Salluit

ᑐᑭᖓ: ᓴᓪᓗᑯᑖᑦ
ᐃᓄᑦᑕᖏᑦ: 1241


salluit1ᓴᓪᓗᐃᑦ ᑲᖏᕐᓱᑯᑖᑉ ᐃᓱᐊᓂ ᐃᓂᖃᕐᑐᖅ 10 ᑭᓚᒦᑕᓂᒃ ᐅᖓᓯᓐᓂᓕᒻᒥᑦ ᓄᓇᒧᑦ ᐃᑭᕋᓴᕐᔪᐊᑉ ᐃᒪᖓᓂᑦ ᑕᕐᕆᐅᒪᔭᐅᑦᓱᓂ ᐳᕐᑐᔪᒻᒪᕆᓐᓄᑦ ᖃᖅᑲᔪᐊᓄᑦ 500 ᒦᑕᓂᒃ ᐳᕐᑐᓂᓕᓐᓄᑦ. ᓴᓪᓗᐃᑦ ᕿᑎᖓᓃᕝᕕᐅᔪᖅ ᓄᓇᕕᐅᑉ 14-ᖏᓐᓄᑦ ᓄᓇᓕᖏᓐᓄᑦ, ᓈᒻᒪᒋᔭᐅᑦᓱᓂ ᑲᑎᒪᒋᐊᕐᑐᕕᐅᑲᑦᑕᓲᖅ ᑕᒪᒃᑯᓄᖓ ᑕᓯᐅᔭᕐᔪᐊᒥᐅᓄᓪᓗ ᐅᖓᕙᒥᐅᓄᓪᓗ.

ᓄᓇᓖᑦ ᐊᑦᓯᑕᐅᒪᒍᑎᖓ ᑌᒣᑦᑐᒥᒃ ᐱᐅᓯᙯᓐᓇᓲᖑᖏᑲᓗᐊᕐᑎᓗᒍ, ᑕᒪᑦᓱᒪᐅᑉ ᓄᓇᖓ ᐆᒪᔪᖃᑦᓯᐊᑐᒻᒪᕆᐅᔪᖅ ᐅᑭᐅᕐᑕᑑᓪᓗ ᐱᕈᕐᑐᔭᖏᓐᓂᒃ. ᓯᑦᔭᖓᑕ ᐃᖅᑲᖓᓂ ᐅᕕᓗᖃᑦᓯᐊᒥᔪᖅ ᐊᒻᒨᒪᔪᕐᓂᓗ. ᓴᓪᓗᒥᐅᑦ ᐊᑦᔨᒌᖏᑐᓚᑳᓂᒃ ᓂᕆᒐᑦᓴᖃᓲᖑᒻᒥᔪᑦ ᒪᑯᓂᖓ ᐃᖃᓗᑉᐱᓂᒃ, ᑐᑦᑐᕕᓂᕐᓂᓗ, ᐸᓂᕐᑎᑕᒥᓪᓗ, ᐸᐅᒃᖓᓂᓪᓗ, ᐁᕋᕐᓂᓗ, ᑏᑦᓴᔭᓂᓪᓗ. ᓴᓪᓗᐃᑦ ᓄᓇᖓᓂ ᓯᓚᖓ ᐃᒃᑮᓇᕐᑐᒪᕆᐅᒍᓐᓇᒪᑦ ᐃᓄᖏᓐᓄᑦ ᐱᐅᓯᖃᕐᕕᐅᓯᐊᑐᐃᓐᓇᒥᔪᖅ ᐊᓐᓇᐅᒪᕕᐅᒍᓐᓇᓯᓯᒪᑦᓯᐊᑦᓱᓂ. ᑖᑦᓱᒪ ᓄᓇᓕᐅᑉ ᐊᑦᓯᑕᐅᒪᒍᑎᖓᓄᑦ ᐅᓂᒃᑲᐅᓯᖃᕐᑐᖅ, ᑌᑦᓱᒪᓂᐊᓗᒃ, ᐃᓚᖏᑦ ᐃᓄᐃᑦ ᐅᖃᐅᓯᖃᕐᑐᕕᓂᐅᒋᐊᖏᑦ ᑕᒪᑦᓱᒪᐅᑉ ᓄᓇᖓ ᐆᒪᔪᖃᑦᓯᐊᑐᒪᕆᐅᒋᐊᖓᓂᒃ. ᓱᓕ ᑎᑭᑐᐊᕋᒥᒃ ᓱᓇᖃᑦᓯᐊᖏᑦᑐᒨᕐᑐᕕᓂᐅᒐᒥᒃ ᐱᕐᓕᑲᓴᓚᕿᔪᕕᓃᑦ.

1958-ᒥ, ᑐᓂᕐᑕᓂᐊᕐᑐᕕᓃᑦ ᕿᑭᕐᑕᒥ, ᓴᓪᓗᐃᑦ ᑲᖏᕐᓱᖓᓃᑦᑐᒥᒃ. ᓄᐊᑕᕕᓃᑦ ᑕᑯᑦᓴᐅᑎᑦᓯᔪᕕᓃᑦ ᑕᒪᒃᑯᐊ ᑌᑦᓱᒪᓂᑌᑦ ᐃᓄᐃᑦ ᓇᔫᑎᔪᕕᓂᐅᒋᐊᖏᑦ ᑕᒪᑦᓱᒥᖓ ᓄᓇᒥᒃ 800 ᐊᕐᕌᒍᐃᑦ ᐃᓅᓕᓚᐅᕐᑎᓇᒍ ᑲᔦᑦᑑᓯ ᐃᓅᓕᕐᓯᒪᓕᕐᑎᓗᒍ 1000-ᓂᒃ ᐊᕐᕌᒍᓂᒃ. ᑖᒃᑯᐊ ᐱᖓᓱᑦ ᓴᒡᒐᑕᐅᓚᐅᔪᑦ ᐊᑦᓯᑕᐅᓚᐅᔪᑦ ᐅᑯᓂᖓ ᑭᐊᑌᓐᓇᖅ, ᑕᔭᕋᖅ ᐊᒻᒪᓗ ᑐᓄᒃ. ᓴᓪᓗᓂ ᑮᓇᙳᐊᖅ, ᒥᑭᔫᑦᓱᓂ ᑐᒑᕐᒥᑦ ᓴᓇᔭᕕᓂᐅᑦᓱᓂ ᓴᒡᒐᑕᕕᓂᐅᓚᐅᔪᖅ ᑕᔭᕋᐅᑉ ᓄᓇᖓᓂ ᐊᒻᒪᓗ ᓄᑕᐅᖏᓂᖃᕐᓱᓂ 400-ᓂᒃ ᐊᕐᕌᒍᓂᒃ ᑲᔦᑦᑑᓯ ᐃᓅᓕᓚᐅᕐᑎᓇᒍ.

1925-ᒥ, ᐃᒻᒥᓂᕿᔪᒥᒃ ᑕᐅᕐᓰᑲᑦᑕᑎᒥᒃ ᓂᐅᕕᕐᓂᐊᕕᒻᒥᒃ ᐅᒃᑯᐃᓯᔪᖃᕐᑐᕕᓂᖅ ᑌᑲᓂ ᓴᓪᓗᐃᑦ ᓄᓇᓕᒋᓕᕐᑕᖓᑕ ᐃᓂᖓᓂ. ᑭᓯᐊᓂ ᐱᓂᕐᓴᐅᓕᐅᑎᔪᒻᒪᕆᐅᑦᓱᑎᒃ ᑖᒃᑯᐊ ᖃᑦᓴᓐᐯᒃᑯᑦ ᑲᒻᐸᓂᖏᑦ ᓇᒻᒥᓂᖅ ᓂᐅᕕᕐᓂᐊᕕᑦᑖᓕᕐᑐᕕᓃᑦ ᓴᓪᓗᐃᑦ ᓄᓇᓕᒋᓕᕐᑕᖓᓂ. ᐊᕐᕌᒍᖅ ᐊᓂᒍᑐᐊᕐᒪᑦ ᑲᒻᐸᓂᒃᑯᑦ ᓅᓯᓐᓂᒥᔪᑦ ᓴᓪᓗᐃᑦ ᐁᑉᐸᖓᓄᑦ ᑭᓯᐊᓂ 1930-ᒥ ᓂᐅᕕᕐᓂᐊᕕᓕᐅᕐᓱᑎᓪᓗ ᐊᖏᕐᕋᓴᓕᐅᕐᓱᑎᓪᓗ ᔪᕕᓂᐅᓕᕐᑐᑦ ᓴᓪᓗᓂ. 1932-ᒥ ᓴᓪᓗᐃᑦ ᐁᑉᐸᖓᓃᑦᑐᒥᒃ ᐅᒃᑯᐃᓯᓕᕐᑐᕕᓃᑦ. ᒥᖅᑯᓕᓐᓂᒃ ᑕᐅᕐᓰᑲᑦᑕᓂᐅᓯᒪᔪᖅ ᐃᓱᓕᑦᑐᕕᓂᐅᔪᖅ 1936-ᒥ ᒥᖅᑯᓖᑦ ᐊᑭᖏᑦ ᑲᑕᑐᐊᕐᒪᑕ. ᑲᑕᓕᒃᑯᑦ ᑐᑦᓯᐊᕕᒻᒥᒃ ᓇᑉᐯᔪᕕᓂᐅᒐᓗᐊᕐᓱᑎᒃ 1930-ᒥ 20-ᒐᓚᑐᐃᓐᓇᓂᒃ ᐅᒃᑯᐃᖔᕐᑐᕕᓂᐅᔪᖅ. 1955-ᒥ ᐊᖓᓕᑲᒃᑯᑦ ᓄᐃᑦᓯᔪᕕᓂᐅᓕᕐᒥᔪᑦ ᑐᑦᓯᐊᕕᒻᒥᒃ ᐊᒻᒪᓗ ᒪᕐᕉᒃ ᐊᕐᕌᒍᐃᑦ ᐊᓂᒍᑐᐊᕐᒪᑕ ᑲᕙᒪᑐᖃᒃᑯᑦ ᐃᓕᓐᓂᐊᕕᓕᐅᓕᕐᓂᒥᔪᑦ. ᐃᓄᓐᓂᒃ ᐱᒍᑦᔨᓃᑦ ᐱᓕᐅᒥᓂᕐᓴᐅᓕᑐᐊᕐᒪᑕ ᐃᓄᐃᑦ ᐃᓂᓪᓚᓕᐅᒥᓂᕐᓴᐅᓯᒪᔪᑦ ᑖᑦᓱᒧᖓ ᓄᓇᓕᐊᕈᕐᒧᑦ. ᐃᓄᐃᑦ ᐃᓪᓗᖁᑎᖏᑦ ᓴᓇᔭᐅᒋᐊᖓᓯᔪᕕᓃᑦ 1959-ᒥ. ᓴᓪᓗᒥᐅᑦ ᑲᑎᒋᐊᕐᑐᕕᓂᐅᓕᕐᑐᑦ 1968-ᒥ ᐅᒃᑯᐃᓯᑐᐊᕋᒥᒃ ᑯᐊᐸᒃᑯᑦ ᓂᐅᕕᕐᓂᐊᕕᖓᓂᒃ. ᓴᓪᓗᐃᑦ ᐱᖁᔭᕐᑎᒍᑦ ᒥᓂᓯᐹᓕᑎᙳᓚᐅᔪᕗᖅ 1979-ᒥ.

ᑕᑯᒥᓇᕐᑐᖁᑎᖏᑦ

  •     ᓴᓪᓗᐃᑦ ᐁᑉᐸᖓ ᒪᙯᕝᕕᓯᐊᖑᓂᖓᓄᑦ ᐃᖃᓗᓐᓂᐊᕕᑦᓯᐊᖑᓂᖓᓄᓪᓗ
  •     ᓴᓪᓗᐃᑦ ᑲᖏᕐᓱᖓᑕ ᐃᒪᖓᓂ ᑕᑯᓂᐊᕐᓯᒪᔪᓂᒃ ᐊᓂᕐᓃᕈᑦᔨᒍᓐᓇᑐᖅ ᐅᖃᐅᓰᕈᑦᔨᓗᓂᓗ.
  •     ᐆᒪᔪᓂᒃ ᑕᑯᑦᓴᑕᓕᒃ.