ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦᑕ ᑲᑎᖕᖓᔨᓂᒃ ᓯᕗᓕᕐᑎᖓ ᓂᕈᐊᕐᑕᐅᑎᒐᓱᑦᑐᓴᓂᒃ ᐊᑕᓐᓂᐅᕈᑏᑦ

ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᓴᕐᕿᑎᑕᐅᓯᒪᕗᑦ ᓄᓇᕕᒻᒥ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᒍᑎᖏᓐᓄᑦ (ᕿᑭᕐᑕᓕᕆᓂᕐᓄᑦ), ᑖᒃᑯᐊᓗ ᐊᐅᓚᑦᓯᔨᓪᓚᕆᐅᕗᑦ ᓂᕐᔪᑏᑦ ᑲᒪᒋᔭᐅᒋᐊᖃᕐᓂᖏᓐᓂᒃ ᓄᓇᕕᐅᑉ ᐃᒪᕐᐱᒥ ᓄᓇᖁᑎᖏᓐᓃᑐᓂᒃ ᐱᓇᓱᒐᖃᕐᕕᖁᑕᐅᕗᕐᓗ ᐃᓄᓕᒫᓄᓕᖓᑦᓱᓂ. ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑕᒐᑕᒐ ᕿᓂᕐᐳᖅ ᐃᓐᓄᐃᒐᔭᕐᑐᒥᒃ ᑲᑎᖕᖓᔩᑦ ᓯᕗᓕᕐᑎᖓᑕ ᐃᓂᖓᓂᒃ ᑲᑎᒪᔨᓂ; ᓂᕈᐊᕋᑦᓴᕈᕐᑐᑦ ᐊᐱᕐᓱᑕᐅᒐᔭᕐᑎᓗᒋᑦ ᑎᒃᑯᐊᑕᐅᓗᑎᒃᓗ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓄᑦ ᑭᖑᓂᐊᒍᓪᓗ ᐊᕐᕌᒍᓂ 4-ᓂ ᐊᑕᓚᖓᓕᕐᓗᓂ ᑐᑭᑖᕐᑕᐅᓂᖃᕐᓂᐊᑎᓪᓗᒍ ᑲᓇᑕᐅᑉ ᑲᕙᒪᖓᓄᑦ ᑲᕙᒪᑐᖃᒃᑯᓄᑦ.

ᓂᕈᐊᕐᑕᐅᑎᒐᓱᑦᑐᑦ ᐱᔪᓐᓇᑕᖃᑦᓯᐊᕆᐊᖃᕋᔭᕐᐳᑦ ᓲᕐᓗ ᑲᑎᒪᔨᒃᑯᑦ ᑲᕙᒪᓕᕆᒍᑎᖏᓐᓂᒃ ᑕᒪᒃᑯᓄᖓᓗ ᐃᓕᖓᔪᓂᒃ ᐱᔪᓐᓇᓂᖃᑦᓯᐊᑐᑦ ᕿᓂᕐᑕᐅᕗᑦ; ᐱᓇᓱᓕᓂᐅᒋᐊᖃᕐᐳᓗ ᑲᑎᖕᖓᔪᓂᒃ ᓯᕗᓕᕐᓂᒥᒃ ᑲᑎᖕᖓᕕᓐᓂ ᑕᕆᐅᕐᒥᐅᑕᓕᕆᔨᒃᑯᑦ ᐊᑦᔨᒐᓚᖏᓐᓂᒃ ᑲᑎᒪᔨᐅᕕᓐᓂ. ᖃᐅᔨᒪᔭᖃᑦᓯᐊᓗᓂᓗ ᓂᕐᔪᑎᓂᒃ ᖃᓄᐃᓘᕋᓱᒍᑎᐅᔪᓂᓪᓗ ᓄᓇᕕᐅᑉ ᐃᒪᕐᐱᖓᑕ ᓄᓇᖁᑎᖏᓐᓂ ᑌᒣᒍᓂ ᐱᐅᔫᒐᔭᕐᑐᖅ. ᖃᐅᔨᒪᔭᖃᑦᓯᐊᕈᓂ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓂᕐᒥᓄᑦ ᐊᖏᖃᑎᒌᒍᑎᖏᓐᓂᒃ ᐊᑦᔨᐸᓱᖏᓐᓂᓗ ᓄᓇᓂᒃ ᐃᓐᓄᐃᓯᒪᓇᓱᒍᑎᓂᒃ ᓈᒻᒪᒋᐊᓪᓚᒐᔭᕐᒥᔪᖅ. ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᓯᕗᓕᕐᑎᖓᑦ ᐃᓄᒃᑎᑐᓪᓗ ᖃᓪᓗᓈᕐᑎᑐᓪᓗ ᐅᖃᐅᓰᓐᓂᒃ ᐱᔪᓐᓇᑕᖃᑦᓯᐊᕆᐊᓕᒃ; ᒍᐃᒍᐃᑎᑑᕈᓐᓇᕈᓂ ᐱᐅᒋᐊᓪᓚᒐᔭᕐᒥᔪᖅ. ᓇᓪᓕᑳᔭᐅᔪᓂ, ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᓯᕗᓪᓕᐅᔭᐅᒐᔭᕐᐳᑦ.

ᑲᑎᖕᖓᔩᑦ ᓯᕗᓕᕐᑎᖓᑦ ᐱᔭᑦᓴᖁᑎᖃᕐᓂᐊᐳᖅ ᑲᑎᖕᖓᔪᓂᒃ ᑐᑭᒧᐊᑦᑎᓯᓂᕐᒥᒃ ᐊᖕᒪᓗ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐃᓄᓐᓂᒃ ᑐᑭᓯᓂᐊᕐᕕᖃᓕᕐᐸᑕ ᐃᓚᐅᖃᑦᑕᓗᓂ ᐱᔭᑦᓴᖁᑎᖃᕐᒥᓗᓂᓗ ᑲᔪᓯᑎᑦᓯᓂᕐᒥᒃ ᐊᓪᓚᓯᒪᔪᖕᖑᐃᒍᑎᐅᒪᔪᓂᒃ ᑭᒡᒐᑐᕐᓗᓂ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓂᒃ. ᐊᖑᑕᐅᒍᓂ ᐊᕐᓇᐅᒍᓂᓗᓐᓃᑦ ᐱᔭᑦᓴᖁᑎᖃᕐᓂᐊᒥᔪᖅ ᑭᒡᒐᑐᕐᑎᐅᓂᕐᒥᒃ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᒥᓱᐃᓂ ᑲᑎᖕᖓᓂᕐᓂᓗ ᓱᔪᖃᕐᓂᐅᔪᓂᓗ ᑕᒪᑐᒥᖓ ᐱᓇᓱᒋᐊᖃᓕᕈᓂ. ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐊᕐᕌᒍᑕᒫᑦ ᓯᑕᒪᕕᑦᓱᑎᒃ ᑲᑎᖕᖓᓂᖃᓲᖑᕗᑦ ᑲᑎᖕᖓᕙᒻᒥᓱᑎᒃᓗ ᐅᖃᓕᒫᐅᑎᑎᒍᑦ ᐃᓚᖓᓂᓪᓗ ᐅᓪᓗᓴᓕᐅᕐᑕᐅᒪᓐᓂᖏᑦᑐᓂᒃ ᑲᑎᖕᖓᓂᖃᕆᐊᖃᓕᕋᒥᒃ ᑐᑭᓯᓂᐊᕐᓂᖃᕆᐊᖃᓕᕋᒥᓪᓗ ᑕᒪᒃᑯᓂᖓ ᐱᓂᐊᕐᓂᖃᕐᐸᒥᑦᓱᑎᒃ.
ᑖᓐᓇ ᐃᓂ ᐃᓂᐅᕗᖅ ᐅᓪᓗᓕᒫᑦᓯᐅᑎᐅᓇᓂ ᐅᓪᓗᑕᒫᕐᓯᐅᑎᓪᓗᑑᓇᓂᓗ ᐊᑭᓕᕐᑐᑕᐅᕕᐅᕗᕐᓗ ᒪᓕᑦᓱᒋᑦ ᑲᑎᖕᖓᓂᕐᓄᑦ ᐃᓚᐅᓃᑦ. ᐊᐅᓚᒍᑏᓪᓗ ᐃᓅᓇᓱᒍᑏᓪᓗ ᐊᑭᓕᕐᑐᕆᐊᓖᑦ ᐱᓇᓱᐊᕐᓗᓂ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᑭᓕᕐᑕᐅᕙᑉᐳᑦ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᒃᑯᓄᑦ.

ᓂᕈᐊᕐᑕᐅᒐᓱᒍᓐᓇᐅᑎᑖᕐᑐᑦ ᐱᑕᖃᕆᐊᖃᓚᖓᕗᑦ ᓈᒻᒪᒋᔭᐅᔪᓂᒃ ᑮᓇᐅᔭᑎᒍᑦ ᐃᓕᖓᓂᕐᓂᒃ ᐱᖁᔭᓂᒃᓗ ᓯᖁᒥᑦᓯᓚᐅᕐᓯᒪᒻᒪᖔᕐᒥ ᖃᐅᔨᓴᕐᑕᐅᓂᕐᒥᒃ ᐊᓂᒍᐃᑦᓯᐊᕆᐊᖃᕐᓱᑎᒃ, ᐱᑕᖃᕐᑎᓯᒍᑎᖃᕐᓗᑎᒃᓗ ᐱᖓᓱᓂᒃ (3) ᐅᑉᐱᓇᑦᓯᐊᑐᓂᒃ ᐊᑑᑎᖃᑦᓯᐊᑐᓂᒃᓗ ᐱᔪᓐᓇᓂᕋᕐᑕᐅᒍᑎᓂᒃ, ᐱᑕᖃᕆᐊᖃᕐᓱᑎᒃᓗ ᓄᓇᒃᑯᔫᒥᒃ ᐊᖁᒍᓐᓇᐅᑎᒥᒃ, ᐊᑐᐃᓐᓇᐅᓗᑎᒃᓗ ᐊᕐᕕᑕᕐᓂᓄᑦ (ᓄᓇᕕᒻᒥᓗ ᒪᓐᑐᔨᐊᒥᓗ ᓇᓪᓕᑐᐃᓐᓇᖏᓐᓂ). ᐱᖁᔭᓂᒃ ᓯᖁᒥᑦᓯᓚᐅᕐᓯᒪᓂᕋᕐᑕᐅᒍᑏᑦ ᐃᓕᓚᕿᖕᖏᒍᑎᐅᒍᓐᓇᖏᑦᑐᑦ ᐃᓱᒪᑦᓴᓯᐅᕈᑎᐅᕐᖃᓗᑎᒃ.

ᓇᐅᓕᒫ ᑕᕝᕗᖓ ᐃᓂᒧᑦ ᐃᓕᒐᓱᒍᒪᔪᑦ ᑐᓂᔨᒋᐊᖃᕐᐳᑦ ᐊᓪᓚᓯᒪᔪᓂᒃ ᐱᒐᓱᒍᒪᓂᕋᕈᑎᒥᓐᓂᒃ ᐊᖕᒪᓗ ᐱᓇᓱᑦᓯᒪᓂᕐᒥᓄᑦ ᐊᓪᓚᖁᑎᒥᓂᒃ ᑐᓂᓗᒋᑦ ᑖᒥ ᐹᓕᓴᒧᑦ, ᐳᕐᑐᓂᕐᓴᒥᒃ ᑐᑭᒧᐊᑦᑎᓯᔨᒧᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑕ ᐊᓪᓚᕕᖓᓂ (ᑕᑯᒋᐊᕐᓗᒋᑦ ᑐᕌᕈᑎᖏᑦ ᐊᑖᓂᑦᑐᑦ), ᑖᒃᑯᐊᓗ ᑐᓂᔭᐅᒋᐊᖃᕐᐳᑦ ᐊᓂᒍᓚᐅᖕᓂᖓᓂ ᕕᕗᐊᕆ 9, 2018. ᐅᓪᓗᖓ.

ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦᑕ ᑲᑎᖕᖓᔨᓂᒃ ᓯᕗᓕᕐᑎᖓ ᓂᕈᐊᕐᑕᐅᑎᒐᓱᑦᑐᓴᓂᒃ ᐊᑕᓐᓂᐅᕈᑏᑦ