ᒪᑭᕝᕕᒃ ᐃᕐᖃᐅᒪᑦᓯᓂᒃᑯᑦ ᓇᓗᓀᕆᕗᖅ ᓄᓇᓂᒃ ᐃᓐᓄᐃᓯᒪᒍᑎᒥ ᐊᕐᕌᒍᕐᑖᓂᖓᓂᒃ 40-ᓂᒃ

ᒪᑭᕝᕕᒃ ᐃᓄᑐᐃᓐᓀᑦ ᓄᓇᓇᓂᒃ ᐃᓐᓄᐃᒪᓇᓱᒍᑎᒥᓐᓄᑦ ᐱᓇᓱᒐᖃᕐᕕᖓᑦ ᑯᐯᒃ ᑕᕐᕋᖓᓂ ᓇᓪᓕᐅᓂᕐᓯᐅᓂᖃᓛᕐᐳᖅ ᐊᕙᑎ ᒪᕐᕈᓂ ᓴᕐᕿᔮᕐᓂᖃᓕᕐᓂᒥᓂᒃ ᐊᕐᖁᑎᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓂᒃ ᓄᓇᒥᒃ ᐃᓐᓄᐃᒪᓇᓱᓐᓂᒧᑦ ᐊᖏᖃᑎᒌᒍᑎᐅᓯᒪᔪᓂᒃ ᐊᑎᓕᐅᖃᑎᒌᒍᑕᐅᑦᓱᑎᒃ ᓅᕕᒻᐱᕆ 11, 1975-ᖑᑎᓪᓗᒍ.

“ᐊᕐᕌᒍᓂᒃ ᐊᕙᑎ ᒪᕐᕈᓂᒃ ᓇᓪᓕᐅᑎᓂᖃᓕᕈᑦᑕ ᓅᕕᒻᐱᕆ 11, 2015-ᒥ ᐱᓂᐊᕐᓂᖃᓛᕐᐳᒍᑦ ᓱᕐᖁᐃᑐᒥᒃ ᐃᓘᓐᓇᑕ ᓇᓗᓀᕐᓯᖁᓪᓗᑕ ᐅᐱᒍᓱᓪᓗᑕᓗ ᐱᒻᒪᕆᐊᓘᓂᖏᓐᓂᒃ ᓄᓇᑦᑎᓄᑦ ᐃᓐᓄᐃᒪᒍᑎᑦᑎᓂᒃ ᐊᖏᖃᑎᒌᒍᑎᑦᑎᓂᒃ, ᖃᓄᕐᓗ ᓱᒧᓪᓗ ᓴᕐᕿᑎᑕᐅᓯᒪᒻᒪᖔᑦ, ᐱᓗᐊᕐᑐᒥᓪᓗ, ᖃᓄᐃᑦᑐᒥᒃ ᐃᓅᓯᑦᑎᒍᑦ ᒪᑭᑕᒍᑎᒋᓕᕐᒪᔭᖓᑦᑎᒍᑦ ᐅᓪᓗᒥᓗ ᓯᕗᓂᑦᑎᓂᓗ ᑭᖑᕚᕆᓛᕐᑕᑕ ᐃᓅᓯᕆᓛᕐᑕᖏᓐᓂ,” ᒪᑭᕝᕕᐅᑉ ᐊᖓᔪᕐᖄᒪᕆᖓ ᔫᐱ ᑕᕐᕿᐊᐱᒃ ᑌᒣᓕᑦᓱᓂ ᐅᖃᓚᐅᔪᕗᖅ.

ᑰᒃᔪᐊᒥ ᓅᕕᒻᐱᕆ 11-ᖑᓕᕐᐸᑦ ᒪᑭᕝᕕᒃ ᑐᖕᖓᓱᑦᑎᓯᔨᐅᓛᕐᑐᖅ ᑕᑯᑦᓴᐅᑎᑦᓯᒋᐊᖕᖓᓚᕆᒍᑎᖃᕐᓗᓂ ᙯᕐᖁᔭᐅᒪᔪᑦ ᑭᓯᐊᓃᕐᑐᓂᒃ ᑕᑯᓐᓇᕋᑦᓴᔭᑎᒍᑦ ᐅᓂᒃᑲᐅᓯᓕᐊᕆᒪᔭᒥᓂᒃ ᓄᐃᑕᑎᑦᓯᒋᐊᖕᖓᓂᖃᓕᕐᐸᑦ ᓇᓗᓀᕆᒍᑎᒋᓗᒋᑦ ᓇᓪᓕᐅᑎᓂᕐᒥᒃ ᐅᖃᐅᓯᑦᓴᒪᕆᐊᓗᓐᓂᓗ ᐱᔭᖃᕈᑎᒋᓯᒪᔭᖏᓐᓂᒃ ᑌᒃᑯᐊ ᐊᖏᖃᑎᒌᒐᓱᓐᓂᓂᒃ ᐱᓂᐊᕐᓂᖃᓚᐅᕐᓯᒪᔪᑦ ᑭᖑᓂᐊᒍᑦ ᓅᕕᒻᐱᕆ 12-ᒥ ᐃᓄᓕᒫᑦ ᑕᑯᓐᓇᕆᐊᕈᓐᓇᓛᕐᑎᓗᒋᑦ. ᑕᒪᑐᒪ ᐊᑦᔨᒐᓚᖓᓂᒃ ᐱᓂᐊᕐᓂᖃᓛᕐᒥᔪᑦ ᒪᓐᑐᔨᐊᒥ ᓅᕕᒻᐱᕆ 30-ᒥ. ᐊᒻᒪᓗᒋᐊᓪᓚᓗ ᑕᑯᓐᓇᕋᑦᓴᔭᑎᒍᑦ ᐅᓂᒃᑲᓕᐊᖑᒪᔪᑦ ᑕᑯᑦᓴᐅᑎᑕᐅᓂᖃᓛᕐᒥᓱᑎᒃ ᓄᓇᕕᐅᑉ ᓄᓇᓕᓕᒫᖏᓐᓂ ᑕᒪᓐᓇ ᓯᕗᓂᑦᑎᓂ ᖃᓂᑦᑐᓂ ᐱᓇᓱᐊᕈᓯᐅᓛᕐᑐᓂ ᐊᑑᑎᑦᓴᐅᑎᒋᓛᕐᑐᖅ, ᓄᓇᓕᓐᓂᓗ ᓱᔪᖃᕐᑎᓯᓂᖃᕐᓗᑎᒃ ᑌᒃᑯᓇᓂ ᐅᓪᓗᓂ ᑕᑯᑦᓴᐅᑎᑦᓯᓂᖃᕐᓇᐅᓛᕐᑐᓂ.

“ᐃᓅᓱᑦᑐᒪᕆᐅᑦᓱᑎᒃ ᓯᕗᓕᕐᑎᒋᓚᐅᕐᓯᒪᔭᕗᑦ, ᓄᓇᓕᑦᑕᓗ ᐱᔪᓐᓇᓯᓚᐅᕐᓯᒪᔭᖏᑦ ᐊᕐᕌᒍᓂ ᐊᕙᑎ ᒪᕐᕈᓂ ᐊᓂᒍᕐᓯᒪᓕᕐᑐᓂ, ᐅᖃᐅᓯᑦᓴᓯᐊᒻᒪᕆᐊᓘᖏᓐᓈᐳᖅ. ᓯᕗᓂᑦᑎᓂ ᐃᑦᔭᕋᑦᓴᑎᓐᓂᒃ ᐃᓂᓪᓓᓚᐅᕐᓂᖏᑉᐸᑕ, ᓄᓇᕕᒃ ᐅᓪᓗᒥ ᐅᐱᒋᒻᒪᕆᑦᑕᕗᑦ ᐱᐅᓯᕐᒥᓂᒃ ᐱᐅᓯᖃᕋᔭᖕᖏᓚᖅ ᐊᓪᓛᑦ ᑲᓇᑕᐅᑉ ᑕᕐᕋᓕᒫᖓ ᑌᒣᒐᔭᖕᖏᑐᖅ” ᐅᖃᕐᐳᖅ ᔫᐱ ᑕᕐᕿᐊᐱᒃ. “ᑌᒃᑯᐊ ᐊᖏᖃᑎᒌᓐᓂᒥᒃ ᐱᓇᓱᑦᓯᒪᔪᑦ ᐊᑐᕈᓐᓇᑕᓕᒫᑦᓯᐊᒥᓐᓂᒃ ᐊᑐᕐᓯᒪᒻᒪᑕ ᐊᑐᑦᓯᐊᒪᕆᑦᓱᒋᓪᓗ, ᐱᓂᐊᕐᓂᓕᕆᓂᑎᒍᑦ ᐊᖏᖃᑎᒌᒐᓱᓐᓃᑦ, ᐃᓄᓕᒫᓂᒃ ᑐᓴᐅᒪᑎᑦᓯᓂᒃᑯᑦ ᐱᔭᖃᕐᓃ ᐊᒻᒪᓗ ᐱᓗᐊᕐᑐᒥ ᐊᑐᓚᐅᕐᓯᒪᓂᖏᑦ ᐱᖁᔭᓂᓪᓗ ᐃᕐᖃᑐᐃᕕᓐᓂᓗ.”

ᐃᓘᓐᓇᒐᓚᑎᒃ ᐊᖏᖃᑎᒌᒍᑎᓂᒃ ᐊᑎᓕᐅᖃᑕᐅᓯᒪᔪᑦ ᓂᕆᐅᒋᔭᐅᕗᑦ ᑕᑯᑦᓴᐅᑎᑦᓯᓂᕐᒥ ᓱᔪᖃᕐᓂᐅᒋᐊᖕᖓᑐᒧᑦ ᐃᓚᐅᔭᕐᑐᓛᕆᐊᖏᑦ.

ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐃᓐᓄᐃᓯᓂᕐᓄᑦ ᐊᖏᖃᑎᒌᒍᑎᓂᒃ ᐱᓇᓱᒍᑎᑦᓴᑕᕐᓯᒪᕗᑦ ᓄᓇᕕᐅᑉ ᐃᓄᑐᐃᓐᓇᖏᑦ ᐱᔪᓐᓇᐅᑎᖃᕐᕕᑕᕐᓱᑎᒃ ᐊᖏᔪᕐᔪᐊᒥᒃ ᓄᓇᒥᒃ ᐊᑦᓱᐃᑐᒍᑎᓕᒻᒥᒃ ᐱᑦᓴᖁᑎᓂᒃ ᑌᒃᑯᐊᓗ ᐊᖏᖃᑎᒌᒍᑎᐅᒪᔪᑦ ᐅᒃᑯᐃᓯᒍᑎᐅᒪᔪᑦ ᓄᖑᓐᓂᐊᖏᑦᑐᓂᒃ ᐱᒐᓱᕝᕕᓴᐅᔪᓂᒃ ᐱᓇᓱᖃᑎᒌᖃᑎᖃᕐᓂᓴᑎᒍᑦ ᐅᔭᕋᓐᓂᐊᓂᕐᒥᒃ ᐱᓇᓱᑦᑐᓂᓪᓗ ᐊᓯᖏᓐᓂᓗ ᐱᓇᓱᒐᑦᓴᔭᓂᒃ ᐱᒐᓱᕝᕕᓴᓂᒃ.

ᔫᐱ ᑕᕐᕿᐊᐱᒃ ᐅᖃᕆᐊᓪᓚᓚᐅᔪᔪᖅ ᐃᒣᓕᑦᓱᓂ “ᐃᓱᒪᔪᖓᓕ ᓇᑯᕐᒦᕈᑎᑦᓯᐊᖑᓂᕐᐹᖑᒐᔭᕆᐊᖓ ᑕᒪᒃᑯᓂᖓ ᐊᖏᖃᑎᒌᒍᑎᒋᓯᒪᔭᖏᓐᓂᒃ ᐱᕕᓕᒫᑦᑎᒍᑦ ᐊᑐᕐᑕᖃᑦᓯᐊᑐᑦᓴᐅᒋᐊᑦᑕ ᐱᒐᓱᕝᓴᕐᑕᑎᑦᓯᒍᑎᒋᓯᒪᔭᖏᓐᓂᒃ ᐊᕐᓱᕈᕐᓱᑎᒃ ᓯᕗᓂᕐᒥᓗ ᑕᐅᑐᖕᖑᐊᓱᑎᒃ ᐱᒐᓱᒍᑎᒋᓯᒪᔭᖏᓐᓂᒃ ᐊᑐᑦᓯᐊᑐᑦᓴᐅᒋᐊᑦᑕ ᑭᖑᕚᑦᑎᓂᓪᓗ ᕿᑐᕐᖓᑎᓐᓂᒃ ᑌᒫᓪᓗᐊᖅ ᑖᒃᑯᑎᑐᓇ ᕿᒻᒪᕇᕕᖃᕐᓗᑕ.

ᑐᑭᓯᒋᐊᒃᑲᓂᕈᒪᔪᑦ ᖃᐅᔨᒋᐊᕐᕕᖃᕈᓐᓇᑐᑦ:
ᒍᐃᓕᐋᒻ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᒥᒃ ᐊᑕᐅᑦᓯᑯᕐᑎᓯᔨ ᑐᓴᕋᑦᓴᓂᐊᕐᑎᓂᓪᓗ ᐱᓇᓱᖃᑎᖃᓲᖑᑦᓱᓂ
wtagoona@makivik.org
819-964-2925

ᒪᑭᕝᕕᒃ ᐱᕙᓪᓕᐊᑎᑦᔨᐅᓂᐊᕐᓗᓂ ᐱᓇᓱᒐᖃᕐᕕᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᒋᔭᐅᓂᐊᕐᓂᒥᒃ ᕿᒻᒪᖁᑎᑦᓴᐅᓱᑎᒃ ᑮᓇᐅᔭᖁᑎᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᓄᑦ. ᒪᑭᕝᕕᐅᑉ ᐱᔭᑦᓴᖃᕐᑎᑕᐅᒍᑎᖏᑦ ᐃᓚᖃᕐᑐᑦ ᐊᐅᓚᑦᓯᓂᔨᐅᓂᕐᒥᒃ ᐊᒻᒪᓗ ᑮᓇᐅᔭᖁᑎᓂᒃ ᕿᑐᕐᖏᐅᑎᑦᓯᓇᓱᓐᓂᒥᒃ ᖁᕝᕙᑎᕆᓂᕐᒥᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᑦᓴᓂᒃ.