Social Development

social-developmentᐃᓅᖃᑎᒌᓐᓂᑎᒍᑦ ᐱᕈᕐᐸᓕᐊᑎᑦᓯᓂᖅ ᓄᓇᕕᒻᒥ ᑕᐅᑐᑦᑕᐅᔪᑦᓴᐅᕗᖅ ᐱᓇᓱᐊᖃᑎᒌᓐᓂᕆᔭᐅᑎᓪᓗᒍ ᒪᑭᕝᕕᒧᑦ, ᑯᐯᑉ ᑲᕙᒪᖓᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ.

ᐃᓘᓐᓇᖓᒍᑦ ᒪᓕᒐᖃᕐᓂᖅ ᐃᓅᖃᑎᒌᓄᑦ, ᐱᓇᓱᐊᕐᑎᓯᒍᑎᓄᑦ ᐱᒍᑦᔨᒍᑎᓄᓪᓗ ᑯᐯᑉ ᑲᕙᒪᖓᑕ ᑎᒍᒥᐊᕐᑕᖓ ᐊᒻᒪᓗ ᓄᓇᕕᒻᒥ ᐃᓗᓯᓕᕆᔩᑦ ᐃᓄᓕᕆᔩᓪᓗ, ᑌᒣᑎᑕᐅᓯᒪᒻᒪᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ. ᑌᒣᒐᓗᐊᕐᑎᓗᒍ ᒪᑭᕝᕕᒃ ᐃᒪᒋᔭᐅᑎᑦᓯᓯᒪᔪᖅ ᐃᓅᖃᑎᒌᑎᒍᑦ ᐱᕈᕐᐸᓕᐊᑎᑦᓯᓂᕐᒥᒃ ᑎᓕᔭᐅᓯᒪᒍᑎᒥᓄᑦ ᓴᑑᑎᓖᑦᓱᓂ “ᐃᓗᓯᕐᓱᓯᐊᕐᑐᓴᐅᓂᖓᑦ ᖃᓄᐃᙱᓯᐊᕆᐊᖃᕐᓂᖓᓗ ᓄᓇᕕᒻᒥᐅ ᐃᓄᐃᑦ” ᑎᓕᔭᐅᓯᒪᒍᑎᒥᒍᑦ.

ᑌᒣᓐᓂᖓᓄᑦ, ᐊᔪᒉᑦᑑᖏᑦᑐᖅ ᒪᑭᕝᕕᒃ ᓲᖑᔪᒥᒃ ᐱᒍᑦᔨᒐᓱᐊᕐᒪᑦ ᐱᒻᒪᕆᐅᑎᑦᓱᓂᐅᒃ ᐃᓅᖃᑎᒌᑦ ᓄᓇᓖᓪᓗ ᐱᕈᕐᐸᓕᐊᒋᐊᖃᕐᓂᖓ ᑮᓇᐅᔭᖃᕐᑎᑕᐅᓲᖅ ᒪᑭᕝᕕᒧᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᓄᓇᕕᒻᒥ ᐃᓗᓯᓕᕆᔩᑦ ᐃᓄᓕᕆᔨᓄᑦ ᑯᐯᓪᓗ ᑲᕙᒪᖓᓄᑦ.

ᐊᕐᕌᒍᓂ ᐊᕙᑎᓪᓗ ᖁᓕᓪᓗᓂ ᐊᓂᒍᕐᑐᓂ, ᒪᑭᕝᕕᒃ ᑮᓇᐅᔦᕈᑎᖃᕐᓯᒪᓕᕐᑐᖅ R100 ᒥᓕᐊᓂᒃ ᐃᓄᖃᑎᒌᑎᒍᑦ ᐱᕈᕐᐸᓕᐊᑎᑦᓯᓂᕐᒧᑦ ᓄᓇᓕᓐᓂᓗ ᐱᓇᓱᐊᕐᑎᓯᒍᑎᓄᑦ, ᐃᙯᓕᓴᕐᕕᓕᐅᕐᓂᑎᒍᑦ ᓯᐊᕐᕆᔭᕐᕕᓂᓪᓗ, ᐳᐃᑦᔪᕋᕐᕕᓂᒃ ᐅᕕᒐᕐᑐᑦ ᒪᙯᑎᑕᐅᕕᖏᓐᓂᒃ ᑖᒃᑯᐊ ᐃᓂᓪᓚᖓᑦᓯᐊᑐᓂᒃ ᐱᕈᕐᐸᓕᐊᒍᑎᐅᓂᐊᕐᑐᓂᒃ ᓄᓇᕕᐅᑉ ᐅᕕᒐᕐᑐᖏᓄᑦ ᑐᕌᒐᖃᕐᑎᓗᒋᑦ. ᑖᒃᑯᐊ ᐃᓅᖃᑎᒌᑎᒍᑦ ᐱᕈᕐᐸᓕᐊᑎᑦᓯᒍᑏᑦ ᑐᕌᒐᖃᖃᑦᑕᒥᔪᑦ ᐃᓄᑐᖃᕐᓂᒃ ᐱᓇᓱᐊᕐᑎᓯᒍᑎᐅᓂᐊᕐᑐᓂᒃ ᓄᓇᕕᒻᒥ.

ᒪᑭᕝᕕᒃ ᐃᑲᔪᕐᓯᒪᓲᖑᒻᒥᔪᖅ ᓴᐳᑏᑦ ᐅᕕᒐᕐᑐᑦ ᑲᑐᑦᔨᖃᑎᒌᓐᓂᖓᓂᒃ ᐃᑲᔪᓲᖑᒻᒥᓱᓂᓗ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓂᒃ ᓄᓇᕕᒻᒥ, ᑌᔭᐅᓲᓂᒃ ᓴᑐᕐᕖᑦ ᑐᑭᖃᕐᑎᓗᒍ “ᓂᕆᐅᓂᑖᕐᕕᒃ”, ᓴᑐᕐᕖᑦ ᓴᕐᕿᑎᑕᐅᓯᒪᔪᑦ 2005-ᖑᑎᓪᓗᒍ ᐊᕐᓇᓄᑦ ᖁᓕᓪᓗ ᓯᑕᒪᓪᓗᓄᑦ ᓄᓇᕕᒻᒥ ᑲᑎᖃᑎᒌᑦᑎᓗᒋᑦ ᐳᕕᕐᓂᑐᒥ ᑖᒃᑯᐊ ᐃᓱᒫᓗᒋᔭᖃᓚᐅᔪᒻᒪᑕ ᐃᓄᐃᑦ ᖃᓄᐃᑦᑐᒦᓐᓂᖏᓐᓂᒃ, ᐃᓚᐅᑎᓪᓗᒍ ᐃᓚᒌᑎᒍᑦ ᐱᓗᑲᐅᑎᖃᑦᑕᓂᖅ, ᓄᓇᓕᓐᓂᓗ. ᑖᒃᑯᐊ ᐃᓱᒫᓗᒍᑎᖏᑦ ᐃᓚᒥᓂᒃ ᐱᕈᕐᓭᓂᖅ, ᐃᓕᓐᓂᐊᓂᖅ, ᐃᓄᐃᑦ ᐅᖃᐅᓯᖓᑦ, ᕿᑐᕐᖓᐅᔪᑦ ᐅᖃᕐᑎᖃᕐᑐᓴᐅᓂᖏᑦ, ᐃᓄᓅᓕᖓᔪᓂᒃ ᐊᙱᐊᖏᔭᕈᑎᖃᕐᓂᖅ, ᐃᒻᒥᓂᐊᕐᓂᕆᖃᑦᑕᑕᖓᓗ ᐅᕕᒐᕐᑐᑦ ᐳᕐᑐᓗᐊᕐᓂᖓ. ᓴᑐᕐᕖᑦ ᐊᓂᒍᕐᑎᓯᓚᐅᔪᒻᒥᔪᑦ ᐅᖃᒻᒪᕆᒍᑎᒥᒃ ᓄᕐᖃᑎᑦᓯᒐᓱᐊᕐᓂᒧᑦ ᐊᕐᓀᑦ ᐱᓗᑲᑦᑕᐅᖃᑦᑕᓂᖓᓂᒃ ᓄᓇᕕᒻᒥ.