ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᒋᓯᒪᔭᖏᓐᓅᓕᖓᑦᓱᑎᒃ ᐊᐱᕐᓱᕈᑎᐅᖏᓐᓇᓕᒪᓲᑦ

ᐊᐱᕆᒍᑎ 1: ᐱᔪᓐᓇᐅᑎᖃᖏᓐᓈᖁᖔ ᐊᑐᕆᐊᒥᒃ ᐱᔪᓐᓇᐅᑎᑖᕆᓯᒪᔭᒃᑲᓂᒃ ᐱᑎᑕᐅᖃᑦᑕᖏᓐᓇᓂᐊᕐᐳᖓᓘ ᐱᕙᓪᓕᖁᑎᓂᒃ ᐱᒍᓇᓯᓯᒪᔭᒃᑲᓂᒃ ᐊᕐᖁᑎᒋᑦᓱᒍ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ ᓄᓇᓯᒪᓯᒪᓕᕋᓗᐊᕈᒪ ᓄᓇᖁᑎᑦᑕ ᓯᓚᑖᓂᑦ ᐊᕐᕌᒍᑦ ᖁᓕᑦ/ᑕᓪᓕᒪᐅᔪᕐᑐᑦ ᐅᖓᑖᓄᑦ, ᑐᖕᖓᕕᖃᖕᖏᑲᓗᐊᕈᒪ ᐱᖓᓱᓂᒃ ᑐᖕᖓᕕᐅᔪᓐᓇᑎᑕᐅᔪᓂᒃ ᐱᒍᓐᓇᓂᐊᕈᑦᑕ ᐱᕙᓪᓕᖁᑎᓂᒃ (ᐅᑯᓂᖓ ᐊᐅᓪᓚᓯᒪᒍᑎᖃᖕᖏᓗᖓ ᐃᓕᓐᓂᐊᕆᐊᕐᓯᒪᓂᖅ – ᐃᓗᓯᖃᑦᓯᐊᓂᑦᓴᓅᓕᖓᔪᑦ – ᐱᓇᓱᒐᖃᕐᓂᑯᒧᓪᓗᓃᑦ ᐃᓄᑐᐃᓐᓀᑦ ᐱᓇᓱᒐᖃᕐᕕᖁᑖᓐᓂ)?

ᑭᐅᔭᐅᑦᔪᑎᖏᑦ 1: ᐊᐅᑲ, ᐃᓄᑐᐃᓐᓇᖅ ᐱᕙᓪᓕᖁᑎᑖᕐᑕᑐᖅ, ᓄᓇᓯᒪᓲᑐᖃᐅᑦᓱᓂ ᓯᓚᑖᓂ ᓄᓇᖁᑕᐅᔫᑉ ᐊᐅᓪᓚᕕᒋᓚᐅᕐᑕᕕᓂᕆᓗᓂᐅᒃ ᐊᕐᕌᒍᑦ ᖁᓕᑦ/ᑕᓪᓕᒪᐅᔪᕐᑐᑦ ᐅᖓᑖᓂᑦᑐᑦ ᐊᓂᒍᕐᑎᓗᒋᑦ ᐱᔪᓐᓇᐅᑎᒥᓂᒃ ᓴᒃᑯᓯᓯᒪᕗᖅ ᐅᕝᕙᓗᓐᓃᓗ ᐱᑎᑕᐅᑦᔪᑎᖃᕈᓐᓇᖏᓪᓚᖅ ᐱᕙᓪᓕᖁᑎᓂᑦ ᐱᔭᐅᑎᑕᐅᕙᑦᑐᓂᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑎᒍᑦ. ᐃᓄᒃ ᑲᔪᓯᔪᒥᒃ ᑖᒃᑯᓇᖕᖓᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ ᐱᕙᓪᓕᖁᑎᑖᕐᑕᖏᓐᓇᕋᓗᐊᕐᓗᓂ ᑭᓯᐊᓂ ᐊᑎᖓ ᓄᑦᑎᑕᐅᓲᖅ ᐊᓪᓚᖁᑕᐅᔪᓄᑦ ᑐᖕᖓᕕᓕᓐᓄᑦ ᓄᓇᖁᑕᐅᔫᑉ ᓯᓚᑖᓂ ᓄᓇᓯᒪᓕᕐᓱᑎᒃ ᐊᕐᕌᒍᓂ ᖁᓕᓂ/ᑕᓪᓕᒪᐅᔪᕐᑐᓂ ᑐᖓᓕᕇᓂ ᐊᕐᕌᒍᕐᓂ ᐅᕝᕙᓗᓐᓃᑦ ᑖᒃᑯᐊ ᐊᕐᕌᒍᐃᑦ ᐅᖓᑖᓄᑦ, ᐃᓛᓐᓂᑦ ᑖᒃᑯᐊ ᐊᓪᓚᖁᑏᑦ ᖃᐅᑦᔨᑕᐅᒍᑎᖏᑦ ᐅᖃᕐᑕᐅᓲᖑᒻᒥᔪᑦ “ᐱᕙᓪᓕᖁᑎᑖᕐᑕᓯᒪᔪᑦ ᐊᓪᓚᖁᑎᖏᑦ ᐃᖏᕐᕋᑎᑕᐅᒍᓐᓀᑐᑦ”.

ᐃᓅᑉ ᐱᔪᓐᓇᐅᑎᖏᑦ ᐱᑎᑕᐅᑦᔪᑎᒋᓲᖏᓪᓗ ᑐᖕᖓᕕᐅᑎᓪᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ ᕿᑲᕐᑎᑕᐅᓲᖑᕗᑦ ᐅᑎᕆᐊᖕᖏᓂᓕᒫᖓᓂ ᓄᓇᓯᒪᒋᐊᓪᓚᓂᕐᒧᑦ ᐊᖏᖃᑎᒌᒍᑕᐅᒪᔪᒧᑦ ᓄᓇᒧᑦ. ᑌᒣᓕᖓᓕᕐᐸᑦ ᐊᑐᕐᑕᐅᒋᐊᖃᕐᐳᖅ Re-establishment of Residence in Nunavik Application Form (Form D) ᐃᓂᓪᓚᒋᐊᓕᕐᕿᓂᖅ ᓄᓇᓯᒪᒍᑎᑎᒍᑦ ᓄᓇᕕᒻᒧᑦ ᐱᒐᓱᒍᑎᐅᑦᓱᓂ ᐊᓪᓚᓯᒪᔪᖕᖑᐃᕕᑦᓴᔭ (Form D) ᐊᑐᕐᓗᒍ ᐊᐅᓪᓚᑎᑕᐅᒋᐊᖃᕐᐳᑦ ᓄᓇᓖᑦ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᖏᓐᓄᑦ ᓄᓇᓕᒻᒥ ᐱᑐᑦᓯᒪᕕᐅᑦᓱᓂ ᑐᑭᑖᕈᑎᖃᕆᐊᖃᓕᕐᑐᒥᒃ ᐊᑕᓐᓂᐅᕈᑎᓂᒃ.

ᐊᐱᕆᒍᑎ 2: ᑕᒐᓖ ᐃᓄᑐᐃᓐᓇᐅᓗᖓ ᐱᕙᓪᓕᖁᑎᑖᕐᑕᓗᖓ, ᐊᓯᖏᓐᓄᑦ ᓄᓇᑖᕐᓯᒪᒻᒥᔪᓄᑦ ᑲᓇᑕᒥ ᐃᓚᐅᖃᑕᐅᒍᓐᓇᕆᕗᖓ?

ᑭᐅᔭᐅᑦᔪᑎᖏᑦ 2: ᐊᐅᑲ. ᐃᓄᒃ ᐱᔪᓐᓇᐅᑎᓕᒃ ᐊᓪᓚᑕᐅᒪᖃᑕᐅᓂᕐᒥᒃ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ ᐊᓪᓚᑕᐅᒪᖃᑕᐅᒋᐊᓪᓚᒍᓐᓇᖏᓪᓚᖅ ᐊᓯᓄᑦ ᐱᕙᓪᓕᖁᑎᑖᕐᑕᐅᑎᓄᑦ ᑲᓇᑕᒥᐅᑦ ᓄᓇᓕᑐᖃᖏᑕ ᓄᓇᑖᕐᓯᒪᓂᕐᒧᑦ ᐊᖏᖃᑎᒌᒍᑎᖏᓐᓂᑦ ᐅᕝᕙᓘᓐᓃᑦ ᐊᖏᖃᑎᒌᒍᑎᐅᒪᒻᒥᔪᓂᑦ ᓱᕐᖁᐃᑐᒥᒃ ᖃᐅᔨᒪᔭᐅᖕᖏᑐᐊᕈᓂ ᑌᒃᑯᓇᖕᖓᑦ ᐱᕙᓪᓕᖁᑎᑖᕐᑕᕕᒋᓲᒥᓂᑦ ᐃᓚᐅᔫᒍᓐᓀᓯᒪᓕᕆᐊᖓ.

ᑌᒣᓕᖓᒍᓐᓇᕕᑐᐊᓕᒃ ᐊᖏᖃᑎᒌᒍᑕᐅᒪᔪᑦ ᐃᓕᖓᑐᐊᕐᐸᑕ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᔪᓐᓇᐅᑎᖃᕐᑎᑕᐅᒍᑎᖏᓐᓄᑦ ᐊᖏᖃᑎᒌᒍᑎᐅᓯᒪᔪᓄᑦ ᐃᓕᖓᑦᓱᑎᒃ ᓄᓇᕕᐅᑉ ᐃᒪᕐᐱᒥᓂ ᓄᓇᖁᑎᖏᓐᓄᑦ ᑯᐯᒃ ᐊᕙᑖᓂ ᐅᕝᕙᓗᓐᓃᑦ ᓛᐸᑐᐊᒥ ᓛᐸᑐᐊᓪᓗ ᐃᒪᕐᐱᖓᑕ ᓄᓇᖁᑎᖏᓐᓂ.

ᐊᐱᕆᒍᑎ 3: ᐊᑕᐅᓯᑐᐃᓐᓇᐅᖏᑦᑐᒦᒃ ᐃᓄᑐᐃᓐᓀᑦ ᓄᓇᓕᖓᓐᓂᒃ ᐱᑐᑦᓯᒪᖃᑕᐅᕕᖃᕈᓐᓇᖁᖓ?

ᑭᐅᔭᐅᑦᔪᑎᖏᑦ 3: ᐊᐅᑲ. ᐱᕙᓪᓕᖁᑎᑖᕐᑕᑐᖅ ᐱᑐᑦᓯᒪᕕᖃᕈᓐᓇᖏᓪᓚᖅ ᐊᑕᐅᓯᐅᖕᖏᑐᒥᒃ ᐃᓄᑐᐃᓐᓀᑦ ᓄᓇᓕᖓᓐᓂᒃ. ᑌᒣᓕᖓᒐᓗᐊᕐᑎᓗᒋᑦ, ᐱᕙᓪᓕᖁᑎᑖᕐᑕᑐᖅ ᐱᒐᓱᒍᑎᖃᕈᓐᓇᖁᖅ ᑐᓂᔨᓗᓂ ᓄᓇᓕᐅᑉ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᖏᓐᓄᑦ ᐃᓄᑐᐃᓐᓀᑦ ᓄᓇᓕᖓᓂ ᓄᓇᓕᒻᒥ ᐊᓯᐊᓂ ᐊᖏᕐᑕᐅᒍᑎᑖᕐᕕᒋᓗᒍᓗ ᐱᑐᑦᓯᒪᕕᖃᖔᕈᒪᓕᕈᓂ ᐊᓯᐊᓂᒃ ᓄᓇᓕᒻᒥᒃ.

ᐊᐱᕆᒍᑎ 4: ᐱᕙᓪᓕᖁᑎᑖᕐᑕᑑᑉ ᖃᓄᐃᓕᖓᔪᒦᓐᓂᖓ ᐃᓚᐅᔫᖃᑕᐅᓂᕐᒥᒍᑦ ᐊᓪᓚᑕᐅᓯᒪᔪᕕᓂᐅᑦᓱᓂ ᒣ 1, 2006 ᓯᕗᓂᖓᓂ, ᐃᓚᐅᔫᖃᑕᐅᓂᕋᕐᑕᐅᓱᓂ ᐅᕝᕙᓗᓐᓃᑦ ᐃᓚᐅᔫᖃᑕᐅᒍᓐᓇᓯᒐᓱᒍᓐᓇᓂᕋᕐᑕᐅᓱᓂ ᐃᓄᑐᐃᓐᓇᒥᒃ ᑲᑎᑎᑕᐅᖃᑎᖃᕐᓂᑯᑦ ᕿᒥᕐᕈᔭᐅᔪᓐᓇᕈᓇᑦᓴᕆᕙ ᓄᓇᓕᓐᓂ ᐃᓚᐅᔪᓕᕆᓂᕐᓂᒃ ᑲᑎᒪᔨᒃᑯᓄᑦ ᑕᒐᑕᒐ ᒪᓕᒐᖃᕐᑎᓯᒍᑎᓕᐊᖑᓯᒪᔪᑦ ᑐᖕᖓᕕᐅᑎᓪᓗᒋᑦ?

ᑭᐅᔭᐅᑦᔪᑎᖏᑦ 4: ᐋ, ᐃᓄᒃ ᓱᕐᖁᐃᑕᐅᒪᑦᓯᐊᓗᓂ ᐱᑐᑦᓯᒪᒍᑎᑦᓴᖃᕈᓐᓀᓯᒪᓂᕋᕐᑕᐅᒍᓐᓇᓕᕈᓂ ᐃᓄᑐᐃᓐᓀᑦ ᓄᓇᓕᖓᓐᓄᑦ, ᑐᖕᖓᕕᐅᑎᓪᓗᒋᑦ ᑲᑎᑎᑕᐅᓯᒪᖃᑎᒥᓂᒃ ᐊᕕᑦᓯᓂᖓ, ᐱᖁᔭᑎᒍᑦ ᐃᓕᑕᕆᔭᐅᔪᒥᒃ ᑲᑎᒪᑦᓯᒍᓀᓯᒪᓕᕐᓂᖓ, ᑲᑎᒪᒍᓐᓀᓯᒪᓕᕆᐊᖓᓗ ᑐᓴᐅᒪᔭᐅᓕᕐᑑᒃ ᐅᕝᕙᓗᓐᓃᑦ ᐃᓅᑉ ᑲᑎᑎᑕᐅᓯᒪᖃᑎᖓ ᐃᓅᒍᓐᓀᓂᕐᐸᑦ ᐊᑑᑎᔪᕕᓂᕐᓂᒃ ᒣ 1, 2006-ᒥ ᑭᖑᓂᐊᓂᓘᓐᓂᑦ ᑖᑦᓱᒪ ᐅᓪᓗᖓᑕ.

ᑌᒣᓕᖓᓕᑐᐊᕐᒪᑦ, ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᑦ ᐱᔭᑦᓴᖁᑎᖃᓯᓲᖑᕗᑦ ᑐᑭᑖᕆᓂᕐᒥᒃ, ᐃᓕᒃᑯᑦ ᐊᐅᓚᑦᓱᒍ ᐅᕝᕙᓗᓐᓃᑦ ᐱᕙᓪᓕᖁᑎᑖᕐᑕᑐᒧᑦ ᐊᑕᓐᓂᐅᕈᑕᐅᑉᐸᑦ, ᑐᑭᑖᕈᑎᖃᕐᓗᑎᒃ, ᐊᕕᑕᐅᓂᑰᓕᕐᑑᑉ ᐃᓅᑉ ᖃᓄᐃᓕᖓᒋᐊᖃᓕᕐᓂᖓᓂᒃ ᑐᖕᖓᕕᐅᑎᓪᓗᒋᑦ ᒪᓕᒐᖃᕐᑎᓯᒍᑎᑖᖑᕐᖃᒦᑦ

ᐊᐱᕆᒍᑎ 5: ᒪᓕᒐᖃᕐᑎᓯᒍᑎᑖᖑᕐᖃᒦᑦ ᐊᓯᑦᔨᑕᐅᒋᐊᕐᓯᒪᓕᕐᖃᑦ ᐃᓕᖓᔪᑦ ᐃᓄᑐᐃᓐᓇᐅᑉ ᐱᕙᓪᓕᖁᑎᑖᕐᑕᓂᖏᑦ ᑲᑎᑎᐅᖃᑎᖃᕐᓯᒪᓂᑯᒥᓄᑦ ᐃᓄᑐᐃᓐᓇᐅᖃᑎᒥᓂᒃ ᐋᕐᕿᒋᐊᕐᑕᐅᒪᓕᕐᖃᑦ ᑐᖕᖓᕕᖃᕐᓱᑎᒃ ᓄᑖᓂᒃ ᒪᓕᒐᖃᕐᑎᓯᒍᑎᑖᕐᖃᒥᐅᔪᓂᒃ?

ᑭᐅᔭᐅᑦᔪᑎᖏᑦ 5: ᒪᓕᒐᕐᑖᖃᒻᒦᑦ ᓱᕐᕃᓂᖃᖕᖏᑐᑦ ᐱᔪᓐᓇᐅᑎᑕᖑᒌᕐᓯᒪᔪᓂᒃ ᐊᕐᖁᑕᐅᑎᓪᓗᒋᑦ ᒪᓕᒐᕐᖄᕕᓃᑦ.

ᑌᒃᑯᑎᒎᓇ ᓄᑕᐅᖕᖏᑐᑎᒍᑦ ᒪᓕᒐᖃᕐᑎᓯᒍᑎᐅᕐᖄᑐᕕᓂᑎᒍᑦ ᐱᕕᖃᕈᓐᓇᓯᐊᖃᑦᑕᓚᐅᔪᑦ ᐃᓚᐅᔪᖕᖑᓂᕐᒥᒃ ᑲᑎᑎᑕᐅᖃᑎᖃᑐᐊᕋᒥᒃ ᐃᓄᑐᐃᓐᓇᒥᒃ ᐱᕙᓪᓕᖁᑎᑖᕐᑕᑐᑦᓴᔭᒥᒃ. ᒪᓕᒐᖃᕐᑎᓯᒍᑏᑦ ᓄᑕᐅᓯᓕᒋᐊᓚᐅᕐᑎᓗᒋᑦ ᓄᑖᓂᒃ ᒪᓕᒐᖃᕐᑎᓯᒍᑎᐅᓕᕐᑐᓂᒃ ᑐᖕᖓᕕᖃᓕᕐᓱᑎᒃ (ᒣ 1, 2006-ᖑᓕᓚᐅᔪᒻᒪᓂᑦ), ᐃᓄᒃ ᑲᑎᑎᑕᐅᖃᑎᓕᒃ ᐃᓄᑐᐃᓐᓇᒥᒃ ᐱᕙᓪᓕᖁᑎᑖᕐᑕᑐᒥᒃ ᑕᕝᕓᓇᖅ ᐃᓚᐅᔪᖕᖑᓲᖑᒍᓐᓀᐳᖅ ᐱᕙᓪᓕᖁᑎᑖᕐᑕᒌᓱᖑᒍᓐᓀᑐᑦ.

ᒣ 1, 2006 ᐅᓪᓗᖓᓂᒃ ᐱᒋᐊᕐᕕᓕᐅᑎᓗᑎᒃ ᐃᓄᓕᒫᑦ ᐊᓪᓚᓯᒪᔪᖕᖑᐃᒍᑎᖃᖃᑦᑕᕆᐊᖃᓕᕐᐳᑦ ᑐᓂᓗᒋᓪᓗ ᐅᑯᐊ Enrolment Nunavik Inuit Beneficiary (Adult) Application Form (Form A) ᓄᓇᓕᒻᒥ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᓄᑦ ᑐᓂᓗᒍ ᐊᑕᓐᓂᐅᕈᑏᑦ ᐃᓚᐅᔪᖕᖑᕈᒪᓗᑎᑦ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ.

ᐊᐱᕆᒍᑎ 6: ᑭᓇᒃᑯᕚᑦ ᐃᓚᐅᔪᑦ ᓄᓇᓕᓐᓂ ᐃᓚᐅᔪᖕᖑᓂᕐᒥᒃ ᑲᑎᖕᖓᔨᐅᒍᑎᓕᓐᓄᑦ?

ᑭᐅᔭᐅᑦᔪᑎᖏᑦ 6: ᓄᓇᒥᒃ ᑎᒍᒥᐊᕐᑎᓕᓐᓂᒃ ᓄᓇᓕᓐᓂ ᒪᑭᑕᔪᓂᒃ ᑐᖕᖓᕕᖃᕐᓱᑎᒃ ᐱᖁᔭᓂᒃ ᓲᓱᒋᔭᓕᓐᓂᒃ ᓄᓀᑦ ᐱᖁᔭᖃᕐᑎᑕᐅᒍᑎᖏᓐᓂᒃ ᔦᒥᓯ ᐯᒥᓗ ᐊᒻᒪᓗ ᓄᑖᑉ ᑯᐯᒃ ᓄᓇᖁᑎᖏᓐᓂ:

ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔩᑦ ᐱᓯᒪᓲᖑᕗᑦ ᓄᓇᒥᒃ ᑎᒍᒥᐊᕐᑎᑯᑦ ᑲᑎᖕᖓᔨᖏᓐᓂᑦ ᐊᒻᒪᓗ ᐊᑕᐅᓯᖅ (1) ᐃᓄᑐᖃᖁᑕᐅᔪᖅ ᑎᓕᔭᐅᓯᒪᒍᑎᖃᕐᓱᓂ ᑐᑭᑖᕈᑎᑎᒍᑦ ᐊᓂᒎᑎᑎᑕᐅᒪᔪᒥᒃ ᓄᓇᒥᒃ ᑎᒍᒥᐊᕐᑎᑯᑦ ᑲᑎᒪᔨᖏᓐᓄᑦ, ᐊᕐᕌᒎᓐᓂ ᒪᕐᕉᓂ ᓄᑕᐅᓯᓕᕆᓐᓇᕕᖃᓛᕐᑑᓂ ᐊᑕᓂᐊᓕᕐᑎᓗᒍ; ᐊᒻᒪᓗ: ᐳᕕᕐᓂᑐᒥ (ᓄᓇᒥᒃ ᑎᒍᒥᐊᕐᑎᖃᖕᖏᑐᓂ) ᐃᓚᐅᔫᖃᑎᒌᑦᑐᖁᑎᖏᑦ ᐳᕕᕐᓂᑐᕐᒥᐅᑦ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᖏᑕ ᐃᒣᓕᖓᔪᑦ, ᐊᕐᖁᑎᖃᕐᓱᑎᒃ ᑐᑭᑖᕈᑎᓂᒃ ᐊᓂᒎᑎᑎᑕᖏᓐᓂᒃ ᐳᕕᕐᓂᑐᕐᒥᐅᑦ ᓄᓇᓕᖓᑕ ᑲᕙᒫᐱᖓᑕ, ᑲᕙᒫᐱᒃᑯᑦ ᑲᑎᖕᖓᔨᖏᑦ ᓂᕈᐊᕐᑕᐅᓯᒪᓂᕐᒦᑎᑕᐅᔪᑦ ᐱᔭᑦᓴᖁᑎᖃᕐᑎᑕᐅᒋᕗᑦ ᐃᓚᐅᔪᓕᕆᓂᕐᒥᒃ ᑲᑎᒪᔨᐅᕕᖃᕐᓂᓂᒃ.

ᐊᐱᕆᒍᑎ 7: ᖃᓄᐃᓘᕐᓗᖔ ᐃᓚᐅᔪᖕᖑᖃᑕᐅᔪᓐᓇᐳᖓ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᕕᖓᓐᓄᑦ?

ᑭᐅᔭᐅᑦᔪᑎᖏᑦ 7: ᐃᓚᐅᔪᖕᖑᓂᐊᕈᕕᑦ ᓄᓇᕕᒻᒥ ᐃᓄᑐᐃᓐᓀᒃ ᐱᕙᓪᓕᖁᑎᑖᕐᑕᕕᖓᓐᓄᑦ, ᐊᓪᓚᓯᒪᔪᖕᖑᐃᒍᑎᖃᕆᐊᖃᕐᐳᑎᑦ ᐊᑎᓕᐅᕐᕕᒋᓗᒍᓗ ᐊᓪᓚᓯᒪᔪᖕᖑᐃᕕᑦᓴᔭ ᖃᓪᓗᓈᑉᑎᑐᑦ ᐊᑦᓯᕋᐅᑎᓕᒃ ᐃᒫ Form A (Enrolment Nunavik Inuit Beneficiary (Adult) Application Form) ᐅᕝᕙᓘᓐᓃᑦ ᑲᒃᑲᓛᒍᒍᕕᑦ/ᐱᐊᕋᐅᒍᕕᑦ ᐆᒥᖓ ᐊᓪᓚᓯᒪᔪᖕᖑᐃᒍᑦᔭᐅᓗᑎᑦ, Form B (Enrolment Nunavik Inuit Beneficiary (Child) Application Form.

ᑖᒃᑯᐊ ᐃᓘᓐᓇᑎᒃ ᐱᔭᕇᑦᓯᐊᐸᑕ ᐊᑎᓕᐅᕐᕕᐅᒌᕐᓗᑎᒃᓗ, ᐊᐅᓪᓚᑎᒋᐊᖃᕐᓂᐊᓕᕋᕕᒋᑦ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᒃᑯᓄᑦ ᐱᑐᑦᓯᒪᕕᒋᒍᒪᓕᕐᑕᑎᓐᓄᑦ.

ᐃᕐᖃᐅᒪᑦᓯᐊᕆᑦ ᐃᓚᐅᑎᑦᓯᒋᐊᖃᕆᐊᕐᐱᑦ ᐃᓘᓐᓇᖏᓐᓂᒃ ᐱᔭᖃᕋᓱᒍᑎᑉᐱᑦ ᓴᐳᑦᔭᐅᒪᒍᑎᑕᖏᓐᓂᒃ (ᐃᓅᓕᕐᓯᒪᓂᕋᕐᑕᐅᒍᑎᓐᓂᒃ – ᑲᑎᑎᑕᐅᓯᒪᓂᕋᕐᑕᐅᒍᑎᓐᓂᒃ – ᑐᖁᓯᒪᓂᕋᕐᑕᐅᒍᑎᒥᒃ, ᐊᓯᖏᓐᓂᓗ).

ᐊᐱᕆᒍᑎ 8: ᖃᓄᐃᓘᕐᓗᖔ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐃᓚᐅᔫᓂᕐᒥᓄᑦ ᓯᒃᑭᑖᐱᖓᓐᓂᒃ ᐊᑦᔨᖑᐊᓕᒻᒥᒃ/ᐊᑦᔨᖁᑎᓕᒻᒥᒃ ᐱᔭᖃᕋᔭᕐᐳᖓ?

ᑭᐅᔭᐅᑦᔪᑎᖏᑦ 8: ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒃ ᐱᑎᑦᓯᒍᑎᖃᓲᖑᕗᖅ ᓄᓇᕕᒻᒥᐅᑦ ᐊᖏᖃᑎᒌᓐᓂᒥᑦ ᐱᕙᓪᓕᖁᑎᑖᕐᑕᑐᑦ ᓯᒃᑭᑖᐱᖏᓐᓂᒃ ᐊᑦᔨᖑᐊᓕᓐᓂᒃ/ᐊᐃᖁᑎᓕᓐᓂᒃ ᐱᔭᐅᑎᕙᑦᑕᒥᓐᓂᒃ ᐃᓄᑐᐃᓐᓇᓄᑦ ᐃᓚᐅᔫᖃᑕᐅᔪᓄᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᓯᒪᕕᖓᑎᒍᑦ.

ᐅᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᓪᓚᓯᒪᔪᖕᖑᐃᕕᐅᒋᐊᖃᕐᐳᖅ ᐱᔭᕇᑦᓯᐊᓗᒍ ᐊᐅᓪᓚᑎᓯᓗᒍᓗ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧᑦ ᑐᕌᕐᑎᓗᒍ: Form H: Nunavik Inuit Beneficiary Card with Photo Application Form (Adult) ᐊᒻᒪᓗ/ᐅᕝᕙᓘᓐᓃᑦ ᐅᓇᖔᖅ Form I: Nunavik Inuit Beneficiary Card with Photo Application Form (Child aged under 18 years old).

ᐊᐱᕆᒍᑎ 9: ᓈᒻᒪᓴᖕᖏᓚᖓ ᑐᑭᑖᕈᑎᐅᔪᕕᓂᕐᒥᒃ ᓄᓇᓕᓐᓂ ᐃᓚᐅᔪᓕᕆᓂᕐᒥᒃ ᑲᑎᒪᔨᒃᑯᓄᑦ ᐱᔪᒪᔭᖃᕐᐳᖓᓗ ᑭᐳᑦᑎᓯᒋᐊᕐᓂᒥᒃ. ᖃᓄᐃᓘᕐᓗᖔ ᑭᐳᑎᑦᓯᒋᐊᕈᓐᓇᖁᖓ?

ᑭᐅᔭᐅᑦᔪᑎᖏᑦ 9: ᓄᓇᕕᒻᒥ ᐃᓚᐅᔪᓕᕆᓂᕐᒥᒃ ᕿᒥᕐᕈᓂᕐᓄᑦ ᑲᑎᖕᖓᔨᐅᓚᖓᔪᑦ ᓴᕐᕿᑎᑕᐅᒍᑎᖃᕐᓯᒪᕗᑦ ᐱᓇᓱᑦᑕᖃᕐᓂᐊᑎᓪᓗᒋᑦ ᑐᑭᑖᕐᑐᐃᔨᐅᓂᕐᒥᒃ ᐃᓚᐅᔪᖕᖑᕋᓱᒍᑎᐅᑦᓱᑎᒃ ᐊᓪᓚᓯᒪᔪᖕᖑᐃᒍᑎᐅᒪᔪᓂᒃ ᕿᒥᕐᕈᔭᐅᒋᐊᖃᕐᓱᑎᒃ ᓈᒻᒪᒋᔭᐅᖕᖏᑐᐊᕈᑎᒃ ᑐᑭᑖᕐᑕᐅᒍᑎ[ᓕᖏᑦ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᓄᑦ.

ᐊᓪᓚᓯᒪᔪᖕᖑᐃᕕᑦᓴᔭ ᐊᑦᓯᕋᐅᑎᓕᒃ Request to Review a Decision Application Form (Form F-ᒥᒃ) ᑐᓂᔭᐅᒋᐊᖃᕐᓱᑎᒃ ᓄᓇᕕᒻᒥ ᐃᓚᐅᔪᓕᕆᓂᕐᒥᒃ ᐊᓪᓚᕕᒻᒧᑦ ᑕᕐᖀᖅ ᖁᓕᓪᓗ ᒪᕐᕈᓗ/ᑕᓪᓕᒪᐅᔪᕐᑐᓗ ᒪᕐᕈᓗ ᐊᓂᒍᓚᐅᕐᑎᓇᒋᑦ ᑌᑲᖕᖓᑦ ᐅᓪᓗᒥ ᑐᑭᑖᕐᕕᐅᔪᕕᓂᕐᒥᑦ ᐱᒋᐊᕐᕕᓕᐅᑎᕕᖃᕐᓗᑎᒃ.

ᓄᓇᕕᒻᒥ ᐃᓚᐅᔪᓕᕆᓂᕐᓂᒃ ᕿᒥᕐᕈᓂᕐᓄᑦ ᑲᑎᒪᔩᑦ ᑐᑭᑖᕈᑎᖏᑦ ᑌᒃᑰᓚᖓᓕᕐᑎᓗᒋᑦ ᑐᑭᑖᕈᑕᐅᓲᖑᕗᑦ ᓱᕐᕋᑕᐅᕐᖃᔦᕐᓗᑎᒃ. ᑐᑭᓯᒋᐊᒃᑲᓂᕈᒪᒍᑦᓯ, ᖃᕆᑕᐅᔭᑎᒍᑦ ᑕᑯᒋᐊᕈᓐᓇᐳᓯ ᐅᑯᓇᓂ Nunavik Enrolment Review Committee Guideline and Policies/ᓄᓇᕕᒻᒥ ᐃᓚᐅᔪᓕᕆᓂᕐᒧᑦ ᑲᑎᒪᔩᑦ ᕿᒥᕐᕈᓂᕐᓄᑦ ᒪᓕᒐᖃᕈᑎᖏᑦ ᐱᖁᔭᖃᕐᑎᑕᐅᒍᑎᖏᓪᓗ.

ᐊᐱᕆᒍᑎ 10: ᐃᓄᑐᐃᓐᓀᑦ ᐱᐅᓯᑐᖃᖏᑎᒍᑦ ᐱᓂᐊᕐᓂᖃᕐᓱᖓ ᑎᒍᐊᕐᑖᓚᐅᕐᖁᖓ ᐃᓚᐅᔪᖕᖑᖁᕙᕋᓗ ᐃᓄᑐᐃᓐᓇᑎᑐᑦ ᐱᕙᓪᓕᖁᑎᑖᕐᑕᑐᑎᑐᑦ. ᖃᓄᐃᓘᕐᓗᖔ ᑕᒪᓐᓇ ᐱᔭᕆᐊᓕᒐ?

ᑭᐅᔭᐅᑦᔪᑎᖏᑦ 10: ᐊᓪᓚᓯᒪᔪᖕᖑᑕᐅᑎᑦᓯᓂᖅ ᑎᒍᐊᕐᑖᒥᒃ ᐃᓚᐅᔪᖕᖑᓚᖓᓕᕐᑎᓗᒍ ᓄᓇᕕᒻᒥᐅᓄᑦ ᐃᓄᑐᐃᓐᓇᐅᓱᑎᒃ ᐱᕙᓪᓕᖁᑎᑖᕐᑕᑐᓄᑦ ᐃᒣᓘᕐᑕᐅᓂᖃᕆᐊᖃᕐᐳᖅ ᐊᓪᓚᓯᒪᔪᖕᖑᐃᕕᐅᑎᓪᓗᒍ Declaration of Inuit Customary Adoption (Form G)– ᐊᓪᓚᓯᒪᔪᖕᖑᐃᕕᑦᓴᖓ ᐊᓪᓚᓯᒪᔪᖕᖑᐃᕕᐅᓗᓂ ᐊᑎᓕᐅᕐᕕᐅᓗᓂᓗ ᕿᑐᕐᖓᑖᕐᑐᕕᓃᓐᓄᑦ, ᑎᒍᐊᕐᑑᓄᑦ, ᓄᓇᓕᐅᑉ ᓯᕗᓕᕐᑎᖓᓄᑦ (ᐅᕝᕙᓗᓐᓃᑦ ᐊᓪᓚᑎ-ᑮᓇᐅᔭᓕᕆᔨᒧᑦ) ᓄᓇᓖᑦ ᑲᕙᒫᐱᒃᑯᖏᑕ ᐊᓪᓚᕕᖓᓂ ᐊᒻᒪᓗ ᐊᖓᔪᕐᖄᖓᓄᑦ ᓄᓇᓕᐅᑉ ᐃᓄᑐᐃᓐᓇᑎᒍᑦ ᓄᓇᒥᒃ ᑎᒍᒥᐊᕐᑎᖏᑕ ᑭᒡᒐᑐᕐᓗᓂᒍ ᓄᓇᓕᒃ, ᐊᓪᓚᓯᒪᔪᖕᖑᑕᐅᖃᓯᐅᒻᒥᑎᓪᓗᒍ Enrolment Nunavik Inuit Beneficiary Application Form (Child under 18 years old) (Form B).-ᒥᒃ ᐊᑦᓯᕋᐅᑎᖃᕐᓱᓂ ᐊᓪᓚᓯᒪᔪᖕᖑᐃᕕᑦᓴᔭ.

ᐊᑎᓕᐅᕐᕕᖃᕆᐊᓕᓕᒫᓄᑦ ᐊᑎᓕᐅᕐᑕᐅᒌᕐᓯᒪᓕᕈᓂ, ᐊᓪᓚᓯᒪᔪᖕᖑᐃᒍᑎᑦᓴᔭ ᐊᑦᓯᕋᐅᑎᓕᒃ “Declaration of Inuit Customary Adoption Form”-ᒥᒃ ᐊᐅᓪᓚᑎᑕᐅᒋᐊᖃᓕᕋᔭᕐᖁᖅ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧᑦ ᑖᒃᑯᓄᖓ ᐊᐅᓪᓚᑎᑕᐅᓯᓂᐊᕐᒥᑎᓪᓗᒋᑦ ᑐᕌᕐᓗᑎᒃ ᑯᐯᒃᒥᐅᑦ ᐃᓄᖁᑎᒥᓂᒃ ᐊᓪᓚᓯᒪᔪᖕᖑᐃᒍᑎᖃᕐᓯᒪᕕᖓᑕ ᐊᓪᓚᕕᖓᓄᑦ. ᕿᑐᕐᖓᑕᖑᔫᑉ ᐊᑎᖓᓗ ᐊᑎᓕᕐᕿᖓᓗ ᑭᓇᐅᓂᕋᕐᑕᐅᒪᒍᑎᖏᑦ ᐋᕐᕿᒋᐊᕐᑕᐅᓚᐅᕐᓗᑎᒃ ᓲᕐᓗ ᐅᖃᒻᒪᕆᒍᑎᓂ ᐅᖃᕐᕕᒥ ᐋᕐᕿᒋᐊᕐᑕᐅᓂᖃᕐᓂᐊᓕᕐᒪᑦ ᐅᖃᒻᒪᕆᒍᑎᓂ ᐊᓪᓚᑕᐅᒪᔪᑦ ᑐᖕᖓᕕᐅᖔᓯᑎᓪᓗᒋᑦ.

ᐅᓇ ᐱᒻᒪᕆᐅᑦᓱᓂ ᖃᐅᔨᒪᔭᐅᑦᓯᐊᕆᐊᓕᒃ ᐃᓄᑐᐃᓐᓇᐅᖏᑦᑐᑦ (ᑦ) ᑎᒍᐊᕐᑖᕈᓐᓇᖏᓐᓂᖓᑦ ᐃᓄᑐᐃᓐᓇᓂᒃ ᐊᕐᖁᑎᖃᕐᓗᑎᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᐅᓯᑐᖃᕐᒥᒍᑦ ᑎᒍᐊᕐᑖᓂᖃᕐᓂᕆᓲᖓᓐᓂᒃ.

ᐊᐱᕆᒍᑎ 11: ᓄᓇᕕᐅᑉ ᓄᓇᖁᑎᖓᓂ ᓄᓇᓯᒪᔪᖓ ᑭᓯᐊᓂ ᑯᐯᒃ ᓄᓇᓕᕐᒪᖓᑕ ᓯᕿᓂᐊᓃᓕᕋᓄ, ᓄᑕᐅᓯᓕᑎᕆᒋᐊᖃᓕᓚᐅᔪᔪᖓ ᐋᓐᓂᐅᓯᐅᑎᑖᕐᑖᑲᓂᒃ ᓇᒻᒥᓂᕐᓗ ᐊᑭᓕᕆᐊᖃᓚᐅᔪᕙᒃᑲ. ᐊᑭᓖᑦᓴᓚᐅᔪᒐᒪ ᑕᒐ ᐊᑭᓖᒍᑎᕕᓂᒃᑲᓂᒃ ᐅᑎᕐᑎᓯᕕᐅᒍᓪᓇᕈᓇᑦᓴᖁᖓ?

ᑭᐅᔭᐅᑦᔪᑎᖏᑦ 11: ᐋ, ᐅᑎᕐᕕᐅᓂᐊᕈᕕᑦ, ᑐᓂᔨᒋᐊᖃᕐᐳᑎᑦ ᐊᑯᓂᕆᑎᑦᑌᓕᓗᒋᑦ ᐊᑭᓖᒍᑎᕕᓂᕐᓂᒃ ᐅᕗᖓ ᑐᕌᕈᑎᒧᑦ ᐊᐅᓪᓚᑎᓗᒋᑦ (Rights and Benefits under JBNQA (d)) (ᐱᔪᓐᓇᐅᑏᓪᓗ ᐱᕙᓪᓕᖁᑏᓪᓗ ᐱᔭᐅᓯᒪᔪᑦ ᑐᖕᖓᕕᐅᑎᓪᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ (d):

Non-Insured Health Benefits Nunavik

ᐃᒻᒪᖃᐅᑎᖃᖕᖏᑐᑦ ᐃᓗᓯᓕᕆᔭᐅᓂᕐᒧᑦ ᐱᕙᓪᓕᖁᑎᖏᑦ ᓄᓇᕕᒻᒥ
RRSS Nunavik RBHSS
P.O. Box 900
ᑰᒃᔪᐊᖅ, ᑯᐯᒃ.   J0M 1C0
ᐊᑭᓕᕇᕐᓯᒪᔪᖅ ᐅᖄᓚᐅᑎᖓ 1-866-686-7262
ᑰᒃᔪᐊᒥ 819-964-2222
ᓱᑲᑦᑐᑯᕐᑎᓯᒍᑎᖓ:  (514) 486-5527

ᐊᐱᕆᒍᑎ 12: ᐃᓚᐅᔫᖃᑕᐅᓂᕋᓂᒃ ᓴᒃᑯᓯᒍᒪᓕᕋᒪ ᑲᔪᓯᕕᒋᒍᒣᕋᒃᑯ ᑐᖕᖓᕕᒋᓗᒋᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᓯᒪᕕᐊᓐᓂ. ᖃᓄᐃᓘᕆᐊᖃᕐᐹᑦ?

ᑭᐅᔭᐅᑦᔪᑎᖏᑦ 12: ᐊᓪᓚᓯᒪᔪᖕᖑᐃᒍᑎᖃᕆᐊᖃᕐᖁᑎᑦ Form E Removal from Nunavik Inuit Beneficiaries Register Application Form-ᒥᒃ ᐊᐅᓪᓚᑎᓪᓗᒍᓗ ᓄᓇᓕᓐᓂ ᐃᓚᐅᔪᓕᕆᓂᕐᒥᒃ ᐊᓪᓚᕕᒻᒧᑦ.

ᐊᐱᕆᒍᑎ 13: ᐃᓚᐅᔪᖕᖑᕈᒪᑦᓱᖓ ᐊᓪᓚᓯᒪᔪᖕᖑᐃᒍᑎᒋᓚᐅᕐᑕᕋ ᐊᖏᕐᑕᐅᓚᐅᖕᖏᒪᑦ ᓄᓇᓕᓐᓂ ᐃᓚᐅᔪᓕᕆᓂᕐᒥᒃ ᑲᑎᒪᔨᓄᑦ, ᑌᒣᒃᑲᓗᐊᕐᐸᑖ ᐊᓯᖏᓐᓄᑦ ᓄᓇᓕᓐᓂ ᐃᓚᐅᔪᓕᕆᓂᕐᒥᒃ ᑲᑎᖕᖓᔨᓄᑦ ᐊᓪᓚᒍᓐᓇᐳᖓ?

ᑭᐅᔭᐅᑦᔪᑎᖏᑦ 13: ᐋ, ᒪᓕᒐᖃᕐᑎᑕᐅᓗᑎᒃ ᑭᓯᐊᓂ ᐃᒫᒃ:

(a) ᑕᕐᖀᑦ ᖁᓕᓪᓗ ᒪᕐᕈᓗᐃᑦ/ᑕᓪᓕᒪᐅᔪᕐᑐ ᒪᕐᕈᓗᐃᑦ ᐊᓂᒍᕐᓯᒪᒋᐊᓖᑦ ᑲᑎᒪᔩᑦ ᑐᑭᑖᓚᐅᔪᑎᓪᓗᒋᓂᑦ ᕿᐱᓗᒋᐊᒥᒃ ᐱᒐᓱᒍᑎᐅᔪᓂᒃ;

(b) ᐃᓄᒃ ᐱᔪᓐᓇᕕᓕᒃ ᐱᒐᓱᒍᑎᓕᐅᕐᓂᒥᒃ ᓴᒃᑯᓯᑫᓐᓇᓂᕐᒥᒃ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᕿᒥᕐᕈᔨᒃᑯᑦ ᑲᑎᖕᖓᔨᖏᓐᓂᑦ ᕿᒥᕐᕈᖁᓗᒋᑦ ᓯᕗᓪᓕᒥᒃ ᓄᓇᓕᓐᓄᑦ ᐃᓚᐅᔪᖕᖑᕋᓱᒍᑎᓂᒃ ᓯᕗᓪᓖᑦ ᑲᑎᖕᖓᔩᑦ ᕿᐱᓗᓚᐅᔪᔭᖓᓐᓂᒃ: ᐅᕝᕙᓘᓐᓃᑦ

(c) ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᕿᒥᕐᕈᓂᕐᒧᑦ ᑲᑎᒪᔩᑦ ᑐᓂᔨᓯᒪᓕᕐᓗᑎᒃ ᑐᑭᑖᕈᑎᒥᓐᓂᒃ ᑲᔪᓯᑎᑦᓯᓂᐊᕐᓗᑎᒃ ᐊᖏᖕᖏᒍᑎᕕᓂᕐᒥᓂᒃ ᓯᕗᓪᓖᑦ ᓄᓇᓖᑦ ᐃᓚᐅᔪᓕᕆᓂᕐᓄᑦ ᑲᑎᒪᔨᖏᑕ ᐊᖏᓚᐅᔪᖕᖏᑕᖏᓐᓂᒃ.

ᐊᐱᕆᒍᑎ 14: ᖃᓄᐃᓘᕐᑎᓴᓕᐊᖑᓯᒪᔪᓂᒃᑯᐊ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔩᑦ?

ᑭᐅᔭᐅᑦᔪᑎᖏᑦ 14: ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔩᑦ ᐱᔭᑦᓴᖁᑎᑖᕐᑕᐅᒪᕗᑦ ᑐᑭᑖᕆᖃᑦᑕᓂᕐᒥᒃ, ᓅᑦᓯᒍᑎᑎᒍᓪᓗᓃᑦ ᐅᕝᕙᓘᓐᓃᓗ ᓄᑦᓯᒍᑎᑎᒎᖕᖏᑲᓗᐊᕈᑎᒃ ᑐᖕᖓᕕᒋᓗᒋᑦ ᐱᔭᑦᓴᖁᑎᑖᕆᓯᒪᓕᕐᑕᖏᑦ, ᑐᖕᖓᕕᖃᕐᓗᑎᒃ ᐊᑕᓐᓂᐅᕈᑎᐅᔪᓂᒃ ᐃᓕᖓᑦᓱᑎᒃ ᐃᓄᑐᐃᓐᓇᐅᑉ ᐱᕙᓪᓕᖁᑎᑖᕐᑕᑑᑉ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ ᖃᓄᐃᓕᖓᓕᕐᓂᖓᓂᑦ

ᑲᑎᖕᖓᓂᖃᓲᑦ ᑕᕐᖀᑦ ᐱᖓᓱᑦ (3) ᐊᓂᒍᑐᐊᕐᒪᑕ ᑕᒫᑦ ᐊᒥᓱᕕᓐᓂᓴᐅᓱᖑᒻᒥᓱᑎᒃ ᑲᑎᖕᖓᒍᑎᑦᓴᖃᕐᑐᕆᓕᑐᐊᕋᒥᒃ ᑐᑭᑖᕐᓱᑎᒃ ᐊᑯᕐᖓᒥᓐᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔩᑦ, ᓱᕐᖁᐃᑐᒥᓪᓗ ᑲᒪᒋᔭᖃᖃᑦᑕᓚᖓᑦᓱᑎᒃ ᐃᓘᓐᓇᖏᓐᓂᒃ ᐃᓚᐅᔪᖕᖑᕋᓱᑦᑐᑦ ᐊᓪᓚᓯᒪᔪᖕᖑᐃᒍᑎᒋᓯᒪᔭᖏᓐᓂᒃ ᐱᓇᓱᐊᕐᓗᓂᒋᑦ ᖃᓄᐃᓘᕐᑕᐅᒋᐊᖃᕐᓂᖏᑎᒍ, ᐱᐊᓚᓗᑎᒃ ᐱᔭᕇᕈᐊᕐᑐᕕᒋᓗᒋᓪᓗ.

ᑐᑭᓯᒋᐊᒃᑲᓂᕈᑎᑖᕆᐊᖃᕈᑦᓯ, ᑕᑯᒋᐊᖁᓇᕐᐳᓯ ᐅᑯᓂᖓ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᒃᑯᑦ ᒪᓕᒐᖃᕐᑎᓯᒍᑎᖏᑦ ᑐᖕᖓᕕᖁᑎᖏᓪᓗ ᓄᓇᓕᑦᓯ ᑲᑎᒪᔨᖏᑕ ᐱᖏᑦ ᑕᑯᒋᐊᕐᓗᒋᑦ.

ᐃᓄᒃᑎᑑᕐᑐᑦ ᐊᓪᓚᓯᒪᔪᕐᑕᖃᖕᖏᑐᑦ ᒪᓕᒐᖃᕐᑎᓯᒍᑏᑦ

ᐊᐱᕆᒍᑎ 15: ᓱᓇᐅᓕᕆᕚᑦ ᓄᑖᑦ ᒪᓕᒐᕐᑕᖃᒻᒥᓕᐊᖑᒪᔪᑦ ᐃᓄᒃ ᐃᓚᐅᔪᖕᖑᓂᐊᕐᐸᑦ ᐃᓄᑐᐃᓐᓇᑎᑐᑦ ᐱᕙᓪᓕᖁᑎᑖᕐᑕᓯᓗᓂ, ᐱᑎᑕᐅᑦᔪᑎᖃᕈᓐᓇᓂᐊᕈᓂᓗ ᐱᔪᓐᓇᐅᑎᖏᓐᓂᒃ, ᐱᑎᑕᐅᖃᑦᑕᓗᓂᓗ ᐱᕙᓪᓕᖁᑎᓂᒃ ᑐᓂᔭᐅᓲᓂᒃ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ?

ᑭᐅᔭᐅᑦᔪᑎᖏᑦ 15: ᐱᑕᖃᕐᐳᖅ 5-ᓂᒃ ᐱᑕᖃᓪᓚᕆᒋᐊᓕᓐᓂᒃ ᒪᓕᒐᖃᕐᑎᓯᒍᑎᓂᒃ ᐊᓪᓚᑕᐅᒪᓕᕐᒥᔪᓂᒃ ᓄᑖᓂ ᐱᖁᔭᓕᐅᕆᒪᒍᑎᓂ, ᐃᓘᓐᓇᑎᒃ ᐱᑕᖃᑦᓯᐊᕆᐊᖃᕐᓱᑎᒃ ᐱᑦᔪᑎᐅᓂᐊᐊᕈᑎᒃ ᐊᑕᐅᓯᕐᒥᒃ ᐃᓗᐃᑦᑐᒥᒃ ᐊᓪᓚᓯᒪᔪᑎᒍᑦ ᐃᓚᐅᔪᖕᖑᕋᓱᒍᑎᒥᒃ ᑲᒃᑯᐊᖑᔪᑦ:

  1. ᐃᓅᓗᓂ ᐊᓂᕐᑎᕆᓗᓂ; ᐊᒻᒪᓗ
    b. ᑲᓇᑕᒥᐅᖑᑦᓱᓂ; ᐊᒻᒪᓗ
    c. ᐃᓄᑐᐃᓐᓇᐅᓱᓂ, ᑐᑭᖃᕐᑎᓯᒍᑎᖏᑎᒍᑦ ᑐᖕᖓᕕᐅᔪᑦ ᐃᓄᑐᐃᓐᓀᑦ ᐱᕐᖁᓯᖏᓐᓄᓗ ᐱᐅᓯᑐᖃᖏᓐᓄᓗ: ᐊᒻᒪᓗ
    d. ᐃᓄᑐᐃᓐᓇᐅᓂᕋᕐᓱᓂ ᐃᒻᒥᓂᒃ ᓇᓗᓀᕆᒍᑎᒋᓯᒪᑦᓱᒍ; ᐊᒻᒪᓗ
    e. ᐱᑐᑦᓯᒪᓂᖃᕐᓗᓂ ᐃᓄᐃᑦ ᓄᓇᓕᖓᓐᓄᑦ (ᐊᕐᖁᑎᒋᓗᒋᑦ ᐊᐅᖃᑎᖃᕐᓂᑯᑦ ᐃᓚᖃᕐᓃᑦ, ᐊᖏᕐᕋᖃᕐᑎᑕᐅᕕᖃᕐᓂᑯᑦ, ᐱᕙᓪᓕᐊᓯᒪᔪᑎᒍᑦ, ᐱᕐᖁᓯᑎᒍᑦ ᐅᕝᕙᓗᓐᓃᑦ ᐃᓅᑦᔪᓯᑎᒍᑦ ᐱᑐᑦᓯᒪᖃᑎᖃᕐᓂᑯᑦ ᑌᒣᑦᑐᓂᒃ ᓄᓇᕐᖃᑎᒌᒍᑎᓂᒃ).

ᐱᓪᓚᕆᐅᕗᖅ ᖃᐅᔨᒪᔭᐅᒋᐊᖃᕐᓂᖓᑦ ᐃᓘᓐᓇᑎᒃ ᐃᓄᐃᑦ, ᐃᓄᑐᐃᓐᓇᓂᑦ ᓯᕗᓕᓖᑦ ᐃᓚᖏᑎᒍᑦ ᖏᑦᑑᒐᓗᐊᓪᓗ, ᐊᓪᓚᓯᒪᔪᑎᒍᑦ ᐃᓚᐅᔪᖕᖑᕋᓱᒍᑎᓂᒃ ᐊᓪᓚᓯᒪᔪᖕᖑᐃᒋᐊᖃᕐᐳᑦ ᐃᓚᐅᔪᖕᖑᕈᓐᓇᓯᑎᑕᐅᓂᐊᓕᕋᒥᒃ ᑐᖕᖓᕕᐅᑎᓪᓗᒋᑦ ᐊᖏᖃᑎᒌᒍᑎᐅᓯᒪᔪᑦ ᐱᔪᓐᓇᐅᑎᑖᕋᓱᒃᑐᖅ ᐃᓘᓐᓇᖏᓐᓂᒃ ᐱᔪᓐᓇᐅᑎᑦᓴᓕᐊᖑᒪᔪᓂᒃ ᐱᔪᓐᓇᐅᑎᑦᓴᖃᑦᓯᐊᑐᐊᕐᐸᑦ.

ᐊᐱᕆᒍᑎ 16: ᖃᓄᐃᓕᖓᕚᑦ ᓄᓇᓯᒪᓂᕋᕐᓂᑯᑦ ᐱᒐᓱᒍᑎᐅᒍᓐᓇᑐᑦ ᐊᑐᕐᑕᐅᓗᑎᒃ ᐱᔪᓐᓇᐅᑎᖃᕐᑎᑕᐅᒍᑎᓂᒃ ᐊᑐᕐᑐᓄᑦ ᐅᕝᕙᓗᓐᓃᑦ ᐱᕙᓪᓕᖁᑎᑖᕐᑕᖃᑕᐅᓂᐊᕐᑐᒧᑦ ᑐᖕᖓᕕᐅᑎᓪᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ?

ᑭᐅᔭᐅᑦᔪᑎᖏᑦ 16: ᑐᖕᖓᕖᑦ ᒪᓕᑦᑕᐅᕙᑦᑐᑦ ᐱᔪᓐᓇᑎᑦᓯᓂᐅᓂᐊᕐᑐᓄᑦ ᐊᑐᕈᓐᓇᖁᓪᓗᒋᑦ ᐱᔪᓐᓇᐅᑎᒥᓐᓂᒃ ᐊᒻᒪᓗ ᐱᕙᓪᓕᖁᑎᑖᕐᑕᓗᑎᒃ ᑐᖕᖓᕕᒋᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓃᑐᑦ ᑐᖕᖓᕕᖃᕐᐳᑦ ᐃᓅᑉ ᖃᓄᐃᓕᖓᓂᖓᓂ ᑭᓇᐅᓂᖓᓂᒃᓗ:

  • ᑲᔪᓯᔪᒥᒃ ᓄᓇᓯᒪᓂᕋᐅᑎᒥᓂᒃ ᐊᓪᓚᑕᐅᑎᑦᓯᓯᒪᖏᓐᓇᖃᑦᑕᓂᕐᐸᑦ ᓄᓇᖁᑎᒥᓂ.
  • ᐃᓂᓪᓓᒍᑎᖃᕐᓯᒪᑉᐸᑦ ᓄᓇᓯᒪᒍᑎᒥᓂᒃ ᓄᓇᖁᑕᐅᔫᑉ ᓯᓚᑖᓂ ᐊᕐᕌᒍᑦ ᖁᓕᑦ/ᑕᓪᓕᒪᐅᔪᕐᑐᑦ (10) ᐅᖓᑖᓂ ᑖᒃᑯᓇᖕᖓᓗᓐᓃᑦ ᐊᕐᕌᒍᓂᑦ ᐊᒥᓲᓂᕐᓴᓂ ᐱᑦᔪᑎᖃᕐᓱᓂ ᐃᓕᓐᓂᐊᓂᕐᒥᒃ, ᐃᓗᓯᕐᒥᓅᓕᖓᔪᒥᒃ ᐅᕝᕙᓘᓐᓃᑦ ᐱᓇᓱᒐᕐᒧᑦ ᐱᓇᓱᑦᑎᐅᓗᓂ ᐱᑐᑦᓯᒪᓗᓂᓗᓐᓃᑦ ᐱᓇᓱᒐᖃᕐᕕᒧᑦ ᑎᓕᔭᐅᒪᒍᑎᖃᕐᑐᒧᑦ ᖁᕝᕙᑎᕆᓂᐊᕐᓗᓂ ᐃᓄᐃᑦ ᖃᓄᐃᖕᖏᓯᐊᕐᑐᓴᐅᓂᖏᓐᓂᒃ ᓇᒻᒥᓂᖅ ᓄᓇᖁᑎᒥᓐᓂ (Rights and Benefits under JBNQA (c)).
  • ᓄᓇᓯᒪᓂᕋᕈᑎᒥᓂᒃ ᐅᑎᕐᑎᑕᐅᑎᑦᓯᓗᓂ ᓄᓇᕕᒻᒥᒃ ᓄᓇᖁᑎᖃᕐᓂᒥᓄᑦ (Rights and Benefits under JBNQA (a));

ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᓄᓇᓯᒪᕕᒋᔭᑦᓴᕕᓂᕐᒥ ᓯᓚᑖᓂ ᓄᓇᓯᒪᔪᑦ ᓄᓇᕕᐅᑉ ᓄᓇᖁᑖᑕ ᓯᓚᑖᓂ ᐱᑦᔪᔭᐅᓲᖑᕗᑦ ᑲᓇᑕᒥ ᐃᓗᓯᓕᕆᔨᒃᑯᓄᑦ ᐃᓕᖓᔪᓂᒃ ᐃᓗᓯᖃᑦᓯᐊᕆᐊᖃᕐᓂᖏᓐᓄᑦ ᑖᒃᑯᐊᓗ ᐱᒐᓱᒍᑎᓂᒃ ᑭᓯᑦᔪᑎᓂᒃ ᐃᓄᑐᐃᓐᓇᐅᒋᐊᒥᒃ ᓇᓗᓀᕐᑕᐅᒪᒍᑎᓂᒃ ᐱᒋᐊᖃᕐᐳᑦ ᐊᓪᓚᓯᒪᔭᐅᒍᑎᖏᑦ ᓯᕗᓪᓕᐹᓕᓐᓂᒃ N-ᒥᒃ ᑭᖑᓪᓕᖃᕐᓗᓂ ᓯᑕᒪᐅᔪᕐᑐᓂᒃ ᑭᓯᑦᔪᑎᓂᒃ. ᑌᒣᑦᑐᒥᒃ N-ᒥᒃ ᐱᒋᐊᕐᓂᓕᐅᑎᓕᒻᒥᒃ ᑭᓯᑦᔪᑎᑖᕈᒪᔪᑦ, ᐃᓄᑐᐃᓐᓇᐅᓱᑎᒃ ᐱᕙᓪᓕᖁᑎᑖᕐᑕᑐᑦᓴᔦᑦ ᖃᐅᔨᒋᐊᕐᕕᖃᕆᐊᖃᕐᐳᑦ ᑲᓇᑕᒥ ᐃᓗᓯᓕᕆᔨᒃᑯᓂᒃ (ᑯᐯᒃ ᓄᓇᖁᑎᖓᓅᓕᖓᔪᓂᒃ:

Health Canada/ᑲᓇᑕᒥ ᐃᓗᓯᓕᕆᔨᒃᑯᑦ
ᐅᖄᓚᐅᑎᖓᑦ (ᐊᑭᓕᕐᓯᒪᔪᖅ): 1-877-483-5501
ᐅᖄᓚᐅᑎᖓᑦ (ᒪᓐᑐᔨᐊᒥ): 514-283-5501

ᐊᐱᕆᒍᑎ 17: ᖃᓄᐃᑦᑐᒦᒃ ᐱᕙᓪᓕᐊᓂᖃᕐᓯᒪᒍᑎᖃᕐᐸ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖑᓐᓄᑦ “ᐅᐃᒍᑖᖑᑦᓱᓂ ᐊᖏᖃᑎᒌᒍᑎᑖᖑᒋᐊᓪᓚᓚᐅᔪᔪᖅ ᑭᓯᑦᔪᑎᖃᕐᓱᓂ 18-ᒥᒃ ᐱᑦᔪᑎᖃᕐᓱᓂ ᐱᔪᓐᓇᖃᑕᐅᓂᑦᓴᓄᓪᓗ ᐃᓚᐅᔪᖕᖑᑐᑦᓴᐅᓂᕐᓄᓗ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ?

ᑭᐅᔭᐅᑦᔪᑎᖏᑦ 17: ᐊᖏᖃᑎᒌᒍᑎᓄᑦ ᐅᐃᒍᑖᖑᒪᔪᖅ ᑌᔭᐅᑦᔪᑎᖃᕐᓱᓂ ᐊᖏᖃᑎᒌᑦ ᐅᐃᒍᑖᖓᓐᓂᒃ ᑭᓯᒃᔪᑎᓕᖕᒥᒃ 18-ᒥ ᐊᑎᓕᐅᖃᑎᒌᒍᑕᐅᒪᔪᖅ ᔭᓄᐊᕆ 27, 2005-ᒥ, ᐋᕐᕿᒋᐊᕆᒍᑎᐅᓯᒪᕗᖅ ᔦᒥᓯ ᐯᑉ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐃᓕᖓᔪᓂᒃ ᐃᓚᐅᔫᒍᓐᓇᓂᕐᓄᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑎᑕᐅᒍᑎᖏᓐᓄᑦ.

ᑖᒃᑯᐊ ᐊᖏᖃᑎᒋᒍᑏᑦ ᐱᔪᓐᓇᐅᑎᑖᕐᑎᓯᓚᐅᔪᕗᑦ ᐃᓚᐅᔪᓕᕆᓂᕐᓄᑦ ᒪᓕᒐᕐᓂᒃ ᓴᕐᕿᑎᑦᓯᓂᕐᓂᒃ ᐊᒻᒪᓗ ᖃᓄᐃᓕᖓᔪᒥᒃ ᐃᓄᑐᐃᓐᓇᐅᒍᑎᓖᑦ ᐃᓚᐅᔪᖕᖑᑎᑕᐅᒍᓐᓇᓂᐊᕐᒪᖔᑕ, ᑖᒃᑯᐊ ᐱᔪᓐᓇᐅᑎᑖᕐᑎᓯᒍᓐᓇᐅᑎᑦ ᐃᓄᑐᐃᓐᓇᓄᑦ ᐁᑦᑑᑕᐅᓚᐅᔪᑦ ᑖᒃᑯᐊ ᐃᓄᑐᐃᓐᓀᑦ ᑐᑭᑖᕈᓐᓇᓂᖃᑦᓯᐊᓚᕆᒻᒪᑕ ᐃᓄᑐᐃᓐᓇᐅᓂᕌᕐᑐᑦ ᐱᓪᓗᒋ ᓲᕐᓗ ᑲᒃᑯᐊ ᑐᖕᖓᕕᒋᓗᒋᑦ:

  • ᓇᓗᓀᕐᓗᒋᑦ ᐃᓄᑐᐃᓐᓇᖁᑕᐅᔪᑦ ᐱᕙᓪᓕᖁᑎᑖᕐᑕᕆᐊᖃᕐᓱᑎᒃ ᐊᓪᓚᑕᐅᓯᒪᖃᑕᐅᒍᑎᑖᕐᓗᓂᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ, ᐊᒻᒪᓗ
  • ᓇᓗᓀᕐᑕᐅᓗᑎᒃ ᓲᕐᓗ ᐃᒻᒥᓂᒃ ᑐᑭᓯᒪᒍᑎᖏᑦ ᒪᓕᓪᓗᒋᑦ, ᖃᓄᕐᓗ ᐱᕐᖁᓯᕐᒥᓂᒃ ᑐᑭᓯᒪᓂᖏᑦ ᐱᐅᓯᑐᖃᕐᓂᓗ ᑐᑭᓯᒪᓂᖏᑦ; ᐊᒻᒪᓗ
  • ᓈᒻᒪᕕᖃᕐᓂᓗ ᓇᓛᒍᕐᓂᓗ ᑐᑭᑖᕈᑎᑦᓴᐅᓗᓂ ᑭᓇ ᐃᓄᑐᐃᓐᓇᐅᒪᖔᑦ ᓲᕐᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᒍᑦ ᐃᒣᒍᓂ ᐃᓄᑐᐃᓐᓇᐅᓂᕋᕐᑕᐅᒍᓐᓇᐳᖅ.

ᑐᑭᓯᒋᐊᒃᑲᓂᕈᒪᔪᓂᒃ ᑕᑯᒋᐊᖁᔨᕗᒍᑦ ᐅᑯᓂᖓ ᐃᓚᐅᔪᓕᕆᓂᕐᒥᒃ ᐱᓇᓱᒍᑏᑦ ᐃᓕᖓᔪᑦ ᓄᓇᕕᐅᑉ ᐃᓄᑐᐃᓐᓇᖏᓐᓄᑦ ᐱᕙᓪᓕᖁᑎᑖᕐᑕᑐᓄᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ ᒪᓕᒐᖃᕐᑎᓯᒍᑎᓂᒃ ᐱᖁᔭᖃᕐᑎᓯᒍᑎᖏᓐᓂᓗ ᐊᖏᕐᑕᐅᒪᑦᓱᑎ ᓄᓇᓕᓐᓂ ᑭᒡᒐᑐᕐᑎᐅᓂᕐᒥᒃ ᒪᑭᕝᕕᐅᑉ ᑲᑎᖕᖓᔨᖏᓐᓄᑦ ᔫᓂ 1, 2010-ᖑᑎᓪᓗᒍ.

ᐊᐱᕆᒍᑎ 18: ᖃᓄᐃᓕᖓᔪᒥᒃ ᐋᕐᖀᓯᒪᕙᑦ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᕿᒥᕐᕈᓂᕐᒧᑦ ᑲᑎᒪᔩᑦ?

ᑭᐅᔭᐅᑦᔪᑎᖏᑦ 18: ᕿᒥᕐᕈᓂᕐᓄᑦ ᑲᑎᖕᖓᔩᑦ ᐋᕐᕿᓯᒪᓂᖏᑦ ᐃᒣᓕᖓᕗᑦ ᐱᖓᓲᔪᕐᑑᓱᑎᒃ (6) ᐃᓚᐅᔫᖃᑎᒌᖑᔪᑦ ᑎᒃᑯᐊᑕᐅᓯᒪᑦᓱᑎᒃ ᐊᕐᖁᑎᐅᑎᓪᓗᒋᑦ ᑐᑭᑕᕈᑏᑦ ᐊᓂᒎᑎᑎᑕᐅᔪᑦ ᒪᑭᕝᕕᒧᑦ ᐊᑯᕐᖓᓂ ᓄᓇᕕᒻᒥᐅᑦ ᐃᓚᐅᔫᒍᓐᓇᐅᑎᓖᑦ ᐱᕙᓪᓕᖁᑎᑖᕐᑕᓱᑎᒃ , ᓇᓪᓕᖁᐊᕇᒥᒃ ᐅᓄᕐᓂᖃᕐᓱᑎᒃ, ᐅᖓᕙᒥᐅᓂᑦ, ᓄᕗᐊᓗᒻᒥᐅᓂᒃ ᐊᒻᒪᓗ ᑕᓯᐅᔭᕐᔪᐊᒥᐅᓂᑦ.

ᑐᓴᕐᑎᓯᒍᑎᑎᒍᑦ ᖃᐅᔨᑎᑕᐅᓯᒪᓕᑐᐊᕈᑎᒃ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᖕᒧᑦ ᕿᒥᕐᕈᔭᐅᒋᐊᖃᕐᑐᖃᓕᕆᐊᖓ ᐃᓚᐅᔪᖕᖑᕋᓱᒍᑕᐅᔪᒥᒃ, ᑲᑎᒪᔨᐅᖃᑎᒌᑦ ᑎᓕᔨᓕᕋᔭᕐᐳᑦ ᐱᖓᓱᓂᒃ (3) ᐃᓚᐅᔪᓂᒃ ᐊᑯᕐᖓᒥᓐᓂᑦ ᐃᓚᐅᔫᖃᑎᒌᖑᖃᑕᐅᓚᖓᓕᕐᑐᓂᒃ ᕿᒥᕐᕈᓂᕐᒥᒃ ᑲᑎᒪᔨᐅᒍᑎᓕᓐᓄᑦ. ᐊᑐᓂᑦ ᐱᖓᓱᑦ (3) ᓄᓇᕕᐅᑉ ᓄᓇᖁᑎᖏᑦ ᐊᕕᑦᑐᓯᒪᓂᖏᑦ ᐊᑐᓂᑦ ᐱᖓᓱᓂᒃ ᓇᒻᒥᓂᕐᒥᓂᒃ ᑭᒡᒐᑐᕐᑎᖃᕆᐊᖃᕐᐳᑦ ᑖᒃᑯᓇᓂ ᕿᒥᕐᕈᓂᕐᓄᑦ ᑲᑎᒪᔨᓄᑦ ᐃᓚᐅᔫᖃᑎᒌᓂ.

ᐊᓱᐃᓛ ᕿᒥᕐᕈᓂᕐᓄᑦ ᑲᑎᖕᖓᔩᑦ ᕿᒥᕐᕈᖃᑎᒌᓐᓂᐊᓕᕐᒪᑕ ᑐᓴᕐᑎᑕᐅᒍᑎᖃᕆᐊᒃᑲᓂᕐᓗᑎᒃ, ᐊᒻᒪᓗ ᕿᒥᕐᕈᓂᕐᓄᑦ ᑲᑎᒪᔨᒃᑯᑦ ᐊᖏᕐᓂᖃᕈᓐᓇᓱᑎᒃ ᐃᓱᒪᑦᓴᓯᐅᕈᑎᖃᓚᖓᓗᑎᒃ ᐊᓪᓚᖁᑎᓂᒃ, ᑐᑭᓯᒪᒍᑎᑦᓴᖃᕐᑎᓯᒍᑎᓂᒃ ᐊᒻᒪᓗᒋᐊᓪᓚᒃ ᓱᕐᖁᐃᑐᒥᒃ ᐊᑑᑦᓯᒪᓂᕐᒥᒃ ᑕᑯᑦᓴᐅᑎᑦᓯᒍᑎᓂᒃ ᐊᓯᒋᔭᐅᔪᓂᒃ ᐊᓪᓚᓯᒪᔪᖕᖑᐃᒍᑎᓐᓃᑎᑕᐅᒌᕐᓯᒪᔪᓄᑦ ᑐᓂᔭᐅᔪᑦᓴᐅᓱᑎᒃ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ. ᐊᒻᒪᓗᒋᐊᓪᓚᒃ ᓱᓕ , ᐱᑕᖃᕐᑎᓯᕕᖃᕐᓂᐊᕆᕗᖅ ᐱᒐᓱᒍᑎᓕᐅᕐᓯᒪᔪᓂᒃ ᐱᕕᑦᓴᖃᕐᑎᓯᕕᖃᕐᓗᑎᒃ ᓇᒻᒥᓂᖅ ᑐᕃᓐᓇᓗᑎᒃ ᐃᒻᒥᓂᒃ ᐅᖄᒍᑦᔨᓂᑦᓴᖏᓐᓂᒃ.

ᐊᐱᕆᒍᑎ 19: ᓱᓇᐅᕚ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᑕᐅᒪᕕᖓᑦ?

ᑭᐅᔭᐅᑦᔪᑎᖏᑦ 19: ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᐃᒍᑕᐅᒪᕕᖓᑦ ᒪᕐᕈᐃᓕᖓᔫᓐᓂᒃ (2) ᐋᕐᕿᑕᐅᓯᒪᓂᖃᕐᐳᖅ, ᑲᒪᔨᓖᓐᓂᒃ ᓄᑕᐅᓯᓕᑎᕆᔨᖃᕐᓱᑎᒃᓗ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᖕᒥᒃ ᐱᓇᓱᑦᑕᐅᒍᑎᖏᑦ ᖃᕆᑕᐅᔭᑎᒍᑦ ᐃᖏᕐᕋᑎᑕᐅᑎᓪᓗᒋᑦ ᐊᓪᓚᓯᒪᔪᓂᒃ ᓄᐊᑦᓯᕕᓐᓂ, ᑐᖕᖓᕕᒋᓱᒋᑦ ᑐᑭᑖᕈᑎᒋᓯᒪᔭᖏᑦ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᐅᔪᑦ ᐊᒻᒪᓗ ᓄᓇᕕᒻᒥ ᐃᓚᐅᔪᓕᕆᓂᕐᒥᒃ ᕿᒥᕐᕈᓂᕐᓄᑦ ᑲᑎᖕᖓᔨᒃᑯᑦ:

  • ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᓯᒪᒍᑎᖏᑦ; ᐊᒻᒪᓗ
  • ᐊᓪᓚᑕᐅᓯᒪᒍᑎᖏᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᓄᓇᕕᐅᑉ ᓯᓚᑖᓂ ᓄᓇᓯᒪᔪᑐᖃᐅᔪᑦ ᐊᕐᕌᒍᓂ ᖁᓕᓂ/ᑕᓪᓕᒪᐅᔪᕐᑐᓂ (10) ᐅᖓᑖᓂᓘᓐᓃᑦ (ᐅᖃᕐᑕᐅᒍᓯᒋᐊᓪᓚᖃᕐᒥᓱᑎᒃ “ᕿᑲᕐᑎᑕᐅᔪᑦ ᐊᓪᓚᑕᐅᒪᕕᐊᓐᓂᒃ”.)

ᐊᐱᕆᒍᑎ 20: ᖃᖓᐅᑎᓪᓗᒎ ᑌᓐᓇ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᖏᑕ “ᐅᐃᒍᑖᖓ ᐊᖏᖃᑎᒌᒍᑎ ᑭᓯᑦᔪᑎᓕᒃ 18-ᒥᒃ” ᐱᖁᔭᖕᖑᑎᑕᐅᓐᓂᖃ?

ᑭᐅᔭᐅᑦᔪᑎᖏᑦ 20: “ᐊᖏᖃᑎᒌᒍᑕᐅᒪᔪᑦ ᐅᐃᒍᑖᕐᑕᐅᒪᒍᑎᖓᑦ ᑭᓯᑦᔪᑎᓕᒃ 18-ᒥᒃ” (CA18) ᐊᑐᓕᕐᑎᑕᐅᓂᖃᓚᐅᔪᕗᖅ ᒣ 1, 2006 ᐅᓪᓗᖓᓂᒃ ᑖᓐᓇ ᐅᒡᓗ ᐳᐃᒎᒪᔭᒃᓴᐅᖏᑦᑐᖅ, ᐅᒡᓘᒐᒥ ᐱᒋᐊᕐᕕᓕᐅᑎᕕᕕᓂᐅᑦᓱᓂ, ᓄᑖᓄᑦ ᐃᓄᑐᐃᓐᓀᑦ ᐃᓚᐅᔪᖕᖑᓂᕐᒧᑦ ᒪᓕᒐᕐᑕᑕᐅᕐᖃᒥᕈᑎᖏᓐᓄᓗ ᐊᒻᒪᓗ ᐃᓚᐅᔪᖕᖑᕋᓱᓐᓂᒥᒃ ᐱᕙᓪᓕᐊᑎᑦᓯᒍᑎᖃᕐᓂᓴᐅᔪᑦ ᑕᒡᒐᓂ ᐅᓪᓗᒥ ᐱᒋᐊᕐᕕᖃᕐᓯᒪᑦᓱᑎᒃ.

ᑐᑭᑖᕐᑐᐃᒍᓐᓇᓂᕐᓄᑦ ᐱᔪᓐᓇᐅᑎᖃᕈᑕᐅᔪᑦ ᐃᓕᖓᑦᓱᑎᒃ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ ᐊᖏᓂᕐᐹᖑᖃᑕᐅᕗᑦ ᐊᓯᑦᔨᑕᐅᒍᑎᓄᑦ ᑐᖕᖓᕕᒋᑦᓱᒋᑦ ᓄᑖᑦ ᐱᖁᔭᕐᑖᕆᒍᑕᐅᕐᖃᒥᐅᔪᑦ. ᑐᖕᖓᕕᒋᑦᓱᒋᑦ ᐱᖁᔭᑐᖃᐅᓯᒪᔪᑦ ᐊᕕᑦᑐᓂᖅ 3-ᒥ ᐊᓪᓚᑕᐅᒪᓚᐅᔪᔪᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ, ᑐᑭᑖᕆᓂᕐᒥᒃ ᐱᔪᓐᓇᐅᑏᑦ ᑎᒍᒥᐊᕐᑕᐅᓚᐅᔪᒻᒪᑕ ᐸᐸᑦᓯᔨᒧᑦ, ᑭᒡᒐᑐᕐᓱᓂ ᑲᕙᒪᒃᑯᓄᑦ ᐱᓇᓱᑦᑎᐅᓂᕐᒥᓂᒃ ᐊᕐᖁᑎᖃᕐᓱᓂ ᑎᓕᔭᐅᒪᑦᓱᓂᓗ ᑯᐯᒃ ᑲᕙᒪᖓᑕ ᑐᕐᖃᑕᕐᕕᖓᓄᑦ ᐃᓕᖓᔪᒧᑦ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᓂᕐᓄᑦ, ᐊᑐᕐᑕᐅᑎᑦᓯᖃᑦᑕᓚᐅᔪᒻᒪᑦ ᒪᓕᒐᖃᕐᑎᓯᒍᑎᓕᐊᖑᒪᔪᓂᒃ ᐃᓚᔫᒍᓐᓇᓂᕐᓅᓕᖓᑦᓱᑎᒃ ᑐᖕᖓᕕᖃᕐᓱᓂ ᐱᓯᒪᔭᒥᓂᒃ ᓄᑕᐅᖕᖏᑐᓂᑦ ᒪᓕᒐᖃᕐᑎᓯᒍᑎᕐᖄᕕᓂᕐᓂᑦ (ᑐᖕᖓᕕᖃᖃᑦᑕᓯᒪᒻᒪᑕ ᐃᓄᑐᐃᓐᓇᓂᒃ ᓯᕗᓕᖃᕐᓯᒪᓂᕐᒥᒃ ᐃᓅᓕᕐᓯᒪᓂᕐᒥᓗ, ᑎᒍᐊᕐᑖᖑᓯᒪᓂᕐᒥᓗ, ᑲᑎᑎᑕᐅᖃᑎᖃᕐᓯᒪᓂᕐᒥᓗ). ᑌᒪᖕᖓᑦ ᒣ 1, 2006-ᖑᓕᓚᐅᔪᒻᒪᓂᓂᑦ, ᑐᑭᑖᕐᑐᐃᓂᕐᓄᑦ ᐱᔪᓐᓇᐅᑎᖃᕈᑕᐅᔪᑦ ᐊᒻᒧᒋᐊᕐᓂᖃᕐᓯᒪᓕᕐᖁᖅ ᑎᒍᒥᐊᕐᑕᐅᒐᓕᕐᓱᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ ᑕᒐᑕᒐ ᐱᔪᓐᓇᐅᑎᖃᕈᑎᒋᓕᕐᓱᓂᒋᑦ ᑐᑭᑖᕆᒍᓐᓇᓂᕐᒥᒃ ᓇᒻᒥᓂᕐᒥᓄᑦ ᓄᓇᓕᒥᑕ ᐱᕙᓪᓕᖁᑎᑖᕐᑕᓂᖏᓐᓅᓕᖓᔪᓂᒃ ᐋᕐᕿᑕᐅᕙᓐᓂᐊᓕᕐᑐᓂᒃ ᓄᓇᓕᒻᒥᑕ ᐃᓚᐅᔪᓕᕆᓂᕐᓄᑦ ᑲᑎᒪᔨᖏᓐᓄᑦ.

ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᒃᑯᑦ ᐊᑐᓱᖑᕗᑦ ᐃᓕᒃᑯᑦ ᑲᔪᓯᑎᑦᓯᒍᑎᖃᕐᓱᑎᒃ ᒪᓕᒐᖃᕐᑎᓯᒍᑕᐅᔪᓂᒃ ᐊᓪᓚᑕᐅᒪᑦᓱᑎᒃ ᐊᖏᖃᑎᒌᒍᑏᑦ ᐅᐃᒍᑖᕐᑕᐅᒪᒍᑎᖏᓐᓂᒃ ᑭᓯᑦᔪᑎᖃᕐᓱᑎᒃ 18-ᒥᒃ, ᑕᒪᓐᓇ ᐊᑐᕐᐸᑕᖓᑦ ᑐᑭᑖᕈᑎᖃᕆᐊᖃᓕᑐᐊᕋᒥᒃ ᐃᓚᐅᔪᖕᖑᕋᓱᒍᑎᒥᒃ ᑐᓂᔭᐅᔪᒥᒃ ᐃᓄᒻᒧᑦ ᐅᕝᕙᓗᓐᓃᑦ ᐱᖁᔭᑎᒍᑦ ᑭᒡᒐᑐᕐᑎᖓᓄᑦ ᐃᓕᖓᑐᐊᕐᒪᑦ 18-ᓂᒃ ᐅᑭᐅᕐᑖᓯᒪᕋᑕᖕᖏᑐᓄᑦ.

ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔩᑦ ᑐᓂᔨᖃᑦᑕᕆᐊᖃᕐᑐᑦ ᑐᑭᑖᕈᑎᒥᓐᓂᒃ ᑲᔪᓯᑎᑦᓯᓗᑎᒃ ᒪᓕᒐᖃᕐᑎᑕᐅᒍᑎᓂᒃ ᐊᓪᓚᑕᐅᒪᔪᓂᒃ (CA18)-ᒥ ᐊᓪᓚᓯᒪᕕᐅᑎᓪᓗᒍ ᑐᑭᓯᒪᑦᓯᐊᑐᓄᑦ, ᓇᓛᒍᕐᓂᖃᑦᓯᐊᑐᓄᑦ ᐊᒻᒪᓗ ᐱᐅᓯᕐᒥᒃ ᑲᔪᓯᑎᑦᓯᓂᖃᑦᓯᐊᓱᑎᒃ ᐱᓂᐊᕐᓂᐅᔪᓄᑦ.

ᐊᐱᕆᒍᑎ 21: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form A-ᒥᒃ ᑌᔭᐅᔪᒥᒃ: ᐃᓚᐅᔪᖕᖑᓂᕐᒧᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᐅᑎᑖᕐᑕᕈᑎᑦᓴᓂᒃ (ᐃᓕᖓᑦᓱᓂ ᐃᓄᖕᒪᕆᓐᓄᑦ) ᐊᓪᓚᓯᒪᔪᖕᖑᐃᕕᑦᓴᔭᖓᓐᓂᒃ?

ᑭᐅᔭᐅᑦᔪᑎᖏᑦ 21: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᔪᑦᓴᐅᓗᓂ ᖃᖓᑐᐃᓐᓇᓕᒫᖅ ᐃᓄᒃ ᐅᑭᐅᓕᒃ 18-ᓂ ᐅᖓᑖᓂᓗ, ᐃᓚᐅᔪᖕᖑᕈᒪᓕᑐᐊᕐᐸᑦ ᓄᓇᕕᒻᒥ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᒪᕕᖏᑎᒍᑦ.

Please click here to download the Form A/ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ A-ᒥᒃ ᓇᓗᓀᒃᑯᑕᓕᒃ

ᐊᐱᕆᒍᑎ 22: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form B-ᒥᒃ ᑌᔭᐅᔪᒥᒃ : ᐃᓚᐅᔪᖕᖑᓂᕐᒧᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᐅᑎᑖᕐᑕᕈᑎᑦᓴᓂᒃ (ᐃᓕᖓᑦᓱᓂ ᑲᒃᑲᓛᓄᑦ/ᐱᐊᕋᕐᓄᑦ) ᐊᓪᓚᓯᒪᔪᖕᖑᐃᕕᑦᓴᔭᖓᓐᓂᒃ?

ᑭᐅᔭᐅᑦᔪᑎᖏᑦ 22: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᖃᖓᑐᐃᓐᓇᓕᒫᖅ ᐊᑐᕐᑕᐅᔪᑦᓴᐅᓗᓂ ᐃᓅᑉ ᓇᓪᓕᑐᐃᓐᓇᖓ ᕿᑐᕐᖓᐅᔪᒥᒃ ᐅᑭᐅᖏᑦ 18-ᖑᕋᑕᖕᖏᑐᓂᒃ, ᐃᓚᐅᔪᖕᖑᖁᔨᓂᖃᓕᑐᐊᕐᐸᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᑕᐅᒪᕕᖏᑎᒍᑦ.

Please click here to download the Form B. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ B-ᒥᒃ ᓇᓗᓀᒃᑯᑕᓕᒃ

ᐊᐱᕆᒍᑎ 23: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form C-ᒥᒃ ᑌᔭᐅᔪᒥᒃ: ᐃᓚᐅᔫᖃᑕᐅᒍᑏᑦ ᐋᕐᕿᒋᐊᕐᑕᐅᒍᑎᖏᑦ ᐊᒻᒪᓗ ᑕᒻᒪᓯᒪᔪᐃᔭᕐᑕᐅᓂᖏᑦ ᐱᒐᓱᒍᑎᐅᑦᓱᑎᒃ ᐊᓪᓚᓯᒪᔪᖕᖑᐃᒍᑎᒥ ᐊᓪᓚᑕᐅᓯᒪᔪᑦ?

ᑭᐅᔭᐅᑦᔪᑎᖏᑦ 23: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᓪᓚᓯᒪᔪᖕᖑᐃᒍᑎᐅᖃᑦᑕᕆᐊᓕᒃ ᖃᖓᑐᐃᓐᓇᓕᒫᑦ ᐃᓄᑐᐃᓐᓇᖅ ᐊᓯᑦᔨᑎᕆᒍᒪᓕᕐᐸᑦ ᐅᕝᕙᓘᓐᓃᑦ ᐊᓪᓚᓯᒪᔪᓂᒃ ᑕᒻᒪᓯᒪᔪᐃᔦᒍᒪᑉᐸᑦ ᐊᓪᓚᑕᐅᒪᒌᕐᑐᓂᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᑕᐅᒪᕕᖏᓐᓂ.

Please click here to download the Form C /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ C-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 24: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form D-ᒥᒃ ᑌᔭᐅᔪᒥᒃ: Re-establishment of Residence in Nunavik Application Form? ᓄᓇᕕᒻᒥ ᓄᓇᖃᕐᓂᒥᒃ ᐃᓂᓪᓓᒋᐊᓪᓚᒍᑎᑦᓴᔭᒥᒃ?

ᑭᐅᔭᐅᑦᔪᑎᖏᑦ 24: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᖃᓲᒥᒃ ᐃᓄᒃ ᓄᓇᕕᐅᑉ ᓯᓚᑖᓂ ᓄᓇᓯᒪᔪᕕᓂᖅ ᐊᕐᕌᒍᓂ 10-ᓂ ᐅᖓᑖᓄᓪᓗ ᐅᑎᕐᑎᓯᒍᒪᓕᑐᐊᕐᒪᑦ ᓄᓇᓯᒪᓂᖃᕐᓂᒥᓂᒃ ᓄᓇᕕᒻᒥᐅᖑᒋᐊᓪᓚᓯᓗᓂ.

Please click here to download the Form D. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ D-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 25: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form E-ᒥᒃ ᑌᔭᐅᔪᒥᒃ: Removal from Nunavik Inuit Beneficiaries Register Application Form? ᐊᓪᓚᓯᒪᔪᓂᑦ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᒪᕕᖓᓐᓂᑦ ᐲᕐᓯᒍᑎᐅᑦᓱᓂ ᐊᓪᓚᓯᒪᔪᖕᖑᐃᕕᑦᓴᔭᒥᒃ?

ᑭᐅᔭᐅᑦᔪᑎᖏᑦ 25: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᓕᒃ ᐃᓄᒃ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᒪᕕᖓᓐᓂᑦ ᐊᑎᕐᒥᓂᒃ ᐲᕐᑕᐅᖁᔨᓕᑐᐊᕐᐸᑦ

Please click here to download the Form E. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ E-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 26: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form F-ᒥᒃ ᑌᔭᐅᔪᒥᒃ: Request to Review a Decision Application Form? ᐊᑕᓐᓂᐅᕈᑎᒥᒃ ᕿᒥᕐᕈᔭᐅᖁᔨᓗᓂ ᑐᑭᑖᕈᑕᐅᔪᕕᓂᐅᑎᓪᓗᒍ ᐱᒐᓱᒍᑎᐅᑦᓱᓂ ᐊᓪᓚᓯᒪᔪᖕᖑᐃᒍᑎᐅᒪᔪᖅ?

ᑭᐅᔭᐅᑦᔪᑎᖏᑦ 26: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᓕᒃ ᖃᖓᑐᐃᓐᓇᖅ ᐃᓄᒃ ᐊᐱᕆᓯᒪᓕᑐᐊᕐᐸᑦ ᕿᒥᕐᕈᔭᐅᖁᔨᓗᓂ ᑐᑭᑕᕈᑕᐅᔪᕕᓂᕐᓂᒃ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᒃᑯᓄᑦ.

Please click here to download the Form F. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ F-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 27: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form G-ᒥᒃ ᑌᔭᐅᔪᒥᒃ: Declaration of Inuit Customary Adoption Form? ᐅᖃᒻᒪᕆᒍᑎᒥᒃ ᐃᓄᑐᐃᓐᓇᑎᒍᑦ ᐱᐅᓯᑐᖃᒃᑯᑦ ᑎᒍᐊᕐᑕᑐᖃᓚᐅᕐᑎᓗᒍ ᐊᓪᓚᓯᔪᖕᖑᐃᕕᑦᓴᔭᒥᒃ?

ᑭᐅᔭᐅᑦᔪᑎᖏᑦ 27: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᑐᕐᑕᐅᒋᐊᓕᒃ ᐃᓄᑐᐃᓐᓇᐅᑉ ᕿᑐᕐᖓᖓ ᑎᒍᐊᕐᑖᖑᑐᐊᕐᐸᑦ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᑎᒎᕕᖏᓐᓄᑦ ᓄᓇᕕᒻᒥᐅᑎᒍᑦ ᐱᐅᓯᕐᓱᓱᑎᒃ ᑎᒍᐊᕐᑎᓯᓂᕐᒥᒃ ᐊᑑᑎᓚᐅᕐᑎᓗᒋᑦ.

Please click here to download the Form G. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ G-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 28: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form H-ᒥᒃ ᑌᔭᐅᔪᒥᒃ: Nunavik Inuit Beneficiary Card with Photo Application Form (Adult)/ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᑦᔨᖑᐊᓕᒻᒥᒃ ᓯᒃᑭᑖᐱᒻᒥ ᐱᒐᓱᒍᑎᑦᓴᔭᐅᑦᓱᓂ ᐊᓪᓚᓯᒪᔪᖕᖑᐃᕕᑦᓴᔭ (ᐃᓄᒻᒪᕆᓐᓄᑦ ᐃᓕᖓᔪᖅ) ?

ᑭᐅᔭᐅᑦᔪᑎᖏᑦ 28: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᓕᒃ ᖃᖓᑐᐃᓐᓇᖅ ᐃᓄᒃ ᐅᑭᐅᓕᒃ 18-ᓂᒃ ᐅᖓᑖᓄᓪᓗ ᐱᒍᒪᑐᐊᕐᐸᑦ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᓯᒃᑭᑖᐱᖓᓂᒃ ᐊᑦᔨᖑᐊᓕᒻᒥᒃ ᓴᓇᔭᐅᔪᕕᓂᐅᑦᓱᓂ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧᑦ.

Please click here to download the Form H. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ H-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 29: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form I-ᒥᒃ ᑌᔭᐅᔪᒥᒃ: Nunavik Inuit Beneficiary Card with Photo Application Form (Child)? ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᑦᔨᖑᐊᓕᒻᒥᒃ ᓯᒃᑭᑖᐱᒻᒥ ᐱᒐᓱᒍᑎᑦᓴᔭᐅᑦᓱᓂ ᐊᓪᓚᓯᒪᔪᖕᖑᐃᕕᑦᓴᔭ (ᑲᒃᑲᓛᓄᑦ/ᐱᐊᕋᕐᓄᑦ ᐃᓕᖓᔪᖅ)

ᑭᐅᔭᐅᑦᔪᑎᖏᑦ 29: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᓕᒃ ᖃᖓᑐᐃᓐᓇᖅ ᐃᓄᒃ ᐅᑭᐅᓕᒃ 18 ᐊᑖᓂ, ᐱᔪᒪᔭᖃᓕᑐᐊᕐᐸᑦ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᓯᒃᑭᑖᐱᖓᓐᓂᒃ ᐊᑦᔨᖑᐊᕐᑕᓕᒻᒥᒃ ᐋᕐᕿᑕᐅᒪᑦᓱᓂ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧ. ᖃᐅᔨᒪᔭᐅᒋᐊᓕᒃ ᕿᑐᕐᖓᐅᔪᑦ 12 ᐊᑖᓂ ᐅᑭᐅᓖᑦ, ᐊᑦᔨᖑᐊᖃᕆᐊᑐᖕᖏᒪᑕ ᐱᕙᓪᓕᖁᑎᑕᕐᑕᓂᕐᒧᑦ ᓯᒃᑭᑖᐱᖁᑎᖏᑦ.

Please click here to download the Form I. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ I-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 30: ᖃᖓ ᐊᑐᕆᐊᖃᕋᔭᕐᐳᖓ ᐊᓪᓚᓯᒪᔪᖕᖑᐃᕕᑦᓴᔭᒥᒃ Form J-ᒥᒃ ᑌᔭᐅᔪᒥᒃ: Access to nominative information of the Nunavik Inuit Beneficiaries Register Application Form ᐱᒐᓱᒍᓐᓇᐅᑎᐅᑦᓱᓂ ᑐᑭᓯᒪᒍᑎᑦᓴᓂᒃ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᑕᐅᒪᕕᖓᓐᓂᒃ?

ᑭᐅᔭᐅᑦᔪᑎᖏᑦ 30: ᑖᓐᓇ ᐊᓪᓚᓯᒪᔪᖕᖑᐃᕕᑦᓴᔭ ᐊᐅᓪᓚᑎᑕᐅᒋᐊᓕᒃ ᑐᕌᕐᓗᓂ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᒃᑯᓄᑦ, ᐊᑐᕐᑕᐅᒋᐊᓕᒃ ᖃᖓᑐᐃᓐᓇᖅ ᐃᓄᒃ ᐊᒻᒪᓗ/ᐅᕝᕙᓘᓐᓃᓗ ᐱᓇᓱᒐᖃᕐᕕᒃ ᐱᒍᒪᔭᖃᑐᐊᕐᐸᑦ ᑐᑭᓯᒪᒍᑎᑦᓴᓂᒃ ᐊᓪᓚᑕᐅᒪᔪᓂᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᓯᒪᔪᖕᖑᑕᐅᒪᕕᖓᓐᓂ.

Please click here to download the Form J. /ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕈᒪᒍᕕᐅᒃ ᐊᓪᓚᓯᒪᔪᖕᖑᐃᕕᑦᓴᔭ J-ᒥᒃ ᓇᓗᓀᒃᑯᑕᓕᒃ.

ᐊᐱᕆᒍᑎ 31: Where can I apply to enrol as an Inuit beneficiary? ᓇᓃ ᐊᓪᓚᓯᒪᔪᖕᖑᐃᒍᑎᓕᐅᕈᓐᓇᐳᖓ ᐃᓚᐅᔪᖕᖑᕋᓱᒍᑎᑦᓴᑲᓂᒃ ᐃᓄᑐᐃᓐᓇᓄᑦ ᐱᕙᓪᓕᖁᑎᑖᕐᑕᑐᓄᑦ?

ᑭᐅᔭᐅᑦᔪᑎᖏᑦ 31: ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔩᑦ ᓴᕐᕿᑎᑕᐅᓯᒪᕗᑦ ᐃᓘᓐᓇᖏᓐᓂᒃ ᐃᓄᐃᑦ ᓄᓇᓕᖏᓐᓂ. ᐊᑕᖏᕐᓱᑎᒃ ᖁᓕᓪᓗ/ᑕᓪᓕᒪᐅᔪᕐᓗ ᐱᖓᓲᔪᕐᑐᓗᐃᑦ (16) ᐃᓚᐅᔪᓕᕆᓂᕐᓄᑦ ᑲᑎᒪᔩ: ᑲᖏᕐᓱᐊᓗᒃᔪᐊᖅ, ᑰᒃᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᒃ, ᖁᐊᕐᑕᖅ, ᑲᖏᕐᓱᔪᐊᖅ, ᓴᓪᓗᐃᑦ, ᐃᕗᔨᕕᒃ, ᐊᑯᓕᕕᒃ, ᐳᕕᕐᓂᑐᖅ, ᐃᓄᑦᔪᐊᖅ, ᐅᒥᐅᔭᖅ, ᑰᒃᔪᐊᕌᐱᒃ ᓯᔅᓵᓯᐱ ᐊᒻᒪᓗ ᑭᓪᓕᓂᖅ
(
ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔩᑦ)

ᐊᐱᕆᒍᑎ 32: ᑭᓈ ᑲᒪᒋᔭᖃᕐᑎᐅᕙ ᐊᓪᓚᑕᐅᓯᒪᕕᖏᓐᓂᒃ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᖏᑦᑕ?

ᑭᐅᔭᐅᑦᔪᑎᖏᑦ 32: ᑕᒪᓐᓇ ᐱᔭᑦᓴᖁᑕᐅᔪᖅ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧᑦ ᓴᕐᕿᑎᑕᐅᒪᑦᓱᓂ ᒪᑭᕝᕕᒃ ᐱᓇᓱᒐᖃᕐᕕᑯᑎᒍᑦ ᐱᖁᔭᖕᖑᑕᐅᑦᓱᓂ ᐱᖁᔭᑎᒍᑦ ᓲᓱᒋᔭᓕᒃᑯᑦ ᒪᑭᕝᕕᒃ ᐱᓇᓱᒐᖃᕐᕕᒥᒃ (ᐊᕕᑦᑐᓯᒪᓂᖅ S-18.1-ᒦᑦᓱᑎᒃ) ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒃ ᓄᓇᓯᒪᕗᖅ ᐅᕙᓂ ᑐᕌᕈᑎᒥ:

ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒃ
P.O. Box 179
ᑰᒃᔪᐊᑦ, ᑯᐯᒃ, J0M 1C0
ᐅᖄᓚᐅᑎᖓ: 819-964-2925
ᓱᑲᑦᑐᑯᕐᑎᓯᒍᑎᖓ: 819-964-0458
ᖃᕆᑕᐅᔭᒃᑯᑦ ᑐᕌᕈᑎᖓ: nunavikenrolmentoffice@makivik.org

ᖃᓄᕐᓗᓃᑦ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᐅᑉ ᐊᓪᓚᓯᒪᔪᖁᑎᖏᑦ ᑐᓴᕐᑎᓯᒍᑎᐅᓲᖑᖕᖏᓚᑦ ᐃᓕᖓᑎᓪᓗᒋᑦ ᐃᓚᐅᔫᒍᓐᓇᓂᕐᓄᑦ ᐊᒻᒪᓗ ᐃᓄᑐᐃᓐᓇᐅᑉ ᐃᓚᐅᔪᖕᖑᑎᑕᐅᓂᖓᓄᑦ ᐱᕙᓪᓕᖁᑎᑖᕐᑕᑐᓄᑦ. ᐱᑕᖃᕐᑎᓯᕕᐅᒐᒥ ᓴᐳᑦᔨᓯᒪᓂᕐᒥᓗ ᐊᑕᐅᑦᓯᑯᕐᑎᓯᓂᕐᒥᓗ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᖕᖓᔨᓂᒃ ᐊᒻᒪᓗ ᓄᓇᕕᒻᒥ ᐃᓚᐅᔪᓕᕆᓂᕐᒥᒃ ᕿᒥᕐᕈᓂᕐᒧᑦ ᑲᑎᒪᔨᓂᒃ ᑖᒃᑯᐊ ᑕᒪᕐᒥᒃ ᐱᒍᓐᓇᖁᓪᓗᒋᑦ ᐱᔭᑦᓴᖁᑎᒥᓐᓂᒃ ᐃᓕᖓᔪᓂᒃ ᐃᓚᐅᔪᓕᕆᓂᕐᒥᒃ ᐱᕙᓪᓕᖁᑎᑖᕐᑕᑐᓂᒃ.

ᐱᓪᓚᕆᐊᓘᔪᖅ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᐅᑉ ᐱᑕᖃᕆᐊᖃᕐᓂᖓ, ᐅᓪᓗᒥᓂᑕᕐᓂᒃ ᐊᓪᓚᖁᑎᖃᑦᓯᐊᓂᕐᒥᒃ ᓄᓇᕕᒻᒥᐅᑦ ᐃᓄᐃᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᒪᕕᖓᓐᓂ, ᑖᒃᑯᐊ ᐊᓪᓚᓯᒪᔪᖁᑕᐅᔪᑦ ᐊᑐᕐᑕᐅᓲᖑᒻᒪᑕ ᓂᕈᐊᕈᓐᓇᑐᑦ ᐊᓪᓚᑕᐅᒪᒍᑎᖏᓐᓂᒃ; ᓇᓗᓀᕆᒍᑎᐅᓱᖑᑦᓱᑎᒃᓗ ᐱᑎᑦᓯᒍᑎᐅᑦᓱᑎᓪᓗ ᐃᓄᑐᐃᓐᓇᓅᓕᖓᔪᓂᒃ ᐱᓇᓱᒍᑎᐅᓕᕋᔭᕐᒥᔪᓂᒃ; ᐊᓯᖏᓐᓄᓗ.

ᖃᐅᔨᒪᔭᐅᒋᐊᓕᒃ: ᐃᓄᒃ ᐱᔭᑦᓴᖁᑎᖃᕐᐳᖅ ᐊᓪᓚᑕᐅᒪᓗᓂ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᕙᓪᓕᖁᑎᑖᕐᑕᑐᑦ ᐊᓪᓚᑕᐅᒪᕕᐊᓐᓂ ᑐᓴᐅᒪᑎᑦᓯᒋᐊᖃᕐᓂᖓ ᓄᓇᓕᓐᓂ ᐃᓚᐅᔪᓕᕆᓂᕐᓄᑦ ᑲᑎᒪᔨᒃᑯᓂᒃ ᐱᑦᔪᑎᖃᕐᓗᓂ ᓄᓇᓕᒻᒧᑦ ᐱᑐᑦᓯᒪᐅᑎᒥᓂᒃ ᑐᓴᐅᒪᔭᐅᑎᑦᓯᓗᓂ ᖃᖓᑐᐃᓐᓇᖅ ᐊᑎᕐᒥᓂᒃ ᐊᓯᑦᔩᒍᓂ ᐊᒻᒪᓗ/ᐅᕝᕙᓘᓐᓃᓗ ᐊᑦᓯᔩᒋᐊᕐᓂᕈᓂ ᑐᑭᓯᒪᔭᐅᒍᑎᒥᓂᒃ ᐊᓪᓚᑕᐅᒪᑦᓱᑎᒃ ᐃᓚᐅᔪᓕᕆᔩᑦ ᐊᓪᓚᓯᒪᔪᒃᑯᕕᖓᓐᓂ, ᐊᑎᕐᓂᒃ ᐊᓪᓚᓯᒪᔪᒃᑯᕕᖓᓂᓗ ᐱᕙᓪᓕᖁᑎᑖᕐᑕᑐᓪᓗ ᓯᒃᑭᑖᐱᖓᓐᓂ.

ᓄᓇᖁᑕᐅᔫᑉ ᓯᓚᑖᓂ ᓄᓇᓯᒪᑐᐊᕈᕕᑦ, ᐃᕐᖃᐅᒪᑦᓯᐊᕆᐊᖃᕐᐳᑎᑦ ᐊᐅᓪᓚᑎᑦᓯᕕᖃᖃᑦᑕᕆᐊᖃᕆᐊᒥᒃ ᓄᓇᕕᒻᒥ ᐃᓚᐅᔪᓕᕆᓂᕐᓄᑦ ᐊᓪᓚᕕᒻᒧᑦ ᓯᓚᑎᑦᓴᑎᓐᓂᒃ ᐊᓯᑦᔨᔨᐊᖃᕐᓯᒪᓕᑐᐊᕈᕕᑦ ᓄᑦᑎᑐᕕᓂᐅᒍᕕᓪᓗ (Notice Change of Address when Residing Outside Territory).(ᑐᓴᕐᑕᐅᑎᑦᓯᒍᑏᑦ ᓯᓚᑎᑦᓴᐅᑉ ᐊᓯᑦᔨᓂᖓᓂᒃ ᓄᓇᓯᒪᓗᓂ ᓄᓇᕕᐅᑉ ᓯᓚᑖᓂ).