ᓄᑖᖅ ᒫᓐᓇᓯᐅᑎᒃ ᐃᓪᓗᓂᒃ ᐊᑦᑕᑐᕐᓂᓄᑦ ᐊᑭᓄᑦ ᑯᐯᒻᒥᒃ ᐋᕐᕿᓯᒪᐅᑎᒃ ᓄᐃᑕᖅ: ᐃᓄᐃᑦ ᐃᓪᓗᖏᑦ ᐊᑭᑭᓪᓕᑎᕐᓯᒪᓚᖓᔪᑦ ᐊᒻᒪᓗ ᐃᑯᓪᓚᑎᑕᐅᑫᓐᓇᓗᑎᒃ

ᑰᑦᔪᐊᖅ, ᑯᐯᒃ, ᒣ 1, 2017 – ᐃᓄᐃᑦ ᓯᕗᓕᕐᑎᖏᑦ ᐱᓯᒪᔪᑦ ᒪᑭᕝᕕᒃ ᑯᐊᐳᕇᓴᓐᑯᓂᑦ (ᒪᑭᕝᕕᒃ) ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ (ᑫᐋᔩ) ᓄᐃᑦᓯᖃᑎᓖᑦ ᑯᐯᑉ ᑲᕙᒪᖓᓂᒃ ᐊᖏᖃᑎᒌᒍᑎᒥᒃ ᑐᑭᓕᐅᕈᑎᑦᓴᒥᒃ, ᑲᔪᓯᒍᓐᓇᓯᑎᑕᐅᒋᐊᖃᓛᕐᓱᓂ ᑲᕙᒪᒃᑯᑦ ᐱᓂᐊᕐᓂᓕᕆᔨᖏᓐᓄᑦ, ᒫᓐᓇᓯᐅᑎᒃ ᐃᓄᐃᑦ ᐃᓪᓗᖃᕐᑎᑕᐅᒍᑎᖏᑦᑕ ᐊᑭᖏᓐᓂᒃ ᐋᕐᖀᑫᓐᓇᓯᒪᐅᑎᐅᓚᖓᔪᖅ ᐊᑭᑭᓪᓕᒋᐊᕐᑕᐅᑎᓪᓗᒋᑦ ᐃᓪᓗᐃᑦ ᐊᑭᖏᑦ ᐊᒥᓲᓂᕐᓴᓄᑦ ᓄᓇᕕᒻᒥᐅᓄᑦ ᑖᒃᑯᓂᖓ ᐃᓪᓗᓂᒃ ᐊᑦᑕᑐᕐᑐᓄᑦ.

“ᑌᒣᓕᖓᑎᓗᒋᑦ ᐃᓚᒌᑦ ᐊᕐᓱᕈᒍᑎᖃᓗᐊᖕᖑᐊᐸᑦᑐᑦ ᐃᑲᔪᕐᓯᔭᐅᓚᖓᔪᑦ,” ᓚᓚᐅᕐᑐᖅ ᔫᐱ ᑕᕐᕿᐊᐱᒃ ᒪᑭᕝᕕᐅᑉ ᐊᖓᔪᕐᖄᖓ. “70% ᐊᑖᓂᐊᐱᑐᐃᓐᓈᑐᑦ ᓄᓇᕕᒻᒥ ᐃᓚᒌᑦ ᑮᓇᐅᑦᔭᓲᑦ $34,000 ᐊᑖᓃᑦᑐᓂᒃ ᐊᕐᕌᒍᑕᒫᑦ. ᓄᑖᑦ ᐃᓪᓗᓂᒃ ᐊᑭᓕᕐᑐᐃᓂᕐᓄᑦ ᐋᕐᕿᓯᒪᐅᑏᑦ ᐃᑲᔪᕐᓯᐅᑕᐅᓚᖓᔪᑦ ᑖᒃᑯᓂᖓᓗᐊᖕᖑᐊᖅ ᐃᓄᓐᓂᒃ, ᐃᓪᓗᓄᑦ ᐊᑭᓕᕐᑐᑕᖏᑦ ᐊᑭᑭᓪᓕᒋᐊᕐᑕᐅᓚᖓᒻᒪᑕ ᐃᑭᓐᓂᐸᐅᑎᓪᓗᒋᑦ 20% ᐅᓄᕐᓂᐸᐅᑎᓪᓗᒋᑦ 75%. ᐊᓯᑦᔨᔭᐅᒍᑎᒃ ᑮᓇᐅᔭᒥᓂᒃ ᑭᖕᖒᒪᓇᓪᓚᕆᑉᐸᑐᓄᑦ ᐊᑐᕈᓐᓇᓯᓚᖓᔪᑦ ᓂᐅᕕᐅᑎᒋᒍᓐᓇᓯᓗᒋᑦ ᓂᕿᓂᒃ ᐊᒻᒪᓗ ᐊᓐᓄᕌᓂᒃ ᐊᒻᒪᓗ ᑫᓪᓗᑐᐃᕗᖓ ᐃᓄᓐᓂᒃ ᐃᑲᔪᕐᓯᔭᐅᒍᑎᑦᓴᓂᒃ ᐊᑭᑭᓪᓕᒋᐊᕐᑕᐅᓂᖏᓐᓄᑦ ᐃᓪᓗᐃᑦ ᐊᑦᑕᑐᕐᑕᖏᑦᑕ ᕿᓄᕕᖃᖁᑦᓱᒋᑦ ᑲᑎᕕᒃ ᓄᓇᓕᓐᓂ ᐃᓪᓗᓕᕆᓂᕐᓄᑦ ᐊᓪᓚᕕᒻᒪᕆᒻᒥᒃ (KMHB).”

“ᐱᔭᕐᓃᑐᑎᒎᕐᓂᓕᒫᑦᑎᓂ ᐊᖏᖃᑎᖃᕋᓱᐊᕐᓱᑕ ᑯᐯᒻᒥᒃ ᐊᕐᕌᒍᓂ ᐊᓂᒍᕐᑐᓂ ᓯᑕᒪᓂ, ᐱᒐᓱᐊᕈᑎᖃᖏᓐᓇᐸᑦᑐᒍᑦ ᑌᒪᖕᖓᑦ ᓈᒻᒪᓯᐊᕐᑐᓂᒃ ᐊᒻᒪᓗ ᐱᕙᓪᓕᐅᑎᐅᒍᓐᓇᑐᓂᒃ ᐃᓪᓗᓄᑦ ᐊᑭᓖᒍᑏᑦ ᐋᕐᕿᓯᒪᐅᑎᖏᓐᓂᒃ,” ᓚᓚᐅᕐᑐᖅ ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕗ ᒪᓂᒃ. “ᐱᕙᓪᓕᓯᐊᕈᑎᖃᕐᑐᒍᑦ ᐊᕐᖁᑎᒋᑦᓱᒍ ᑖᓐᓇ ᒫᓐᓇᓯᐅᑎᒃ ᐊᖏᖃᑎᒌᒍᑎᒃ ᐊᒻᒪᓗ ᓱᓕ ᐊᖏᖃᑎᖃᕋᓱᐊᖏᓐᓇᓚᖓᑦᓱᑕ ᑯᐯᒻᒥᒃ ᐃᓕᒣᓐᓇᓚᖓᔪᑦ ᐃᓪᓗᓂᒃ ᐊᑭᓕᕐᑐᐃᒍᑏᑦ ᐋᕐᕿᓯᒪᐅᑎᑦᓴᖏᓐᓂᒃ ᐃᓚᒋᔭᐅᓪᓚᕆᓚᖓᔪᓂᒃ ᐱᒐᓱᐊᕐᓂᑎᓄᑦ ᑮᓇᐅᔭᑎᒍᑦ ᐅᖁᒣᑦᓴᓗᐊᕐᐸᓂᖏᓐᓂᒃ ᐃᓚᒌᑦ ᓄᓇᕕᒻᒥ ᐃᑯᓪᓚᑎᕆᒋᐊᕈᒪᒧᑦ.”

ᑲᔪᓯᒍᓐᓇᐅᑎᑖᕐᑕᐅᒍᑎᒃ ᒫᓐᓇᓯᐅᑏᑦ ᐃᓪᓗᐃᑦ ᐊᑭᖏᑦ ᑲᔪᓯᒍᓐᓇᓯᓛᕐᑐᑦ ᑭᖑᓂᕐᒥᓗ ᐊᑭᑭᓪᓕᒋᐊᕐᓯᒪᐅᑎᑦᓴᕕᓂᑦ ᐊᑎᔭᐅᒍᓐᓇᓯᓗᑎᒃ ᐱᒋᐊᕐᕕᐅᑎᓪᓗᒍ ᔪᓓ 1, 2016 ᐊᒻᒪᓗ KMHB ᐃᓪᓗᖁᑎᖏᓐᓂᒃ ᐊᑦᑕᑐᕐᑐᑦ ᐱᕕᖃᕐᑎᑕᐅᓛᕐᓱᑎᒃ 120-ᓂᒃ ᐅᓪᓗᓂᒃ ᐱᒋᐊᕐᕕᐅᑎᓪᓗᒍ ᐅᓪᓗᖅ ᑲᔪᓯᒍᓐᓇᐅᑎᒥᒃ ᐃᓕᔨᕕᐅᔪᖅ ᐱᒐᓱᐊᕈᓐᓇᕕᖃᕐᓗᑎᒃ ᑭᖑᓂᕐᒥ ᐃᓪᓗᐃᑦ ᐊᑦᑕᑐᕐᑕᖏᑦᑕ ᐊᑭᑭᓪᓕᒋᐊᕐᓯᒪᐅᑎᒋᒋᐊᓕᕕᓂᖏᓐᓂᒃ. ᐃᓗᐃᒃᑲᑎᒍᑦ ᐃᑲᔪᕐᓯᐅᑎᓂᒃ ᑖᒃᑯᓂᖓ ᐊᑑᑎᑎᑦᓯᐊᕈᒪᒍᑎᒃ ᓄᑖᓂᒃ ᒫᓐᓇᓯᐅᑎᓂᒃ ᐃᓪᓗᓂᒃ ᐊᑦᑕᑐᕐᓂᓄᑦ ᐊᑭᓕᕐᑐᐃᒍᑏᑦ ᐋᕐᕿᓯᒪᐅᑎᑖᖏᑎᒍᑦ, ᐃᓪᓗᓂᒃ ᐊᑦᑕᑐᕐᑐᑦ ᑌᒣᓯᒪᒌᖕᖏᑯᑎᒃ ᖃᐅᔨᒐᓱᐊᕆᐊᖃᓛᕐᑐᑦ KMHB-ᒥᒃ ᓱᕐᖁᐃᓯᕕᒋᒋᐊᕐᓗᒋᑦ ᐃᓪᓗᐃᑦ ᐊᑦᑕᑐᕐᑕᖏᑦ ᐊᑭᑭᓪᓕᒋᐊᕈᓐᓇᑐᓄᑦ ᐃᓚᐅᒍᓐᓇᒪᖔᑕ.

ᓄᓇᕕᒻᒥ ᑲᒪᖃᑎᒌᑦ ᑐᕌᕈᑎᓕᐅᕐᓯᒪᔪᑦ ᔪᓓ 1, 2020-ᐅᒐᔭᕐᑎᓗᒍ, ᐃᖏᕐᕋᓯᑎᑕᐅᕕᑦᓴᕆᔭᖓᓂᐅᒃ ᓄᑖᑉ ᐃᓕᒣᓐᓇᓚᖓᔫᑉ ᐃᓪᓗᓂᒃ ᐊᑦᑕᑐᕐᓂᓄᑦ ᐋᕐᖀᓯᒪᐅᑎᐅᑉ. ᐃᓕᒣᓐᓇᓚᖓᔪᑦ ᐃᓪᓗᒨᕐᓯᐅᑏᑦ ᑐᖕᖓᕕᖃᕋᔭᕐᑐᑦ ᐃᓚᖏᑎᒍᑦ ᕿᒥᕐᕈᓯᐊᕐᑕᐅᓂᖏᑎᒍᑦ ᓄᐃᑕᐅᓚᕿᓯᒪᓗᑎᒃ ᓄᓇᕕᒻᒥ ᐆᒪᒐᓱᐊᕐᓂᐅᑉ ᐊᑭᖏᑦᑕ ᖃᐅᔨᓴᕐᑕᐅᓂᖏᓐᓄᑦ ᑐᓴᕐᑎᓯᐅᑎᓄᑦ ᓄᐃᑕᐅᓯᒪᔪᓄᑦ ᓅᕕᒻᐱᕆᐅᓚᐅᔫᒥ. ᑐᓴᕐᑎᓯᐅᑏᑦ ᓄᐃᑕᐅᓯᒪᔪᑦ ᓚᕚᓪ ᐃᓕᓐᓂᐊᕐᕕᔪᐊᒧᑦ ᐃᑲᔪᕐᑕᐅᓱᑎᒃ ᑫᐋᔩᒧᑦ, ᒪᑭᕝᕕᒧᑦ, ᐊᒻᒪᓗ ᑯᐯᒃ ᑲᕙᒪᖓᓄᑦ. ᑕᑯᑦᓴᐅᑎᑦᓯᔪᑦ ᑖᒃᑯᐊ ᐃᓚᒌᑦ ᓄᓇᕕᒻᒥ ᑮᓇᐅᑦᔭᓴᑦᓯᐊᖏᑦᑐᑦ ᓂᐅᕕᕈᑎᖃᕐᐸᓂᖏᓐᓂᒃ 70.3%-ᖏᓐᓂᒃ ᐃᓪᓗᓖᑦ ᑮᓇᐅᑦᔭᓵᒥᓂᒃ ᓂᐅᕕᐊᕆᓗᒋᑦ ᑭᓯᐊᓂᐅᔪᓂᒃ ᐆᑦᑑᑎᒋᑦᓱᒋᑦ ᓂᖀᑦ ᐊᒻᒪᓗ ᐃᓪᓗᐃᑦ ᐃᒣᓪᓗᐊᐸᑦᑎᓗᒋᑦ ᑯᐯᒃ ᓯᑎᒥᐅᑦ ᐊᑭᓕᕆᐊᖃᕐᐸᑕᖏᑦ ᐆᒪᒐᓱᐊᕈᑎᑦᓴᓄᑦ 41.3%.

-30-

ᑐᑭᓯᒋᐊᕐᕕᓵᒃ:
ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
media@krg.ca
www.krg.ca

ᐅᐃᓕᐊᒻ ᑕᒍᕐᓈᖅ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ ᐊᒻᒪᓗ ᑐᓴᕋᑦᓴᓕᕆᔨ
ᒪᑭᕝᕕᒃ ᑯᐊᐳᔩᓴᓐ
ᐅᖄᒍᑎᖓ 819-964-2925
wtagoona@makivik.org

ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.
ᒪᑭᕝᕕᒃ ᓄᓇᖃᕐᓂᕋᕐᓂᓄᑦ ᑎᒥᐅᒍᑎᖃᕐᐳᖅ ᑎᓕᔭᐅᒪᒍᑎᖃᕐᓱᓂ ᐊᐅᓚᑦᓯᓂᕐᓂᒃ ᕿᒻᒪᖁᑎᑦᓴᖃᕐᓂᓄᑦ ᑮᓇᐅᔭᖁᑎᖏᓐᓂᒃ ᓄᓇᕕᒻᒥᐅᑦ ᐃᓄᐃᑦ ᒪᓂᔭᐅᓯᒪᔪᓂᒃ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ.

ᒪᑭᕝᕕᑯᑦ ᐱᓇᓱᒐᖏᑦ ᐃᓚᖃᕐᐳᑦ ᐊᐅᓚᑦᓯᓂᕐᒥᒃ ᐊᒻᒪᓗ ᕿᑐᕐᖏᐅᑐᑦᓴᓕᐅᕐᓂᓂᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᓂᕐᒥᒃ ᐃᑲᔪᕈᑎᒋᓗᒋᑦ ᓄᐃᑎᕐᑕᐅᓂᖏᑦ ᐃᓄᐃᑦ ᐃᖏᕐᕋᑎᑕᖏᑦ ᑮᓇᐅᑦᔭᕋᓱᐊᕐᕖᑦ ᓄᓇᕕᒻᒥ. ᒪᑭᕝᕕᑯᑦ ᐱᕙᓪᓖᑎᑦᓯᒋᐊᕐᑏᑦ ᐊᓯᐅᑎᑦᓯᑌᓕᓂᕐᒥᒃ ᐃᓄᐃᑦ ᐃᓗᒡᒍᓯᖓᓂᒃ ᐊᒻᒪᓗ ᐅᖃᐅᓯᖓᓂᒃ ᐊᒻᒪᓗ ᐃᓗᓯᕐᓱᓂᖏᓐᓂᒃ, ᐃᓱᕐᕆᓂᖏᓐᓂᒃ, ᐊᔪᕐᓴᑎᑕᐅᑦᑌᓕᓂᖏᓐᓂᒃ, ᐊᒻᒪᓗ ᐃᓕᓴᕐᓂᖏᓐᓂᒃ ᐃᓄᐃᑦ ᓄᓇᓕᒥᓃᑦᑐᑦ.