ᐋᓐᑎ ᒧᐊᖃᐅᔅ

  • ᐋᓐᑎ ᒧᐊᖃᐅᔅ
    Vice President
    Economic Development

    Makivik Executive
  • Phone: 1-819-254-1173 Fax: 1-819-254-1040
  • Email:

ᐅᓂᒃᑳᑕᐅᒍᑎᖏᑦ

ᐊᖓᔪᕐᖄᑉ ᑐᖓᓕᖓ ᒪᑭᑉᐸᓕᐊᒍᑎᑦᓴᓕᕆᕕᒻᒥ

ᐋᓐᑎ ᐱᒍᓐᓇᓂᖃᑦᓯᐊᓱᓂ ᐃᓄᑐᐃᓐᓇᐅᓱᓂ ᐱᕙᓪᓕᖁᑎᑖᕐᑕᑑᕗᖅ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ, ᐃᓅᓕᕐᓯᒪᔪᖅ ᒪᓐᑐᔨᐊᒥ ᐆᒃᑐᐱᕆ 9, 1979-ᒥ. ᐃᓄᑦᔪᐊᒥ ᐱᕈᕐᓴᓚᐅᔪ, ᑕᒫᓂᓗ ᐳᕐᑐᓂᕐᓴᒥᒃ ᐃᓕᓐᓂᐊᑕᒥᓂᒃ ᐱᔭᕇᕈᓯᕐᑕᐅᓚᐅᔪᕗᖅ. ᐅᑭᐅᖃᓕᕐᓱᓂ 20-ᓂᒃ ᓂᕈᐊᕐᑕᐅᒋᐊᖕᖓᓯᒪᕗᖅ ᐃᓄᑦᔪᐊᒥᐅᑦ ᓄᓇᓕᖓᑕ ᑲᕙᒫᐱᒃᑯᖏᓐᓂ ᑲᑎᖕᖓᔨᐅᖃᑕᐅᓚᖓᓕᕐᓱᓂ.

ᐋᓐᑎ ᒨᖃᐅᔅ ᑕᒐᑕᒐ ᓂᕈᐊᕐᑕᐅᒪᒋᐅᕐᕕᒥᓃᑦᑐᖅ ᐊᖓᔪᕐᖄᒧᑦ ᑐᖓᓕᐅᑦᓱᓂ ᐱᔭᑦᓴᖁᑎᖃᕐᓱᓂ ᒪᑭᕝᕕᒥ ᒪᑭᑉᐸᓕᐊᒍᑎᑦᓴᓕᕆᕕᒻᒥ. ᑖᓐᓇ ᓂᕈᐊᕐᑕᐅᒪᕕᒋᑦᓱᒍ ᒫᓐᓇ ᐃᓂᖓ ᐱᖓᑦᓯᐅᑎᒋᓕᕐᑕᖓᑦ ᒪᑭᕝᕕᐅᑉ ᐳᕐᑐᓂᕐᓴᖏᓐᓄᑦ ᐃᓚᐅᑦᓱᓂ – ᓂᕈᐊᕐᑕᐅᒋᐊᖕᖓᓯᒪᒐᒥ ᒪᑭᕝᕕᒧᑦ ᐊᓪᓚᑎᒻᒪᕆᐅᓚᖓᓕᕐᓱᓂ 2010-ᖑᑎᓪᓗᖑ ᑕᒃᑲᓂᓗ ᐊᓪᓚᑎᒻᒪᕆᐅᑉ ᐃᓂᖓᓂ ᓂᕈᐊᕐᑕᐅᓯᒪᓚᐅᔪᕗᖅ ᒪᕐᕉᓂ ᓂᕈᐊᕐᑕᐅᒪᓈᓐᓂ.

ᐊᓪᓚᑎᒻᒪᕆᖕᖑᓗᓂ ᓂᕈᐊᕐᑕᐅᓂᕐᒥ ᓯᕗᓂᖓᒍᑦ, ᐋᓐᑎ ᐱᓇᓱᖃᑦᑕᓚᐅᔪᕗᖅ ᒪᑭᕝᕕᒧᑦ ᒪᑭᑕᒐᓱᒍᑎᓕᕆᐅᑎᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᑦᑎᒋᔭᐅᑦᓱᓂ ᐊᑕᐅᑦᓯᑯᓪᓗ ᐊᑕᐅᑦᓯᑯᕐᑎᓯᔨᐅᑦᓱᓂ ᐅᖓᓗᒃᑯᑎᒍᑦ ᐱᓇᓱᒍᑎᓂᒃ, ᑖᒃᑯᐊ ᐊᐅᓚᑕᐅᓂᖃᕐᑐᑦ ᑲᑐᑦᔮᖑᑦᓱᑎᒃ ᒪᑭᕝᕕᒧᓪᓗ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ, ᑮᓇᐅᔭᖃᕐᑎᓯᔨᐅᑦᓱᑎᒃ ᐃᓗᕐᖁᓯᕐᑎᒎᕐᓂᖃᕐᓂᓴᓂᒃ ᐱᓇᓱᒍᑎᓂᒃ ᑐᕌᕐᑕᖃᕈᑎᐅᑦᓱᑎᒃ ᐱᖁᔭᓂᒃ ᓯᖁᒃᑎᕆᓂᕐᒥᒃ ᐱᓂᕐᓗᐊᒍᑎᐅᓲᓂᒃ ᐊᑑᑎᑎᑦᓯᑌᓕᒍᑎᓂᒃ ᓄᓇᓖᑦ ᑲᑉᐱᐊᓇᖕᖏᓂᕐᓴᓂᒃ ᖃᓄᐃᖕᖏᓯᐊᕐᑐᓂᒃᓗ ᓄᓇᓕᖃᕈᓐᓇᖁᓪᓗᒋᑦ.

ᐊᕐᕌᒍᓂ ᐱᒋᐊᕐᕕᓕᐅᑎᔪᓂ 2007-ᒥᑦ ᑎᑭᑦᓱᒍ 2010, ᐋᓐᑎ ᐊᖓᔪᕐᖃᒪᕆᒋᔭᐅᓚᐅᔪᕗᖅ ᑲᑎᕕᒃ ᓄᓇᓕᓐᓂ ᐃᒡᓗᓕᕆᔨᕐᔪᐊᑯᓐᓄᑦ; ᓂᕈᐊᕐᑕᐅᒪᑦᓱᓂ ᐅᖃᕐᑎᒋᔭᐅᑦᓱᓂᓗ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᓄᑦ; ᓂᕈᐊᕐᑕᐅᒪᑦᓱᓂ ᐃᓚᐅᔫᖃᑕᐅᑦᓱᓂ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒧᑦ ᐃᓚᐅᕕᒋᓚᐅᔪᒻᒥᔭᕐᒥᓂ ᐳᕐᑐᓂᕐᓴᒥᒃ ᑲᑎᖕᖓᔨᖏᓐᓄᑦ.

ᐃᓚᐅᑎᓪᓗᒋᑦ ᓯᕗᓪᓕᐹᒥ ᓂᕈᐊᕐᑕᐅᒪᓂᕆᓯᒪᔭᖓᓄᑦ ᐃᓄᑦᔪᐊᑉ ᑲᕙᒫᐱᒃᑯᖏᓐᓂ 1999-ᒥ ᐋᓐᑎ ᓂᕈᐊᕐᑕᐅᓯᒪᑦᓱᓂ ᐃᓄᑦᔪᐊᑉ ᑲᕙᒫᐱᖓᓄᑦ ᑲᑎᖕᖓᔨᐅᖃᑕᐅᖃᑦᑕᓯᒪᕗᖅ ᐊᕐᕌᒍᓂ ᐅᑯᓇᓂ 2001, 2007 ᐊᒻᒪᓗ 2009. 2003-2005 ᐊᕐᕌᒍᖏᓐᓂ ᐃᓄᑦᔪᐊᑉ ᓄᓇᓕᖓᓂ ᓯᕗᓕᕐᑎᐅᓚᐅᔪᖅ. 2003-ᒥ ᓂᕈᐊᕐᑕᐅᓚᐅᕐᓯᒪᒻᒥᓱᓂ, ᑮᓇᐅᔭᓕᕆᔨᐅᓚᖓᓕᕐᑎᓗᒍ ᑲᑎᕕᒃ ᓄᓇᓕᓐᓂ ᐃᓪᓗᓕᕆᔨᕐᔪᐊᑯᓐᓄᑦ. 1999-2003 ᐊᕐᕌᒍᖏᓐᓂ ᐊᖓᔪᕐᖄᖑᓚᐅᔪᒻᒥᔪᖅ ᓴᐳᑏᑦ ᐅᕕᒃᑫᑦ ᑲᑐᑦᔨᖃᑎᒌᓐᓂᖓᓄᑦ ᓄᓇᕕᒻᒥ.

ᐋᓐᑎ ᒨᖃᐅᔅ ᐊᖏᕐᕋᖃᕐᐳᖅ ᐃᓄᑦᔪᐊᖅ, ᓄᓇᕕᒻᒥ. ᐱᒍᓐᓇᕕᓕᒫᒥᓄᑦ ᕿᑐᕐᖓᒥᓂᒃ ᒪᙯᖃᑎᖃᖏᓐᓇᕋᓱᓲᖅ, ᐊᖁᐃᒪᖃᑎᒋᑦᓱᒋᓪᓗ ᐃᖃᓗᓐᓂᐊᖃᑎᒋᑦᓱᒋᓪᓗ ᐊᕐᕌᒍᓕᒫᒥ ᐃᓕᓴᕐᐸᓱᓂᒋᑦ ᐃᓄᐃᑦ ᐱᐅᓯᑐᖃᖏᓐᓂᒃ. ᐋᓐᑎ ᓴᐳᑦᔨᓯᒪᑦᓯᐊᓚᕆᑦᑐᖅ ᐃᓄᒃᑎᑐᑦ ᐅᖃᐅᓯᕐᒥᒃ ᐊᓯᐅᖁᔨᒐᓂ ᖁᕝᕙᑎᕐᓱᓂᐅᒃᓗ, ᐃᓱᒪᒃᑯᓗ ᖃᓄᐃᖕᖏᓯᐊᕐᑐᓴᐅᓂᕐᓂᒃ ᐅᕕᒃᑫᓗ ᐱᕙᓪᓕᐊᑎᑕᐅᒍᑎᖏᓐᓂᒃ.

ᐋᓐᑎ ᒧᐊᖃᐅᔅ