ᖃᐅᔨᑎᑦᓯᒍᑏᑦ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐃᓚᐅᔪᓂᒃ (ᐊᒻᒪᓗ ᐃᓚᐅᔫᑐᐃᓐᓇᕆᐊᓕᓐᓂᒃ)

ᐱᓪᓗᒍ ᑭᖑᓪᓕᐹᒥ ᐊᑭᓖᓂᐅᒍᒪᔪᒧᑦ

ᐅᓪᓗᖓ: ᐊᐅᒍᔅᑎ 23, 2017

ᓱᓀᓂᒃᑯᐊ ᐊᐅᓪᓛᑎᑕᐅᓚᐅᕐᑐᕕᓂᕐᓂᒃ ᐊᑭᓖᒍᑎᑦᓴᓕᐊᖑᓯᒪᔪᑦ?

ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐊᑭᓖᒍᑎᐅᔪᓄᑦ ᑮᓇᐅᔭᖁᑎᖏᓐᓂᒃ ᓄᐃᑕᐅᔪᖃᓚᐅᕐᓯᒪᕗᖅ 1996-ᒥ ᐊᖏᖃᑎᒌᒍᑎᐅᕐᖄᓚᐅᑲᑦᑎᓗᒋᑦ ᒪᑭᕝᕕᑯᓄᓪᓗ ᑲᕙᒪᑐᖃᒃᑯᓄᓪᓗ.  ᑖᒃᑯᐊ ᑮᓇᐅᔭᖁᑏᑦ ᑎᒍᒥᐊᕐᑕᐅᒪᑕ ᐊᑭᓖᒍᑎᐅᓯᒪᒻᒪᑕ ᑕᒃᑯᓂᖓ ᒪᕐᕈᐃᓂᒃ ᐃᒻᒥᒎᓕᖓᔪᓂᒃ ᐃᓚᐅᔪᓂᒃ, ᑕᒃᑯᓂᖓ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓂᒃ ᑌᑦᓱᒪᓂᐅᑎᓪᓗᒍ 1950-ᓂᑦᑎᓗᒋᑦ ᐃᓄᒃᔪᐊᒥᑦ ᓄᓇᕕᒻᒥᑦ ᒥᑦᓯᒪᑕᓕᒻᒧᑦ, ᓄᓇᑦᓯᐊᖑᓯᒪᔪᕐᒧᑦ, ᖃᐅᓱᐃᑦᑐᒧᓪᓗ ᐊᐅᓱᐃᑦᑐᒧᓪᓗ; ᐊᒻᒪᓗ ᑖᒃᑯᓂᖓ ᖁᑦᓯᑐᓕᐊᕐᑎᑕᐅᓂᑯᐃᑦ ᑭᖑᕚᖏᓐᓂᒃ, ᐅᓪᓗᒥ ᑭᖑᕚᕆᔭᐅᓕᕐᑐᓄᑦ ᑕᒃᑯᓄᖓ ᖁᑦᓯᑐᒧᑦ ᐊᐅᓪᓛᑎᑕᐅᓚᕐᑐᕕᓂᕐᓄᑦ.

ᑕᒃᑯᐊ ᑮᓇᐅᔭᖁᑏᑦ ᑮᓇᐅᔭᕐᑎᒍᑦ ᐱᕙᓪᓕᕈᑎᒋᔭᐅᖃᑦᑕᓯᒪᓕᕐᑐᑦ 1996-ᒥᓂᑦ ᑕᒪᒃᑯᐊ ᐃᓚᐅᔪᐃᑦ ᑭᖕᖑᒪᒍᑎᖏᓐᓄᑦ ᐃᓕᓐᓂᐊᓂᕐᑎᒍᑦ, ᐃᓅᕐᓯᕐᑎᒍᓪᓗ, ᐃᓗᕐᕈᓯᕐᑎᒍᓪᓗ ᐊᒻᒪᓗ ᒪᑭᑕᒐᓱᐊᕐᓂᑯᑦ, ᐱᓗᐊᕐᑐᒥᒃ ᐃᓗᓐᓈᒍᑦ ᐃᓚᖓᑎᒍᓪᓘᓃᒃ, ᑮᓇᐅᔭᕐᑐᕈᑎᒋᓲᖏᓐᓄᑦ ᐃᓚᒥᓄᑦ ᐳᓛᕆᐊᓕᑐᐊᕐᒪᑕ ᐊᐅᓚᒋᐊᖃᓕᑐᐊᕐᒪᑕᓗ ᓇᓪᓕᐅᓂᕐᓯᐅᕆᐊᖃᓕᑐᐊᕐᒪᑕᓗ.

ᑕᒃᑯᓂᖓ ᑮᓇᐅᔭᖁᑎᒋᔭᐅᔪᓂᒃ ᑲᒪᔨᒻᒪᕆᖃᓲᖑᕗᖅ ᐱᖓᓲᔪᕐᑐᓂᒃ (6) ᐃᑉᐱᒋᔭᖃᕆᐊᖃᓲᓂᒃ ᑕᒃᑯᐊ ᑮᓇᐅᔭᖁᑏᑦ ᑮᓇᐅᔭᒻᒪᕆᖏᑦ ᑲᒪᒋᔭᐅᑦᓯᐊᕋᓗᐊᕐᒪᖔᑕ ᐊᒡᒍᑐᐃᔨᐅᑦᓱᑎᓪᓗ ᑮᓇᐅᔭᖁᑎᖏᓐᓂᒃ.

ᓱᒧᑦ ᑮᓇᐅᔭᖁᑎᓂᒃ ᑎᒍᒥᐊᕐᑎᖏᑦ ᑭᖑᓪᓕᐹᒥ ᐊᒡᒍᑐᐃᓚᖓᕙᑦ ᑮᓇᐅᔭᓂᒃ?

ᑖᒃᑯᐊ ᑮᓇᐅᔭᖁᑏᑦ ᓄᐃᑕᐅᓕᓚᐅᕐᓯᒪᒻᒪᑕᓂᑦ, ᑐᕌᒐᖃᓚᐅᕐᓯᒪᔪᑦ ᑮᓇᐅᔭᒻᒪᕆᖏᑦ ᕿᑲᕐᑎᑕᐅᓂᐊᕐᑎᓗᒋᑦ 2031-ᒧᑦ ᑎᑭᓪᓗᒍ (35-ᓂᒃ ᐊᕐᕌᒍᕐᒥᒃ).  ᓂᕆᐅᒋᔭᐅᓚᐅᕐᓯᒪᒻᒪᑦ ᑖᒃᑯᐊ ᑮᓇᐅᔭᓕᐊᖑᓂᐊᕐᑐᑦ ᑖᒃᑯᓄᖓ ᑮᓇᐅᔭᖁᑎᓄᑦ ᓇᒻᒪᒐᔭᕐᓂᐊᕆᐊᖏᑦ ᑮᓇᐅᔭᑐᐃᓐᓇᓂᒃ ᐊᒡᒍᑐᐃᕕᐅᖃᑦᑕᓗᓂ ᐃᓚᐅᔪᓄᑦ.

ᑖᒃᑯᓄᖓ ᑮᓇᐅᔭᖁᑎᓄᑦ ᑐᕌᒐᓕᐊᖑᓯᒪᒐᓱᐊᕐᑐᑦ ᒪᓕᑦᑕᐅᓯᐊᕋᓱᑦᑑᒐᓗᐊᑦ, ᑖᒃᑯᐊ ᐅᓄᕐᓂᐸᐅᑎᑦᓯᒐᓱᐊᕈᑎᐅᒻᒪᑕ ᐊᑭᓖᒍᑎᐅᒋᐊᖃᓲᓂᒃ ᐃᓚᐅᔪᓄᑦ.  ᑭᓯᐊᓂᓕ, ᑮᓇᐅᔭᑐᐃᓐᓇᓂᒃ ᐊᒡᒍᑐᐃᖃᑦᑕᕋᓱᐊᕆᐊᒥᒃ ᐃᓚᐅᔪᓄᑦ ᐱᔭᕆᐊᑦᑐᓯᒪᓕᕐᒪᑦ ᑕᒪᒃᑯᐊ ᑮᓇᐅᔭᖁᑎᓄᑦ ᐅᑎᕐᑐᓴᓕᐊᖑᖃᑦᑕᓚᐅᕐᑐᑦ ᐃᑭᓗᐊᖃᑦᑕᓚᐅᕐᒪᑕ ᒪᓕᑦᓱᒋᑦ ᓯᓚᕐᔪᐊᓕᒫᒥ ᒪᑭᑕᒐᓱᐊᕐᓂᖓᑕ ᖃᓄᐃᓕᖓᓕᕐᓂᖏᑦ, ᕿᑐᕐᖏᐅᕈᑏᓪᓗ ᐳᒃᑭᑑᑦᓱᑎᒃ ᐊᒻᒪᓗ 2008-ᒥ ᓄᓇᕐᔪᐊᒥᐅᖑᖃᑎᒌᑦ ᑮᓇᐅᔭᑎᒍᑦ ᑲᑕᓚᐅᕐᓯᒪᒻᒪᑕ ᓱᕐᕃᓯᒪᓂᖓᓄᑦ.

ᑌᒣᒻᒪᑦ, ᑕᒃᑯᐊ ᑮᓇᐅᔭᖁᑏᑦ ᐱᑦᔪᑎᖃᕐᑎᑕᐅᒍᑎᖏᑦ ᑲᔪᓯᖏᓐᓇᖁᒧᑦ, 2010-ᒥ, ᑯᐯᒃᒥ ᐃᕐᖃᑐᐃᔨᕐᔪᐊᖏᑦ ᐱᔪᓐᓇᑎᑦᓯᓚᐅᕐᓯᒪᔪᑦ ᑖᒃᑯᓂᖓ ᑮᓇᐅᔭᖁᑎᓂᒃ ᑎᒍᒥᐊᕐᑎᓂᒃ ᐃᓚᖓᑎᒍᑦ ᑮᓇᐅᔭᓂᒃ ᐊᒡᒍᑐᐃᖁᔨᓚᐅᕐᓯᒪᔪᑦ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ.  ᓲᑭᐊᖑᒐᓗᐊᖅ, ᑌᒪᖕᖓᓂᑦ, ᑖᒃᑯᐊ ᑮᓇᐅᔭᖁᑎᓂᒃ ᑎᒍᒥᐊᕐᑎᐅᔪᑦ ᐱᔭᕆᐊᑐᔪᒨᕐᐸᓕᐊᑐᐃᓐᓇᓚᐅᕐᓯᒪᒻᒥᒪᑕ ᐊᒡᒍᑐᐃᒐᓱᐊᕆᐊᒥᒃ ᑮᓇᐅᔭᓂᒃ ᐃᓚᐅᔪᖁᑎᒥᓄᑦ, ᑖᒃᑯᐊᓗ ᐅᓄᕐᓯᕙᓪᓕᐊᑐᐃᓐᓇᓕᕐᒥᓱᑎᒃ ᐊᕐᕌᒍᑕᒫᑦ.

ᑖᒃᑯᐊ ᑮᓇᐅᔭᖁᑎᓂ ᑎᒍᒥᐊᕐᑏᑦ ᑌᒣᒻᒪᑦ ᑲᔪᓯᑎᑦᓯᒋᐊᓯᓚᐅᔪᑦ ᑭᖑᓪᓕᐹᒥ ᑮᓇᐅᔭᓂᒃ ᐊᒡᒍᑐᐃᓂᐊᓕᕆᐊᒥᒃ.  ᑕᒪᓐᓇᐅᓕᕐᐸᑦ ᑭᖑᓪᓕᐹᒥ ᑮᓇᐅᔭᓕᕆᔭᐅᓂᖃᓚᖓᓕᕐᑐᖅ ᐊᐅᓚᑕᐅᓂᖃᓚᖓᔪᓂᒃ ᑖᒃᑯᓄᖓ ᑎᒍᒥᐊᕐᑎᓄᑦ ᐊᒻᒪᓗ ᐊᑭᓕᕐᑕᐅᔪᖃᕐᓗᓂ ᑭᖑᓪᓕᐸᐅᓂᖃᓕᕐᑐᓂᒃ ᒪᓕᓪᓗᒋᑦ ᐃᓄᐃᑦ ᐅᓄᕐᓂᖏᑦ, ᐃᓗᐃᒃᑲᐅᓈᕐᑎᑐᓂᒃ; ᐊᖏᕐᑕᐅᒍᓐᓇᓚᖓᑐᐊᕐᐸᑕ ᑯᐯᒃᑯᑦ ᐃᕐᖃᑐᐃᔨᕐᔪᐊᖏᓐᓄᑦ.

ᑭᖑᓪᓕᐹᒥ ᐊᒡᒍᑐᐃᓂᖅ ᐱᔭᕆᑦᓯᐊᖁᓪᓗᒍ, ᐊᑐᕐᑕᐅᔪᖃᕐᓂᐊᑐᖅ ᐱᖁᔭᑎᒍᕐᑐᒥᒃ ᑮᓇᐅᔭᑎᒍᕐᑐᒥᓪᓗ ᓄᐃᑕᐅᔪᖃᓕᕐᐸᑦ ᓄᑖᒥᒃ ᑎᒍᒥᐊᕐᑎᐅᓂᐊᕐᑐᒥᒃ ᑌᔭᐅᒍᓯᖃᕐᓂᐊᕐᑐᒥᒃ ᐃᒫᒃ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓃᑦ ᐃᓚᖏᓐᓂᒃ ᑮᓇᐅᔭᖁᑎᖏᑦ, ᑕᒃᑯᐊ ᑎᓕᔭᐅᒪᒍᑎᖃᕋᔭᕐᓂᐊᕐᑎᓗᒋᑦ, ᐃᕐᖃᑐᐃᔨᓄᑦ ᐊᖏᕐᑕᐅᒍᑎᒃ, ᐱᔨᐅᓂᐊᕐᓗᑎᒃ ᑖᒃᑯᓂᖓᓕᒫᖅ ᓅᑕᐅᔪᓂᒃ ᑮᓇᐅᔭᖁᑏᑦ ᑮᓇᐅᔭᒻᒪᕆᖏᓐᓂᒃ ᑌᒪ ᐊᒡᒍᑐᐃᖃᑦᑕᓂᐊᓕᕐᑎᓗᒍ ᑖᒃᑯᓄᖓ ᐃᓚᐅᔪᓄᑦ (ᑖᑦᓱᒧᖓ ᓄᑖᒧᑦ ᑎᒍᒥᐊᕐᑎᒧᑦ ᐃᓚᐅᔫᖃᑕᐅᓂᐊᓕᕐᑐᓂᒃ).

ᑭᖑᓪᓕᐹᒥ ᐊᒡᒍᑐᐃᓂᐅᒍᒪᔪᕐᒧᑦ

ᒪᓕᓪᓗᒋᑦ ᐃᕐᖃᑐᐃᔨᒃᑯᓄᑦ ᐊᖏᕐᑕᐅᒋᐊᓖᑦ ᑭᖑᓪᓕᐹᒥ ᐊᒡᒍᑐᐃᓂᐅᒍᒪᓕᕐᑐᒧᑦ, ᐃᓚᐅᔪᓕᒫᑦ ᐱᕙᓪᓕᕈᓐᓇᓚᖓᔪᑦᓴᐅᓕᕐᑐᑦ ᑭᖑᓪᓕᐹᒥ ᐃᓗᐃᒃᑲᐅᓂᖃᕐᑐᓂᒃ ᑮᓇᐅᔭᓂᒃ ᐊᑯᓂᐅᖏᑐᒥ, ᐱᓗᐊᕐᑐᒥᒃ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓂᒃ ᐊᒥᓱᒻᒪᕆᓪᓗ ᐃᓄᑐᖃᐅᓕᕐᓱᑎᒃ.

ᑭᓪᓕᖃᑦᓯᐊᖁᒧᑦ, ᑖᒃᑯᐊ ᑭᖑᓪᓕᐹᒥ ᐊᒡᒍᑕᐅᓂᐊᕐᑐᑦ ᐅᓄᕐᓂᓴᐅᒍᓇᐅᓚᖓᓕᕐᑐᑦ ᑖᒃᑯᓄᖓ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ (ᑐᕃᓐᓇᑐᒥᒃ ᓱᕐᕋᑕᐅᓪᓚᕆᑦᓯᒪᔪᓄᑦ ᓅᑕᕕᓂᐅᓂᑯᒥᓄᑦ) ᑖᒃᑯᓇᖕᖓᑦ ᐊᐅᓪᓛᑎᑕᐅᓚᐅᕐᑐᕕᓃᑦ ᑭᖑᕚᖏᓐᓂᑦ.

ᑖᒃᑯᐊ ᑮᓇᐅᔭᖁᑏᑦ ᓄᕐᖃᑎᑕᐅᓚᖓᓂᖏᑦ ᑲᔪᓯᑎᑕᐅᓂᐊᕐᒪᑕ, ᑎᒍᒥᐊᕐᑏᑦ ᖃᐅᔨᓴᕆᐊᑦᓯᐊᕆᐊᖃᕐᒪᑕ ᐃᓚᐅᔪᐃᑦ ᐊᑎᖏᓐᓂᒃ ᐱᕕᖃᕐᑎᑕᐅᒍᓐᓇᓲᓂᒃ ᐊᒡᒍᑐᐃᓂᕐᒧᑦ ᑖᒃᑯᐊ ᑮᓇᐅᔭᖁᑎᑎᒍᑦ ᐊᑭᓖᒍᑎᓂᒃ, ᐱᓗᐊᕐᑐᒥᒃ ᐃᓚᔭᐅᔪᖃᕆᐊᖃᕐᐸᑦ ᖁᑦᓯᑐᒧᑦ ᑭᖑᕚᖏᑦ ᐱᕕᖃᕈᓐᓇᓕᕐᒪᖔᑕ ᐊᑭᓕᕐᑕᐅᒍᑎᓂᒃ.

ᐱᕕᖃᕐᑎᑕᐅᒍᓐᓇᓚᖓᕗᖔ ᑮᓇᐅᔭᖁᑎᓄᑦ ᐃᓚᐅᔫᖃᑕᐅᓂᕐᒧᑦ?

ᒪᕐᕈᓗᐊᖑᐊᓂᒃ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐃᓚᐅᔪᖁᑎᖃᕐᐳᖅ ᐅᑯᓂᖓ:

  1. ᐃᒻᒥᒎᓕᖓᓂᖃᕐᑐᒥᒃ 1 ᐃᓚᐅᔪᐃᑦ, ᐅᕝᕙᓘᓐᓃᑦ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓃᑦ ᑖᑦᓱᒧᖓ ᐃᒻᒥᒎᓕᖓᑎᑕᐅᓂᖃᕐᑐᒧᑦ ᐱᕕᖃᕐᑎᑕᐅᒍᓐᓇᐳᑎᑦ ᓅᑕᐅᓚᐅᕐᓯᒪᓐᓂᕈᕕᑦ ᐃᓄᒃᔪᐊᒥᑦ ᒥᑦᓯᒪᑕᓕᒻᒥᓘᓐᓃᑦ ᐊᐅᓱᐃᑦᑐᒧᑦ ᖃᐅᓱᐃᑦᑐᒧᓪᓘᓃᑦ ᐊᕐᕌᒍᐃᑦ 1950-ᓃᑦᑎᓗᒋᑦ.  ᑖᓐᓇ ᐃᓄᒃ ᐃᓅᒍᓐᓀᓯᒪᑐᐊᕐᐸᑦ, ᑌᒪᑦ ᑖᑦᓱᒪᐅᑉ ᐊᐅᑉᐸᕕᓂᖓ ᕿᑐᕐᖓᖓᓘᓐᓃᑦ ᓯᕗᓪᓕᐸᐅᓂᖃᕐᓗᓂ (ᐱᒋᔭᐅᓪᓚᕆᓪᓗᓂ ᑎᒍᐊᖑᓗᓂᓘᓐᓃᑦ) ᐃᓱᒪᒋᔭᐅᓂᖃᕐᓂᐊᑐᖅ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᐅᒋᐊᖓᓂᒃ.  ᑭᓯᐊᓂ, ᑖᒃᑯᐊ ᑮᓇᐅᔭᖁᑎᓂᒃ ᐊᐅᓚᑦᓯᔩᑦ ᑎᒍᒥᐊᕐᑐᑦ ᐃᓄᑑᓈᕐᑎᑐᓕᒫᑦ ᐊᑎᖏᓐᓂᒃ ᐃᓱᒪᒋᔭᐅᓂᖃᕐᑐᓂᒃ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᐅᒋᐊᖏᑦ, ᑌᒣᒻᒪᑦ ᑭᓪᓕᖃᑦᓯᐊᕕᐅᓚᖓᔪᑦᓴᐅᔪᑦ ᐃᓗᓐᓇᑎᒃ.
  2. ᐃᒻᒥᒎᓕᖓᓂᖃᕐᑐᑦ 2 ᐃᓚᐅᔪᐃᑦ, ᖁᑦᓯᑐᒧᑦ ᐊᐅᓪᓛᑎᑕᐅᓂᑯᐃᑦ ᑭᖑᕚᖏᑦ. ᑖᑦᓱᒧᖓ ᐱᕕᖃᕐᑎᑕᐅᑐᐃᓐᓇᕆᐊᖃᕐᐳᑎᑦ ᑐᕃᓐᓇᑐᒃᑯᑦ ᑭᖑᕚᕆᔭᐅᒍᕕᑦ (ᑎᒍᒥᐊᕐᑎᑯᑦ ᕿᑐᕐᖏᐅᓯᐊᕐᓂᑯᓪᓘᓃᑦ) ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᒧᑦ.  ᐅᑦᑑᑎᒋᓗᒍ, ᐊᓈᓇᑦᓯᐊᓕᕐᕿᐅᑏᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐃᓚᐅᔫᖃᑕᕕᓂᐅᑉᐸᑦ, ᐱᕕᖃᕐᑎᑕᐅᑐᐃᓐᓇᕆᐊᖃᕐᐳᑎᑦ ᑭᖑᕚᓄᑦ ᐃᓚᐅᔫᖃᑕᐅᔪᓄᑦ, ᐅᑭᐅᑎᑦ ᓇᒻᒪᓯᓯᒪᓪᓗᑯᐊᐱᒍᓐᓀᑎᓗᒋᑦ ᐅᕝᕙᓘᓐᓃᑦ ᓇᓪᓕᐊᓂᒥᐅᖑᓂᐊᕋᓗᐊᕈᕕᑦ ᓄᓇᓕᓐᓂ.

ᖃᓄᖅ ᐱᕙᓪᓕᖁᑎᓂᒃ ᐱᒐᓱᐊᕈᓐᓇᐳᖓ?

ᙯᔪᕐᓂ ᐱᓇᓱᐊᕈᓯᕐᓂ, ᖃᕆᑕᐅᔭᒃᑯᑦ ᑕᑕᕐᓴᒐᕐᓂᒃ ᓄᐃᑕᔪᖃᕐᓂᐊᑐᖅ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐃᓚᐅᔪᓄᑦ ᐱᕕᖃᕐᑎᑕᐅᒍᓐᓇᒪᖔᕐᐱᑦ ᖃᐅᔨᒍᑎᐅᓂᐊᕐᑐᓂᒃ.  ᑖᒃᑯᓄᖓ ᐃᓚᐅᔪᓄᑦ ᐱᕕᖃᖃᑕᐅᒋᐊᖃᕐᑐᕆᒍᕕᑦ ᑕᑕᕐᓭᖁᔨᕗᒍᑦ, ᐱᔭᕆᕐᓯᒪᖕᖏᑯᕕᑦ ᐱᒐᓱᐊᕈᑎᓂᒃ ᖃᕆᑕᐅᔭᒃᑯᑦ.  ᑖᒃᑯᐊ ᓯᑯᑦᓴᔭᒥᑦᑎᑕᐅᓗᑎᒃ ᓄᐃᑕᐅᓂᐊᕐᒥᔪᑦ ᐱᓇᓱᐊᕈᓰᑦ ᐊᒥᓲᖏᑐᑦ ᐊᓂᒍᕐᓯᒪᓕᕐᐸᑕ ᐊᑐᕐᑕᐅᒍᓐᓇᓂᐊᕐᑐᓂᒃ ᑌᒃᑯᓄᖓ ᑕᑕᕐᓭᒍᒪᔪᓄᑦ ᖃᕆᑕᐅᔭᒃᑯᑦ ᐊᓪᓚᑖᕐᕕᑯᓪᓘᓃᑦ ᓱᑲᑦᑐᑯᓪᓘᓃᑦ.

ᑕᑕᕐᓴᒐᓕᐊᕆᓯᒪᔭᕗᓐᓂᒃ ᖃᕆᑕᐅᔭᒦᑦᑎᑕᕗᓐᓂᒃ ᐊᑐᕐᑕᐅᖁᔨᕗᒍᑦ ᐱᔭᕆᐊᑭᓐᓂᐸᐅᒻᒪᑦ ᓱᑲᓐᓂᐸᐅᑦᓱᓂᓗ ᐊᑐᕆᐊᖓ, ᑭᓯᐊᓂ ᐊᓯᐊᒍᑦ ᑕᑕᕐᓭᒍᓐᓇᒥᔪᑎᑦ ᐃᒣᓕᖓᔪᒃᑯᑦ:

  • ᖃᕆᑕᐅᔭᒃᑯᑦ: ᓯᑯᑦᓴᔭᒧᕐᓗᒍ ᓱᓇᒥᓪᓗᒍᓗ ᓯᑯᑦᓴᔭᖅ ᐊᑕᑎᑕᐅᔪᑦ ᐊᐅᓪᓚᑎᓗᒍ ᐅᕗᖓ harttrust@makivik.org
  • ᓱᑲᑦᑐᑯᑦ: ᓯᑯᑦᓴᔭᒧᕐᓗᒍ ᐊᑕᑎᑕᐅᔪᖅ ᓯᑯᑦᓴᔭᖅ ᐊᐅᓪᓚᑎᓗᒍ ᓱᑲᑦᑐᑯᑦ ᐅᕗᖓ: 514-745-0364 ᑐᕌᕐᑎᓄᒍ Joanne Thompson-ᒧᑦ, ᑮᓇᐅᔭᖁᑏᑦ ᐊᐅᓚᑦᓯᓂᓕᕆᔨᖓᓄᑦ
  • ᐊᓪᓚᑖᕐᕕᑯᑦ ᐅᕗᖓ:
    • c/o Joanne Thompson, Trust Administrator, HART
      1111, Dr.-Fredrik-Philips Boulevard, 3rd floor
      Saint-Laurent, Quebec H4M 2X6

ᑮᓇᐅᔭᖁᑎᓂᒃ ᑎᒍᒥᐊᕐᑏᑦ ᐱᔪᓐᓇᐅᑎᖃᕐᓂᐊᑐᑦ ᑐᑦᓯᕋᕈᓐᓇᕆᐊᒥᒃ ᓇᒻᒪᒋᔭᐅᔪᑎᒍᑦ ᑮᓇᐅᔭᖁᑎᓂᒃ ᑎᒍᒥᐊᕐᑎᓄᑦ, ᐊᓪᓚᑕᐅᒋᐊᓪᓚᓯᒪᔪᓂᒃ ᓄᐃᑦᓯᒍᑎᐅᓂᐊᕐᑐᓂᒃ ᐃᓕᑕᕆᔭᐅᒍᑎᓂᒃ, ᓄᓇᓕᒻᒨᓕᖓᓂᖏᓐᓂᓗ ᐅᕝᕙᓘᓐᓃᑦ ᓇᓗᓀᕐᓯᒍᑎᐅᓗᑎᒃ ᐱᕕᖃᕈᓐᓇᒪᖔᑕ ᑖᒃᑯᐊ ᑮᓇᐅᔭᖁᑏᑦ ᐱᕙᓪᓕᖁᑎᖏᓐᓂᒃ

ᑖᓐᓇᓕ ᕿᑐᕐᖓᕋ 18 ᐊᑖᓂ ᐅᑭᐅᓕᒃ?  ᑖᓐᓇᓕ ᐱᕕᖃᕐᑎᑕᐅᓚᖓᒋᕙ?

ᐋᐊ: 18-ᓂᒃ ᐊᑖᓄᑦ ᐅᑭᐅᓖᑦ ᐱᕕᖃᕐᑎᑕᐅᒍᓐᓇᓂᐊᕐᑐᑦ ᑖᒃᑯᓄᖓ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓃᑦ ᑭᖑᕚᖏᓐᓄᑦ ᑖᓐᓇ ᑐᕃᓐᓇᑐᒥᒃ ᑭᖑᕚᕆᔭᐅᑐᐊᕐᐸᑦ ᖁᑦᓯᑐᒧᑦ ᐊᐅᓪᓛᑎᑕᐅᓪᓚᕆᓚᐅᕐᑐᕕᓂᕐᒧᑦ.  ᐊᖓᔪᕐᖄᕆᔭᐅᔪᒥᒃ ᐅᕝᕙᓘᓐᓃᑦ ᐱᖁᔭᑎᒍᑦ ᑎᒍᒥᐊᕐᑐᒥᒃ ᑕᑕᕐᓭᒍᑦᔨᔪᖃᕈᓐᓇᑐᖅ ᐅᑭᐅᑭᓗᐊᕐᑐᒥᒃ ᐊᒻᒪᓗ ᖃᐅᔨᓴᕐᑕᐅᓂᐊᕐᓱᓂ ᐊᐅᓚᑦᓯᓂᓕᕆᔨᒧᑦ ᑖᓐᓇ ᐅᑭᐅᑭᑦᑐᖅ ᐱᐊᕋᖅ ᐱᕕᖃᕐᑎᑕᐅᑦᓯᐊᕆᐊᖃᕋᓗᐊᕐᒪᖔᑦ.

ᐊᐱᕆᐅᑎᑦᓴᖃᕈᒪ ᑭᓇᒧᑦ ᐅᖄᓚᒍᓐᓇᐳᖓ?

ᑮᓇᐅᔭᖁᑎᓂᒃ ᑎᒍᒥᐊᕐᑎᓄᑦ ᐅᖄᓚᒍᓐᓇᐳᓯ ᐊᐱᕆᐅᑎᑦᓴᖃᕈᑦᓯ ᐅᕗᖓ 1-800-361-7052, ᐊᒻᒪᕕᒋᓗᒍ 2276, ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐅᕗᖓ harttrust@makivik.org

 

ᖃᐅᔨᑎᑦᓯᒍᑏᑦ ᖁᑦᓯᑐᒧᑦ ᐊᐅᓪᓛᑎᑕᐅᓚᐅᕐᑐᕕᓂᕐᓄᑦ ᐃᓚᐅᔪᓂᒃ (ᐊᒻᒪᓗ ᐃᓚᐅᔫᑐᐃᓐᓇᕆᐊᓕᓐᓂᒃ)