ᓵᓕ ᒍᐊᑦ ᐊᖓᔪᑦᓯᖅ ᓂᕈᐊᕐᑕᐅᕗᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᓄᑦ – ᐅᑎᕐᕕᖃᕐᓱᓂ ᑎᒥᒧᑦ ᓄᐃᓚᐅᕐᑕᕕᓂᕐᒥᓄᑦ 40 ᐊᕐᕌᒍᐃᑦ ᓯᕗᓂᐊᒍᑦ

ᐁᑉᐱᑐᓂ ᔭᓄᐊᕆ 23, 2018 – ᑰᔾᔪᐊᖅ, ᑯᐯᒃᒥᑦ – ᐳᕐᑐᓂᕐᓴᒨᕐᑐᓴᕐᒧᑦ ᓂᕈᐊᕐᓂᖃᓚᐅᕐᑎᓗᒋᑦ ᓯᑕᒪᒻᒥᑐᓂ ᔭᓄᐊᕆ 18, 2018-ᒥ ᒪᑭᕝᕕᑯᑦ ᓇᑯᕐᓴᓂᖃᓕᕆᕗᐃᑦ ᑐᓴᕐᑎᓯᒋᐊᒥᒃ ᑖᓐᓇ ᐅᑎᕐᕕᖃᓚᐅᕐᒪᑦ ᓵᓕ ᒍᐊᑦ ᐊᖓᔪᑦᓯᖅ ᐊᖓᔪᕐᖄᒪᕆᐅᓂᕐᒧᑦ.

ᓵᓕ ᒍᐊᑦ ᑖᒃᑯᓂᖓ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᑦ ᓄᐃᑕᐅᑎᓪᓗᒍ ᐊᖓᔪᕐᖄᕆᔭᐅᓚᐅᕐᓯᒪᔪᖅ – ᑖᓐᓇ ᑎᒥᐅᔪᖅ ᐊᖏᖃᑎᒌᒐᓱᐊᕐᑎᒋᔭᐅᓚᐅᕐᓯᒪᒻᒪᑦ ᑖᒃᑯᓂᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓂᒃ 1970-ᐃᑦ ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᒋᑦ ᑭᒡᒐᑐᕐᒧᑎᒃ ᓄᓇᕕᒻᒥᐅᑦ ᐃᓄᖏᓐᓂᒃ. ᑖᒃᑯᐊ ᔦᒥᔅᐯᑉ ᐊᖏᖃᑎᒌᓐᓂᖏᑦ ᐊᑎᓕᐅᕐᑕᐅᓯᒪᓕᑐᐊᕐᒪᑕ ᑖᓐᓇ ᑲᑐᑦᔨᖃᑎᒌᓐᓂᖅ ᐃᓕᑕᕆᔭᐅᓂᕐᑎᒍᑦ ᒪᑭᕝᕕᕈᓕᓚᐅᔪᕗᖅ ᔫᓂ 1978-ᒥ. ᓵᓕ ᒍᐊᑦ ᒪᑭᕝᕕᑯᑦ ᓄᐃᑕᐅᑐᐊᕐᒪᑕ ᐊᖓᔪᕐᖄᕆᔭᐅᓚᐅᕐᓯᒪᒻᒥᔪᖅ 1982-ᒧᑦ ᑎᑭᑦᓱᒍ.

ᓵᓕ ᒍᐊᑦ ᒪᑭᕝᕕᑯᓄᑦ ᐊᖓᔪᕐᖄᕆᔭᐅᖃᑦᑕᓯᒪᒻᒥᔪᖅ 1980-ᐃᑦ ᐊᕐᕌᒍᖏᑦ ᐃᓱᓕᓕᕐᑎᓗᒋᑦ 1990-ᐃᑦ ᐱᒋᐊᕐᓂᖏᓐᓄᑦ – ᑌᑦᓱᒪᓂᐅᑎᓪᓗᒍ ᒪᑭᕝᕕᑯᑦ ᓂᐅᕕᓚᐅᕐᓯᒪᑎᓪᓗᒋᑦ ᕘᔅᑦ ᐃᐊᒃᑯᓂᒃ ᐃᓚᒋᔭᐅᓂᐊᓕᕐᑎᓗᒍ ᑎᒥᐊᕈᖏᑦᑕ ᑲᒻᐸᓂᖏᓐᓄᑦ ᐱᓕᐅᒥᑎᑦᓯᓂᐊᓕᕋᒥᒃ ᖃᖓᑦᑕᔫᓕᕆᓂᕐᒥᒃ ᖃᐅᔨᒪᔪᒻᒪᕆᐅᓂᕐᒥᓂᒃ, ᑕᒪᓐᓇ ᐱᒋᐊᕐᓂᖃᓚᐅᔪᒻᒪᑦ ᓄᐃᑕᐅᔪᖃᕐᑎᓗᒍ ᐃᓄᐃᑦ ᖃᖓᑦᑕᔫᖏᓐᓂᒃ ᒪᑭᕝᕕᑯᓄᑦ ᑐᖕᖓᕕᒋᔭᐅᓪᓚᕆᓕᕐᓱᓂ ᑌᑦᓱᒪᓂᐅᑎᓪᓗᒍ.

“ᓇᑯᕐᑐᒪᕆᐅᕗᖅ ᒪᑭᕝᕕᑯᑦ ᐅᑎᕐᕕᒋᒋᐊᖏᑦ ᒫᓐᓇᐅᑎᓪᓗᒍ,” ᑌᒣᓕᑦᓱᓂ ᐅᖃᓚᐅᕐᑐᖅ ᓵᓕ ᒍᐊᑦ. “2018 ᐃᕐᖃᐅᒪᓇᕐᑐᒪᕆᐅᓚᖓᓕᕐᑐᖅ ᑖᑦᓱᒧᖓ ᑎᒥᐅᔪᒧᑦ ᐅᐱᒍᓲᑎᖃᕐᓂᐊᓕᕐᑎᓗᑕ 40-ᓂᒃ ᐊᕐᕌᒍᕐᑐᓯᒪᓕᕐᓂᑎᓐᓂᒃ. ᕿᓚᓈᕐᐳᒍᑦ ᐅᓂᒃᑲᐅᓯᖃᖃᑦᑕᓂᐊᕆᐊᒥᒃ ᐊᕐᕌᒍᕙᓚᐅᕐᑐᓂᒃ ᑕᒪᒃᑯᐊ ᓄᐃᑎᕐᑕᐅᓕᕐᑎᓗᒋᑦ ᓇᒻᒥᓂᕐᑎᒍᑦ, ᑕᑯᑦᓴᐅᑎᑦᓯᓗᑕᓗ ᖃᓄᑎᒋᒃ ᐃᓄᐃᑦ ᐱᕙᓪᓕᐊᓂᖃᕐᓯᒪᓕᕐᒪᖔᑕ ᑖᒃᑯᓇᓂ 40-ᓂᒃ ᐊᕐᕌᒍᕐᓂᒃ. ᑌᒪᑦᓭᓇᕐᓗ, ᕿᓚᓈᒍᑎᖃᕐᒥᓱᖓ ᐱᓇᓱᐊᒐᖃᓚᖓᓕᕆᐊᒥᒃ ᐃᓄᓐᓄᑦ ᓵᖕᖓᔭᐅᓂᖃᓕᕐᑐᓂᒃ ᒫᓐᓇᐅᑎᓪᓗᒍ, ᑲᔪᓯᑎᒋᐊᓪᓚᓗᒋᓪᓗ ᔫᐱ ᑕᕐᕿᐊᐱᐅᑉ ᐱᓇᓱᐊᒻᒪᕆᖃᑦᑕᓚᐅᕐᑕᖏᑦ, ᐱᓗᐊᕐᑐᒥᒃ ᐃᓕᓐᓂᐊᓂᓕᕆᓂᕐᒧᐊᖓᔪᓂᒃ ᐊᖏᓕᑎᑦᓯᒋᐊᕐᓂᒥᓪᓗ ᓄᓇᖃᕐᕕᑎᓐᓂᒃ.”

ᒪᑭᕝᕕᑯᓂᒃ ᑭᒡᒐᑐᕐᓱᓂ, ᓵᓕ ᒍᐊᑦ ᓇᑯᕐᒦᓂᖃᓚᐅᕐᐳᖅ ᔫᐱ ᑕᕐᕿᐊᐱᒻᒥᒃ ᐱᖓᓲᔪᕐᑐᓂᒃ ᐊᕐᕌᒍᕐᓂᒃ ᐱᒍᑦᔨᓚᐅᕐᓂᖓᓄᑦ ᓯᕗᒧᐊᕐᑎᓯᒋᐊᕐᓱᓂ ᐃᓄᓐᓄᑦ ᐱᑦᔪᑕᐅᔪᓂᒃ, ᐊᒻᒪᓗ ᑭᒡᒐᑐᖃᑦᑕᓚᐅᕐᓂᖓᓄᑦ ᐃᓄᓐᓂᒃ ᑭᓯᑦᓴᐅᖏᑦᑐᓂᒃ ᐃᓄᐃᑎᒍᑦ ᑲᑎᒪᓂᐅᖃᑦᑕᓚᐅᕐᑐᓄᑦ ᓄᓇᕕᐅᑉ ᐃᓗᐊᓂ, ᑯᐯᒃ ᐃᓗᐊᓂᓗ, ᑲᓇᑕᒥᐅᑎᒍᓪᓗ ᓄᓇᕐᔪᐊᒥᐅᖑᖃᑎᒌᓐᓂᑎᒍᓪᓗ ᒪᑭᕝᕕᑯᓄᑦ ᐊᖓᔪᕐᖄᖑᑦᓱᓂ.

“ᒪᑭᕝᕕᑯᑦ ᑕᑯᓐᓈᓂᖃᓚᖓᔪᑦ ᐱᑦᔪᑎᒋᔭᐅᓕᕐᑐᓂᒃ ᐃᓕᖓᓗᐊᖑᐊᑐᓂᒃ ᓄᓇᖃᕐᖄᓯᒪᔪᐃᑦ ᐱᔪᓐᓇᐅᑎᖏᓐᓄᑦ ᐃᓚᖃᕐᓂᐊᑎᓪᓗᒍ ᐱᔪᓐᓇᐅᑎᖃᕐᓂᑎᓐᓂᒃ ᓇᒻᒥᓂᖅ ᐊᐅᓚᑦᓯᔨᐅᒍᓐᓇᓂᑦᑎᓄᑦ.”

ᓵᓕ ᒍᐊᑦ ᑲᓇᑕᒥ ᐱᖁᔭᓕᐅᕐᑎᒪᕆᓐᓄᑦ ᐃᓚᐅᔫᒋᕗᖅ, ᑎᓕᔭᐅᓚᐅᕐᓯᒪᓂᕐᒥᒍᑦ ᑲᓇᑕᐅᑉ ᐊᖓᔪᕐᖄᒪᕆᖓᓄᑦ ᐱᐊᕐ ᐃᓕᐊᑦ ᑐᕉᑐᒧᑦ ᔭᓄᐊᕆ 16, 1984-ᒥ. ᑖᓐᓇ ᑕᒡᒐᖓᑦ ᐱᖁᔭᓕᐅᕐᕕᒪᕆᒻᒥᑦ ᓄᕐᖃᕕᖃᕈᒪᐅᑎᒥᓂᒃ ᐱᒋᐊᕐᑎᓯᓯᒪᓕᕐᑐᖅ. ᑖᓐᓇ ᒍᐊᑦ ᑯᐯᒃᒥ ᑲᕙᒪᖏᓐᓄᑦ ᐃᓕᑕᕆᔭᐅᒍᑎᖃᕐᒥᔪᖅ (1994-ᓂᑕᕐᒥᒃ), ᐃᓕᑕᕆᔭᐅᒍᑎᑖᕐᓯᒪᒻᒥᓱᓂᓗ ᑲᓇᑕᓕᒫᒥ ᓄᓇᖃᕐᖄᓯᒪᔪᐃᑦ ᐱᔪᓐᓇᓯᒪᓪᓚᕆᑦᑐᓂᒃ ᐃᓕᑕᕐᓯᒍᑎᖓᓂᒃ (1997-ᒥ), ᐊᒻᒪᓗ ᐊᓯᖏᓐᓄᑦ ᐃᓕᑕᕆᔭᐅᒪᒍᑎᖃᕐᒥᓱᓂ.

ᑖᓐᓇ ᐊᖓᔪᕐᖄᒧᑦ ᓂᕈᐊᕐᓂᖃᕐᑎᓗᒋᑦ ᓵᓚᖃᓚᐅᕐᑐᖅ ᓯᑕᒻᒥᑐᓂ ᔭᓄᐊᕆ 18, 2018-ᒥ 2,045-ᓄᑦ ᓂᕈᐊᕐᑕᐅᓱᓂ, ᓂᕈᐊᕐᑐᓕᒫᑦ 53.62% ᐳᓴᓐᑎᖏᓐᓄᑦ. ᓂᕈᐊᕐᑐᕕᓃᑦ ᖃᓄᐃᓕᔪᕕᓂᐅᒻᒪᖔᑕ ᐊᓪᓚᓯᒪᐅᑎᖏᑦ ᑕᑯᒋᐊᕐᑕᐅᒍᓐᓇᑐᑦ ᒪᑭᕝᕕᑯᑦ ᖃᕆᑕᐅᔭᖃᕐᕕᖓᓂ ᐅᕙᓂ www.makivik.org

-30-

ᐅᖄᖃᑎᒋᔭᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ ᐊᒻᒪᓗ ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org

ᒪᑭᕝᕕᑯᑦ ᓄᓇᑖᕋᓱᐊᕐᑎᐅᓂᕐᒥᒃ ᑎᒥᐅᔫᒍᑎᖃᕐᐳᖅ ᑎᓕᔭᐅᒪᑦᓱᓂ ᑲᒪᒋᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓄᑦ ᐊᑖᒍᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᒍᓯᖃᕐᒪᑕ ᐃᓚᖃᕐᑐᓂᒃ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔦᕈᑎᐅᒋᐊᓕᓐᓂᓗ ᑕᒪᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑕᒐᓱᐊᕐᓂᒥᒃ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑕᐅᔪᖃᕐᑎᓗᒍ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓂᖃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒧᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᒃᑯᑦ, ᑐᖕᖓᕕᖃᑦᓯᐊᓂᒃᑯᓗ, ᐊᑦᓱᔫᑎᑦᓯᑌᓕᒪᓂᕐᒥᓗ, ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓂᒃ ᓄᓇᓕᓐᓃᑎᓪᓗᒋᑦ.

ᓵᓕ ᒍᐊᑦ ᐊᖓᔪᑦᓯᖅ ᓂᕈᐊᕐᑕᐅᕗᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᓄᑦ – ᐅᑎᕐᕕᖃᕐᓱᓂ ᑎᒥᒧᑦ ᓄᐃᓚᐅᕐᑕᕕᓂᕐᒥᓄᑦ 40 ᐊᕐᕌᒍᐃᑦ ᓯᕗᓂᐊᒍᑦ