ᒪᑭᕝᕕᒃ ᑐᓴᕐᑎᓯᒍᑎᖃᕐᖁᖅ ᐅᐱᒍᓱᓐᓂᒥᓂᒃ ᒪᕐᕈᕕᑦᓱᓂ ᐃᓕᓯᒪᒋᐊᖃᕐᓂᖅ ᐱᓂᐊᕐᓂᖃᕈᑕᐅᖃᑦᑕᑎᓪᓗᒍ ᐊᑑᑎᔭᐅᒍᒪᒐᔭᕐᑐᑦ ᓯᕗᓂᕐᒥ ᐱᓪᓗᒋᑦ ᐱᕙᓪᓕᔭᐅᑦᓯᐊᖁᓪᓗᒋᑦ ᓄᓇᕕᒻᒥᐅᑦ ᐅᕕᒃᑫᑦ ᐃᓅᓱᑦᑐᐃᑦ ᐃᓘᓐᓈᒍᓪᓗ ᓄᓇᕕᒃ

ᑰᒃᔪᐊᖅ ᑯᐯᒃ-ᓯᑕᒪᖓᓐᓂ ᓯᑉᑎᒻᐱᕆ 28, 2017- ᒪᑭᕝᕕᒃ ᒪᑭᕝᕕᒃ ᐅᐱᒍᓲᑎᖃᕐᖁᖅ ᒪᕐᕈᕕᑦᓱᓂ ᐃᓕᓯᒪᒋᐊᖃᕐᓂᖅ ᐱᓪᓗᒍ ᐊᑑᑎᔭᐅᖃᑦᑕᓚᐅᕐᑑᓂᒃ ᐃᓕᖓᑎᓪᓗᒋᒃ ᓄᓇᕕᒻᒧᑦ. ᓯᕗᓪᓕᖅ ᐃᓕᓯᒪᒋᐊᖃᕐᓂᖅ ᑐᑭᓯᑎᑦᓯᒍᑕᐅᑦᓱᓂ ᐊᑑᑎᑎᑕᐅᓚᐅᕐᑐᖅ ᖃᕐᔪᐃᑦ ᐅᕕᒃᑫᑦ ᑲᑐᑦᔨᖃᑎᒌᓐᓂᖓᓄᑦ ᑕᒃᒐᓂ ᐱᓇᓱᐊᕈᓯᕐᒥ ᐅᖃᓕᒪᒍᑎᖃᕐᓱᑎᒃ ᖃᓄᐃᓕᖓᓂᖓᓂᒃ ᐃᓕᓯᒪᒋᐊᖃᕐᓂᐅᑉ ᐸᕐᓇᑕᐅᓯᒪᐅᓯᓕᒫᖏᒍᑦ ᐊᑑᑎᑦᓯᐊᒪᕆᓚᐅᕐᑐᖅ. ᐅᖃᓕᒪᔨᒋᔭᐅᓚᐅᕐᑐᑦ ᒪᑭᕝᕕᐅᑉ ᐊᖓᔪᕐᖄᖓ ᔫᐱ ᑕᕐᕿᐊᐱᒃ, ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᖓᔪᕐᖄᖓ ᐋᓚᓯ ᓈᓚᑦᑑᔭᖅ ᐊᒻᒪᓗ ᒪᕐᕈᒋᐊᓪᓛᒃ ᐃᓕᓐᓂᐊᑎᐅᓯᒪᔫᒃ ᐳᕐᑐᓂᕐᓴᒋᐊᓪᓚᒥ ᓕᐊ ᒦ ᓇᕙᕋᓇ ᑲᓓᔅᓗ. ᐅᖃᓕᒪᒍᑎᖃᕐᓂᖅ ᐃᓕᓯᒪᒋᐊᖃᕐᓂᐅᑉ ᖃᓄᐃᓕᖓᓂᖓᓂᒃ ᓯᕗᓪᓕᐹᑦᓯᐊᒥ ᐊᑑᑎᔭᐅᓚᐅᕐᖁᖅ ᓄᓇᕕᒻᒥ ᐊᑕᐅᑦᓯᑰᖃᑕᐅᑦᓱᓂ ᐊᕐᕌᒍᑕᒫᑦ ᑲᑎᒪᑎᑦᓯᓂᕆᓲᖓᓄᑦ ᖃᕐᔪᐃᑦ ᐅᕕᒃᑫᑦ ᑲᑐᑦᔨᖃᑎᒌᓐᓂᖓᑕ. ᓈᓚᐅᑎᒃᑯᑦ ᑐᓴᕐᓴᐅᖃᑦᑕᓚᕐᒥᔪᑦ ᑕᕝᕓᓇᑦᓴᐅᑎᒋ ᐅᖃᓕᒪᓪᓗᑐᕐᑎᓗᒋᑦ ᑐᓵᑦᓱᒋᑦ ᑕᕐᕋᒥᐅᑦ ᓂᐱᖓᑦᑕ ᑐᓴᕐᓴᐅᑎᑦᓯᒍᑎᖓᒍᑦ ᓄᓇᕕᒻᒥ. ᒪᑭᕝᕕᒃ ᐅᐱᒍᓱᒻᒪᕆᒃᑯᖅ ᐊᔪᐃᓐᓚᕈᑎᖃᕐᓂᖏᓐᓂᒃ ᓯᓚᑐᔫᓂᖏᓐᓂᓗ ᖃᕐᔪᐃᑦ ᐅᕕᒃᑫᑦ ᑲᔪᖏᕐᓴᕆᐊᓪᓚᓱᒋᓪᓗ ᐱᔭᕐᓂᖏᑦᑐᓂᒃ ᐱᒐᓱᐊᕈᑎᖃᕐᓂᖏᓐᓄᑦ ᓄᕐᖃᕈᑎᖃᕈᓐᓀᓗᑎᒃ ᐱᒐᓱᐊᕐᑕᒥᓂᒃ.

ᑐᖓᓕᐊ ᒪᓐᑐᕆᐊᓪᒥ ᐱᓇᓱᐊᕈᓯᐅᓚᐅᕐᑐᒥ ᐱᒋᐊᓪᓚᕆᑦᑎᑕᐅᓂᕆᓚᐅᕐᑕᖓ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕕᖓᑕ ᑖᓐᓇ ᐃᓘᓐᓇᑎᓐᓄᑦ ᐅᐱᒍᓱᒍᑎᒋᔭᐅᔪᑦᓴᐅᕗᖅ ᐊᒻᒪᓗ ᐱᒐᓱᐊᑦᓯᐊᕈᑎᒋᓗᒍ ᐱᕙᖃᑦᓯᐊᖁᓪᓗᑕ . ᓄᓇᕕᒃ ᓯᕗᓂᑦᒪᔪᑦ ᐃᖏᕐᕋᑎᑕᖏᑦ ᐃᓕᓐᓂᐊᑕᐅᑎᑦᓱᒋᑦ ᒪᓐᑐᕆᐊᓪᒥ ᐃᓂᖃᖃᑦᑕᑐᑦ ᐊᕙᑕᖅ ᐱᐅᓯᑐᖃᓕᕆᕕᖓᑕ ᐊᒃᓚᕕᖓᓂ. ᐱᒋᐊᓪᓚᕆᑦᑎᑕᐅᓂᖓ ᐊᑑᑎᓚᐅᕐᑐᖅ ᓯᑉᑎᒻᐱᕆ 20, 2017 ᐅᕙᓃᑦᓱᑎᒃ ᑲᓚᑉ ᐋᑦᕗᐊᑐ (Club Atwater).

“ᐊᓕᐊᓱᓪᓚᕆᓚᐅᔪᕗᖓ ᓯᕗᓪᓕᐹᒥ ᑕᑯᓂᐊᕐᓱᖓ ᓯᑉᑎᒻᐱᕆ ᕿᑎᖓᓂ ᐃᓕᓐᓂᐊᑎᓂᒃ, ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᔫᐱ ᑕᕐᕿᐊᐱᒃ ᐃᓚᐅᓚᐅᔪᒻᒥᔪᖅ ᐃᓄᑐᙯᑦ ᑲᑎᒪᑎᓪᓗᒋᑦ ᑰᒃᔪᐊᕌᐱᒻᒥ ᑕᒃᒐᓂᑦᓰᓇᖅ ᐅᓪᓗᒥ ᐅᒃᑯᐃᑕᐅᓂᖃᕐᑎᓗᒍ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕕᖓ.ᖃᓪᓗᓛᓂ ᐅᖄᕕᒋᓚᐅᔪᔭᒃᑲ ᖃᓄᐃᑦᑑᓚᐅᕐᓯᒪᒻᒪᖔᑦ ᓯᕗᓪᓕᐸᐅᑦᓱᖓ ᖃᖓᑦᑕᔫᕐᑎᕈᖃᑕᐅᓚᐅᕐᓯᒪᒐᒪ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ, ᐱᔭᕆᐅᕐᓴᓱᖓ ᖃᓪᓗᓈᓂ ᐊᓱᐃᓛ ᖃᖓᑦᑕᔫᕐᑎᕈᕐᓱᖓ ᐃᓄᐃᑦ ᖃᖓᑦᑕᔫᖓᓐᓄᑦ. ᑕᑯᓚᐅᔪᔪᖓ 18ᓂᒃ ᐃᓕᓐᓂᐊᑎᓂᒃ ᓂᕆᐅᓐᓂᖃᑦᓯᐊᓱᑎᒃ ᓯᕗᓂᕐᒥᓂ, ᐅᖃᐅᑎᓚᐅᕐᑕᑲ ᒪᑭᕝᕕᒃ ᐃᓗᓐᓇᑎᓪᓗ ᓄᓇᕕᒻᒥ ᐱᓇᓱᕝᕕᐅᔪᑦ ᑲᔪᖏᕐᓭᒋᐊᖏᑦ ᐃᓘᓐᓇᖏᓐᓂᒃ ᐃᓕᓐᓂᐊᑐᓂᒃ ᐃᓕᓐᓂᐊᑕᖏᑦ ᐱᓪᓗᒋᑦ,ᓴᐳᑦᔨᓯᒪᒻᒥᔪᒍᑦ ᑲᔪᖏᕐᓴᒋᐊᓪᓚᓱᒋᓪᓗ ᐃᓕᓐᓂᐊᑎᑦᓯᔩᑦ ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᕕᖓᓂ.”

ᐃᖏᕐᕋᑎᑕᐅᒍᑎᖏᑦ ᐃᓕᓐᓂᐊᒉᑦ ᑮᓇᐅᔭᖃᕐᑎᑕᐅᕗᑦ ᐅᖓᑖᓄᑦ $665-ᑕᐅᓴᓐ ᐱᓯᒪᑦᓱᒋᑦ ᐱᑦᔪᔭᐅᕕᖓᓐᓂᑦ ᓄᓇᖃᕐᖄᓯᒪᔪᑦ ᑕᕐᕋᒥᐅᓪᓗ ᑲᓇᑕᒥ. ᒪᑭᕝᕕᒃ ᐃᑲᔪᕐᓯᓯᒪᒍᑎᖃᕐᒥᑎᓪᓗᒍ $80,000ᓂᒃ ᐃᓕᖓᔪᓂᒃ ᐊᕐᕌᒍᒧᑦ ᓯᕗᓪᓕᐹᒧᑦ ᐃᖏᕐᕋᑎᑦᓯᓂᖓᑕ.

ᑮᓇᐅᔭᖃᕐᑎᑕᐅᒍᑎᖏᑦ ᐊᑐᐃᓐᓇᖃᕐᑎᓯᓚᖓᕗᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑕᐅᔪᓂᒃ ᓄᓇᕕᒻᒥᐅᑦ ᐅᕕᒃᑲᖏᑦᑕ ᐱᕕᑦᓴᖃᕈᑎᒋᓂᐊᕐᑕᖏᓐᓂᒃ ᐃᓕᓐᓂᐊᓗᑎᒃ ᐃᓕᓪᓗᒍᓗ ᐃᓄᑐᐃᓐᓀᑦ ᖃᓄᐃᑦᑑᓯᒪᒻᒪᖔᑕ ᑌᑲᖕᖓᓂᐊᕐᔪᒃ, ᐅᖃᐅᓯᕐᖓ, ᐱᕐᖁᓯᖓ, ᐱᓂᐊᕐᓂᓕᕆᒍᓯᖓ ᐊᒻᒪᓗ ᐊᐅᓚᑦᓯᒍᓯᖓ. ᐃᖏᕐᕋᑎᑕᐅᓂᖓ ᓯᕗᓪᓕᐹᑦᓯᐊᖅ ᐃᓕᖓᑦᓱᓂ ᓄᓇᕕᒻᒧᑦ ᐃᓂᓪᓚᑕᐅᓯᒪᑦᓱᓂᓗ ᐱᔭᕇᕈᓯᕐᑎᓯᒍᑕᐅᖃᑦᑕᓂᐊᕐᓱᓂ ᐃᓕᓐᓂᐊᑎᓂᒃ ᐱᔭᕇᕈᑎᖃᕐᓗᑎᒃ ᖃᐅᔨᒪᐅᓯᕐᑖᓯᐊᕐᓗᑎᒃ ᒐᓛᐱᑐᐃᓐᓇᕈᓐᓀᓗᑎᒃ ᑕᒪᑦᓱᒥᖓ ᐃᓄᑐᐃᓐᓇᐅᓂᕐᒥᑕ ᖃᓄᐃᓕᖓᒋᐊᖕᖓᓯᒪᓂᖓᓂᒃ.ᐊᑐᐃᓐᓇᕈᕐᑎᕆᒍᑎᐅᒻᒪᑦ ᐃᓄᑐᐃᓐᓇᓂᒃ ᐅᕕᒃᑲᓂᒃ ᓯᕗᒧᒋᐊᖁᓪᓗᒋᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᓯᒪᓂᖏᑦ, ᐱᒍᓐᓇᓯᒍᑎᒋᓗᒋᑦ ᐱᒍᓐᓇᓂᖃᕈᑕᐅᒋᐊᓕᓐᓂᒃ ᓈᒻᒪᓈᑦᓯᐊᑐᓂᒃ ᐱᓇᓱᒐᕐᓄᑦ ᓄᓇᕕᒻᒦᑐᓄᑦ ᐱᓇᓱᕝᕕᐅᔪᓄᑦ, ᐊᒻᒪᓗ ᓴᐳᒻᒥᒍᑎᒋᑦᓱᒍ ᓄᐃᑕᐅᕙᓪᓕᐊᓂᖓᓂᒃ ᐱᕐᖁᓯᕐᒥᑎᒍᑦ ᑐᖕᖓᓯᐊᕐᓗᑎᒃ ᐅᕕᒃᑫᑦ ᐊᑐᕋᑦᓴᓯᐊᖃᖁᓪᓗᒋᑦ ᓯᕗᓕᕈᑎᖃᕐᓂᒥᒍᑦ ᐱᓂᐊᕐᓂᓕᕆᐅᑎᓂᒃ ᐃᓅᓯᕐᒧᓗ ᐃᓕᖓᔪᓂᒃ ᓯᕗᒧᒍᑎᒋᓂᐊᕐᑕᖏᓐᓂᒃ ᓄᓇᕕᒻᒥᐅᑦ ᐊᕗᖓᒋᐊᓪᓛᕈᑎᒋᓗᒋᓪᓗ. ᑕᒪᓐᓇ ᐱᑦᔪᑎ ᑭᐅᑦᔪᑕᐅᒻᒥᔪᖅ ᓄᓇᕕᒻᒥᐅᑦ ᐅᕕᒃᑲᖏᑦᑕ ᐅᖃᐅᓯᕆᓚᐅᕐᓯᒪᔭᖏᓐᓄᑦ ᐸᕐᓇᓯᒪᐅᑎᒥᒃ ᑲᑎᓯᒍᑎᖃᖃᑦᑕᑎᓪᓗᑕ.

-30-

ᑐᑭᓯᒋᐊᑦᓯᐊᕈᒪᒍᕕᑦ ᖃᐅᔨᒋᐊᕐᕕᒋᓗᒍ
ᕗᐃᓕᐊᒻ ᑕᒍᕐᓈᖅ
ᑐᓴᐅᒪᖃᑦᑕᐅᑎᒍᑎᓕᕆᔨ ᑐᓴᕋᑦᓴᓕᕆᔨᐅᑦᓱᓂᓗ:
819-964-2925
wtagoona@makivik.org
www.makivik.org

ᒪᑭᕝᕕᒃ ᓄᓇᑖᕈᑎᖃᕐᓯᒪᑦᓱᓂ ᐱᖕᖑᓯᒪᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓱᓂ ᐱᔪᖃᕐᓯᒪᔪᕕᓂᕐᓂᒃ ᐱᑦᔪᑎᖃᕐᓱᑎᒃ ᑮᓇᐅᔭᖁᑏᑦ ᑮᓇᐅᔭᖁᑎᖏᑦ ᐃᓄᑐᐃᓐᓀᑦ ᓄᓇᕕᒻᒥᐅᑦ ᐱᑕᖃᕐᑎᑕᐅᔪᑦ ᐊᑐᕐᓱᒍ ᔦᒥᓯ ᐯ ᑯᐯᒃ ᑕᕐᕋᖓᑕᓗ ᐊᖃᑎᒌᒍᑎᖓ. ᒪᑭᕝᕕᐅᑉ ᑎᓕᔭᐅᒪᐅᑎᖓ ᐃᓚᖃᕐᒥᔪᖅ ᐊᐅᓚᑦᓯᓂᕐᒥᒃ ᐱᕈᕐᐸᓕᐊᑎᑦᓯᓂᕐᒥᓗ ᑖᒃᑯᓂᖓ ᑮᓇᐅᔭᓕᐅᕈᑎᐅᒍᓐᓇᑐᓂᒃ ᐊᒻᒪᓗ ᐱᓕᐅᒥᑎᑦᓯᓂᕐᒥᒃ ᑮᓇᐅᔭᑎᒍᑦ ᐱᑕᖃᕐᑎᓯᑦᓱᓂ ᐃᑲᔪᕐᓯᒪᒍᑎᓂᒃ ᓄᐃᑕᐅᕙᓪᓕᐊᓂᖏᓐᓂᒃ ᐃᓄᑐᐃᓐᓇᓄᑦ ᐊᐅᓚᑕᐅᑦᓱᑎᒃ ᑮᓇᐅᔭᓕᐅᕋᓱᐊᕈᑕᐅᔪᑦ ᓄᓇᕕᒻᒥ. ᒪᑭᕝᕕᒃ ᐱᕙᓪᓕᑎᑦᓯᒐᓱᐊᖏᓐᓇᓕᒫᕐᑐᖅ ᐱᐅᓕᐊᕐᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᐱᕐᖁᓯᖓᓂᒃ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ, ᐃᓅᓯᖃᑦᓯᐊᓗᑎᒃ, ᐊᔪᕐᓴᖏᑦᑑᓗᑎᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᑦ ᐃᓄᑐᐃᓐᓀᑦ ᓄᓇᓕᒻᒥᓂ.

ᒪᑭᕝᕕᒃ ᑐᓴᕐᑎᓯᒍᑎᖃᕐᖁᖅ ᐅᐱᒍᓱᓐᓂᒥᓂᒃ ᒪᕐᕈᕕᑦᓱᓂ ᐃᓕᓯᒪᒋᐊᖃᕐᓂᖅ ᐱᓂᐊᕐᓂᖃᕈᑕᐅᖃᑦᑕᑎᓪᓗᒍ ᐊᑑᑎᔭᐅᒍᒪᒐᔭᕐᑐᑦ ᓯᕗᓂᕐᒥ ᐱᓪᓗᒋᑦ ᐱᕙᓪᓕᔭᐅᑦᓯᐊᖁᓪᓗᒋᑦ ᓄᓇᕕᒻᒥᐅᑦ ᐅᕕᒃᑫᑦ ᐃᓅᓱᑦᑐᐃᑦ ᐃᓘᓐᓈᒍᓪᓗ ᓄᓇᕕᒃ