ᒪᑭᕝᕕᒃ ᑐᖕᖓᓱᑦᑎᓯᔪᖅ ᑲᕙᒪᑐᖃᒃᑯᑦ ᓄᑖᓂᒃ ᐱᓇᓱᒍᓯᕐᓂᒃ ᓄᓇᓕᑐᖃᕐᓂᒃ

ᐊᐅᒍᔅᑎ 30, 2017 – ᑰᒃᔪᐊᖅ ᓄᓇᕕᒃ – ᒪᑭᕝᕕᑯᑦ ᓇᑯᕐᓴᓚᐅᕐᑐᑦ ᑲᓇᑕᐅᑉ ᐊᖓᔪᕐᖄᒪᕆᖓᑦ ᑐᓴᕐᑎᓯᓚᐅᕐᑎᓗᒍ ᐊᓪᓕᕇᕐᑐᓂ ᐊᐅᒍᔅᑎ 28-ᒥ. ᓄᖑᑎᑦᓯᓂᕐᒥᓄᑦ ᑖᑦᓱᒥᖓ ᓄᓇᖃᕐᖄᓯᒪᔪᓕᕆᓂᕐᒥᓗ ᑕᕐᕋᒥᐅᓕᕆᓂᕐᒥᓗ ᐱᓇᓱᐊᕐᕕᒋᓚᐅᕐᑕᖓᓂᒃ ᓄᐃᑦᓯᓱᑎᓪᓗ ᒪᕐᕉᓂᒃ ᓄᑖᓂᒃ ᐱᓇᓱᐊᕐᕕᐅᓂᐊᓕᕐᑐᓂᒃ ᐱᒍᑦᔨᓯᐊᓂᓴᐅᒍᑎᑦᓴᒧᑦ ᐃᓄᓐᓂᒃ, ᐊᓪᓚᖓᔪᓂᒃ ᐊᒻᒪᓗ ᐊᓪᓚᓂᒃ ᑲᓇᑕᒥ.

“ᐃᓄᐃᑦ ᓄᓇᕕᒻᒥᐅᑦ ᖃᐅᔨᒪᓚᖓᓕᕐᑐᑦ ᑕᒪᑦᓱᒥᖓ ᐊᓯᑦᔨᒪᕆᑦᑕᐅᔪᒥᒃ ᐃᑯᓪᓚᐅᒥᑎᑦᓯᒋᐊᕈᑎᐅᓂᐊᕐᑐᒥᒃ ᓄᐃᑕᒌᕐᑐᓂᒃ ᖃᓪᓗᓈᓂᒃ ᑐᖕᖓᕕᖃᓗᐊᕐᓂᒥᒃ ᑕᒪᒃᑯᐊ ᖃᓄᐃᓕᐅᖃᑎᒌᓐᓂᕆᓲᕗᑦ ᐱᐅᓯᓕᐅᒥᓂᐊᕐᒪᑕ. ᑕᒪᓐᓇ ᐊᓯᑦᔨᓱᒍ, ᑲᕙᒪᒃᑯᑦ ᓱᕐᖁᐃᑕᐅᑎᑦᓯᔪᑦ ᑖᓐᓇ ᓄᓇᖃᕐᖄᓯᒪᔪᓕᕆᔨᒃᑯᑦ ᐱᓇᓱᐊᕐᕕᖓᑦ ᑲᒪᒋᔭᖃᓗᐊᖑᐊᑎᑕᐅᓚᐅᕐᒪᑦ ᐊᓪᓚᓄᑦ ᐱᖁᔭᓕᐊᖑᓯᒪᔪᓂᒃ, ᐊᒻᒪᓗ ᓄᐃᑕᐅᒪᑦᓱᓂ ᓴᐳᒻᒥᒍᑎᐅᓂᖃᖕᖏᓱᓂ ᐃᓄᓐᓂᒃ. ᑖᓐᓇ ᑲᕙᒪᑐᖃᒃᑯᑦ ᐃᓄᓕᕆᔨᒻᒪᕆᖓᑕ ᐊᓯᑦᔨᑕᐅᓂᖓ ᒪᕐᕈᐃᓄᑦ ᐱᓇᓱᐊᕐᕕᐅᔪᕐᓄᑦ, ᓂᕆᐅᑦᑐᒍᑦ, ᑕᑯᑦᓴᐅᑎᑦᓯᓂᐊᓕᕆᐊᖓ ᐃᓄᐃᑦ ᐊᑦᔨᒋᔭᐅᖏᑐᒥᒃ ᐃᓂᖃᕐᒪᑕ ᑲᓇᑕᒥ,” ᑌᒣᓕᑦᓱᓂ ᐅᖃᓚᐅᕐᑐᖅ ᔫᐱ ᑕᕐᕿᐊᐱᒃ, ᒪᑭᕝᕕᐅᑉ ᐊᖓᔪᕐᖄᒪᕆᖓᑦ.

ᐊᓕᕇᕐᑎᓗᒍ ᑲᕙᒪᑐᖃᒃᑯᑦ ᑐᓴᕐᑎᓯᓚᐅᕐᑐᑦ ᑖᓐᓇ ᐃᓄᓕᕆᔨᒻᒪᕆᒃᑯᑦ ᑐᕐᖃᑕᕐᕕᒋᓚᕐᑕᖓᑦ ᑲᕈᓕᓐ ᐱᐊᓇᑦ ᓄᑖᕐᒥᒃ ᑐᕐᖃᑕᕐᕕᑖᕐᓂᐊᓕᕐᑎᓗᒍ ᑕᒪᑦᓱᒧᖓ ᑲᕙᒪᑐᖃᒃᑯᑦ-ᓄᓇᖃᕐᖄᓯᒪᔪᐃᑦ ᖃᓄᐃᓕᐅᖃᑎᒋᕝᕕᖓᓂᒃ. ᐊᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᒋᓚᐅᕐᑕᖓ ᔩᓐ ᐱᐅᓪᐸᑦ ᓄᑖᕐᒥᒃ ᑐᕐᖃᑕᕐᕕᑖᕐᓂᐊᑐᖅ ᓄᓇᖃᕐᖄᓯᒪᔪᓂᒃ ᐱᒍᑦᔨᓂᕐᒧᑦ.

“ᓂᕆᐅᑦᑐᒍᑦ ᐱᓇᓱᐊᖃᑎᖃᕐᓂᐊᕆᐊᒥᒃ ᒥᓂᔅᑕ ᐱᐊᓇᑦᒥᒃ ᓄᑖᒥᒃ ᐃᓂᖃᓕᕐᑎᓗᒍ. ᑖᓐᓇ ᑐᖕᖓᕕᓕᐅᕐᓯᒪᓕᕐᒪᑦ ᐃᓄᐃᑦ ᐊᒻᒪᓗ ᑲᕙᒪᑐᖃᒃᑯᑦ ᖃᓄᐃᓕᐅᕐᕕᖓᑕ ᑲᑎᒪᔨᐊᐱᖏᓐᓂᒃ, ᐊᒻᒪᓗ ᓂᕆᐅᑦᓱᑕ ᓄᑖᓂᒃ ᐱᕙᓪᓕᐊᓂᐊᓕᕐᑐᓂᒃ ᑖᒃᑯᑎᒎᓇ ᓯᕗᒧᐊᕐᑎᑕᐅᓪᓚᕆᖁᓗᒋᑦ ᓄᓇᕕᐅᑉ ᐃᓄᖏᑦ ᐊᒻᒪᓗ ᐃᓄᐃᑦ ᓄᓇᓕᒫᖓᓂ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ. “ᐊᒻᒪᓗᑦᑕᐅᖅ ᑖᓐᓇ ᒥᓂᔅᑕ ᐱᐅᓪᐸᑦ ᐊᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᐅᓚᐅᕐᓱᓂ ᐃᓚᐅᖃᑕᐅᓪᓚᕆᓯᒪᑦᓱᓂ ᑕᒪᑦᓱᒧᖓ ᐃᓄᐃᑦ ᑲᕙᒪᑐᖃᒃᑯᓂᒃ ᖃᓄᐃᓕᐅᕐᕕᖓᓄᑦ, ᐊᒻᒪᓗ ᑲᔪᓯᓚᖓᑦᓱᓂ. ᓇᑯᕐᓴᐳᖓ ᑖᓐᓇ ᓄᑖᖅ ᐱᓇᓱᐊᕐᕕᒃ ᑭᓪᓕᖃᑦᓯᐊᑐᒥᒃ ᐊᑐᕐᓂᖃᓚᖓᓕᕆᐊᖓ ᐱᐅᓯᓕᐅᒥᑎᑦᓯᒍᑕᐅᓗᓂ ᐱᐅᔫᓂᖏᓐᓂᒃ ᐱᒍᑦᔨᒍᑎᐅᓲᑦ ᐃᓄᓐᓂᒃ, ᐊᓪᓚᖓᔪᓂᒃ ᐊᒻᒪᓗ ᐊᓪᓚᓂᒃ ᐊᑦᔨᒋᔭᐅᖏᑑᓂᖏᑦ ᑐᖕᖓᕕᐅᓂᖃᕐᑎᓗᒋᑦ.

“ᑭᖑᓪᓕᐸᐅᑎᓗᒍ, ᑕᒪᓐᓇ ᐊᓯᑦᔨᑕᐅᓂᖓ ᐊᑯᓂᕐᓂᖃᓚᖓᒻᒪᑦ ᑲᔪᓯᑎᒐᓱᐊᕐᓗᒍ. ᐱᖁᔭᓕᐅᕐᑕᐅᔪᖃᕆᐊᖃᓚᖓᒻᒪᑦ ᓄᖑᑎᕆᐅᑎᐅᓂᐊᕐᑐᓂᒃ ᑲᕙᒪᑐᖃᒃᑯᑦ ᐃᓄᓕᕆᔨᒻᒪᕆᒋᓚᐅᕐᑕᖏᓐᓂᒃ, ᐊᒻᒪᓗ ᑲᔪᓯᔪᓂᒃ ᑐᑭᓯᓂᐊᕐᓂᖃᕆᐊᖃᓚᖓᑦᓱᓂ ᐃᓄᓐᓂᒃ ᓄᐃᑕᐅᔪᖃᓕᕐᑎᓗᒍ ᑕᒪᖏᓐᓂᒃ ᓄᑖᓂᒃ ᐱᓇᓱᐊᕐᕕᐅᔪᓂᒃ. ᓂᕆᐅᑉᐳᖓ ᐱᓇᓱᐊᖃᑎᖃᑦᓯᐊᓂᐊᕆᐊᒥᒃ ᐃᓄᐃᑦ ᓯᕗᓕᕐᑎᖏᓐᓂᒃ ᓄᓇᓕᓕᒫᑎᒍᑦ ᑲᓇᑕᒥᐅᓕᒫᑎᒍᓪᓗ, ᓄᐃᑦᓯᓂᕐᓴᐅᒍᑎᑦᓴᒧᑦ ᓱᔭᐅᒐᓱᐊᕐᑐᓄᑦ ᐃᓗᓐᓀᓄᑦ ᐃᓄᓐᓄᑦ, ᐊᒻᒪᓗ ᑲᓇᑕᒥᐅᓕᒫᓄᑦ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ.

-30-

ᐅᖄᓚᕕᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᓂᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ ᐊᒻᒪᓗ ᑐᓴᕋᑦᓴᓂᐊᕐᑎᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ: wtagoon@makivik.org
www.makivik.org

ᒪᑭᕝᕕᑯᑦ ᓄᓇᑖᕋᓱᐊᕐᓂᓕᕆᓂᕐᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᑦᓱᓂ ᑲᒪᒋᔭᖃᕆᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᔪᓂᒃ ᑖᒃᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᐅᑉ ᐊᑖᒍᑦ. ᒪᑭᕝᕕᑯᑦ ᐊᑐᕐᑕᐅᓂᖓ ᐃᓚᖃᕐᑐᖅ ᐊᐅᓚᑦᓯᓂᓕᕆᐅᑎᖃᕆᐊᖃᕐᓂᒥᒃ ᐅᑎᕐᑐᓴᓕᐅᕈᑎᖃᕐᓂᒥᓪᓗ ᑕᒪᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑉᐸᓕᐊᒐᓱᐊᕐᓂᑯᑦ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑦᓯᓂᕐᒧᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᓗ ᐅᖃᐅᓯᖓᓂᓗ ᐊᒻᒪᓗᑦᑕᐅᖅ ᖃᓄᐃᖏᓯᐊᕈᑕᐅᔪᓂᒃ, ᐊᑦᓱᔫᓂᕐᒥᓗ ᐃᑯᓪᓚᐅᒥᑎᑦᓯᓂᕐᒥᒃ ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓂᒃ ᓄᓇᓕᓐᓂ.

ᒪᑭᕝᕕᒃ ᑐᖕᖓᓱᑦᑎᓯᔪᖅ ᑲᕙᒪᑐᖃᒃᑯᑦ ᓄᑖᓂᒃ ᐱᓇᓱᒍᓯᕐᓂᒃ ᓄᓇᓕᑐᖃᕐᓂᒃ