ᒪᑭᕝᕕᑯᑦ ᑐᓴᕐᑎᓯᔪᑦ $16.8 ᒥᓕᐊᓐᑖᓚᓂᒃ ᓄᓇᕕᒻᒥ ᐱᒋᐊᕐᑎᑕᐅᓂᐊᕐᑐᓄᑦ 2017-2018 ᐊᕐᕌᒍᖓᓅᓕᖓᔪᓂᒃ

ᑰᒃᔪᐊᖅ, ᑯᐯᒃ – ᐱᖓᑦᓯᑐᓂ, ᐅᑦᑑᐱᕆ 11, 2017 – ᒪᑭᕝᕕᑯᑦ ᓇᑯᕐᓴᑐᒻᒪᕆᐅᕗᑦ ᑐᓴᕐᑎᓯᒋᐊᒥᒃ $16.8 ᒥᓕᐊᓐᑖᓚᓂᒃ ᐱᑎᑕᐅᓛᓕᕆᐊᒥᒃ ᓄᓇᕕᒻᒥ ᐱᒋᐊᕐᑎᑕᐅᓂᐊᕐᑐᓄᑦ 2017-2018 ᐊᕐᕌᒍᖓᓅᓕᖓᓂᐊᕐᑐᓂᒃ (ᐅᑦᑑᐱᕆ 1, 2017-ᒥᑦ ᓯᑉᑎᒻᐱᕆ 30, 2018-ᒧᑦ).

“ᑮᓇᐅᔭᓕᕆᒍᑎᑦᑎᓄᑦ ᐅᑎᕐᕕᐅᓯᐊᕈᓐᓇᓚᐅᑎᓗᑕ, ᐊᒻᒪᓗ $3 ᒥᓕᐊᓐᑖᓚᓂᒃ ᖄᖏᕐᓂᑯᑖᕐᑎᑕᐅᓚᐅᕐᓱᑕ ᕘᔅᑦ ᐃᐊᒃᑯᓄᑦ, ᐊᒻᒪᓗ $2 ᒥᓕᐊᓐᑖᓚᓂᒃ ᖄᖏᕐᓂᑯᑖᕐᑎᑕᐅᒻᒥᓱᑕ ᐃᓄᐃᑦ ᖃᖓᑦᑕᔫᖏᓐᓂᑦ, ᐱᔪᕆᐅᑎᖃᕐᐳᒍᑦ ᓱᓕ ᓴᓂᕐᕓᒍᓐᓇᓕᕐᒥᒐᑦᑕ ᑮᓇᐅᔭᓂᒃ ᓄᓇᓕᓕᒫᓄᑦ. 2017-2018 ᐊᕐᕌᒍᖓᓂ, $16.8 ᒥᓕᐊᓐᑖᓚᓂᒃ ᓴᓂᕐᕙᑕᐅᔪᖃᕐᓯᒪᓚᖓᔪᖅ ᓴᐳᒻᒥᒍᑎᐅᓂᐊᕐᑐᓂᒃ ᐊᒥᓱᓂᒃ ᐊᑦᔨᒋᖏᑐᓂᒃ ᓄᓇᓕᓐᓂ ᐱᓇᓱᐊᕐᑕᐅᓂᐊᕐᑐᓂᒃ ᐊᒻᒪᓗ ᓄᑖᓄᑦ ᐱᒋᐊᕐᑎᑕᐅᓂᐊᕐᑐᓄᑦ,” ᑌᒣᓕᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᔫᐱ ᑕᕐᕿᐊᐱᒃ.

“ᑕᒪᒃᑯᐊ ᑐᓂᕐᕈᑏᑦ ᐃᓚᒋᔭᐅᕗᑦ ᒪᑭᕝᕕᑯᑦ ᓴᐳᒻᒥᒍᑎᒋᓲᖏᓐᓄᑦ ᑕᒪᒃᑯᓄᖓ ᐊᑦᔨᒋᖏᑐᓄᑦ ᐃᑲᔪᕐᓯᒪᐅᑎᓄᑦ ᐱᒋᐊᕐᑎᑕᐅᓲᓄᓪᓗ ᐊᕐᕌᒍᑕᒫᑦ ᐊᕐᖁᑎᒋᑦᓱᒋᑦ ᐃᓄᐃᑦ ᖃᖓᑦᑕᔫᖏᓪᓗ ᕘᔅᑦ ᐃᐊᒃᑯᓗ. ᑖᒃᑯᐊ $16.8 ᒥᓕᐊᓐᑖᓓᑦ ᑐᓂᔭᐅᒍᓐᓇᓯᓯᒪᔪᑦ ᑮᓇᐅᔭᓕᕆᓂᑦᑎᓂᒃ ᑕᑯᓐᓈᓯᐊᕋᓱᐊᖃᑦᑕᓕᓚᐅᕋᑦᑕ ᑕᒪᒃᑯᓇᓂ ᖃᒻᒥᓂᑕᕐᓂᒃ ᐊᕐᕌᒍᕐᓂᒃ ᑐᕌᖓᓂᖃᕐᑎᑕᐅᑎᓪᓗᒍ ᐱᔪᓐᓇᓯᑦᓴᐅᑎᒋᓂᐊᕆᐊᒥᒃ ᑐᕌᒐᕆᔭᐅᓕᕐᑐᓂᒃ ᑕᕝᕘᓇᑦᓭᓇᖅ ᒪᑭᕝᕕᑯᑦ ᐃᓚᐅᔪᖁᑎᖏᑦᑕ ᐱᖁᑎᒻᒪᕆᖏᓐᓂᒃ ᐱᕈᓭᖏᓐᓇᓂᖃᕐᑎᓗᑕ ᑲᔪᓯᔪᒥᒃ ᐱᕙᓪᓕᓲᖑᓂᐊᖁᓪᓗᒋᑦ ᑭᖑᕚᖑᓂᐊᕐᑐᑦ,” ᑌᒣᓕᓚᐅᕆᕗᖅ ᔫᐱ.

ᓄᓇᓕᓐᓄᑦ ᐊᒡᒍᑐᕐᑕᐅᓂᐊᕐᑐᓄᑦ

ᒪᑭᕝᕕᑯᑦ ᑐᓂᕐᕈᓯᓲᖑᕗᑦ ᓄᓇᕕᐅᑉ ᓄᓇᓕᖏᓐᓄᑦ ᐊᕐᕌᒍᑕᒫᑦ ᒪᓕᑦᓱᒋᑦ ᐃᓄᖏᑦᑕ ᐅᓄᕐᓂᖏᑦ. 2017-2018-ᒥ ᑖᒃᑯᐊ 15-ᖑᔪᑦ ᓄᓇᓖᑦ, ᐃᓚᐅᑎᓪᓗᒋᑦ ᓯᓵᓯᐱᐅᑉ ᐃᓄᖏᑦ, ᐊᕕᖃᑎᒌᓐᓂᐊᑐᑦ $4.5 ᒥᓕᐊᓐᑖᓚᓂᒃ.

ᐊᒻᒪᓗᑦᑕᐅᖅ, $1.3 ᒥᓕᐊᓐᑖᓚᑲᓴᓐᓂᒃ ᐊᒡᒍᑐᕐᑕᐅᔪᖃᕐᓂᐊᓱᓂ ᐅᑯᓄᖓ ᓄᓇᓖᑦ ᐱᒋᐊᕐᑎᓯᒪᔭᖏᓐᓄᑦ: ᓱᖃᑦᓯᑎᑦᓯᓂᕐᒧᑦ; ᐃᓄᒻᒪᕆᓐᓄᑦ; ᐅᓇᑕᕐᑎᐊᐱᓐᓄᑦ; ᔦᒥᔅᐯᑉ ᐊᖏᖃᑎᒌᓐᓂᖓᑕ ᐅᓪᓗᖃᕐᑎᑕᐅᓂᖓᓄᑦ; ᑲᓇᑕᓕᒫᒥ ᓄᓇᖃᕐᖄᓯᒪᔪᐃᑦ ᐅᓪᓗᖃᕐᑎᑕᐅᓂᖓᓄᑦ; ᑐᑦᓯᐊᕖᑦ ᑮᓇᐅᔭᖃᕐᑎᑕᐅᒍᑎᖏᓐᓄᑦ; ᓄᓇᓕᓐᓂ ᑐᓂᕐᕈᑏᑦ ᑮᓇᐅᔭᖃᕐᑎᑕᐅᒍᑎᖏᓐᓄᑦ; ᐊᒻᒪᓗ ᐊᓐᓂᐊᕕᓕᐊᕐᓯᒪᔪᐃᑦ ᑮᓇᐅᔭᖃᕐᑎᑕᐅᒍᑎᖏᓐᓄᑦ.

ᓄᓇᓕᓐᓄᑦ ᐊᒡᒐᑐᕐᑕᐅᒋᐊᓖᑦ ᐱᓪᓗᒋᑦ, ᒪᑭᕝᕕᐅᑉ ᑲᑎᒪᔨᖏᑦ ᑲᒪᒋᔭᖃᓲᑦ ᐱᔨᐅᑦᓱᑎᒃ ᓄᓇᓖᑦ ᑐᑦᓯᕋᐅᑎᖏᓐᓂᒃ ᐊᕐᕌᒍᑉ ᐃᓗᐊᓂᓕᒫᖅ.

ᓴᓇᕐᕈᑏᑦ ᑮᓇᐅᔭᖃᕐᑎᓯᒍᑎᖏᓐᓄᑦ

ᒪᑭᕝᕕᐅᑉ ᑲᑎᒪᔨᖏᑦ ᑐᑭᑖᕐᓯᒪᔪᑦ ᓄᑕᐅᓯᓕᕐᑎᓯᓂᐊᕆᐊᒥᒃ ᑮᓇᐅᔭᖃᕐᑎᓯᒍᑎᓂᒃ ᐅᕝᕙᓘᓐᓃᑦ ᓄᑖᓂᒃ ᑮᓇᐅᔭᖃᕐᑎᓯᒍᑎᑦᓴᓕᐅᕐᓗᑎᒃ ᒪᑯᓄᖓ ᐃᑲᔪᕐᓯᒪᐅᑎᓄᑦ ᐊᕐᖁᑎᒋᓗᒋᑦ ᓴᓇᕐᕈᑎᒃ ᐊᖏᖃᑎᒌᒍᑎᖏᑦ. ᑮᓇᐅᔭᖃᕐᑎᑕᐅᓲᑦ ᑎᒥᐅᔪᐃᑦ, ᐊᒻᒪᓗ ᓄᓇᓕᓕᒫᓂ ᐱᒋᐊᕐᑎᑕᐅᓂᖃᕐᑐᓄᑦ.

ᑎᒥᐅᔪᐃᑦ ᑮᓇᐅᔭᖃᕐᑎᑕᐅᓂᖏᓐᓄᑦ ᓴᓇᕐᕈᑎᒃᑯᑎᒍᑦ

ᐊᕙᑕᖅ ᐱᐅᓯᑐᖃᓕᕆᔨᖏᑦ ᐱᑎᑕᐅᓂᐊᕐᑐᑦ $982,576-ᓂᒃ ᑮᓇᐅᔭᖃᕐᑎᑕᐅᒋᐊᓪᓚᕈᑎᖏᓐᓄᑦ, ᐃᓚᖃᕐᑐᓂᒃ $290,000-ᓂᒃ ᐱᓇᓱᑦᑎᓯᒋᐊᕈᑎᖏᓐᓄᑦ ᓄᐃᑦᓯᒐᓱᐊᕐᓂᒧᑦ ᐅᖃᐅᓯᓕᕆᔩᑦ ᐱᔪᓐᓇᓯᑎᑦᓯᔨᖏᓐᓂᒃ, ᐊᒻᒪᓗ $250,000-ᓂᒃ ᐊᑦᔨᒋᖏᑐᓄᑦ ᐱᓇᓱᐊᕐᑕᐅᓂᐊᕐᑐᓄᑦ.

ᑕᕐᕋᒥᐅᑦ ᓂᐱᖓᑦ – ᓄᓇᕕᒻᒥᐅᑦ ᓈᓚᐅᑎᖃᕐᑎᓯᔨᖏᑦ – ᐱᑎᑕᐅᓂᐊᕐᑐᑦ $439,546-ᓂᒃ ᑮᓇᐅᔭᖃᕐᑎᑕᐅᒋᐊᓪᓚᕈᑎᑦᓴᖏᓐᓄᑦ ᐊᒻᒪᓗ $230,000-ᓂᒃ ᐃᑲᔪᕐᓯᒍᑎᐅᓂᐊᕐᑐᓂᒃ ᓴᓇᒋᐊᕐᓂᒍᑎᑦᓴᒧᑦ ᓴᓪᓗᓂ ᓈᓚᐅᑎᖃᐅᑎᖓᑕ ᐃᓪᓗᖓᓂᒃ ᐊᒻᒪᓗ ᖃᕆᑕᐅᔭᕐᑖᕈᑎᑦᓴᖏᓐᓄᑦ.

ᐊᓯᖏᑦ ᑎᒥᐅᔪᐃᑦ ᑮᓇᐅᔭᖃᕐᑎᑕᐅᓂᐊᕐᒥᔪᑦ ᐃᓚᖃᕐᑐᑦ ᓄᓇᕕᒻᒥ ᓂᐅᕐᕈᑕᕐᓂᓕᕆᓂᕐᒧᑦ ᑲᑐᑦᔨᖃᑎᒌᓐᓂᖓᑦ ᐱᑎᑕᐅᓂᐊᕐᑎᓗᒍ $125,000-ᓂᒃ. ᓄᓇᕕᒻᒥ ᓯᕗᓂᑦᓴᕗᑦ ᐱᑎᑕᐅᓂᐊᕐᑐᑦ $80,000-ᓂᒃ (ᑲᑎᕕᒃ ᐃᓕᓐᓂᐊᓂᓕᕆᕕᖓᑎᒍᑦ). ᓄᓇᕕᒻᒥ ᐅᔭᕋᓐᓂᐊᑎᐊᐲᑦ ᐱᑎᑕᐅᓂᐊᕐᑐᑦ $30,000-ᓂᒃ. ᓄᓇᕕᒻᒥ ᐊᖑᕕᒐᒻᒪᕆᒃᑯᑦ ᐊᒻᒪᓗ ᖃᕐᔪᐃᑦ ᐅᕕᒃᑫᑦ ᑲᑐᑦᔨᖃᑎᒌᓐᓂᑯᖏᑦ ᐊᑐᓂᑦ ᐱᑎᑕᐅᓂᐊᕐᑎᓗᒋᑦ $439,546-ᓂᒃ. ᓄᓇᒥᒃ ᑎᒍᒥᐊᕐᑎᑯᑦ ᐊᒻᒪᓗ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᑯᖏᑦ ᐱᑎᑕᐅᓂᐊᕐᑐᑦ $2.2 ᒥᓕᐊᓐᑖᓚᓂᒃ.

ᓄᓇᓕᓐᓄᑦ ᐊᒡᒍᑐᕐᑕᐅᔪᓄᑦ ᓴᓇᕐᕈᑎᒃᑯᑦ ᐊᑖᒍᑦ

$2 ᒥᓕᐊᓐᑖᓚᓂᒃ ᐱᑎᑕᐅᔪᖃᕐᓂᐊᑐᖅ ᓯᑕᒪᓂᒃ ᓄᓇᓕᓐᓂᒃ ᐃᓱᐊᖁᑎᑦᓭᑦ ᐱᓇᓱᐊᕐᑕᐅᓂᖏᓐᓄᑦ ($500,000ᔨᓂᒃ ᐊᑐᓂᑦ).

ᓄᑖᒥᒃ ᐱᒋᐊᕐᑎᑕᐅᔪᒥᒃ ᑮᓇᐅᔭᖃᕐᑎᑕᐅᓚᖓᔪᒥᒃ 2017-2018-ᒥ ᐃᓕᖓᔪᑦ ᐃᓱᐊᕐᓯᕕᒃ ᒪᒥᓭᕕᖓᓄᑦ ᑰᔾᔪᐊᒥ $1 ᒥᓕᐊᓐᑖᓚᓂᒃ ($500,000-ᓂᒃ ᐊᕐᕌᒍᑕᒫᑦ ᒪᕐᕉᓂᒃ ᐊᕐᕌᒍᕐᓂᒃ) ᓴᓇᒍᑎᑦᓴᒧᑦ ᓄᑖᒥᒃ ᒪᒥᓭᕕᑦᓴᒥᒃ. “ᑕᒪᓐᓇ ᐱᓇᓱᐊᕐᑕᐅᓚᕆᒋᐊᖃᕐᒪᑕ ᓄᓇᕕᐅᑉ ᓄᓇᖓᓂᒥᐅᓕᒫᓄᑦ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ. “ᓴᐳᒻᒥᔪᒍᑦ ᐃᓱᐊᕐᓯᕕᐅᑉ ᑲᑎᒪᔨᖏᓐᓂᒃ ᑮᓇᐅᔭᓂᒃ ᓄᐃᑦᓯᒐᓱᐊᕐᑎᓗᒋᑦ ᑕᒪᒃᑯᓇᖕᖓᑦ ᑲᕙᒪᒃᑯᓂᑦ ᓴᓇᒍᑎᑦᓴᒧᑦ ᐊᖏᓂᕐᓴᒥᒃ ᓇᒻᒪᓂᕐᓴᒥᓗ ᒪᒥᓭᕕᒻᒥᒃ, ᐃᓚᒋᔭᐅᓂᐊᕐᑐᓄᑦ ᒪᑭᕝᕕᑯᑦ ᑐᓂᕐᕈᑎᖏᓐᓄᑦ.”

ᐅᓂᒃᑳᑕᐅᓚᐅᕐᑐᐃᑦ ᑲᔪᓯᑦᓯᐊᑐᒻᒪᕆᐅᓚᐅᕐᑎᓗᒋᑦ ᐅᑯᐊ “ᓇᐸᒍᓐᓇᖁᓪᓗᓯ” $250,000-ᓂᒃ ᐊᖏᕐᑕᐅᔪᖃᓚᐅᔪᕗᖅ ᒪᕐᕉᓂᒃ ᑕᕐᕋᓕᔮᓕᐅᕐᓂᑯᑦ ᐅᓂᒃᑳᓕᐅᕈᑎᑦᓴᒧᑦ 30 ᒥᓇᑦᓯᓂᒃ ᑕᑭᓂᓕᓐᓂᒃ, ᐃᓚᒋᔭᐅᓂᐊᕐᑐᓂᒃ 8-ᖑᓈᕐᑎᑐᓄᑦ ᐅᓂᒃᑳᓕᐊᖑᓂᐊᕐᑐᓄᑦ.

ᒪᑭᕝᕕᑯᑦ ᑐᓂᕐᕈᑎᖃᓚᖓᒻᒥᔪᑦ $500,000-ᓂᒃ ᖃᓄᐃᓕᕐᐱᑖ ᖃᐅᔨᓴᕐᑕᐅᓂᖓᓄᑦ, ᑖᒃᑯᐊ $200,000 ᐊᒡᒍᑕᐅᓂᐊᕐᑎᓗᒋᑦ ᑕᒡᒍᖓ ᐊᕐᕌᒍᕐᒧᑦ.

ᐊᕐᕌᒍᑕᒫᑦ ᐃᕙᒃᑲᒃ ᕿᒧᑦᓯᑯᑦ ᓱᑲᓕᐅᑎᑎᑦᓯᓂᖅ ᐱᑎᑕᐅᓂᐊᕐᑐᑦ $479,800-ᓂᒃ ᐊᒻᒪᓗ ᒪᑭᕝᕕᑯᑦ ᑖᒃᓯᓴᔭᓕᕆᐅᑎᒋᓲᖏᑦ ᐃᑲᔪᕐᓯᒍᑎᐅᓲᖑᒻᒪᑕ 6,000-ᓂᒃ ᓄᓇᕕᒻᒥᐅᓂᒃ ᐊᑐᐃᓐᓇᕈᕐᑎᓯᒍᑎᖏᓐᓄᑦ ᑖᒃᓯᓴᔭᓕᕆᐅᑎᓂᒃ, ᐱᑎᑕᐅᓂᐊᕐᑐᑦ $629,106-ᓂᒃ.

ᑭᖑᓪᓕᐸᐅᑎᓗᒍ, ᒪᙯᑦᑏᑦ ᐱᑎᑕᐅᓂᐊᕐᑐᑦ $1.2 ᒥᓕᐊᓐᑖᓚᓂᒃ ᑕᒪᑦᓱᒧᖓ “ᒥᕐᖁᓕᓐᓂᒃ ᑎᒍᓚᒍᑎᓄᑦ, ᓄᓇᓕᓐᓂ ᐊᓐᓄᕌᓕᐅᕐᓂᓄᑦ, ᐊᒻᒪᓗ ᐱᕕᖃᕈᓐᓇᓂᕐᒧᑦ” ᑮᓇᐅᔭᖃᕐᑎᑕᐅᓂᐊᕐᑐᓂᒃ ᒪᙯᑦᑎᓂᒃ ᓴᐳᒻᒥᔨᒃᑯᓄᑦ, ᑲᒪᒋᔭᐅᓲᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ.

“ᐊᑕᐅᑦᓯᑯᑦ, ᐱᖓᓱᓂᒃ ᕿᑎᕐᖃᓂᓪᓗ ᐅᓪᓗᓂᒃ ᐅᖄᖃᑎᒌᓚᐅᕐᑎᓗᑕ ᐊᑦᔨᒋᖏᑐᓂᒃ ᐱᑦᔪᑕᐅᔪᓂᒃ, ᒪᑭᕝᕕᐅᑉ ᑲᑎᒪᔨᖏᑦ, ᐊᐅᓚᑦᓯᔨᒻᒪᕆᖏᑦ ᐊᒻᒪᓗ ᒪᑭᕝᕕᐅᑉ ᐳᕐᑐᓂᕐᓴᖏᑦ ᑮᓇᐅᔭᖃᕐᑎᓯᒍᑎᓄᑦ ᑐᑭᑖᕆᖃᑦᑕᓯᒪᓕᕐᑐᑦ ᐱᕙᓪᓕᖁᑎᑦᓴᐅᓂᐊᕐᑐᓄᑦ ᓄᓇᕕᓕᒫᒧᑦ,” ᑌᒣᓕᑦᓱᓂ ᐅᖃᓚᐅᕐᑐᖅ ᒪᑭᕝᕕᐅᑉ ᑮᓇᐅᔭᓕᕆᔨᒻᒪᕆᖓᑦ, ᐋᓐᑎ ᐲᕐᑎ. “ᑕᒪᒃᑯᓄᖓ ᑐᑭᑖᖃᑎᒌᑦᓯᒪᕗᒍᑦ, ᐊᒻᒪᓗ ᓇᑯᕐᓴᓱᑕ ᑐᓴᕐᑎᓯᒋᐊᒥᒃ $16.8 ᒥᓕᐊᓐᑖᓚᓂᒃ ᑐᓂᕐᕈᑕᐅᔪᖃᕐᓂᐊᓕᕐᒪᑦ ᐃᓄᐃᑦ ᓄᓇᓕᖁᑎᖏᓐᓄᑦ ᐊᑦᔨᒋᖏᑐᓂᒃ ᐱᒋᐊᕐᑎᓯᒍᑎᐅᓂᐊᕐᑐᓄᑦ.”

-30-

ᐅᖄᖃᑎᑦᓴᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓕᕆᔨᖓᑦ ᐊᒻᒪᓗ ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org

ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᑦᓱᓂ ᑲᒪᒋᐊᖃᕆᐊᒥᒃ ᐊᑭᓕᕐᑕᐅᒪᒍᑎᓂᒃ ᐃᓄᓐᓂᒃ ᓄᓇᕕᒻᒥᐅᓂᒃ ᐱᑕᖃᕐᑎᑕᐅᓯᒪᔪᓂᒃ ᐊᑖᒍᑦ ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐱᓇᓱᐊᕆᐊᓕᖏᑦ ᐃᓚᖃᕐᒪᑕ ᐊᐅᓚᑦᓯᓂᓕᕆᐅᑎᖃᕆᐊᖃᕐᓂᒥᒃ ᑮᓇᐅᔦᕈᑎᖃᕐᓗᑎᓪᓗ ᑕᒪᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑕᒐᓱᐊᕐᓂᓕᕆᓂᒃᑯᑦ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑕᐅᔪᖃᕋᓱᐊᕐᑎᓗᒍ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᓪᓗ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᕐᒥᒃ, ᑲᒪᑦᓯᐊᕆᐊᖃᕐᓂᒥᒃ, ᐊᑦᓱᔫᑦᑌᓕᒪᓂᕐᒥᒃ, ᐊᒻᒪᓗ ᐃᓕᓐᓂᐊᓂᓕᕆᓂᖏᓐᓂᒃ ᐃᓄᐃᑦ ᓄᓇᓕᓐᓃᑐᑦ.

ᒪᑭᕝᕕᑯᑦ ᑐᓴᕐᑎᓯᔪᑦ $16.8 ᒥᓕᐊᓐᑖᓚᓂᒃ ᓄᓇᕕᒻᒥ ᐱᒋᐊᕐᑎᑕᐅᓂᐊᕐᑐᓄᑦ 2017-2018 ᐊᕐᕌᒍᖓᓅᓕᖓᔪᓂᒃ