JBNQA

ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᐊᑎᓕᐅᕐᑕᐅᓚᐅᕐᓯᒪᕗᖅ ᓅᕕᒻᐱᕆ 1975-ᖑᑎᓪᓗᒍ. ᓯᕗᓪᓕᐹᑦᓯᐊᖑᑦᓱᓂ ᐱᒻᒪᕆᐅᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᐅᓯᒪᔪᖅ ᑲᓇᑕᐅᑉ ᑕᕐᕋᖓᓂ, ᓄᓇᖃᖅᑳᓯᒪᔪᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓂᒃ ᐱᒋᐊᕐᓂᓕᕐᑎᓯᓪᓚᕆᑦᓱᓂ.

1971-ᖑᑎᓪᓗᒍ ᑯᐯᑉ ᑲᕙᒪᖓ ᐱᓇᓱᐊᕐᓂᐊᓂᕋᕐᓯᒪᒻᒪᑦ “ᐊᑑᑎᔭᐅᓚᐅᕐᓯᒪᙱᑐᒥᒃ” × ᔦᒥᓯ ᐯᒥ ᑰᓐᓂᐊᓛᕐᓂᕋᕐᓱᑎᒃ. ᐃᓄᐃᑦ ᐊᓪᓓᓗ ᑯᔩ ᐱᒍᓐᓴᐅᑎᖏᑦ ᔦᒥᓯ ᐯᑉ ᑕᕐᕋᖓᓂᒥᐅᑦ ᑯᐯᓪᓗ ᑕᕐᕋᖓᓂᒥᐅᑦ ᑲᖐᒋᔭᐅᓚᐅᕐᓯᒪᙱᑐᑦ.

ᓵᓕ ᒍᐊᑦ ᐅᕕᒃᑲᒪᕆᐅᑦᓱᓂ ᐃᓄᓐᓂᒃ ᑲᑎᑎᑦᓯᓚᐅᕐᓯᒪᔪᖅ ᓴᕐᕿᑎᑦᓯᓱᓂᓗ ᐃᓄᐃᑦ ᑲᑐᑦᔨᖃᑎᒌᓐᓂᖓᓂᒃ ᑯᐯᑉ ᑕᕐᕋᖓᓂ. ᐱᓇᓱᐊᖃᑎᖃᓯᑦᓱᑎᓪᓗ ᑯᐯᑉ ᑕᕐᕋᖓᓂᒥᐅᓂᒃ ᐊᓪᓚᓂᒃ, 1972-ᖑᑎᓪᓗᒍ ᐃᕐᖃᑐᐃᕕᑎᒍᑦ ᓄᕐᖃᑎᑦᓯᒋᐊᕈᑎᓂᒃ ᐊᑑᑎᓕᓚᐅᕐᓯᒪᔪᑦ ᑯᐯᑉ ᐃᕐᖃᑐᐃᕕᕐᔪᐊᖓᒍᑦ ᑰᓐᓂᐊᕋᓱᐊᕐᑐᓂᒃ ᓄᕐᖃᑎᑦᓯᒋᐊᓯᑦᓱᑎᒃ. ᑖᓐᓇᓗ ᓄᕐᖃᖓᑎᑦᓯᓂᕆᒐᓱᑦᑕᖓ ᓴᖁᑕᐅᑦᓴᐅᑎᒋᓚᐅᕐᓯᒪᑦᓱᓂ. ᑌᒣᓕᒐᓗᐊᕐᑎᓗᒋᑦ ᐃᕐᖃᑐᐃᕕᐅᑉ ᓯᓚᑖᒍᑦ ᐊᖏᖃᑎᒌᒍᑎᒥᒃ ᓴᕐᕿᑎᑦᓯᒍᓐᓇᓯᓚᐅᕐᓯᒪᔪᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ,

ᐊᑎᓕᐅᕐᓯᒪᔪᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ ᐅᑯᐊᖑᔪᑦ ᑯᐯᑉ ᑲᕙᒪᖓ, ᔦᒥᓯ ᐯᑉ ᐃᑯᒪᓕᕆᓂᕐᒧᑦ ᑎᒥᖁᑎᖓ, ᔦᒥᓯ ᐯᒥ ᒪᑭᑉᐸᓕᐊᒐᓱᐊᕐᑐᓕᕆᔩᑦ, ᑯᐯᒃᑯᑦ ᐃᑯᒪᓕᕆᔨᖏᑦ, ᐊᓪᓓᑦ ᑲᑎᙵᔨᖏᑦ (ᑯᐯᒻᒥ), ᐃᓄᐃᑦ ᑲᑐᑦᔨᖃᑎᒌᓐᓂᖓ ᑯᐯᑉ ᑕᕐᕋᖓᓂ ᑲᓇᑕᐅᓪᓗ ᑲᕙᒪᖓ.

ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓ ᑐᓂᔨᓯᒪᔪᖅ R225 ᒥᓕᐊᓂᒃ ᑮᓇᐅᔭᑎᒍᑦ ᔦᒥᓯ ᐯᒥᐅᓄᑦ ᐊᓪᓚᓄᑦ ᑯᔩᓄ ᐃᓄᓐᓄᓗ ᑯᐯᑉ ᑕᕐᕋᖓᓂᒥᐅᓄᑦ, ᐊᑭᓕᕐᑕᐅᓛᕐᑎᓗᒋᑦ ᑲᓇᑕᐅᑉ ᑯᐯᓪᓗ ᑲᕙᒪᒋᓐᓄᑦ. ᐊᓪᓓᑦ ᑮᓇᐅᔭᕐᑖᖏᑦ ᐊᑭᓖᒍᑎᐅᓯᒪᔪᑦ ᐊᓪᓓᑦ ᑯᔩ ᐊᐅᓚᑦᓯᔨᖏᓐᓄᑦ ᐃᓄᐃᓪᓗ ᑮᓇᐅᔭᕐᑖᖏᑦ ᐊᑭᓖᒍᑎᐅᑎᓪᓗᒋᑦ ᒪᑭᕝᕕᒧᑦ.

ᓄᓇᖃᖅᑳᓯᒪᔪᑦ ᓄᓇᖁᑎᖏᓐᓂᒃ ᐊᖏᖃᑎᒌᒍᑎᖃᕐᓂᖓᓄᑦ ᐃᓚᐅᑎᓪᓗᒍ, ᑯᐯᒃᑯᓗ ᑲᕙᒪᖓᓂᑦ, ᐊᖏᖃᑎᒌᒍᑎ ᑐᑭᓯᓇᕐᓯᑎᑦᓯᓯᒪᔪᖅ ᓄᓇᖃᖅᑳᓯᒪᔪᑦ ᐱᒍᓐᓇᐅᑎᖏᓐᓂᒃ ᐃᓂᓪᓓᓱᓂᓗ ᐱᓇᓱᐊᕈᑎᐅᓂᐊᕐᑐᓂᒃ ᓯᕗᓂᕐᒥ ᓄᓇᖃᖅᑳᓯᒪᔪᓄᑦ ᓄᓇᖃᖅᑳᓯᒪᙱᑐᓄᓪᓗ ᓄᓇᖁᑎᑦᑎᓂ ᓄᓇᓕᓐᓂᓗ, ᓄᓇᓕᓕᒫᑎᒍᓪᓗ, ᑯᐯᓕᒫᒥᓗ ᑲᕙᒪᑐᖃᒃᑯᓂᓗ. ᐊᖑᓇᓱᐊᕈᓐᓇᓂᕐᒧᑦ ᐱᒍᓐᓇᐅᑏᑦ ᑐᓂᔭᐅᓯᒪᔪᑦ, ᓄᓀᓪᓗ ᐊᒡᒍᑕᐅᑦᓱᑎᒃ ᐱᒍᑎᑦᓴᓂᓪᓗ ᐊᐅᓚᑦᓯᒍᑎᐅᓂᐊᕐᑐᑦ. ᐃᓕᓐᓂᐊᓂᓕᕆᓂᖅ ᒪᕐᕿᑎᑕᐅᑦᓱᓂ, ᐃᓗᓯᓕᕆᓂᕐᒥᒃ ᐱᒍᑦᔨᒍᑏᑦ ᐃᓂᓪᓚᒋᐊᑦᓯᐊᑕᐅᑦᓱᑎᒃ ᓄᓇᓕᓕᒫᑎᒍᓪᓗ ᑲᕙᒣᑦ ᐃᓂᓪᓚᑕᐅᑦᓱᑎᒃ.

ᑖᓐᓇ ᑐᙵᕕᐅᔪᖅ ᐊᓯᖏᓐᓂᒃ ᐱᒻᒪᕆᓐᓂᒃ ᐱᒍᓐᓇᓯᒍᑎᐅᓯᒪᔪᖅ ᐊᖏᖃᑎᒌᒍᑎᓂᒃ ᐃᓚᐅᑎᓪᓗᒋᑦ ᒪᑯᐊ ᓴᓇᕐᕈᑎᒃ ᐊᖏᖃᑎᒌᒍᑎᒃ ᐊᒻᒪᓗ ᓴᐱᕐᑌᑐᑦ ᐅᓚᐱᕐᓴᐅᑎᑖᖃᑎᒌᒍᑎᖓ ᑖᒃᑯᐊ ᐱᓂᐊᕐᓂᓕᕆᓂᑎᒍᑦ ᒪᑭᑉᐸᓕᐊᒐᓱᐊᕈᑎᑦᓴᖏᑦ ᐃᓄᐃᑦ ᐊᓪᓓᓗ ᑯᔩ ᑐᑭᑖᕋᓱᐊᖃᑎᐅᑎᓪᓗᒋᑦ ᐱᕙᓪᓕᖁᑎᖏᓐᓂᓗ ᐊᒥᖅᑳᖃᑎᒌᑦᓱᑎᒃ. ᐊᖏᖃᑎᒌᒐᓱᐊᕐᓃᑦ ᒫᓐᓇ ᐊᑑᑎᖃᑦᑕᒥᔪᑦ ᓄᓇᕕᒻᒥ ᑲᕙᒪᑖᕐᓂᒧᑦ ᑐᙵᕕᖃᕐᓱᑎᒃ ᐱᒍᓐᓇᓯᔭᐅᓯᒪᔪᓂᒃ ᑎᒥᙳᑎᑕᐅᑦᓱᑎᒃ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ.

Click here to download the PDF file of the agreement