ᐸᕐᓇᓯᒪᐅᑎ

parnasimautik

ᐅᓇ ᓇᕐᓂᓗᒍ ᑕᑯᓂᐊᕋᕕᑦ ᐸᕐᓇᓯᒪᐅᑎᒃᑯᑦ ᖃᕆᑕᐅᔭᒦᔨᐊᖏᓐᓂᒃ

ᓄᓇᕕᒻᒥᐅᑦ ᓱᖏᐅᓐᓀᓕᐅᖕᖏᓚᑦ ᓵᖕᖓᔭᑦᓴᑖᕆᓲᒥᓐᓂᒃ ᐱᔭᐅᑎᓪᓗᒋᑦ ᐱᕙᓪᓕᐊᑎᑦᓯᑎᐅᓕᕐᑐᓄᑦ. 1975-ᒥ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ ᓇᓗᓀᕆᒍᑎᐅᓯᒪᕗᑦ ᐱᔪᓐᓇᐅᑎᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᓄᓇᖁᑎᒥᓐᓂ ᐊᖏᔪᕐᔪᐊᒥ, ᐱᔪᓐᓇᕈᑎᑖᖑᓯᒪᒐᒥᒃ ᐱᖁᔭᑎᒎᕐᓂᓕᒃᑯᑦ ᐃᓕᖓᓂᖃᕈᓐᓇᓕᕐᑎᓗᑕ ᐃᓕᒃᑰᑐᓂᓪᓗ ᐱᐅᓯᕐᓲᑎᑐᐃᓐᓇᐅᖏᑦᑐᓂᒃ ᐊᖓᔪᕐᖃᐅᕕᖃᕈᓐᓇᓂᕐᑖᓱᑕ. 2002-ᖑᑎᓪᓗᒍ ᓴᓇᕐᕈᑎᒃ ᐊᖏᖃᑎᒌᒍᑏᑦ ᐃᓂᓪᓓᒍᑎᐅᓯᒪᕗᑦ ᓄᑖᓂᒃ ᐃᓅᖃᑎᒌᑎᒍᑦ ᐊᓯᑦᑎᓂᒃ ᐃᓅᖃᑎᒌᑦᑐᓂᒃ ᐱᒐᓱᖃᕈᓐᓇᕈᑎᑦᓴᑎᓐᓂᒃ ᓄᓇᕕᒻᒥᐅᑎᒍᑦ ᑯᐯᒃᑯᓂᒃ ᐱᒐᓱᐊᖃᑎᖃᕐᓗᑕ ᓯᕗᓂᕐᒥᓗ ᓄᐃᑦᓯᒍᑎᐅᓯᒪᕗᑦ ᐊᑦᔨᒌᓂᒃ ᓯᕗᓂᖃᕐᓂᓴᓂᒃ ᐃᓕᖓᔪᓂᒃ ᒪᑭᑕᒐᓱᒍᑎᓕᕆᓂᕐᓄᓗ ᓄᓇᓖᓪᓗ ᐱᕙᓪᓕᐊᑎᑕᐅᓂᖏᓐᓄᑦ. ᑌᒣᓯᒪᒐᓗᐊᕐᓱᑎᒃ, ᓯᓚᕐᔪᐊᒥᐅᑦ ᕿᓄᒍᑎᖃᒻᒪᕆᓐᓂᖏᑦ ᐅᔭᕋᓐᓂᐊᑐᑎᒍᓪᓗ ᑰᓐᓂᓗ ᐃᑯᒪᐅᑎᓕᐅᕈᑎᑎᒍᑦ ᐱᑦᓴᑖᕐᕕᓴᐅᔪᓂᒃ ᐱᒍᔭᒪᔭᖃᕐᓂᖏᑦ ᐅᓄᕐᓯᒪᕆᓚᖓᒍᓇᖁᑕᐅᕗᑦ ᑌᒣᑎᓪᓗᒋᑦ, ᐱᔭᖃᕋᓱᖏᓐᓇᕆᐊᖃᕐᐳᒍᑦ ᑕᒐᑕᒐᒥᑦ ᑖᒃᑯᐊ ᐱᕙᓪᓕᐊᑎᑦᓯᒍᑎᒋᒍᒪᔭᖏᓐᓄᑦ ᓯᕗᓂᑦᓴᑎᓐᓂ ᐃᓅᓯᕗᑦ ᐱᕙᓪᓕᐊᑎᑕᐅᓕᕐᑐᓄᑦ ᑲᑉᐱᐊᓇᕐᑐᒨᕐᑕᐅᓚᕿᖁᓇᒍ.

ᐸᕐᓇᓯᒪᐅᑎᒃᑯᑎᒍᑦ ᐱᕕᑦᓴᖃᓕᕐᐳᑦ ᓄᓇᕕᒻᒥᐅᓕᒫᑦ ᑐᑭᓯᓂᐊᕐᓂᒥᒃ ᐃᓅᓯᑦᑎᓂᒃ ᐊᕕᑦᑐᓯᒪᓂᑦᑎᓂᒃ ᓲᕐᓗ -ᑭᓇᒃᑯᕕᑖ, ᓄᓇᓕᕗᓪᓗ ᓄᓇᓕᓕᒫᖁᑎᕗᓪᓗ – ᑖᒃᑯᓇᖕᖓᓗ ᐱᔪᓂᒃ ᑐᓂᔨᒍᑎᑦᓴᑖᕐᓗᑕ ᐃᒣᓕᖓᓗᑎᒃ ᑲᔪᓯᓂᖃᑦᓯᐊᕋᔭᕐᑐᕈᑎᑦᓴᓂᒃ ᐃᓘᓐᓇᑕ ᐃᓄᑐᐃᓐᓇᐅᖃᑎᒌᑎᒍᑦ ᓈᒻᒪᓈᕐᑐᖁᑎᑦᑎᓂᒃ.

ᐸᕐᓇᓯᒪᐅᑎᒃ ᐃᓕᖓᒻᒪᑦ ᓄᓇᕕᒻᒥᐅᓄᑦ. ᐱᕙᓪᓕᐊᑎᑦᓯᒍᑎᖕᖑᓯᒪᑦᓱᑎᒃ ᐱᓇᓱᒍᑎᐅᓛᕐᓱᓂ ᓴᕐᕿᑎᑦᓯᓚᕿᒍᑎᑦᓴᐅᓗᓂ ᐊᑕᖏᕐᓗᑎᒃ ᐊᑦᔨᒌᒥᒃ ᓯᕗᓂᑦᓴᒥᒃ ᐃᓕᖓᔪᓂᒃ ᐱᕙᓪᓕᐊᑎᑦᓯᓂᕐᓄᑦ ᓄᓇᖁᑎᑦᑎᓂ ᓄᐃᑦᓯᒍᑎᑦᓴᐅᓱᓂ. ᓯᕗᓂᕐᒧᑦ ᑕᐅᑐᒍᑎᐅᑦᓱᓂ ᐃᓄᐃᑦ ᐱᐅᓯᑐᖃᕐᒥᒍᑦ ᐃᓅᓯᖏᑦ – ᐱᕐᖁᓯᕗᓪᓗ, ᑭᓇᐅᓂᕗᓪᓗ ᐅᖃᐅᓯᕗᓪᓗ – ᐊᕙᑎᕗᓪᓗ ᓴᐳᑦᔭᐅᒪᓂᖃᕐᓂᐊᑎᓪᓗᒋᑦ ᐱᕙᓪᓕᔭᐅᓂᖃᖃᑦᑕᓗᑎᒃᓗ, ᐊᒻᒪᓗ ᓄᓇᕕᒻᒥᐅᑦ ᑖᒃᑯᑎᒎᓇᑦᓭᓇᖅ ᑐᑭᖄᕆᖃᑦᑕᓚᖓᑎᓪᓗᒋᑦ ᖃᓄᐃᓕᖓᔪᓂᒃ ᐱᐅᓯᖃᕐᑎᑕᐅᓗᓂ ᓄᓇᖁᑎᕗᑦ ᐱᕙᓪᓕᐊᑎᑕᐅᒍᑎᖃᕐᓂᐊᒪᖔᑦ.

ᐃᓕᑦᓯᓂᒃ ᑫᓪᓚᑐᐃᕗᒍᑦ ᑕᑯᓇᓱᖃᑦᑕᖁᓪᓗᓯ ᐸᕐᓇᓯᒪᐅᑎᒃᑯᑦ ᖃᕆᑕᐅᔭᒦᔨᐊᖏᓐᓂᒃ, ᑐᑭᓯᑦᔫᒥᓚᕿᖁᓪᓗᓯ ᖃᓄᑎᒋᐊᓗᒃ ᐊᖏᓂᓕᓐᓂᒃ ᐱᓇᓱᒋᐊᓯᓯᒪᒻᒪᖔᑦᑕ ᑐᑭᓯᓂᐊᕐᓂᖃᓚᐅᕐᓱᑕ 2014-ᒥ, ᑌᒪᖕᖓᒥᓪᓗ, ᐸᕐᓇᓯᒪᐅᑎᒃ ᑲᔪᓯᑦᓱᓂ ᐱᓇᓱᒍᑕᐅᕗᖅ.

 ᐅᓇ ᓇᕐᓂᓗᒍ ᑕᑯᓂᐊᕋᕕᑦ ᐸᕐᓇᓯᒪᐅᑎᒃᑯᑦ ᖃᕆᑕᐅᔭᒦᔨᐊᖏᓐᓂᒃ