Education First: Renewal of the Nunavik Youth Hockey Development Program

ᑐᓴᕐᑎᓯᒍᑎᐅᓯᒪᔪᑦ

ᑰᑦᔪᐊᖅ, ᔫᓓ 25, 2011

ᒪᑭᕝᕕᒃ ᑐᓴᕐᑎᓯᒋᐊᒥᒃ ᐅᐱᒍᓱᑉᐳᖅ ᓄᓇᕕᒻᒥ ᐅᕕᒐᕐᑐᐃᑦ ᖄᑭᕆᐅᕐᓴᑎᑕᐅᓂᕆᓲᖏᑦᑕ ᐱᖓᓲᔪᕐᑑᒍᑎᒋᓕᕐᑕᖓᓂᒃ ᓄᑕᐅᓯᓕᕐᑕᐅᓂᖃᕐᒪᑦ. ᖄᑭᕆᐅᕐᓴᑎᑦᓯᓂᐅᔪᖅ ᓴᐳᑦᔭᐅᔪᒻᒪᕆᐅᓕᓚᐅᕆᕗᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᑲᑎᕕᒃ ᐃᓕᓐᓂᐊᓂᓕᕆᓂᕕᒻᒧᑦ, ᒪᑭᕝᕕᒧᓪᓗ.

ᓄᓇᕕᒻᒥ ᐅᕕᒐᕐᑐᐃᑦ ᖄᑭᕆᐅᕐᓴᑎᑕᐅᓂᖓ ᓄᓇᕕᐅᑉ ᓯᕗᓕᕐᑎᖏᓐᓄᑦ ᒪᑭᕝᕕᒥ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ, ᑲᑎᕕᒃ ᐃᓕᓐᓂᐊᓂᓕᕆᕕᖓᓂᓪᓗ ᐱᒋᐊᕐᑎᑕᐅᓯᒪᑦᓱᓂ ᐊᕐᕌᒍᐃᑦ ᑕᓪᓕᒪᑦ ᓈᓕᕐᑎᓗᒋᑦ ᐱᑦᔪᑎᖃᕐᓱᑎᒃ ᖄᑭᕐᑎᖑᒐᓱᐊᕐᓂᒥᒃ ᐃᓕᓐᓂᐊᓂᕐᒥᓗ ᐱᑐᑦᑎᓯᓂᕐᒥᒃ. ᓄᓇᓕᓕᒫᓂᒃ ᐃᓕᓐᓂᐊᕕᓕᒫᓂᓪᓗ, ᑖᓐᓇ ᐱᓇᓱᐊᕐᑕᐅᔪᖅ ᑲᔪᖏᕐᓭᒍᑎᐅᕗᖅ ᓱᖃᑦᓯᓂᕐᒥᒃ, ᐃᓅᑦᓯᐊᒐᓱᐊᕐᓂᒥᒃ ᐱᒻᒪᕆᐅᑎᓪᓗᒍᓗ, ᐃᓕᓐᓂᐊᓂᕐᒥᒃ ᑲᔪᓯᑦᓯᐊᓂᕐᒥᒃ ᐃᑯᓪᓚᐅᒥᑎᑦᓯᒋᐊᕈᑎᐅᑎᓪᓗᒍ ᐃᓕᓐᓂᐊᓂᕐᒥᒃ ᓄᕐᙯᓇᑲᑦᑕᓂᐅᓲᒥᒃ ᐊᒻᒪᓗ ᐱᓂᕐᓗᑌᓕᒪᑎᑦᓯᓂᕐᒥᒃ. ᓄᓇᕕᒻᒥ ᐅᕕᒐᕐᑐᐃᑦ ᖄᑭᕆᐅᕐᓴᑎᑕᐅᓂᖓ ᑮᓇᐅᔭᖃᕐᑎᑕᐅᓲᒍᕗᖅ ᐅᖓᓗᒃᑯᓄᑦ, ᐊᐅᓚᑕᐅᑦᓱᓂ ᒪᑭᕝᕕᒧᑦ. ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓄᓇᕕᒻᒥ ᐅᕕᒐᕐᑐᐃᑦ ᖄᑭᕆᐅᕐᓴᑎᑕᐅᓂᕆᓲᖏᓐᓂᒃ ᓴᐳᑦᔨᓯᒪᓲᒍᕗᖅ ᐱᓪᓗᑯᒋᐊᓕᓐᓂᒃ ᐱᒍᑦᔨᓱᓂ ᓄᓇᓖᑦ ᓇᓪᓕᖏᑦ ᑐᑦᓯᕋᓕᑐᐊᕐᒪᑕ.

ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ, ᒪᑭᕝᕕᐅᓗ ᓯᕗᓕᕐᑎᖏᑦᑕ ᑐᓴᕐᑎᓯᒍᑎᖓ ᑐᑭᓯᓇᑦᓯᐊᑐᖅ: ᐃᓕᓐᓂᐊᓂᕐᒥᒃ ᓯᕗᓪᓕᐅᔨᓪᓚᕆᑦᑐᒍᑦ. ᐊᑕᐅᑦᓯᑯᓪᓗ ᐅᕕᒐᕐᑐᐃᑦ ᐃᓕᓐᓂᐊᑕᒥᓂᒃ ᐊᕐᓱᕈᕐᑐᑦ ᑭᙴᒪᒋᓪᓗᑯᐊᐱᑦᑕᖏᓐᓂᒃ ᐃᑲᔪᕐᑕᐅᒍᑎᖃᖁᓪᓗᒋᑦ ᓇᒻᒥᓂᖅ ᐱᒍᓐᓇᓯᕙᓪᓕᐊᑐᐃᓐᓇᕆᐊᖃᕐᓂᖏᓐᓄᑦ. ᐃᒻᒥᒎᕐᑎᑐᑦ ᑎᒥᐅᔪᑦ ᓄᓇᕕᒻᒥ ᐅᕕᒐᕐᑐᐃᑦ ᖄᑭᕆᐅᓴᑎᑕᐅᓂᖏᓐᓂᒃ ᑲᔪᓯᑎᑦᓯᔨᐅᖃᑦᑕᑐᑦ ᐱᓇᓱᐊᕐᓂᒥᓂᒃ ᑲᔪᓯᓚᖓᕗᑦ ᓄᓇᓕᓕᒫᓂᓪᓗ ᑐᓴᐅᒪᑎᑦᓯᖏᓐᓇᓕᒫᕐᓗᑎᒃ ᐸᕐᓀᐸᓪᓕᐊᒐᓱᐊᕐᓂᒥᓄᑦ 2011-2012 ᐅᑭᐅᖓᓄᑦ.

ᒪᑭᕝᕕᑯᒃ ᓄᓇᓕᓐᓂᒃ ᐃᓄᓐᓂᓗ ᓄᓇᕕᒻᒥᐅᓂᒃ ᑲᔪᖏᕐᓭᓚᕆᑦᑐᑦ ᓇᒻᒥᓂᖅ ᐱᕙᓪᓕᖁᑎᖃᕋᓱᐊᖁᓪᓗᒋᑦ ᑕᒪᑐᒥᖓ ᐱᕕᑦᓴᓯᐊᒻᒪᕆᐊᓘᔪᒥᒃ ᑲᔪᖏᕐᓭᖃᑕᐅᓗᑎᓪᓗ ᑲᒃᑲᓛᓂᒃFᐱᐊᕋᕐᓂᒃ ᐃᓕᓐᓂᐊᑕᒥᓂᒃ ᑲᔪᓯᑦᓯᐊᖁᓪᓗᒋᑦ ᖄᑭᕐᓂᒥᓪᓗ ᐊᕐᖁᑎᖃᕐᓗᑎᒃ ᑫᓪᓗᑐᕐᓗᒋᑦ.

ᓄᓇᕕᒻᒥ ᐅᕕᒐᕐᑐᓂᒃ ᖄᕿᕆᐅᕐᓴᑎᑦᓯᓂᖅ, ᐱᕈᕐᐸᓕᐊᓂᐅᕗᖅ!

-30-

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑎᒥᐅᕗᖅ ᑐᕌᖓᑦᓱᓂ ᐃᓄᑐᐃᓐᓇᐅᖏᑦᑐᒐᓴᕐᓄᑦ ᓄᐃᑕᐅᓯᒪᑦᓱᓂ 1978-ᒥ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᖓᑕ ᐊᑖᒍᑦ. ᑎᒥᐅᔪᖅ ᐊᑕᓐᓂᐅᕕᓕᒃ ᑯᐯᒃ ᑕᕐᕋᖓᓂᓕᒫᒐᓚᒃ 55 ᐃᑳᖓᔫᑉ ᖁᓛᖓᓂ ᑲᒪᒋᔭᖃᕐᓱᓂ ᐆᑦᑑᑎᒋᓗᒋᑦ ᓄᓇᓕᓐᓄᐊᓕᖓᔪᓂᒃ, ᐊᐅᓚᒍᑎᓕᕆᓂᕐᓂᒃ, ᐊᕙᑎᓕᕆᓂᕐᒥᒃ, ᐳᓖᓯᓕᕆᓂᕐᒥᒃ, ᐱᓇᓱᒐᑦᓴᓕᕆᓂᕐᓂᒃ, ᐱᓇᓱᐊᒋᐅᕐᓴᑎᑦᓯᓂᕐᓂᒃ, ᑮᓇᐅᔭᑎᒍᑦ ᐃᑲᔪᕐᓯᒪᐅᑎᓕᕆᓂᕐᓂᒃ, ᐯᕆᑦᓯᕕᓕᕆᓂᕐᓂᒃ, ᐱᑦᓴᖑᒋᐊᓪᓚᒍᓐᓇᑐᓕᕆᓂᕐᓂᒃ, ᓄᓇᐅᑉ ᐊᑐᕐᑕᐅᓂᑦᓴᖓᓄᑦ ᐸᕐᓀᓂᕐᓂᒃ, ᐃᓄᐃᑦ ᐊᑦᑕᓀᕐᑐᒦᑦᑎᑕᐅᓂᖏᓐᓂᒃ ᐊᒻᒪᓗ ᒪᑭᑉᐸᓕᐊᒐᓱᐊᕈᑎᑦᓭᑦ ᐱᕙᓪᓕᐊᔭᐅᓂᖏᓐᓂᒃ.

ᒪᑭᕝᕕᒃ ᐃᓄᓐᓄᑦ ᓇᒻᒥᓂᕆᔭᐅᑦᓱᓂ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᒧᑦ ᑎᒥᐅᕗᖅ ᐱᙳᑎᑕᐅᓯᒪᑦᓱᓂ 1975-ᒥ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᒃ ᐊᑎᓕᐅᕈᑕᐅᔪᕕᓂᐅᑎᓪᓗᒍ. ᐱᔪᓐᓇᐅᑎᖃᕐᑎᑕᐅᓂᖏᑦ ᐃᓚᖃᕐᐳᑦ 9,800-ᓂᒃ ᐃᓄᓐᓂᒃ ᓄᓇᕕᒻᒥᐅᓂᒃ ᑭᒡᒐᑐᕐᓂᒥᒃ ᐱᓂᐊᕐᓂᓕᕆᓂᐅᔪᓂᒃ, ᑮᓇᐅᔭᓂᒃ ᐊᐅᓚᑦᓯᓂᕐᒥᒃ ᐊᖏᖃᑎᒌᒍᑎᑎᒍᑦ ᓄᐃᑕᐅᓯᒪᔪᓂᒃ. ᒪᑭᕝᕕᒃ ᑎᒥᐊᕈᖁᑎᓕᒃ ᐆᑦᑑᑎᒋᓗᒋᑦ ᐃᓄᐃᑦ ᖃᖓᑦᑕᔫᖏᑦ, ᕘᔅᑦ ᐃᐊ, ᓄᓇᕕᒻᒥ ᓴᓇᔭᐅᓯᒪᔪᑦ, ᖃᓪᓗᑎᒃ ᐅᕐᓱᐊᓗᓐᓂᐊᑏᑦ ᓇᒻᒥᓂᖃᖃᑕᐅᑦᓱᓂᓗ ᐅᑭᐅᕐᑕᑐᒥ ᐅᒥᐊᕐᔪᐊᑯᑦ ᐳᓚᕋᕐᑎᓯᓂᕐᒥᒃ ᐊᒻᒪᓗ ᐃᓄᓐᓂᒃ ᓄᓇᓕᓕᓐᓂᒃ ᐊᓯᐊᓂ ᓇᒻᒥᓂᖃᖃᑕᐅᒻᒥᓱᓂ ᐅᑭᐅᕐᑕᑐᒥ ᐃᑖᒐᐅᑎᑎᑦᓯᑌᓕᔨᓂᒃ.

Click here to download the PDF version of the Press Release

Education First: Renewal of the Nunavik Youth Hockey Development Program