Makivik Corportion

ᑲᓇᑕᓕᒫᒥ ᒪᑭᕝᕕᒃ ᐊᑦᔨᐅᖏᓪᓚᕆᑦᑐᖅ. ᓴᕐᕿᑎᑕᐅᓚᐅᕐᓯᒪᔪᖅ

1975-ᖑᑎᓪᓗᒍ ᐊᐅᓚᑦᓯᔨᐅᓂᐊᕐᑎᓗᒋ ᐃᓄᐃᑦ ᓄᓇᑖᕐᓂᒧᑦ ᑮᓇᐅᔭᖁᑎᑖᖏᓐᓂᒃ ᑲᓇᑕᒥ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓂᖓᒍᑦ, “ᐊᐅᓚᑦᓯᓂᐅᑉ” ᐅᖓᑖᓄᒻᒪᕆᒃ ᐱᓇᓱᐊᕐᓯᒪᔪᖅ.

JBNQAᐱᓂᐊᕐᓂᓕᕆᓂᑎᒍᑦ, ᐃᓗᕐᖁᓯᕐᑎᒍᑦ ᒪᑭᑉᐸᓕᐊᒐᓱᐊᕐᓂᑎᒍᓪᓗ, ᒪᑭᕝᕕᒃ ᓴᓇᓂᕐᓂ ᐱᕈᕐᐸᓕᐊᑎᑦᓯᓂᕐᓂᓗ ᓄᓇᕕᒻᒥ ᐱᒐᓱᐊᒻᒪᕆᑦᓯᒪᔪᖅ ᑲᓇᑕᒥᐅᓂ ᑯᐯᒻᒥᐅᓂᓪᓗ ᐃᓚᐅᒐᓗᐊᕐᓱᑎᒃ ᓄᓇᕕᒻᒥᐅᑦ ᐃᓄᐃᑦ ᓇᒻᒥᓂᖅ ᐃᓂᑖᕐᓯᒪᔪᑦ ᑭᓇᐅᓂᕐᒥᓂᓪᓗ ᓴᕐᕿᑎᑦᓯᓯᐊᕐᓱᑎᒃ.

ᒪᑭᕝᕕᒃ ᐱᓇᓱᐊᕐᓂᒥᒍᑦ ᑕᑯᑦᓴᐅᑎᑦᓯᓲᖅ ᐊᖏᖃᑎᒌᒍᑎᐅᓯᒪᔪᑎᒍᑦ ᐅᓪᓗᒥᐅᓕᕐᑐᖅ ᓄᓇᖃᖅᑳᓯᒪᔪᓄᑦ ᐅᕝᕙᓗᓗᓃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᐱᕙᓪᓕᖁᑎᐅᑎᑦᓯᓯᐊᕋᓱᐊᕐᓱᓂ; ᑲᕙᒪᓂ ᐃᓄᓂᓗ. ᑕᑯᑦᓴᐅᑎᑦᓯᖃᑦᑕᒨᖅ ᐱᓇᓱᐊᖃᑎᒌᓐᓂᓂᒃ ᓄᑖᓂᒃ ᑲᕙᒪᑐᖃᒃᑯᓂ, ᑯᐯᑉ ᑲᕙᒪᖓᓂ ᐊᓯᖏᓐᓂᓗ ᓄᓇᖃᖅᑳᓯᒪᔫᖃᑎᒥᓂ ᐱᓇᓱᐊᖃᑎᖃᑦᓯᐊᕈᓐᓇᓂᕐᒥᓂᒃ ᐃᓄᑐᐃᓐᓇᐅᓱᑎᒃ ᑯᐯᑉ ᑕᕐᕋᖓᓂᐅᒥᖑᑦᓱᑎᒃ.

ᐊᕐᕌᒍᓂ ᐊᕙᑎᓪᓗ ᖁᓕᓪᓗᓂ ᐊᓂᒍᕐᑐᓂ ᒪᑭᕝᕕᒃ ᓯᕗᓕᕐᑎᖑᕐᓯᒪᔪᖅ ᑲᓇᑕᒥ ᓯᓚᕐᔪᐊᓕᒫᒥᓗ ᓄᓇᖃᖅᑳᓯᒪᔪᑦ ᐱᒍᓐᓇᐅᑎᖏᓐᓂᒃ, ᐱᓂᐊᕐᓂᓕᕆᓂᕐᑎᒍᑦ ᐊᖏᖃᑎᒌᒐᓱᐊᕐᓂᓂᒃ ᒪᑭᑉᐸᐊᓕᒐᓱᐊᕈᑎᖃᕐᓂᒥᓪᓗ ᐊᒻᒪᓗ ᒪᑭᑉᐸᓕᐊᒐᓱᐊᕈᑎᖃᕐᓂᑯᑦ ᑲᓇᑕᓕᒫᒥ, ᑯᐯᓕᒫᒥ ᓄᓇᓕᓕᒫᑎᒍᓪᓗ.

ᑎᒥᐅᔪᖅ ᐊᓂᒍᐃᓯᒪᔪᖅ ᐃᓄᐃᑦ ᐊᒥᓱᑦ ᓯᕘᕋᒋᓯᒪᔭᖓᓂᒃ ᓄᓇᖃᖅᑳᓯᒪᔫᓂᕋᕐᓂᒥᓂᒃ ᐊᓯᐅᔨᑦᔭᖒᕐᓱᑎᒃ ᐱᒍᓐᓇᐅᑎᒥᓂᓪᓗ ᓄᓇᒥᓂ ᐱᐅᓯᑐᖃᕐᒥᒍᑦ. ᑮᓇᐅᔭᕐᑖᕆᓯᒪᔭᖏᓐᓂᒃ ᐱᑦᓯᐊᓱᒋᑦ ᑮᓇᐅᔭᓕᐅᕈᑎᖃᕐᓱᑎᒃ ᐊᑐᑦᓯᐊᕋᓱᐊᕐᓱᑎᓪᓗ ᐃᓄᐃᑦ “ᓄᓇᖁᑎᖏᓐᓂᒃ” ᓴᕐᕿᑎᑦᓯᓱᓂ ᐃᓄᐃᑦ ᓄᓇᖃᖅᑳᓯᒪᔪᓪᓗ ᓱᕐᕂᒍᓐᓇᓂᖏᓐᓂᒃ ᓯᕗᓕᕈᓐᓇᓂᖏᓐᓂᒃ ᒪᑭᑉᐸᓕᐊᒐᓱᐊᕐᓂᒥᒃ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᒥᓗ, ᐱᓂᐊᕐᓂᓕᕆᓂᕐᑎᒍᑦ ᐱᕈᕐᐸᓕᐊᓂᕐᒥᒃ, ᓱᑯᐃᔦᓂᕐᑎᒍᑦ, ᐊᕙᑎᓕᕆᓂᕐᑎᒍᑦ ᓄᓇᓕᒻᒥᓗ ᐱᐅᓕᓂᐊᒐᕐᑖᑎᑦᓯᓂᒃᑯᑦ ᑮᓇᐅᔭᓕᐅᕈᑎᖃᕐᓂᒥᒃ.

ᒪᑭᕝᕕᐅᑉ ᐱᓇᓱᐊᑦᓯᐊᓂᕆᖃᑦᑕᑕᖓ ᐱᓇᓱᐊᖃᑎᖃᕐᓱᓂ ᑲᕙᒪᑐᖃᒃᑯᓂᒃ ᑯᐯᒃᑯᓗ ᑲᕙᒪᖓᓂᒃ ᓯᕗᓕᕐᑕᐅᕙᑦᑐᖅ ᓯᕗᓕᕐᑎᓄᑦ ᐱᓇᓱᐊᕈᒪᓂᖃᑦᓯᐊᑐᓄᑦ ᐊᖏᖃᑎᒌᒍᑎᐅᓯᒪᔪᓂᒃ ᐊᑐᓕᕐᑎᓯᒐᓱᐊᕐᑐᓄᑦ ᓈᒻᒪᓈᑦᓯᐊᑐᒃᑯᓗ ᓄᓇᑖᕐᓂᑎᒍᑦ ᐊᖏᖃᑎᒌᒍᑎᐅᓯᒪᔪᓂᒃ ᐱᔭᖃᕋᓱᐊᖃᑦᑕᓱᑎᒃ.

ᐃᓘᓐᓇᖓᒍᑦ ᐱᓂᐊᕐᓂᕆᔭᖓ ᐃᓇᓱᐊᖃᑎᖃᑦᓯᐊᓂᕆᔭᖓ ᐱᙳᑎᑦᓯᒪᔪᖅ ᑲᔪᓯᔪᒥᓪᓗ ᓯᕗᒧᐊᒍᑎᐅᑦᓱᓂ ᓇᒻᒥᓂᖅ ᑲᕙᒪᑖᕋᓱᐊᕐᓂᒧᑦ ᐊᖏᖃᑎᒌᒐᓱᐊᕐᓂᓄᑦ ᐊᖏᖃᑎᒌᒍᑎᐅᓪᓗ ᑐᙵᓂᓕᕐᑕᐅᓂᖓᓄᑦ ᐱᔭᕇᕐᑕᐅᓂᖓᓄᓪᓗ ᓄᓇᕕᒻᒥ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖓᑕ.

ᐊᕐᕌᒍᑦ ᐊᕙᑎᓪᓗ ᖁᓕᓪᓗ ᐊᓂᒍᓕᕐᑎᓗᒋᑦ ᐊᖏᖃᑎᒌᒍᑎ ᐊᑎᓕᐅᕐᑕᐅᓚᐅᕐᓯᒪᑎᓪᓗᒍ ᒪᑭᕝᕕᒃ ᑲᓇᑕᐅᓪᓗ ᑲᕙᒪᖓ ᐱᓇᓱᐊᕐᑕᒥᓂᒃ ᐊᕐᕌᒍᓂ ᖁᓕᓪᓗ ᓯᑕᒪᓪᓗᓂ ᐱᔭᕇᑦᓴᕋᑕᓚᐅᔫᒃ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖓᓂᒃ 2007-ᖑᑎᓪᓗᒍ.

ᑖᓇ ᐊᖏᖃᑎᒌᒍᑎ ᑕᓯᐅᔭᕐᔪᐊᒥ ᐅᖓᕙᒥᓗ ᑕᕆᐅᖁᑎᐅᔪᓄᑦ ᕿᑭᕐᑕᓕᕆᓂᕐᒧᓗ ᐊᖏᖃᑎᒌᒍᑎᐅᒪᐅᔪᖅ.

ᐱᓇᓱᐊᕐᓂᕆᓲᒥᒍᑦ ᒪᑭᕝᕕᒃ ᓇᓗᕐᓀᓯᓯᒪᔪᖅ ᐱᒻᒪᕆᓐᓂᒃ ᑲᓇᑕᓕᒫᒥ ᐱᓂᐊᕐᓂᓕᕆᓂᕐᑎᒍᑦ ᐱᓇᓱᐊᕐᓂᐅᔪᓂᒃ ᐃᓚᐅᕕᖃᖃᑦᑕᓂᒃᑯᑦ.

ᓄᓇᕕᒻᒥᐅᑦ ᐃᓄᐃᑦ ᐱᖁᔭᕐᔪᐊᑎᒍᑦ ᐊᖏᖃᑎᒌᒐᓱᐊᕐᑎᓗᒋᑦ 1982-ᒥ ᐱᓇᓱᐊᖃᑎᐅᓪᓚᕆᑦᓯᒪᔪᑦ ᐃᓄᐃᑦ ᐱᒍᓐᓇᐅᑎᖏᑦ ᑲᓇᑕᐅᑉ ᐱᖁᔭᕐᔪᐊᖏᑎᒍᑦ ᓱᓕᓕᕐᑎᑕᐅᑎᑦᓱᒋᑦ ᓴᐳᒻᒥᔭᐅᓂᕐᑖᓱᒋᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᑲᔪᓯᔪᖅ ᓂᐱᖃᕐᓱᓂ ᓲᖑᔪᒥᒃ ᑲᓇᑕᓕᒫᒥ ᐱᓇᓱᐊᕐᓂᐅᔪᓂ ᐊᕐᖁᑎᖃᕐᓱᓂ ᑲᑎᙵᔨᖏᓐᓂᒃ ᐃᓄᐃᑦ ᑕᐱᕇᑦ ᑲᓇᑕᒥ, ᑖᓐᓇ ᐃᓄᐃᑦ ᑎᒥᖁᑎᖓᑦ ᑭᒡᒐᑐᕐᓱᓂ ᑲᓇᑕᓕᒫᒥ. ᐱᓇᓱᐊᖃᑎᐅᓪᓚᕆᑦᓯᒪᔪᑦ ᒥᓂᔅᑌᑦ ᑲᓇᑕᒥ ᑲᑎᙵᓂᖃᕐᑎᑕᐅᑎᓪᓗᒋᑦ ᐃᓚᐅᑎᓪᓗᒍ ᑭᓘᓇᒥ ᐊᖏᖃᑎᒌᒍᑎᐅᓚᐅᔪᖅ 2005-ᒥ ᐃᓛᓂᐅᙱᑑᕐᓯᒪᓂᖓᓗ ᑲᓇᑕᐅᑉ ᑲᕙᒪᖓᑕ “ᐊᓯᕈᐃᒐᓱᐊᕐᓯᒪᓂᕐᒥᓄᑦ” ᐊᓪᓓᑦ ᐃᓕᓐᓂᐊᕆᐊᕐᑎᑕᐅᖃᑦᑕᓯᒪᓂᖓᒍᑦ ᑕᒪᓐᓇ ᓱᕐᕂᓂᖃᕐᓯᒪᒻᒪᑦ ᐃᓄᐃᑦ ᓄᓇᓕᓕᒫᖏᓐᓂᒃ ᑲᓇᑕᒥ.

ᒪᑭᕝᕕᒃ ᓯᕗᓕᕐᒥᔪᖅ ᐅᖃᕐᑎᒋᔭᐅᕙᑦᓱᓂᓗ ᓇᒻᒥᓂᖅ ᑲᕙᒪᑖᕋᓱᐊᕐᓂᒧᑦ ᓄᓇᕕᒻᒥ ᑖᒃᑯᐊ ᐊᑕᐅᓯᙳᑎᑦᓯᒐᓱᐊᕐᒪᑕ ᐃᓗᓯᓕᕆᓂᕐᒥᒃ, ᐃᓕᓐᓂᐊᓂᕐᒥᒃ, ᓄᓇᓖᓪᓗ ᐱᒍᑦᔭᐅᒍᑎᒋᓱᖏᓐᓂᒃ, ᐊᐅᓚᒍᑎᓕᕆᓂᕐᒥᓄ ᐊᑕᐅᓯᕐᒥ ᓂᕈᐊᕐᑕᐅᓯᒪᕕᐅᔪᒥ ᐊᐅᓚᑕᐅᖃᑦᑕᕋᔭᕐᑎᓗᒋᑦ.

ᒪᑭᕝᕕᐅᑉ ᑎᓕᔭᐅᓯᒪᒍᑎᖏᑦᑕ ᐃᓚᒋᓪᓚᕆᑦᑕᖓ ᒪᑭᑉᐸᓕᐊᒐᓱᐊᕐᑎᓯᓂᖅ ᐱᓇᓱᒐᕐᓂᓗ ᓴᕐᕿᑎᑦᓯᓂᖅ.

ᓯᕗᓪᓕᐹᑦᓯᐊᖑᑎᓪᓗᒍ ᓄᓇᕕᒻᒥᐅᑦ ᒪᑭᑕᒐᓱᐊᕐᓂᒥᒍᑦ ᓯᕗᓂᑦᓴᖓᓂᒃ ᐱᓇᓱᐊᕐᑐᖅ ᑐᙵᕕᖃᕐᓗᓂ ᐱᑦᓴᖑᕆᐊᓪᓚᒍᓐᓇᑐᓂᒃ ᐱᑦᓴᖑᕆᐊᓪᓚᒍᓐᓇᖏᑦᑐᓂᓪᓗ.

ᐱᑦᓴᖑᕆᐊᓪᓚᒍᓐᓇᖏᑦᑐᑎᒍᑦ ᐊᖏᖃᑎᒌᒐᓱᐊᖃᑎᐅᖃᑦᑕᑐᖅ ᐱᓇᓱᐊᖃᑎᐅᑦᓱᓂᓗ ᓇᒻᒥᓂᖃᕐᑐᓄᑦ ᐃᓄᓕᒫᓂᓪᓗ ᐱᒍᑦᔨᕕᐅᔪᓄᑦ. ᐊᖏᖃᑎᒌᒐᓱᐊᖃᑎᖃᕐᐸᑐᒃ ᑯᐯᒃᑯᑦ ᐃᑯᒪᓕᕆᔨᖏᓐᓂᒃ ᒪᓂᕕᒍᑎᒋᓯᒪᔭᖏᓐᓂᒃ ᔦᒥᓯ ᐯᒥ ᐃᑯᒪᓕᐅᕐᓂᒥᒃ ᐱᓇᓱᐊᕈᒪᑦᓱᑎᒃ ᐅᔭᕋᓐᓂᐊᑏᒃ ᕚᓪᑲᐳᕆᑦᔨᑯᑦ ᕌᒡᓚᓐ ᐅᔭᕋᓐᓂᐊᕕᐅᓂᖓᓄᑦ. ᒪᑭᕝᕕᒃ ᑲᒪᒋᔭᖃᕐᒥᔪᖅ ᑮᓇᐅᔭᓕᐅᕋᓱᐊᕐᓂᒥᒃ ᐊᐅᓚᑦᓯᓂᕐᒥᓗ ᑮᓇᐅᔭᓂᒃ ᑖᒃᑯᑎᒎᓇ ᐊᖏᖃᑎᒌᒐᓱᐊᕐᓂᑎᒍᑦ ᐱᔭᐅᖃᑦᑕᑐᓂᒃ.

ᒪᑭᕝᕕᐅᑉ ᐱᑦᓴᖑᕆᐊᓪᒪᒍᓐᓇᑐᓂᒃ ᐱᒍᑦᔨᕕᖓ ᑲᓇᑕᓕᒫᒥ ᐃᓕᑕᕆᔭᐅᓂᖃᕐᑐᒥᒃ ᖃᐅᔨᓴᕐᕕᖃᕐᑐᖅ ᑰᑦᔪᐊᒥ ᑖᒃᑯᐊ ᖃᐅᔨᓴᕐᓂᖃᓲᑦ ᓂᕐᔪᑎᓂᒃ ᐊᕙᑎᒥᓪᓗ. ᒪᑭᕝᕕᒃ ᓴᐳᒻᒥᕕᐅᒻᒥᔪᖅ ᐊᖑᓇᓱᐊᕐᓂᒥᒃ, ᐃᖃᓗᓂᐊᓂᕐᒥᒃ ᒥᑭᒋᐊᕐᓂᐊᓂᕐᒥᓗ ᐊᑐᓂᑦ ᓄᓇᓕᓐᓂ, ᓄᓇᒥᒃ ᑎᒍᒥᐊᕐᑎᓂᓪᓗ ᐊᐅᓚᑦᓯᓂᖏᑎᒍᑦ ᐃᑲᔪᕐᐸᓱᓂ ᓄᓇᓂᒃ ᐃᓄᓄᑦ ᓇᒻᒥᓂᕆᔭᐅᔪᓂᒃ (ᓄᓀᑦ ᐊᕕᑦᑐᓯᒪᓂᕐᒦᑐᑦ ᐊᑕᐅᓯᕐᒥ)

ᑕᓪᓕᒪᑦ ᒪᑭᕝᕕᐅᑉ ᐳᕐᑐᓂᕐᓴᖏᑦ ᖁᓕᓪᓗ ᐱᖓᓲᔪᕐᑐᓗᓂᒃ ᑲᑎᙵᔨᓂᒃ ᐃᓚᖃᕐᓱᑎᒃ ᓂᕈᐊᕐᑕᐅᓯᒪᔪᓂᒃ ᐃᓄᐃᑦ ᓄᓇᓕᖏᓐᓂ ᓄᓇᕕᒻᒥ, ᐱᖓᓱᓂᓪᓗ ᓄᓇᕕᒻᒥ ᐊᐅᓚᑦᓯᔨᒻᒪᕆᓂᒃ ᐃᓚᖃᕐᓱᑎᒃ ᐳᕐᑐᓂᕐᓴᓄᑦ ᑎᒃᑯᐊᑕᐅᓯᒪᔪᓂᒃ ᑲᑎᙵᔨᓄᓪᓗ ᐃᓚᖃᓲᖑᒻᒥᔪᑦ ᐊᔪᖀᒋᐊᕐᑎᒥᓂᒃ.

ᐃᓄᐃᑦ ᓄᓇᕕᒻᒥᐅᑦ ᐊᕐᖁᑎᖃᕐᓱᑎᒃ ᒪᑭᕝᕕᒥᒃ ᓴᐳᒻᒥᔨᓪᓚᕆᐅᔪᑦ ᐃᓚᐅᕕᖃᖏᓐᓇᓕᒫᕐᓱᑎᓪᓗ ᑲᓇᑕᓕᒫᒥ ᐱᓇᓱᐊᕐᓂᐅᔪᓂᒃ ᐃᓄᐃᑦ ᑕᐱᕇᑦ ᑲᓇᑕᒦᒃᑯᑎᒍᑦ ᓯᓚᕐᔪᐊᓕᒫᒥᓗ ᐱᓇᓱᐊᖃᑎᐅᕙᑦᓱᑎᒃ ᐊᕐᖁᑎᒋᑦᓱᒋᑦ ᐃᓄᐃᑦ ᐅᑭᐅᕐᑕᑐᒥᐅᓕᒫᑦ ᑲᑎᙵᔨᖏᑦ.