Makivik saddened by the passing of Greg Fisk (iu)

ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ

ᒪᑭᕝᕕᒃ ᑯᔩᒃ ᕖᔅᑭᐅᑉ ᐃᓅᒍᓐᓀᓂᖓᓂᒃ ᑭᑦᓴᕈᑎᖃᕐᐳᖅ

ᑰᒃᔪᐊᖅ, ᓄᓇᕕᒃ–ᑏᓯᒻᐱᕆ
ᒪᑭᕝᕕᒃ ᑐᓴᕐᑎᑕᐅᒍᑎᒥᓂᒃ ᑭᒃᓴᕈᑎᖃᕐᐳᖅ ᐊᖏᖃᑎᒌᓐᓂᒥᒃ ᐱᔭᖃᕋᓱᑦᓱᑎᒃ ᐊᖏᖃᑎᒌᒐᓱᖃᑕᐅᓯᒪᔪᖅ 1975-ᖑᑎᓪᓗᒍ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐃᓅᒍᓐᓀᓂᕆᓚᐅᕐᑕᖓᓂᒃ.

ᑕᒡᒐᓂ ᐱᓇᓱᐊᕈᓯᕐᒥ ᑯᔩᒃ ᕖᔅᑭ, ᐅᑭᐅᖃᓕᕐᓱᓂ 70-ᓂᒃ ᓇᓂᔭᐅᕐᖃᒥᓚᐅᕐᖁᖅ ᐃᓅᒍᓐᓀᓯᒪᓕᕐᑎᓗᒍ ᐊᖏᕐᕋᒥᓃᑦᓱᓂ ᔫᓄ, ᐊᓛᓯᑲᒥ. ᑖᓐᓇ ᐊᖑᑎ ᐊᖏᖃᑎᒌᒐᓱᑦᑎᐅᖃᑕᐅᓯᒪᔪᖅ ᒪᑭᕝᕕᐅᑉ ᓯᕗᓪᓕᕆᓚᐅᕐᓯᒪᔭᖓᓄᑦ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᕆᓯᒪᔭᖓᑦᑕ ᐱᒋᐊᕐᖃᒥᐅᑎᓪᓗᒋᑦ ᐊᕐᕌᒍᑦ 1970-ᓃᑦᑐᑦ, ᑯᔩᒃ ᐃᑲᔪᕐᓯᓯᒪᔪᖅ ᐊᖏᖃᑎᒌᒐᓱᐊᕈᑕᐅᑎᓪᓗᒋᑦ ᑲᓇᑕᒥ ᓯᕗᓪᓕᐹᖑᑦᓱᑎᒃ ᐊᑕᖏᕐᓯᔪᓂᒃ ᓄᓇᒥᒃ ᐃᓐᓄᐃᓯᒪᒍᑎᓂᒃ ᐊᖏᖃᑎᒌᒍᑎᑖᕐᑐᓄᑦ.

ᓄᓇᕕᐅᑉ ᐃᓄᑐᐃᓐᓇᖏᑦ ᓇᓪᓕᐅᑎᒍᑦᔭᐅᓂᕐᒥᓂᒃ ᓇᓪᓕᐅᓂᕐᓯᐅᕈᑎᖃᕐᑐᑦ ᐊᕐᕌᒍᓂ 40-ᓂ ᐊᖏᖃᑎᒌᒍᑎᖃᓕᕐᓂᒥᓐᓂᒃ.

ᑲᕙᒪᑐᖃᒃᑯᓂ ᐱᖁᔭᓕᐅᕐᑎᒪᕆᐅᖃᑕᐅᔪᖅ ᓵᓕ ᒍᐊᑦ ᑌᑦᓱᒪᓂ ᐊᖓᔪᕐᖄᖑᓚᐅᕐᓯᒪᔪᖅ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᕝᕕᖓᓐᓄᑦ. ᓵᓕ ᐱᓇᓱᑦᑎᑕᓚᐅᕐᓯᒪᔪᖅ ᑯᔩᒃ ᕖᔅᑭᒥᒃ ᐊᓛᓯᑲᓕᐊᕐᓯᒪᑦᓱᓂ ᑐᑭᓯᓂᐊᕆᐊᕐᓱᓂ ᐊᓛᓯᑲᒥᐅᑦ ᐃᓄᐃᑦ ᓄᓇᒥᒃ ᐃᓐᓄᐃᓯᒪᓇᓱᒍᑎᖏᑦ ᖃᓄᐃᓕᖓᒻᒪᖔᑕ ᐊᕐᕌᒍᐃᑦ 1970-ᓃᑦᑐᑦ ᐱᒋᐊᕐᖃᒥᐅᑎᓪᓗᒋᑦ.

“ᖁᐊᕐᓵᕈᑎᒋᔭᕋ, ᑯᔩᒃᒥ ᑲᑎᓯᒋᐅᕐᓱᖓ ᐊᕐᕌᒍᑦ 40 ᐅᖓᑖᓂ ᑕᑯᓚᐅᕐᓯᒪᔪᖓ ᐃᓄᒻᒥᒃ ᐱᔪᒪᓂᖃᕐᑐᒥᒃ ᐊᖕᖔᑐᐃᓐᓇᓴᔭᐅᓇᓂᓗ. ᑯᔩᒃ ᐃᓄᑐᐃᓐᓀᑦ ᓄᓇᕕᒻᒥᐅᑦ ᐱᕙᓪᓕᐊᓯᒪᒍᑎᖏᓐᓂ ᐅᓂᒃᑲᐅᓯᕐᓂ ᐃᓚᐅᖃᑕᐅᑦᓴᖏᔦᑦᑐ,” ᐅᖃᕐᑐᖅ ᓵᓕ ᒍᐊᑦ.

ᔫᐱ ᑕᕐᕿᐊᐱᒃ, ᒪᑭᕝᕕᐅᑉ ᐊᖓᔪᕐᖄᒪᕆᖓ ᐅᖃᕐᑐᖅ ᑖᓐᓇ ᐅᓪᓗᖅ ᑐᑦᓴᓗᕝᕕᐅᔪᖅ ᐊᓕᐊᓇᖕᖏᑐᒻᒪᕆᐅᒋᐊᖓ ᓄᓇᕕᒻᒥᐅᓄᑦ ᑯᐯᒃᒥᐅᓄᓪᓗ.

“ᐊᒥᓱᑦ ᐅᕕᒐᕐᑐᖁᑎᒋᓕᕐᑕᕗᑦ ᐃᓕᑦᓯᕙᓪᓕᐊᓕᑌᓐᓇᓕᕐᑐᑦ ᐊᖏᖃᑎᒌᓐᓂᐅᓯᒪᔪᒥᒃ ᐊᕐᖁᓯᐅᒻᒪᕆᒋᐊᖃᕐᓯᒪᓐᓂᒪᖔᑕ ᓄᓇᖁᑎᑦᓴᑎᓐᓂᒃ ᐊᖏᖃᑎᒌᒍᑎᖃᕋᓱᑦᓱᑎᒃ ᑎᑭᑦᓱᒍ 1975. ᑐᓴᕆᐊᒥᒃ ᐊᖏᖃᑎᒌᒐᓱᖃᑕᐅᓯᒪᒻᒪᕆᑦᑐᖅ ᓂᕆᐅᓇᕋᓂ ᐃᓅᒍᓐᓀᑎᓪᓗᒍ ᓈᒻᒪᓈᕐᓱᓂ ᓇᓪᓕᐅᓂᕐᓯᐅᓂᑦᑎᓄᑦ ᑌᒣᒻᒪᑦ ᖃᐅᔨᒪᖁᕙᕗᑦ ᐊᓛᓯᑲᒦᑦᑐᑦ ᐃᓚᖏᑦ ᑯᔩᒃ ᐱᒐᓱᐊᕐᓯᒪᓂᖏᑦ ᑲᔪᓯᔪᒥᒃ ᑲᓇᑕᒥ ᐃᓚᐅᖏᓐᓇᐸᓐᓂᐊᕆᐊᖏᑦ”

ᒪᑭᕝᕕᒃ ᑕᕐᕋᓕᔮᒐᑎᒍᑦ ᐅᓂᒃᑲᐅᓯᓕᐊᕆᔭᐅᑎᓚᐅᔪᔭᒥᓂᒃ ᑕᑯᑦᓴᐅᑎᑦᓯᒋᐊᖕᖓᓯᓚᐅᔪᔪᖅ ᑕᕐᕿᕆᓚᐅᔪᔭᑦᑎᓂ ᐅᓂᒃᑲᐅᓯᖃᕐᓱᑎᒃ ᐅᕕᒐᕐᑑᓱᑎᒃ ᐃᓄᑐᐃᓐᓇᓂᒃ ᑯᐯᒃ ᑲᕙᒪᒃᑯᓂᓪᓗ ᐃᑯᒪᓕᕆᔨᖏᓐᓂᓗ ᓵᑦᓯᓚᐅᕐᑐᕕᓂᕐᓂᒃ ᐊᕐᕌᒍᑦ 1970-ᓃᑎᓪᓗᒋᑦ ᐅᓪᓗᒥ ᓄᓇᕕᐅᑉ ᖃᓄᐃᓕᖓᓂᕆᓕᕐᑕᖓᓂᒃ ᓴᕐᕿᒍᑎᐅᓯᒪᔪᓂᒃ. ᑯᔩᒃ ᕖᔅᑭ ᐊᕐᕌᓂ ᐊᐅᔭᒥ ᒪᓐᑐᔨᐊᓕᐊᓚᐅᔪᔪᖅ ᑕᕐᕋᓕᔮᒐᑦᓴᓕᐊᖑᖃᑕᐅᒋᐊᕐᑐᓱᓂ, ᑕᑯᑦᓴᐅᒍᑎᒋᓂᐊᓕᕐᑕᖓᓂᒃ ᐃᑲᔪᕐᓯᓯᒪᓂᒃᑯᑦ ᖃᐅᔨᒪᔭᐅᒍᑎᒥᑕ.

ᑐᑭᓯᒋᐊᒃᑲᓂᕈᒪᔪᑦ ᖃᐅᔨᒋᐊᕐᕕᖃᕈᓐᓇᑐᑦ
ᒍᐃᓕᐋᒻ ᑕᒍᕐᓈᒥᒃ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨᒥᒃ ᑐᓴᕋᑦᓴᓂᐊᕐᑐᓕᕆᔨᐅᑦᓱᓂᓗ
wtagoona@makivik.org
819-964-2925

Makivik is the development corporation mandated to manage the heritage funds of Inuit of Nunavik provided for in the James Bay and Northern Québec Agreement. Makivik’s role includes the administration and investment of these funds and the promotion of economic growth.
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᒍᑎᓂᒃ.