ᐅᖃᒻᒪᕆᐅᑎᖓ ᓄᓇᕕᒻᒥᐅᑦ – ᓅᕕᒻᐱᕆ 2014

ᐸᕐᓇᓯᒪᐅᑎᒥ ᖃᐅᔨᒐᓱᐊᕐᓂᐅᓚᐅᔫᑉ ᑐᓴᕐᑎᓯᒍᑎᖓ

ᓄᓇᓕᓕᒫᑎᒍᑦ ᐱᓇᓱᐊᕐᕕᐅᔪᑦ ᑭᒡᒐᑐᕐᑎᖏᑦ ᑲᑎᓚᐅᔪᒻᒪᑕ ᑰᑦᔪᐊᒥ ᐸᕐᓇᓯᒪᐅᑎᐅᓪᓗ ᑐᓴᕐᑎᑕᐅᒍᑎᖓᓂᒃ ᓴᕐᕿᑎᑦᓯᓱᑎᒃ ᐱᓇᓱᐊᕐᑕᐅᓚᐅᔪᒥᒃ ᓯᕗᓕᕐᑕᐅᓱᓂ ᒪᑭᕝᕕᒧᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᓄᓇᕕᒻᒥ ᐃᓗᓯᓕᕆᔩᑦ ᐃᓄᓕᕆᔩᓪᓗ ᑲᑎᖕᖓᔨᖏᓐᓄᑦ, ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ, ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᓄᑦ, ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᐊᒻᒪᓗ ᓴᐳᑏᑦ ᐅᕕᒐᕐᑐᐃᑦ ᑲᑐᑦᔨᖃᑎᒌᓐᓂᖓᓄᑦ. ᐸᕐᓇᓯᒪᐅᑎᒃ ᐱᓇᓱᐊᕐᑕᐅᓯᒪᔪᖅ ᓄᓇᓕᓕᒫᑎᒍᑦ ᓄᓇᓕᓐᓂᓗ ᖃᐅᔨᓴᕐᓂᖃᕐᓱᑎᒃ ᐊᑕᐅᓯᖕᖑᕈᑎᐅᑎᓪᓗᒍ.

ᐸᕐᓇᓯᒪᐅᑎᐅᑉ ᑐᓴᕐᑎᓯᒍᑕᐅᓂᖓ ᓂᐱᒋᔭᐅᔪᖅ ᓄᓇᕕᒻᒥᐅᓄᑦ ᐃᓄᓐᓄᑦ. ᓄᓇᓕᓕᒫᓂ ᓄᓇᕕᒻᒥ, ᓯᓵᓯᐱᒥᐅᓂ ᒪᓐᑐᕆᐊᓪᒥᐅᓂᓗ, ᑲᑎᒪᓂᐊᕈᓯᐅᖃᑦᑕᓚᐅᔪᔪᑦ 2013-ᖑᑎᓪᓗᒍ ᐅᖄᓂᐅᖃᑦᑕᓚᐅᔪᒻᒪᑕ ᑭᖕᖒᒪᒋᔭᒥᓂ ᑕᐅᑐᕐᖂᑕᒥᓂᓪᓗ. ᑐᑭᓯᑎᑦᓯᓂᖃᓚᐅᔪᒻᒥᔪᑦ ᑳᒍᐊᒍᐊᑦᓯᑲᒫᒃᒥ. ᑖᒃᑯᐊ ᖃᐅᔨᓴᕐᓂᐅᓚᐅᔪᒥᒃ ᑐᓴᕐᑎᓯᒍᑏᑦ ᐃᓱᓕᒍᑎᐅᔪᑦ ᑎᓕᔭᐅᓯᒪᒍᑎᒋᓚᐅᔭᖏᓐᓄᑦ ᑎᒥᐅᔪᓕᒫᑦ ᑲᑎᒪᓂᖓᓐᓂ ᓯᑦᑎᒻᐱᕆ 2012-ᖑᑎᓪᓗᒍ ᐊᒻᒪᓗ ᕕᕈᐊᕆ 2014-ᖑᑎᓪᓗᒍ, ᖃᐅᔨᓴᕐᓂᖃᖁᔭᐅᑦᓱᑎᒃ ᐃᓄᓐᓂᒃ ᓄᓇᕕᒻᒥᐅᓂᒃ ᓄᓇᓕᓕᒫᑎᒍᑦ ᖃᓄᐃᓕᖓᐅᓯᕆᒍᒪᔭᖏᓐᓂᒃ ᑐᓴᕐᑎᓯᒍᑎᓕᐅᕐᓗᑎᓪᓗ.

ᓄᓇᕕᒻᒥᐅᑦ ᐅᖄᖃᑎᒌᓐᓂᖓ

ᓄᓇᕕᒻᒥᐅᑦ ᐅᖄᖃᑎᖐᑦᓱᑎᒃ ᑲᑎᒪᓂᖃᕐᑎᓗᒋᑦ, ᑲᑎᖕᖓᔪᓃᑦᑐᑦ ᐊᖏᖃᑎᒌᓚᐅᔪᑦ ᐃᓄᐃᑦ ᓄᓇᕕᒻᒥᐅᑦ ᐱᓂᐊᕐᓂᕋᐅᑎᑐᐃᓐᓇᒥᒃ ᓄᕐᖃᕕᖃᕐᓂᐊᑎᓐᓇᒋᑦ ᑲᕙᒪᓂᑦ ᑭᓯᐊᓂᓕ ᐱᓇᓱᐊᕐᓂᐊᑎᓪᓗᒋᑦ ᐃᓅᓯᑦᑎᓄᑦ ᓱᕐᕃᒪᕆᓐᓂᐊᑐᒥᒃ ᐃᓚᐅᑎᑦᓯᓯᐊᕐᑐᒥᒃ ᑲᔪᓯᑎᑕᐅᖏᓐᓇᕈᓐᓇᓂᐊᕐᑐᒥᒃ ᐊᑦᔨᒌᒥᓪᓗ ᐱᕙᓪᓕᖁᑎᐅᑦᓯᐊᓂᐊᕐᓗᓂ ᐃᓅᓯᑦᑎᓂ ᓄᓇᓕᑦᑎᓂᓪᓗ. ᓄᓇᕕᒻᒧᑦ ᐸᕐᓇᓯᒪᐅᑎᒃ, ᐃᓚᐅᑎᓪᓗᒋᑦ ᐅᖃᕆᐊᖕᖓᕈᑎᖏᑦ ᓄᓇᕕᒻᒥᐅᑦ ᐃᓄᐃᑦ ᑕᕐᕋᒧᑦ ᐸᕐᓇᓯᒪᐅᑎᓂᒃ ᓴᐳᒻᒥᒍᑎᒋᓂᐊᕐᑕᖏᑦ ᐃᓚᒋᔭᐅᓪᒪᕆᓚᐅᔪᑦᓱᑎᓪᓗ ᐸᕐᓇᓯᒪᐅᑎᐅᑉ ᖃᐅᔨᓴᕈᑕᐅᓯᒪᓂᖓᓄᑦ ᑐᓴᕐᑎᓯᒍᑎᓄᑦ.

ᑖᒃᑯᐊ ᑐᓴᕐᑎᓯᒍᑏᑦ ᐱᒻᒪᕆᓐᓂᒃ ᐊᑑᑎᓪᓚᕆᑦᑐᓂᒃ ᓄᓇᕕᒻᒥᐅᓄᑦ ᐃᓄᓐᓄᑦ ᐃᓗᓕᖃᕐᑐᑦ. ᓯᕗᐊᓐᓂᖅ, ᑐᕌᒐᕗᑦ ᐃᒣᑦᑑᓂᐊᕐᐳᑦ:

  • ᐃᓄᐃᑦ ᓄᓇᕕᒻᒥᐅᑦ ᖃᓄᐃᖕᖏᓯᐊᕐᓂᕆᒋᐊᓕᖓ ᐱᕙᓪᓕᑎᑦᓯᐊᕆᐊᕐᓗᒍ ᑐᖕᖓᕕᖃᕐᑎᓗᒍ ᐃᓄᐃᑦ ᐃᓗᕐᖁᓯᖓᓂᒃ, ᐅᖃᐅᓯᖓᓂᒃ ᐃᓅᒍᓯᖓᓂᓪᓗ.
  • ᓄᓇᕕᒻᒥᐅᑦ ᐃᓄᐃᑦ ᐱᒻᒪᕆᐅᑎᑦᓱᒋᑦ ᐅᓇᑕᒡᒑᓯᒪᔭᖏᑦ ᓵᖕᖓᔭᐅᑦᓯᐊᓂᐊᕐᑎᓗᒋᑦ.
  • ᓄᓇᕕᒻᒥᐅᑦ ᐃᓄᐃᑦ ᓄᓇᖓ ᐊᖏᓕᒋᐊᕐᑕᐅᓂᐊᕐᑎᓗᒍ ᓈᒻᒪᓯᐊᕐᑐᒥᒃ.
  • ᑭᖑᕚᖑᓂᐊᕐᑐᑦ ᓯᕗᓂᕐᒥ ᐱᕕᑦᓴᓕᐅᕐᑕᐅᓯᐊᓂᐊᕐᑎᓗᒋᑦ.
  • ᓇᒻᒥᓂᖅ ᑲᕙᒪᖃᕐᓂᓴᖓᓄᑦ ᓄᓇᕕᐅᑉ ᐱᓇᓱᐊᖃᑎᒌᓪᓗᑎᒃ.

ᐱᓇᓱᐊᕐᑕᐅᓛᓕᕐᒥᔪᑦ

ᓄᓇᕕᒻᒥᐅᑦ ᐅᖄᖃᑎᒌᓐᓂᖓᓂ, ᑲᑎᖕᖓᒋᐊᕐᑐᓯᒪᔪᑦ ᓱᓕᓂᕃᓚᐅᔪᑦ ᐱᒻᒪᕆᐅᓂᖓᓂᒃ ᓄᓇᕕᒻᒥᐅᓄᑦ ᐃᓄᓐᓄᑦ ᐸᕐᓇᓯᒪᐅᑎᐅᑉ ᖃᐅᔨᓴᕈᑕᐅᓂᕆᖃᑦᑕᓚᐅᕐᑕᖓ ᑐᓴᕐᑎᓯᒍᑎᖓ ᓄᓇᕕᒻᒥᐅᓄᓪᓗ ᐸᕐᓇᓯᒪᐅᑏᑦ ᐱᕈᕐᑎᑕᐅᑦᓯᐊᑐᑦᓴᐅᓂᖏᓐᓂᒃ. ᒪᑯᓂᖓᓗ ᐃᓂᓪᓓᒍᑎᐅᓚᐅᕐᓱᓂ ᓄᓇᕕᒻᒥᐅᑦ ᐅᖃᒻᒪᕆᐅᑎᖓᑕ ᓄᓇᒥᓂ ᐱᓂᐊᕐᓂᖃᕈᑎᒋᒍᒪᔭᖏᓐᓂᒃ ᐃᒣᑦᑑᓂᐊᕐᑎᓗᒍ:

  • ᐃᓂᓪᓓᓂᐊᕐᓗᑎᒃ ᐱᒻᒪᕆᐅᑎᑕᒥᓂᒃ ᓯᕗᓪᓕᐅᔭᖁᔭᒥᓂᓪᓗ.
  • ᐅᓇᑕᒡᒑᓗᑎᒃ ᒪᓕᒐᕐᑕᕆᔭᐅᓂᐊᕐᑐᓂᒃ ᐱᕈᕐᐸᓕᐊᑎᑦᓯᓂᕐᒧᑦ ᓈᒻᒪᒋᔭᐅᔪᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ.

ᑎᓕᔭᐅᓯᒪᒍᑎᖓ ᐊᑐᐃᓐᓇᕈᕐᑎᓂᐊᕐᑐᑦ ᓄᓇᕕᒻᒥᐅᑦ ᐃᓄᐃᑦ ᐅᖃᒻᒪᕆᐅᑎᖓᓂᒃ ᑐᓴᕐᑎᓯᒍᑎᓕᐅᓛᕐᓗᑎᓪᓗ ᓄᓇᕕᒻᒥᐅᓄᑦ ᐃᓄᓐᓄᑦ ᑎᓕᔨᒍᑎᐅᓚᐅᔪᖅ ᒪᑭᕝᕕᒥᒃ ᐱᓇᓱᐊᖃᑎᖃᓛᕐᓗᑎᒃ ᑎᒥᒻᒪᕆᐅᔪᓂᑦ ᐱᓯᒪᑦᓱᑎᒃ ᐱᓇᓱᐊᖃᑎᒌᖃᑦᑕᓚᐅᕐᑐᓂᒃ. ᐃᓱᓕᕝᕕᖃᕐᑎᓗᒍ ᒫᑦᔨ 2015-ᒥ ᑕᒪᓐᓇ ᐱᓇᓱᐊᕐᑕᐅᔪᑦᓴᓕᐊᖑᓚᐅᕐᑐᖅ ᐊᖏᕐᑕᐅᒋᐊᖃᓛᕐᓗᓂ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂ ᑲᑎᒪᓂᒻᒪᕆᖓᓂ. ᓄᓇᓕᓕᒫᑎᒍᑦ ᑎᒥᒻᒪᕆᐅᔪᑦ ᐊᖏᖃᑎᒌᓚᐅᕐᑐᑦ ᐱᓇᓱᐊᖃᑎᒌᖏᓐᓇᓛᕐᓂᕋᕐᓱᑎᒃ, ᐊᑕᐅᑦᓯᑰᕐᑎᓯᓗᑎᒃ, ᐱᓇᓱᑦᑎᓂᓪᓗ ᑭᖕᖒᒪᓇᕐᐸᑕ ᐊᑐᐃᓐᓇᐅᑎᑦᓯᖃᑦᑕᓗᑎᒃ ᑮᓇᐅᔭᑎᒍᓪᓗ ᐃᑲᔪᕐᓯᒪᓛᕐᓗᑎᒃ ᐱᒍᓐᓇᑕᒥᒍᑦ.

ᓄᓇᕕᒻᒥᐅᑦ ᐅᖄᖄᑎᒌᓐᓂᖓᓂ, ᑲᑎᖕᖓᒋᐊᕐᑐᓯᒪᔪᑦ ᓱᓕᓂᕃᓚᐅᔪᑦ ᐱᒻᒪᕆᐅᓂᖓᓂᒃ ᓄᓇᕕᒻᒥᐅᓄᑦ ᐃᓄᓐᓄᑦ ᐅᖄᖃᑎᒌᓐᓂᐅᔪᓕᒫᓂ, ᑲᑎᒪᓂᕐᓂ, ᐱᓇᓱᐊᖃᑎᒌᑦᑐᓂ ᑲᕙᒪᓄᑦ ᓴᕐᕿᑎᑕᐅᔪᓂ ᑕᕐᕋᒥ ᐱᕈᕐᐸᓕᐊᑎᑦᓯᓂᕐᒧᑦ ᐃᓚᐅᑦᓯᐊᖃᑦᑕᕆᐊᖃᕐᓂᒥᓂᒃ.

ᐅᖄᖃᑎᒌᓐᓂᕆᓂᐊᕐᑕᖓ ᑯᐯᒃ-ᓄᓇᕕᒃ ᓄᓇᕕᒻᒥᐅᓄᑦ ᐃᓄᓐᓄᑦ ᐊᑐᕐᑕᐅᓂᖃᕐᓂᐊᑐᖅ ᑯᐯᓪᓗ ᑲᕙᒪᖓᓄᑦ ᐱᓇᓱᐊᖃᑎᒌᓐᓂᐅᓗᓂ ᓄᓇᕕᒻᒥ ᐸᕐᓇᓯᒪᒍᑎᓄᑦ ᐊᒻᒪᓗ ᐸᕐᓇᓯᐅᒪᐅᑎᐅᑉ ᑐᓴᕐᑎᓯᒍᑎᐅᓯᒪᓂᖓᓄᑦ. ᐊᑐᓂᑦ ᑎᒥᐅᔪᑦ ᐱᓇᓱᐊᕐᑕᒥᓂᒃ ᑲᒪᒋᒋᐊᓕᒻᒥᓂᒃ ᑎᓕᔭᐅᓯᒪᒍᑎᒥᓂᒃ ᑲᔪᓯᑎᑦᓯᖏᓐᓇᓂᐊᕐᒥᔪᑦ.


Click here to download the 2014 Consultation Report