ᐋᑕᒥ ᐹᑦᓚᔮᑦ

  • ᐋᑕᒥ ᐹᑦᓚᔮᑦ
    Corporate Secretary
    Makivik Executive

ᐅᓂᒃᑳᑕᐅᒍᑎᖏᑦ

ᐊᓪᓚᑎᒻᒪᕆᒃ

ᓄᓇᕕᐅᑉ ᐃᓄᑐᐃᓐᓇᖏᑦ ᐱᕙᓪᓕᖁᑎᑖᕐᑕᑐᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ ᓂᕈᐊᓚᐅᔪᕗᑦ ᐋᑕᒥ ᐹᓪᓚᔮᒥᒃ ᑭᒡᒐᑐᕐᑎᒋᓂᐊᓕᕐᓱᒍ ᒪᑭᕝᕕᒥᒃ ᐊᓪᓚᑎᒻᒪᕆᐅᑉ ᐃᓂᖓᓂ ᓂᕈᐊᕐᑕᐅᕕᒋᓚᐅᔪᔭᖓᓂ ᔭᓄᐊᕆ 21, 2016-ᖑᑎᓪᓗᒍ.

ᒪᑭᕝᕕᐅᑉ ᐳᕐᑐᓂᕐᓴᒥ ᑲᑎᖕᖓᔨᖏᓐᓄᑦ ᓂᕈᐊᕐᑕᐅᓚᐅᕋᓂ, ᐋᑕᒥ ᐳᕐᑐᓂᕐᓴᒥᒃ ᑐᑭᒧᐊᑦᑎᓯᔨᐅᓚᐅᔪᕗᖅ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓄᑦ, ᐃᓄᑦᔪᐊᒦᑐᒧᑦ. ᐃᓚᐅᓚᐅᔪᖅ ᐱᕙᓪᓕᐊᑎᑕᐅᒍᑎᖃᕐᑎᓗᒋᑦ ᕿᓚᓗᒐᕐᓂᒃ ᑲᒪᔨᐅᖃᑎᒌᓐᓂᒥᒃ ᐱᓇᓱᒍᑎᑦᓭᑦ ᐃᓚᐅᕕᖃᓚᐅᔪᒻᒥᓱᓂᓗ ᐊᑕᐅᑦᓯᑯᕐᑎᓯᔨᒋᔭᐅᑦᓱᓂ ᓯᕗᓪᓕᐹᑦᓯᐊᒥᒃ ᐃᓄᓕᒫᑦ ᑐᑭᓯᓂᐊᕐᕕᐅᑎᓪᓗᒋᑦ ᓇᓄᕐᓅᓕᖓᔪᓂᒃ ᑕᓯᐅᔭᕐᔪᐊᑉ ᓯᕿᓂᐊᓂ.

ᐋᑕᒥ ᐃᓕᓐᓂᐊᕇᕈᑎᑖᕐᓯᒪᔪᖅ ᐃᑯᓯᒃ ᐳᕐᑐᓂᕐᓴᒥᒃ ᐃᓕᓐᓂᐊᕕᒻᒥ ᐊᕐᕌᒍᓕᒫᒋᐊᓪᓚᒥᓗ ᐃᓕᓐᓂᐊᕆᐊᓪᓚᓯᒪᑦᓱᓂ ᐳᕐᑐᓂᕐᓴᒥᒃ ᔮᓂᒻᒪᕆᒃ ᐃᓕᓐᓂᐊᕕᒻᒥ ᑰᒃᔪᐊᒥ. ᐱᔪᒪᓂᕐᑖᓚᕿᒍᑎᖃᕐᓱᓂ ᐊᒃᑲᒥ ᐋᑕᒥ ᐊᓚᑰᑉ ᐱᓂᐊᕐᑕᖓᓂᒃ, ᖃᖓᑦᑕᔫᕈᓐᓇᐅᑎᑖᓕᓚᐅᔪᒻᒥᔪᖅ Cornwall Aviation/ᑰᓐᒍᐊᓪᒥ ᖃᖓᑦᑕᔫᕐᑎᐅᒋᐅᕐᓴᕕᒻᒥᑦ, ᑲᓇᑕᒥ ᐱᔪᓐᓇᑕᖃᑦᓯᐊᒪᕆᑦᓱᑎᒃ ᖃᖓᑦᑕᔫᕐᑎᐅᓂᕐᒥᒃ ᐃᓕᓐᓂᐊᑎᑦᓯᕕᐅᓲᒥᑦ.

ᐋᑕᒥ ᐊᑯᓕᕕᒻᒥᐅᖑᓯᒪᒻᒥᔪᖅ, ᑖᕙᓂ ᐃᓄᐃᑦᑯᓄᑦ ᐱᓇᓱᑦᑎᐅᓚᐅᔪᖅ. ᓄᓇᓕᓐᓄᓗ ᖃᓄᐃᖕᖏᓯᐊᕐᑐᓴᐅᓂᕐᒥᒃ ᐱᓇᓱᑦᑎᐅᓱᓂ, ᑭᖑᓂᐊᒍᑦ ᐊᓪᓚᑎ-ᑮᓇᐅᔭᓕᕆᔨᒧᑦ ᐃᑲᔪᕐᑎᐅᓕᓚᐅᔪᒻᒥᔪᖅ ᐊᑯᓕᕕᒻᒥᐅᑦ ᑲᕙᒫᐱᒃᑐᖏᓐᓂ. ᓂᕈᐊᕐᑐᓕᕆᔨᐅᓚᐅᔪᒻᒥᓱᓂᓗ ᓄᓇᕕᓪᒫᒥ ᓂᕈᐊᕐᑎᑕᐅᓂᖃᕐᑎᓗᒋᑦ ᐱᑦᔪᑎᒋᑦᓱᒍ ᓄᓇᕕᒻᒥ ᓇᒻᒥᓂᖅ ᑲᕙᒪᑦᓴᖅ ᓂᕈᐊᕈᑎᐅᓚᐅᔪᖅ 2010-2011 ᐊᕐᕌᒍᖏᓐᓂ. ᐃᑲᔪᕐᓯᓯᒪᒻᒪᕆᒻᒥᔪᖅ 2006-2007-ᖑᑎᓪᓗᒍ ᓄᐃᑕᐅᒍᑎᖃᕐᑎᓗᒋᑦ ᐃᓅᓯᕐᒥᒃ ᐅᐱᒍᓱᓐᓂᒥᒃ ᐅᕕᒃᑫᑦ ᐱᓇᓱᑦᑎᑕᐅᒍᑎᒋᓯᒪᔭᖓᑦ ᓄᕐᖃᑎᑦᓯᒋᐊᕋᓱᒍᑎᐅᓯᒪᔪᖅ ᕿᕕᓐᓂᒥᒃ ᐃᒻᒥᓂᐊᕐᓂᒥᒃ.

ᑖᓐᓇ ᓂᕈᐊᕐᑕᐅᒪᓂᖓ ᐊᑕᒥ ᐹᓪᓚᔮᑦ ᓯᕗᓪᓕᐹᒥᒃ ᒪᑭᕝᕕᒥ ᐱᓇᓱᕝᕕᖃᕆᐅᕈᑎᒋᖕᖏᑕᖓ. ᐃᓄᑦᔪᐊᒧᑦ ᐊᕐᓇᒥ ᓄᓇᓕᖓᓄᑦ ᓄᑦᑎᓂᕐᒥ ᓯᕗᓂᖓᒍᑦ, ᑰᒃᔪᐊᒥᐅᖑᓯᒪᔫᒃ ᐋᑕᒥ ᐱᓇᓱᓚᐅᔪᒻᒪᑦ ᐅᕕᒃᑲᓄᑦ ᑐᕐᖃᑕᕐᕕᐅᓂᕐᒥᒃ ᐊᑕᐅᑦᓯᑯᓪᓗ ᒪᑭᕝᕕᒧᑦ ᓂᕈᐊᕐᑐᓕᕆᔨᒻᒪᕆᒋᔭᐅᑦᓱᓂ. ᐳᕐᑐᓂᕐᓴᒋᐊᓪᓚᒥᒃ ᐱᓇᓱᒐᕐᑖᓕᓚᐅᔪᒻᒥᔪᖅ ᐊᖓᔪᕐᖄᑉ ᑐᖓᓕᖓᓄᑦ ᐃᑲᔪᕐᑎᒋᔭᐅᓯᑦᓱᓂ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᓄᑦ ᐱᕙᓪᓕᐊᑎᑦᓯᕕᒻᒥ.

ᐋᑕᒥ ᐹᓪᓚᔮᑦ ᐃᓅᓕᕐᓯᒪᕗᖅ ᓴᓪᓗᓂ, ᑯᐯᒃ ᓄᓇᓕᕐᔪᐊᖓᓂ ᖁᑦᓯᓂᕐᐹᖑᖃᑕᐅᔪᒥ ᐃᓄᐃᑦ ᓄᓇᓕᖓᓂ, ᐃᓅᓕᕐᓱᓂ ᒫᑦᔨ 14, 1972-ᖑᑎᓪᓗᒍ. ᕿᑐᕐᖓᑕᖑᓯᒪᑦᓱᓂ ᐹᓪ ᐳᑐᓕᒃ ᐊᓚᑯᒧᓪᓗ ᓴᓚ ᐹᓪᓚᔮᑦᒧᓪᓗ. ᐋᑕᒥᒃᑯᒃ ᐊᕐᓇᕇᒃ ᓯᑎᐸᓂ ᐱᐅᕖᒃᑰ ᐃᓄᑦᔪᐊᒥ ᐊᖏᕐᕋᖃᕐᕕᖃᓕᕐᑑᒃ, ᕿᑐᕐᖓᒥᓂᒃ ᓯᒥᐅᓂᒥᓪᓗ ᐸᓂᒻᒥᓂᓪᓗ ᕿᕐᓂᐅᓚᐅᒥᒃ ᐃᓚᖃᕐᓱᑎᒃ. ᓯᑕᒪᓂᒃ ᐃᕐᖑᑕᖃᕐᒥᔫᒃ.

ᑌᒪᖕᖓᑦ ᐃᓄᑦᔪᐊᒥᐅᖑᓯᓚᐅᔪᒐᒥᓂᑦ, ᐋᑕᒥ ᐊᕐᕌᒍᓐᓂ ᒪᕐᕉᓂ ᐃᓚᐅᓲᑐᖃᐅᓕᕐᒥᔪᖅ ᐃᓄᑦᔪᐊᒥᐅᑦ ᑲᕙᒫᐱᒃᑯᖏᑕ ᑲᑎᖕᖓᔨᖏᓐᓄᑦ. ᖁᕕᐊᒋᔭᖃᕐᐳᓗ ᑐᓴᕐᓈᕈᑎᓂᒃ ᐱᖕᖑᐊᕆᐊᒥᓪᓗ ᓂᑦᔭᓗᑦᑖᕆᐊᒥᓪᓗ ᓂᑦᔭᓗᑦᑖᕈᑎᖏᑦ ᓲᕐᓗ ᐊᓂᕐᖃᒥ ᐃᓄᑑᓗᖓ ᐊᒻᒪᓗ ᐅᐱᕐᖔᒥ ᑐᓴᐅᑎᒃᑯᑦ ᓂᑦᔭᑎᑕᐅᓲᒃ ᓄᓇᕕᒻᒥ. ᐃᖃᓗᓐᓂᐊᕆᐊᒥᒃ ᐊᓕᐊᒋᔭᓕᒃ, ᖁᕕᐊᓱᒻᒥᓱᓂᓗ ᓂᕐᓕᓯᐅᖃᑎᖃᕆᐊᒥᒃ ᐱᖃᓐᓈᒥᓂᒃ. ᐃᓕᒌᑦᑐᓄᑦ ᐃᓚᐅᑦᓯᐊᖏᓐᓇᓲᖑᒐᒥ, ᐋᑕᒥ ᐹᓪᓚᔮᑦ ᕿᑦᑌᖓᔮᕈᑎᖃᑦᓯᐊᒪᕆᑉᐳᖅ ᐱᐅᓂᕐᓴᒥᒃ ᐃᓅᓯᖃᖁᓪᓗᒋᑦ ᓄᓇᕕᒻᒥᐅᑦ ᐊᑦᑕᓀᑦᑐᓯᐊᒥᓪᓗ ᐃᓗᕐᖁᓯᕐᒥᓂᓪᓗ ᐱᒻᒪᕆᐅᑎᑕᒥᓂᓪᓗ ᑲᔪᓯᓂᖃᑦᓯᐊᖁᑦᓱᒋᑦ ᓄᓇᕕᐅᑉ ᐃᓄᑐᐃᓐᓇᖏᑦ.

ᐋᑕᒥ ᐹᑦᓚᔮᑦ