᑦᓱᓂᓗ (1988-1994); ᐃᓄᐃᑦ ᖃᖓᑦᑕᔫᓕᕆᔨᖏᓐᓂ ᐊᖓᔪᕐᖄᒪᕆᐅᑦᓱᓂ (1988-94). ᒪᑭᕝᕕᒧᑦ ᐊᖓᔪᕐᖄᒪᕆᒋᔭᐅᓯᒪᔪᖅ ᕘᔅ ᐃᐊ ᓂᐅᕕᐊᖑᑎᓪᓗᒍ 1990-ᒥ ᐱᑦᔪᔨᓚᐅᕐᓯᒪᕗᕐᓗ ᕗᔅ ᐃᐊᒃᑯᑦ ᑲᑎᖕᖓᔨᖏᓐᓄᑦ ᓯᕗᓕᕐᑎᐅᓱᓂ 1990-1993 ᐊᕐᕌᒍᖏᓐᓂ. ᑲᑎᖕᖓᔨᓄᑦ ᓯᕗᓕᕐᑎᒋᔭᐅᖃᑦᑕᓯᒪᒻᒥᔪᖅ ᐊᒥᓱᑲᓪᓚᓂ ᐱᓇᓱᒐᖃᕐᕕᐅᔪᓂᒃ, ᐃᓚᐅᑎᓪᓗᒋᑦ ᓯᑯ ᐃᖃᓗᓐᓂᐊᑎᒃᑯᑦ (1998-94) ᐆᑦᑐᓕᒃ ᐊᑦᑕᑐᐊᑦᓴᓕᒃᑯᑦ (1988-94) ᐊᒻᒪᓗ ᑭᒡᒐᖅ ᐊᐅᓚᒍᑎᓕᕆᔨᒃᑯᑦ (1988-94).

ᐃᓄᓕᒫᓄᓕᖓᔪᓂᒃ ᐱᓇᓱᒐᖃᖃᑦᑕᓯᒪᒻᒥᔪᖅ ᐅᑯᐊ ᐃᓚᐅᑎᓪᓗᒋᑦ ᐱᑦᔪᔨᖃᑕᐅᑦᓱᓂ ᓯᕗᓕᕐᑎᐅᖃᑕᐅᑦᓱᓂ ᐃᓄᐃᑦ ᑲᑎᖕᖓᔨᖏᓐᓄᑦ ᑲᓇᑕᓕᒫᒧᓕᖓᔪᓂᒃ ᐱᔭᑦᓴᖁᑎᖃᕐᓱᑎᒃ (1979-84), ᐃᓚᐅᔫᖃᑕᐅᑦᓱᓂ ᓄᓇᕕᒻᒥ ᐱᖁᔭᕐᔪᐊᓕᕆᓂᕐᒧᑦ ᑲᑎᖕᖓᔨᓄᑦ (1985-95) ᐊᒻᒪᓗ ᑲᑎᖕᖓᔨᓄᑦ ᐃᓚᐅᔫᖃᑕᐅᑦᓱᓂ ᐃᓄᐃᑦ ᑕᐱᕇᓴᑦ ᑲᓇᑕᒥᒃᑯᓂ (1988-94).

ᑐᓂᔭᐅᒪᒻᒥᔪᖅ ᑯᐯᒃᒥ ᑲᕙᒪᒃᑯᑦ ᐃᓕᑕᕐᓯᒪᒍᑎᖓᓂᒃ Officer of the National Order of Quebec-ᒥᒃ (1994), ᐱᖁᔭᓕᐅᕐᑎ ᓵᓕ ᒍᐊᑦ ᑐᓂᔭᐅᒪᒋᕗᖅ 1997-ᒥ National Aboriginal Achievement Award ᑲᓇᑕᒥᐅᑦ ᓄᓇᓕᑐᙯᑦ ᐱᔭᕆᐅᕐᓯᒪᓂᕐᒥᓄᑦ ᓇᓗᓀᕐᑕᐅᖑᑎᑦᓴᔭᖓᓂᒃ, ᑐᓂᔭᐅᓯᒪᒻᒥᓱᓂᓗ ᐊᑕᓂᐊᓘᑉ ᓇᓗᓀᕆᒍᑎᖏᓐᓂᒃ ᐅᔭᒦᓐᓂᒃ ᐊᑦᓯᕋᐅᑎᖃᕐᓱᑎᒃ the Queen’s Golden ᐊᒻᒪᓗ Diamond Jubilee medals.

ᓵᓕ ᒍᐊᑦ ᐃᓅᓕᕐᓯᒪᕗᖅ ᑰᒃᔪᐊᒥ, ᐃᓕᓐᓂᐊᓯᒪᑦᓱᓂ ᐅᑯᐊ ᓄᓀᑦ ᐃᓕᓐᓂᐊᕕᖏᓐᓂ ᑰᒃᔪᐊᖅ, ᑯᐯᒃ; ᔨᐊᓗᓀᕝ; ᑭᖕᓯᑕᓐ; ᐋᑐᒑ; ᒪᓐᑐᔨᐊ; ᖃᓕᕚᒃᓯ ᐊᒻᒪᓗ ᐳᔮᓐᑕᓐ.

ᐊᕐᓇᒥᓂᒃ ᑲᑎᑎᑕᐅᒪᖃᑎᓕᒃ ᐁᑕᒥᒃ (ᐃᐳ), ᐊᑖᑕᒋᔭᐅᑦᓱᓂ ᑖᓄᓪ, ᐅᔮᐳᑦ, ᓖᓴ, ᐱᓕ ᐊᒻᒪᓗ ᓵᓖᓐ. ᐊᒥᓱᓂᒃ ᐃᕐᖑᑕᓕᒃ.

ᓵᓕ ᒍᐊᑦ