Price of Gasoline Set to Rise

ᑰᑦᔪᐊᒥ, ᑯᐯᒃ, ᓯᑎᐱᕆ 1, 2013 – 2013-2014 ᐅᖅᓱᐊᓘᑉ ᒑᓴᓖᓐ ᐊᑭᖓ ᓄᓇᕕᒻᒥ ᐅᖅᓱᐊᓗᓕᕆᔨᓄᑦ ᐋᖅᑭᑕᐅᓯᒪᓚᐅᕐᒪᑦ, ᐅᓪᓗᒥ ᐊᑭᑦᑐᕆᐊᓚᖓᑦᓱᓂ, ᐱᒋᐊᕐᓗᓂ $1.946 ᓖᑕᒥᑦ $1.995 ᐊᑭᑲᓕᕐᓗᓂ ᓖᑕ ᓄᓇᕕᒻᒥ ᓄᓇᓕᓐᓂ. ᐅᖅᓱᐊᓗᒻᒧᑦ ᐃᑲᔫᑎᒋᔭᐅᖃᑦᑕᑐᑦ ᐱᓂᐊᕐᓂᑌᑦ ᐊᑭᑭᓕᒋᐊᕐᑎᑦᓯᓚᖓᔪᑦ 2013-ᒥᑦ 2014-ᒧᑦ 21¢ ᓖᑕᒧᑦ ᐊᑕᐅᓯᕐᒧᑦ, ᓖᑕ ᐊᑕᐅᓯᖅ ᐊᑭᖃᓕᕐᓗᓂ ᖁᕕᓯᕕᒻᒥᑦ, ᐃᓘᓐᓇᑲᓵᖏᓐᓂ ᐅᖅᓱᐊᓗᑦᑖᕕᓐᓂ, $1.785 ᓖᑕᒧᑦ ᐊᑕᐅᓯᕐᒧᑦ. ᑖᓐᓇ ᐊᑭᖓ ᐆᒃᑑᑎᒋᓗᒍ 4.9¢ ᓖᑕ ᐊᑕᐅᓯᖅ ᐊᑭᑦᑐᕆᐊᓚᖓᔪᖅ ᐊᑭᒋᔭᐅᖃᑦᑕᓚᐅᕐᑐᒧᑦ ᐅᖅᓱᐊᓗᒻᒧᑦ ᓄᓇᕕᒻᒥᓄᑦ 2012-ᒥᓂᑦ.

ᐅᖅᓱᐊᓗᒻᒧᑦ ᐊᑭᑭᓕᒋᐊᕐᑎᑦᓯᓂᐅᖃᑦᑕᑐᑦ ᐱᓂᐊᕐᓂᑕᖓ ᐱᒋᐊᓚᐅᕐᓯᒪᔪᖅ 2007-ᒥ ᐃᓅᒐᓱᐊᕐᓂᐅᑉ ᐊᑭᑐᓗᐊᕐᓂᖓᓄᑦ ᐃᑲᔪᕐᓯᒋᐊᕈᑕᐅᑦᓱᓂ ᐊᖑᒻᒪᑎᑎᑦᓯᒋᐊᕈᑕᐅᑦᓱᓂ ᐅᖅᓱᐊᓘᑉ ᐊᑭᑦᑐᐸᓪᓕᐊᓂᖓᓄᑦ ᐊᑐᓕᕐᑎᑕᐅᓯᒪᔪᓄᑦ ᓄᓇᓕᓕᒫᓄᑦ 14-ᖑᔪᓄᑦ ᐃᑲᔪᕐᑕᐅᑦᓱᑕ ᐅᖅᓱᐊᓗᓕᕆᔨᓄᑦ ᓄᓇᕕᒻᒥ.

ᐁᕐᕆᓕ 2013-ᒥ, ᑲᑎᕕᒃ ᐃᓕᓴᕐᓂᓕᕆᔨᒃᑯᑦ, ᐃᓕᓯᓕᕆᔨᒃᑯᓪᓗ ᑲᑎᒪᔨᖏᑦ, ᐅᖓᕙᒥᓗ ᑐᓚᑦᑕᕕᒻᒥ ᐋᓐᓂᐊᕕᒃᑯᑦ, ᐃᓅᓕᑦᓯᕕᒃᑯᑦ ᑲᑎᕕᒃ ᐃᓪᓗᓕᕆᔨᒃᔪᐊᒃᑯᓪᓗ ᑯᐯᒥᓗ ᐃᑯᒪᐅᓯᕆᔨᒃᑯᑦ (ᙯᑐᕈᒃᑯᑦ) ᐊᖏᖃᑎᒌᓚᐅᕐᓯᒪᒻᒪᑕ ᐃᑲᔪᕈᒪᑦᓱᑎᑦ KRG-ᑯᓐᓂᒃ ᒪᑭᕝᕕᒃ ᑯᐊᐳᕇᓴᒃᑯᓐᓂᓪᓗ, ᐅᖅᓱᐊᓗᒻᒧᑦ ᐊᑭᑭᓪᓕᐊᕈᑎᖃᖁᔨᑦᓱᑎᒃ $0.21¢ ᓖᑕᒧᑦ ᐊᑕᐅᓯᕐᒧᑦ, ᑲᑐᑦᔨᑦᓱᑎᒃ ᐊᑭᑭᓕᒋᐊᕐᑎᑦᓯᒍᓐᓇᓯᓚᐅᔪᕗᑦ ᓄᓇᓕᓐᓄᑦ ᑌᒫᒃ ᑐᑭᑖᕈᒋᔭᒥᓐᓂᒃ, ᐱᒐᓱᐊᓕᓚᐅᔪᕗᑦ ᐅᖅᓱᐊᓘᑉ ᐊᑭᑭᓕᒋᐊᕈᑎᑦᓴᖓᓄᑦ ᐱᓂᐊᕐᓂᑕᖃᖁᔨᓕᕐᓱᑎᒃ.

ᐅᖅᓱᐊᓘᑉ ᐊᑭᑭᓕᒋᐊᕐᑕᐅᓂᖓᓄᑦ ᐱᓂᐊᕐᓂᑕᖅ ᐱᖓᓲᔪᕐᑐᕆᔭᐅᕗᖅ (6) ᐃᓅᒐᓱᐊᕐᓂᒧᑦ ᐊᑭᑭᓕᒋᐊᕈᑕᐅᓯᒪᔪᓄᑦ, ᐱᒋᐊᕐᑎᑕᐅᓯᒪᔪᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᓐᓄᑦ (KRG) ᐊᒻᒪᓗ ᒪᑭᕝᕕᒃ ᑯᐊᐳᕇᓴᓄᑦ ᑮᓇᐅᔭᖃᕐᑎᑕᐅᕙᑦᑐᓄᑦ ᑯᐯᒃ ᑲᕙᒪᒃᑯᖏᓐᓄᑦ. ᐃᓅᒐᓱᐊᕐᓂᒧᑦ ᐊᑭᑐᔫᓂᖓ ᓯᕗᓪᓕᐅᑦᔭᐅᓯᒪᑦᓯᐊᕐᐳᖅ KRG-ᑯᓐᓄᑦ ᒪᑭᕝᕕᒃᑯᓐᓄᓪᓗ.

ᔫᓂ 21, 2013-ᒥ, ᑖᒃᑯᓇᖕᖓᑦ ᑎᒥᐅᔪᓂᑦ ᑭᒡᒐᑐᕐᑎᐅᔪᑦ ᑕᒪᖏᓐᓂᑦ ᐅᖃᐅᓯᖃᓚᐅᔪᕗᑦ ᓇᓗᓀᕐᓯᑦᓯᐊᕐᓱᑎᓪᓗ ᑕᒪᑦᓱᒪ ᓄᑕᐅᓯᓕᕐᑕᐅᒋᐊᖃᕐᓂᖓᓂᒃ ᑮᓇᐅᔭᖃᕐᑎᑕᐅᓂᖏᓐᓄᑦ ᐃᓚᓕᐅᑎᒍᑕᐅᓗᑎᒃ ᑲᑎᒪᑦᓯᑎᓪᓗᒋᑦ ᑯᐯᒃ ᐳᕇᒥᐊᖓᓂ ᓯᕗᓕᕐᑎᖓᓐᓂᒃ ᑯᐯᒃᑯᓪᓗ ᑲᕙᒪᖏᑦᑕ ᐱᓇᓱᑦᑎᖏᓐᓄᑦ. ᑕᒡᒐᖕᖓᑦ ᑲᑎᒪᓂᕐᒥᑦ ᐱᒋᐊᕐᓱᓂ, ᐃᓅᒐᓱᐊᕐᓂᒧᑦ ᐊᑭᑐᔫᓂᖓ ᓯᕗᓪᓕᐅᑦᔭᐅᓯᒪᑦᓯᐊᓕᕐᐳᖅ ᑯᐯᒃ ᑲᕙᒪᒃᑯᖏᓐᓄᑦ. ᐊᒻᒪ KRG-ᑯᑦ ᒪᑭᕝᕕᒃᑯᓪᓗ ᓱᓕ ᑲᔪᓯᓗᑎᒃ ᐱᓇᓱᖃᑎᒌᖏᓐᓇᓚᖓᕗᑦ ᑲᑐᑦᔨᓗᑎᒃ ᑲᕙᒪᒃᑯᑦ ᐊᖓᔪᖅᑳᖏᓐᓂᒃ ᓵᖕᖓᓯᖃᑦᑕᓗᑎᒃ ᑕᒪᑐᒪᓂ ᐊᕐᕌᒎᔪᒥ ᓄᓇᕕᒻᒥᐅᑦ ᐱᔪᒪᓪᓚᕆᑦᑕᖏᓐᓂᒃ ᐱᓇᓱᐊᕐᓗᑎᒃ ᐃᓅᒐᓱᐊᕐᓂᒧᓪᓗ ᐊᑭᑐᔫᓂᖓᓂᒃ ᐱᕙᓪᓕᑕᐅᑎᑦᓯᒐᓱᐊᕐᓗᑎᒃ ᐊᖕᖑᑎᔭᐅᓕᐅᒥᑎᑦᓯᒐᓱᐊᕐᓗᑎᓪᓗ.

Information:
Caroline D’Astous
Communications Officer
Kativik Regional Government
Tel. 819-964-2961, ext. 2384
media@krg.ca /www.krg.ca

Kitty Gordon
Communications Agent
Makivik Corporation
Tel. 514-745-8880, ext. 215
k_gordon@makivik.org / www.makivik.org


ᑖᒃᑯᐊ KRG-ᑯᑦ ᓇᐅᓕᒫᓄᑦ ᐱᒍᑦᔨᔨᐅᒻᒪᑕ ᐱᒋᐊᓚᐅᕐᓯᒪᔪᑦ 1978-ᖑᑎᓪᓗᒍ, ᔦᒥᔅ ᐯ ᑯᐯᓪᓗ ᑕᕐᕋᖓᓂ ᐊᖏᖃᑎᒌᓐᓂᖓᒍᑦ. ᑲᒪᒋᔭᖃᕐᓱᑎᒡᓗ ᑯᐯᒻᒥ ᓄᓇᐅᑉ 55 ᖁᓛᒍᑦ ᑎᑎᕐᓯᒪᓂᖓᓂ ᑲᕙᒫᐱᓕᕆᓂᕐᒥᒃ, ᐃᖏᕐᕋᐅᑎᓕᕆᓂᕐᒥᒃ, ᐊᕙᑎᒥᐅᑕᓕᕆᓂᕐᒥᒃ, ᐳᓖᓯᖃᕐᓂᒥᒃ, ᐱᓇᓱᑦᑐᓕᕆᓂᕐᒥᒃ, ᐱᓇᓱᑦᑏᓪᓗ ᐱᒋᐅᕐᓴᑎᑕᐅᓂᖏᓐᓂᒃ, ᑮᓇᐅᑦᔭᓵᖃᕐᓂᕐᒥᒃ, ᐯᕆᑦᓯᕕᓕᕆᓂᕐᒥᒃ, ᓄᑕᐅᓯᓕᕈᓐᓇᑐᓕᕆᓂᕐᒥᒃ, ᓄᓇᐅᓪᓗ ᐊᑐᕐᑕᐅᓂᖓᓄᑦ ᐸᕐᓀᓂᕐᒥᒃ, ᐃᓄᐃᓪᓗ ᐊᑦᑕᓇᖏᑦᑐᒦᒋᐊᖃᕐᓂᖏᓐᓂᒃ ᑮᓇᐅᔭᑎᒍᓪᓗ ᒪᑭᒪᒐᓱᐊᕐᓂᓕᕆᓂᕐᒥᒃ.

Price of Gasoline Set to Rise