ᒪᑭᕝᕕᒃ ᑐᓴᕐᑎᓯᔪᖅ ᓄᑖᒥᒃ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᒍᑦᔨᓂᐊᕐᑐᒥᒃ ᐃᓄᓐᓂᒃ ᓄᓇᕕᒻᒥᐅᓂᒃ ᐱᖕᖑᑎᑦᓯᓂᕐᒥᓂᒃ

m5y 1, 2017 – ᑰᒃᔪᐊᖅ ᑯᐯ – ᒪᑭᕝᕕᒃ ᐅᐱᒍᓱᑉᐳᖅ ᑐᓴᕐᑎᓯᒍᑎᖃᕆᐊᒥᒃ ᓄᑖᒥᒃ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᓇᓱᐊᕐᓂᐊᑐᒥᒃ ᓄᓇᕕᒻᒥ ᐅᖓᑖᓂᓗ ᐱᖕᖑᑎᑕᐅᔪᖃᕐᓂᖓᓂᒃ. ᑖᓐᓇ ᓄᑖᖅ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᓇᓱᐊᕐᕕᐅᓂᐊᕐᑐᖅ ᓇᒻᒥᓂᕆᔭᐅᓚᖓᔪᖅ 100%-ᒥᒃ ᒪᑭᕝᕕᒧᑦ.

“ᑕᒪᓐᓇ ᓄᑖᖅ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥ ᐊᑑᑎᒋᐊᓯᔪᖅ” ᒪᑭᕝᕕᐅᑉ ᐊᖓᔪᕐᖄᖓ ᐅᖃᓚᐅᕐᑐᖅ. “ᐊᐅᓚᑦᓯᒍᓐᓇᓯᐊᓲᖑᒐᑦᑕ ᑮᓇᐅᔭᓕᐅᕋᓱᐊᕈᑎᒋᓲᑦᑎᓂᒃ, ᑎᒥᐊᕈᖁᑎᑦᑎᓂᒃ ᐱᓇᓱᐊᖃᑎᒌᒍᑎᑦᑎᓂᓪᓗ ᐊᕐᕌᒍᓂ ᐊᓂᒍᕐᑐᓂ. ᐱᒋᐊᓪᓚᒍᒪᓕᕆᕗᒍᑦ ᒪᑭᑉᐸᓕᐊᒐᓱᐊᕐᓂᒥᒃ ᐱᒍᓐᓇᑐᓪᓚᕆᓐᓄᑦ ᐊᐅᓚᑕᐅᑎᑦᓯᓂᕐᒥᒃ ᐃᓚᐅᔪᑦ ᑮᓇᐅᔭᖁᑎᖏᑦ ᐊᐅᓚᑕᐅᑦᓯᐊᓂᕐᓴᐅᓂᐊᕐᒪᑕ ᐊᕐᕌᒍᓂ ᐊᒥᓱᓂ ᐱᓇᓱᐊᕐᑕᐅᕙᑦᑐᑦ ᐱᕈᕆᐊᒃᑲᓂᕈᓐᓇᓂᐊᕐᒪᑕ, ᑐᑭᓯᒪᑦᓯᐊᓂᕐᓴᐅᓕᕐᓗᑕᓗ ᑎᒥᐊᕈᑎᑦᑕ ᐱᓇᓱᐊᖃᑎᑦᑕᓗ ᖃᓄᐃᓘᕐᓂᖏᓐᓂᒃ.”

ᐅᑭᐊᒥ 2016 ᒪᑭᕝᕕᐅᑉ ᐃᓂᓪᓚᖓᓂᒃ ᕿᒥᕐᕈᔩᑦ ᑲᑎᖕᖓᔨᖏᑦ ᑎᓕᔭᐅᓚᐅᔪᒻᒪᑕ ᖃᐅᔨᓴᕐᓂᖃᖁᔭᐅᑦᓱᑎᒃ ᐃᒣᓕᖓᒐᔭᕐᖂᒫᕈᑎᓕᐅᕐᓗᑎᓪᓗ ᒪᑭᕝᕕᐅᑉ ᑲᑎᖕᖓᔨᖏᓐᓄᑦ ᐃᓱᐊᕐᓂᐸᐅᒐᔭᕐᑐᓂᒃ ᐊᑐᑦᓯᐊᓂᕐᐸᐅᒐᔭᕐᑐᓂᒃ ᒪᑭᕝᕕᒧᑦ ᒪᑭᑉᐸᓕᐊᒐᓱᐊᕐᓂᖅ ᐊᑑᑎᒍᓐᓇᓯᐊᖁᓗᒍ ᒪᑭᕝᕕᐅᑉ ᑎᒥᐊᕈᖁᑎᖏᓐᓂ ᐱᓇᓱᐊᖃᑎᖏᓐᓂᓗ. ᐱᕙᓪᓕᒋᐊᕐᑎᓯᒐᓱᐊᓚᐅᕐᒥᔪᑦ ᒪᑭᑉᐸᓕᐊᒐᓱᐸᕈᑎᐅᒍᓐᓇᑐᓂᒃ ᐊᑑᑎᓂᕐᒥᒃ ᐱᓂᐊᕐᓂᓕᕆᓂᕐᒧᑦ ᐅᓚᐱᑕᐅᒍᓐᓀᓗᑎᒃ ᑐᑭᑖᕋᓱᐊᕈᓐᓇᓂᐊᕐᑎᓗᒋᑦ ᒪᑭᑉᐸᓕᐊᒐᓱᐊᕈᑎᐅᒍᓐᓇᑐᓂᒃ.

ᑲᑎᖕᖓᔩᑦ ᕿᒥᕐᕈᓯᒪᔭᒥᓂᒃ ᖃᐅᔨᓴᕐᓯᒪᔭᒥᓂᒃ ᑐᓴᕐᑕᐅᑎᑦᓯᓯᒪᔪᑦ ᒪᑭᕝᕕᐅᑉ ᑲᑎᖕᖓᔨᖏᓐᓄᑦ. ᐱᖓᓱᓂᓪᓗ ᐃᒣᓕᖓᒐᔭᕐᖂᒫᕈᑎᖃᕐᓱᑎᒃ:

  • ᒪᑭᕝᕕᐅᑉ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐃᖏᕐᕋᑎᑦᓯᓂᖓ ᐱᕙᓪᓕᐅᒥᓂᐊᕐᒪᑦ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᓄᑖᓂᒃ ᐊᑑᑎᒋᐊᕈᓐᓇᓯᓗᓂ – ᒪᑭᕝᕕᒃ ᐃᒻᒥᒎᕐᑐᒥᒃ ᑎᒥᖁᑎᑖᕆᐊᖃᕐᑐᖅ.
  • ᑐᑭᑖᖃᑦᑕᕆᐊᖃᕐᒪᑕ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᑐᖕᖓᕕᖃᕐᓗᑎᒃ ᐱᓂᐊᕐᓂᓕᕆᓂᖅ ᐃᒻᒥᒎᕐᑎᓗᒍ.
  • ᒪᑭᕝᕕᒃ ᑎᒥᖁᑎᑖᕆᐊᖃᕐᑐᖅ ᒪᑭᕝᕕᐅᑉ ᐱᒍᓐᓇᐅᑎᖏᓐᓂᒃ ᑎᒍᒥᐊᕐᓗᓂ ᑎᒥᐊᕈᖁᑎᖏᓐᓂ ᐱᒍᓐᓇᐅᑎᖃᕐᕕᖃᕐᒥᓗᓂ ᒪᑭᕝᕕᐅᑉ ᐃᓚᐅᒍᑎᖃᕐᕕᖏᓐᓂᒃ ᑎᒥᐊᕈᖁᑎᐅᔪᓂᒃ ᐱᓇᓱᐊᖃᑎᒌᓐᓂᐅᔪᓂᓪᓗ.
  • ᖃᐅᔨᓴᕐᓱᑎᒃ ᐃᓄᐃᑦ ᓄᓇᖓᓐᓂ, ᓄᓇᑖᕐᓂᒧᑦ ᐊᖏᖃᑎᒌᒍᑎᖃᕐᑐᓂ ᐃᒻᒥᒎᕐᑐᒥᒃ ᒪᑭᑉᐸᓕᐊᒐᓱᐊᕐᓂᒥᒃ ᐱᓇᓱᐊᕐᓂᐊᑐᒥᒃ ᑎᒥᖁᑎᑖᕐᓯᒪᔪᑦ ᐊᐅᓚᑦᓯᔨᒋᐊᓂᕐᑕᒥᓂᒃ. ᑕᒪᓐᓇ ᐃᓂᓪᓚᖓᐅᓯᖅ ᐊᑑᑎᔭᐅᓛᕐᓕᑐᖅ ᓄᓇᕕᒻᒥ, ᒪᑭᕝᕕᒃ ᐱᓂᐊᕐᓂᓕᕆᓂᕐᒥ ᐃᓄᓕᕆᓂᕐᒥᒃ ᑎᓕᔭᐅᓯᒪᐅᑎᒥᓂᒃ ᐃᓄᓐᓄᑦ ᓄᓇᕕᒻᒥ ᑭᓯᐊᒐᑐᐊᖃᕐᓂᐊᑎᓪᓗᒍ.

“ᒪᑭᕝᕕᒃ ᐱᒍᑦᔨᓲᖑᓕᕐᑐᖅ ᐱᖓᓱᕕᓪᓗᐊᑐᓂᒃ 40 ᐊᕐᕌᒎᓚᐅᔪᒻᒪᑕ ᑌᒫᑦᓭᓇᖅ ᐱᒍᓐᓇᐅᑎᖃᕐᑐᖅ,” ᔫᐱ ᑕᕐᕿᐊᐱᒃ ᐅᖃᓚᐅᔪᖅ. “ᒪᑭᕝᕕᐅᑉ ᒪᑭᑉᐸᓕᐊᒐᓱᐊᕈᑎᖏᑦᑲᔪᓯᑦᓯᐊᖁᑦᓱᒋᑦ ᐊᑯᓃᕐᑐᒥᒃ, ᐅᓪᓗᒥ ᐃᓅᔪᓄᑦ ᑭᖑᕚᕆᓛᕐᑕᑎᓐᓄᓗ.”

ᓄᑖᖅ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᓇᓱᐊᕐᕕᑖᖑᔪᖅ ᑲᑎᖕᖓᔨᖃᕐᓂᐊᑐᖅ ᐱᖓᓲᔪᕐᑐᓂᒃ, ᕘᔅ ᐃᐊᒃᑯᓗ ᐃᓄᐃᒃᑯᓗ; ᐊᑐᓕᕐᑎᓯᓂᕐᒧᑦ ᑲᑎᖕᖓᔩᑦ ᓇᓪᓕᑳᒍᑎᐅᒐᔭᕐᑐᓂᒃ ᐃᓂᓪᓖᓯᒪᓛᕐᑐᑦ, ᐊᐱᕐᓲᔭᕐᓂᖃᑦᑕᓗᑎᒃ ᐱᓇᓱᑦᑎᑖᕋᓱᐊᕐᓂᒧᑦ ᒪᑭᕝᕕᐅᑉ ᑲᑎᖕᖓᔨᖏᓐᓄᑦ ᐅᓇᑕᒡᒑᕋᔭᕐᓗᑎᒃ ᓄᑖᓄᑦ ᐱᓇᓱᑦᑎᑖᖑᖃᑦᑕᓂᐊᕐᑐᓄᑦ.

“ᐱᖓᓱᑦ ᑐᑭᒧᐊᑦᑎᓯᔨᐅᒐᔭᕐᑐᑦ ᓄᑖᓂ ᑲᑎᖕᖓᔨᐅᕕᓐᓂ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐃᓚᐅᔪᓄᑦ ᐃᓂᒋᔭᐅᒐᔭᕐᑐᑦ,” ᔫᐱ ᑕᕐᕿᐊᐱᒃ ᐅᖃᓚᐅᕐᑐᖅ. “ᐃᓄᑐᐃᓐᓇᓂᒃ ᕿᓂᓛᕐᖁᒍᑦ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᓇᓱᐊᓕᓂᕐᓂᒃ, ᒪᑭᕝᕕᒥ ᐱᓇᓱᑦᑎᐅᒌᖕᖏᑐᓂᒃ ᑲᑎᖕᖓᔨᐅᒐᑎᓪᓗ. ᐱᖓᓲᒻᒥᔪᑦ ᐃᓃᑦ ᑲᑎᖕᖓᔨᓂ ᓄᑖᓂ ᐃᓚᐅᔫᒍᓐᓇᑐᑦ ᐃᓚᐅᔫᖕᖏᓗᑎᓪᓘᓃᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᓇᓱᐊᓕᓂᐅᓗᑎᒃ ᐱᒍᓐᓇᐅᑎᖃᑦᓯᐊᓗᑎᒃ. ᐃᓘᓐᓇᓯᐊᖏᑦ ᐃᓚᐅᔫᑐᐃᓐᓇᕆᐊᖃᕐᒥᔪᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ.

ᑕᕐᕿᓂ ᙯᔪᓂ ᐊᑐᓕᕐᑎᓯᓂᕐᒧᑦ ᑲᑎᖕᖓᔩᑦ ᐱᓇᓱᐊᕆᐊᖃᕐᓂᐊᑕᖏᑦ: ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᑎᒥᖕᖑᑎᑦᓯᓂᖅ, ᒪᓕᒐᓕᐅᕐᓂᖅ ᓄᑖᒧᑦ ᐱᓇᓱᐊᕐᕕᐅᓂᐊᕐᑐᒧᑦ, ᓇᓪᓕᑳᒍᑎᐅᓛᕐᑐᓂᒃ ᕿᒥᕐᕈᓂᖅ, ᓄᑖᒥᒃ ᐊᐅᓚᑦᓯᔨᒻᒪᕆᐅᓂᐊᕐᑐᒥᒃ ᕿᓂᕐᓂᖅ, ᑮᓇᐅᔭᑎᒍᓪᓗ ᑐᕌᒐᑦᓴᖏᓐᓂᒃ ᓯᕗᓪᓕᐹᓂᒃ ᐃᖏᕐᕋᒍᑎᐅᓂᐊᕐᑐᓂᒃ ᐃᓂᓪᓓᓂᖅ.

-30- 

ᖃᐅᔨᒋᐊᕐᕕᐅᒍᓐᓇᑐᖅ

ᒍᐃᓕᐊᒻ ᑕᒍᓐᓈᖅ
ᑐᓴᐅᒪᖃᑦᑕᐅᑎᓂᕐᒥᒃ ᐊᑕᐅᑦᓯᑰᕐᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ ᑐᕌᕈᑎᖓ wtagoona@makivik.org


ᒪᑭᕝᕕᒃ ᑎᓕᔭᐅᓯᒪᒍᑎᖃᕐᐳᖅ ᐊᐅᓚᑦᓯᔨᐅᓂᐊᕐᑎᓗᒍ ᑮᓇᐅᔭᕐᑖᖑᓯᒪᔪᓂᒃ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᐅᑉ ᐱᓇᓱᐊᕐᑕᖏᓐᓄᑦ ᒪᑯᐊ ᐃᓚᒋᔭᐅᔪᑦ ᐊᐅᓚᑦᓯᓂᖅ ᑮᓇᐅᔭᓕᐅᕋᓱᐊᕐᓂᓗ ᐊᑐᕐᓗᓂ ᑮᓇᐅᔭᕐᑖᖑᓯᒪᔪᓂᒃ ᑫᓪᓚᑐᐃᒍᑎᖃᕐᓂᓗ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᑎᑦᓯᒐᓱᐊᕐᓂᒥᒃ

ᒪᑭᕝᕕᒃ ᑐᓴᕐᑎᓯᔪᖅ ᓄᑖᒥᒃ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐱᒍᑦᔨᓂᐊᕐᑐᒥᒃ ᐃᓄᓐᓂᒃ ᓄᓇᕕᒻᒥᐅᓂᒃ ᐱᖕᖑᑎᑦᓯᓂᕐᒥᓂᒃ