ᒪᑭᕝᕕᐅᑉ ᐳᕐᑐᓂᕐᓴᒋᒃ ᐋᑕᒥ ᑕᓖᓪ ᐊᓚᑯ ᐊᒻᒪᓗ ᐋᓐᑎ ᐲᕐᑎ ᐊᕐᕌᒍᓄᑦ ᐱᖓᓱᒋᐊᓪᓚᓄᑦ ᓂᕆᐅᕐᑕᐅᒋᐊᓪᓚᑑᒃ

ᔭᓄᐊᕆ 20, 2017 – ᑰᒃᔪᐸᖅ, ᓄᓇᕕᒃ – ᓄᓇᕕᒻᒥᐅᑦ ᐃᓚᐅᔪᑦ ᓂᕈᐊᕋᑦᓴᖑᕐᑐᑑᑎᑦᓯᓚᐅᕐᖁᑦ ᐋᑕᒥ ᑕᓖᓪ ᐊᓚᑯᒥᒃ, ᐊᖓᒧᕐᖄᑉ ᑐᖓᓕᖓᓄᑦ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᒥᒃ ᑲᒪᔨᐅᓲᒥᒃ ᐊᒻᒪᓗ ᐋᓐᑎ ᐲᕐᑎᒥᒃ ᑮᓇᐅᔭᓕᕆᔨᐅᑉ ᐃᓂᖓᓄᑦ ᒪᑭᕝᕕᒥ. ᑖᒃᑯᐊ ᐳᕐᑐᓂᕐᓵᒃ ᑐᖓᓕᐊᓂ ᓂᕈᐊᕐᑕᐅᓯᒪᓚᖓᓯᔫᒃ ᐊᕐᕌᒍᓂᒃ ᐱᖓᓱᓂᒃ. ᑏᓰᒻᐱᕆ 1, 2016-ᖑᑎᓪᓗᒍ ᒪᑭᕝᕕᒃ ᓂᕈᐊᕋᑦᓴᐅᓂᐊᕐᑐᓂᒃ ᑎᒃᑯᐊᑕᐅᑎᑦᓯᓂᖃᕐᑎᓗᒍ ᐊᖓᔪᕐᖄᑉ ᑐᖓᓕᖓᑕ ᐃᓂᖓᓄᑦ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᒥ ᑮᓇᐅᔭᓕᕆᔨᐅᓪᓗ ᐃᓂᖓᓄᑦ ᐅᑯᐊᓚᐅᔪᖅ.

ᐋᑕᒥ ᑕᓖᓪ ᐊᓚᑯ ᐅᖃᓚᐅᕐᑐᖅ “ᐅᐱᒍᓱᓪᓚᕆᑉᐳᖓ ᓄᓇᕕᒻᒥᐅᑦ ᐃᓚᐅᔪᑦ ᐅᑉᐱᕆᔭᖃᕐᒪᑕ ᐅᕙᓐᓂᒃ ᓂᕈᐊᕋᑦᓴᖑᕐᑐᑑᓚᐅᔪᒐᒪ ᐊᖓᔪᕐᖄᑉ ᑐᖓᓕᖓᑕ ᐃᓂᖓᓄᑦ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᒥᒃ ᑲᒪᒋᔭᖃᕐᓂᐊᓱᖓ. ᐊᕐᕌᒍᓂ ᐱᖓᓱᓂ ᐊᓂᒍᕐᑐᓂ ᐱᓇᓱᐊᒻᒪᕆᖃᑦᑕᕋᒪ ᓄᓇᕕᒻᒥᐅᓂᒃ ᑭᒡᒐᑐᕐᓱᖓ ᐊᒥᓱᐃᓂᒃ ᓂᕐᔪᑎᓕᕆᓂᕐᓅᓕᖓᔪᓂᒃ, ᓄᓇᓕᕆᓂᕐᓄᑦ ᑕᕆᐅᒥᓗ ᓄᓇᓕᓕᒫᑎᒍᑦ, ᑲᓇᑕᓕᒫᒥ ᓯᓚᕐᔪᐊᓕᒫᒥᓗ. ᐱᓇᓱᐊᖏᓐᓇᖃᑦᑕᓂᐊᕐᖁᖓ ᐃᓄᐃᑦ ᖃᐅᔨᒪᐅᓯᖏᓐᓂᒃ, ᖃᐅᔨᓴᕐᓂᓂᒃ, ᐃᓕᓐᓂᐊᓂᕐᓂᓗ ᓂᕿᑦᓴᓯᐅᕈᓐᓇᓂᕗᑦ ᓴᐳᒻᒥᔭᐅᑦᓯᐊᖁᓪᓗᒍ ᐃᓄᑐᐃᓐᓀᓗ ᐃᓅᓯᖓ ᐃᓅᒍᓯᖓ.”

ᔭᓄᐊᕆ 19, 2017-ᒥ ᓄᓇᕕᒻᒥᐅᑦ ᐃᓚᐅᔪᑦ ᓂᕈᐊᕆᐊᓪᓚᓚᐅᔪᔪᑦ ᐋᓐᑎ ᐲᕐᑎᒥᒃ ᑮᓇᐅᔭᓕᕆᔨᐅᑉ ᐃᓂᖓᓄᑦ 1409-ᓄᑦ ᓂᕈᐊᕐᑕᐅᓱᓂ, 68.3% ᓂᕈᐊᕐᑐᓂ. ᑏᕕ ᑐᐳᐃ ᓂᕈᐊᕐᑕᐅᑎᒐᓱᐊᓚᐅᔪᒻᒥᔪᖅ ᑮᓇᐅᔭᓕᕆᔨᐅᑉ ᐃᓂᖓᓄᑦ 645-ᓄᑦ ᓂᕈᐊᕐᑕᐅᓚᐅᔪᑦ, 31.3% ᓂᕈᐊᕐᑐᓂ. 7842 ᓂᕈᐊᕈᓐᓇᑐᑦ, 2063 ᓂᕈᐊᕆᐊᕐᑐᓚᐅᔪᑦ.

ᐋᓐᑎ ᐲᕐᑎ ᐅᖃᓚᐅᕐᑐᖅ “ᐅᐱᒍᓱᑉᐳᖓ ᓂᕈᐊᕐᑕᐅᒋᐊᓪᓚᕆᐊᒥᒃ ᑎᒥᖁᑎᑦᑎᓂ ᑭᒐᒡᑐᕐᑐᒥ ᓄᓇᕕᒻᒥᐅᓗ ᐱᒐᓱᐊᕈᒪᔭᖏᓐᓂᒃ ᐱᓇᓱᐊᕐᑕᖃᕐᓱᓂ. ᐊᐅᓚᑦᓯᖏᓐᓇᓂᐊᕐᖁᖓ ᑮᓇᐅᔭᕐᑖᕆᓯᒪᔭᑦᑎᓂᒃ ᐱᓂᐊᕐᓂᕋᐅᑎᒋᓚᐅᔪᒐᒃᑯ ᐃᓚᐅᔪᓄᑦ ᑮᓇᐅᔭᖁᑎᓂᒃ ᐅᓄᕐᓯᕙᓪᓕᐊᑎᑦᓯᖏᓐᓇᕋᓱᐊᕐᓂᐊᐳᖓ. ᓄᓇᕕᒻᒥᐅᑦ ᐃᓅᓯᖓᓐᓂᒃ ᐱᕙᓪᓕᑎᑦᓯᒐᓱᐊᕐᓂᒥᒃ ᐱᓇᓱᐊᕐᐳᖓ ᓄᓇᓕᓐᓄᓗ ᐅᑎᕐᑎᓯᒋᐊᒥᒃ, ᑕᒪᓐᓇ ᑌᒪᖕᖓᓕᒫᖅ ᐃᓱᒪᒋᓲᕋ ᐱᓇᓱᐊᕐᑕᓕᒫᒃᑲᓂ ᓄᓇᕕᒻᒥᐅᓂᒃ ᑭᒡᒐᑐᕐᓂᖅ.”

ᑕᑯᒍᒪᑐᐊᕈᑦᓯᒋᑦ ᓂᕈᐊᕈᑎᕕᓃᑦ 2017-ᒥ, ᑕᑯᒋᐊᕈᓐᓇᑐᓯ ᖃᕆᑕᐅᔭᒃᑯᑦ ᓴᕐᕿᔮᕐᑎᓯᒍᑎᐅᔪᓂᒃ ᐅᕙᓂ www.makivik.org. ᐋᑕᒥ ᑕᓖᓪ ᐊᓚᑯ ᐋᓐᑎ ᐲᕐᑎᓗ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂ ᑲᑎᒪᓂᒻᒪᕆᖓᓂ ᒫᑦᔨ 20, 2017-ᒥ ᑕᓯᐅᔭᒥ ᐊᖏᒻᒪᕆᒍᑎᓂᒃ ᐊᑑᑎᓛᕐᑑᒃ.

-30-

 ᖃᐅᔨᒋᐊᕐᕕᐅᒍᓐᓇᑐᖅ
ᒍᐃᓕᐊᒻ ᑕᒍᓐᓈᖅ
ᑐᓴᐅᒪᖃᑦᑕᐅᑎᓂᕐᒥᒃ ᐊᑕᐅᑦᓯᑰᕐᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ ᑐᕌᕈᑎᖓ wtagoona@makivik.org
www.makivik.org

ᒪᑭᕝᕕᐅᑉ ᐳᕐᑐᓂᕐᓴᒋᒃ ᐋᑕᒥ ᑕᓖᓪ ᐊᓚᑯ ᐊᒻᒪᓗ ᐋᓐᑎ ᐲᕐᑎ ᐊᕐᕌᒍᓄᑦ ᐱᖓᓱᒋᐊᓪᓚᓄᑦ ᓂᕆᐅᕐᑕᐅᒋᐊᓪᓚᑑᒃ