ᐊᕗᖓᓕᐅᒥᑎᑦᓯᒋᐊᕈᑏᑦ ᐊᖏᖃᑎᒌᒍᑎᐅᓯᒪᔪᓂᒃ ᓄᓇᕕᒻᒥ ᐃᓅᒐᓱᐊᕈᑎᓄᑦ ᐃᑯᓪᓚᐅᒥᑎᑦᓯᒋᐊᕐᓂᒧᑦ ᐊᒻᒪᓗ ᐃᑲᔪᕐᓯᒪᐅᑎᓅᓕᖓᑦᓱᑎᒃ ᐃᓪᓗᐃᑦ ᐃᓱᕐᕆᐅᑎᖏᓐᓄᑦ ᐊᒻᒪᓗ ᒪᙯᒍᑏᑦ ᐱᐅᒃᑯᑎᖏᓐᓄᑦ

ᑰᔾᔪᐊᒥ, ᑯᐯᒃ, ᐁᕆᓕ 27, 2017 – ᐅᑯᐊ ᐊᖏᖃᑎᒌᒍᑏᑦ ᑮᓇᐅᔭᖃᕐᑎᓯᓂᕐᒧᑦ ᐃᑯᓪᓚᐅᒥᑎᑦᓯᒋᐊᕐᓂᒧᑦ ᐃᓅᒐᓱᐊᕈᑎᓅᓕᖓᔪᓄᑦ ᓄᓇᕕᒻᒥ ᐊᐅᓚᑕᐅᓂᖃᕐᓱᑎᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (ᑲᑎᕕᒃ) ᐊᕗᖓᓕᐅᒥᑎᑕᐅᒋᐊᓯᒪᓕᕐᒥᔪᑦ ᒫᑦᔨ 2018-ᒧᑦ. ᑖᒃᑯᐊ ᐊᕐᕌᒍᓕᒫᒧᑦ ᐊᕗᖓᓕᐅᒥᑎᑦᓯᒋᐊᕈᑏᑦ ᑖᒃᑯᓄᖓ ᑲᑎᕕᒃᑯᓄᓪᓗ ᒪᑭᕝᕕᑯᓄᓪᓗ ᑯᐯᒃ ᑲᕙᒪᖓᓄᓪᓗ ᐊᖏᖃᑎᒌᒐᓱᐊᕈᑎᐅᒍᓐᓇᓂᐊᕐᑐᖅ ᓇᓗᓀᕐᑕᐅᔪᖃᕋᐊᓱᐊᕐᑎᓗᒍ ᐊᑐᕈᓐᓇᓯᐊᕐᑐᓂᒃ ᐊᑯᓃᕐᑐᓂᓪᓗ ᖃᓄᕐᑑᕆᐊᕈᑎᓂᒃ ᑕᒪᑦᓱᒧᖓ ᓄᓇᕕᒻᒥ ᐃᓅᒐᓱᐊᕈᑏᑦ ᐊᑭᑐᔫᓗᐊᕐᓂᕆᓲᖏᓐᓄᑦ, ᑐᖕᖓᕕᒋᑦᓱᒋᑦ ᐃᓱᒪᒋᔭᐅᓯᒪᓕᓚᐅᔪᐃᑦ ᒪᕐᕉᓂᒃ ᐊᕐᕌᒍᕐᓂᒃ ᖃᐅᔨᓴᕐᑕᐅᔪᖃᓚᐅᔪᑎᓗᒍ ᓚᕚᓪ ᐃᓕᓐᓂᐊᕕᒻᒪᕆᖓᓄᑦ ᓅᕕᒻᐱᕆ 2016-ᒥ.

ᓄᑖᑦ ᒪᙯᒍᑎᓂᒃ ᐊᑭᓖᒍᑎᕕᓂᕐᓂᒃ ᐅᑎᕐᕕᐅᒍᓐᓇᐅᑏᑦ 

ᓄᓇᓕᓐᓂ ᖃᔭᓕᐅᕐᑕᐅᒪᔪᐃᑦ ᐃᓚᔭᐅᓯᒪᓕᕐᑐᑦ ᑕᒪᒃᑯᓄᖓ ᒪᙯᒍᑏᑦ ᐃᖏᕐᕋᐅᑎᒋᓲᖏᓐᓄᑦ ᐱᐅᒃᑯᑎᖏᓐᓄᓗ ᐃᓚᒋᔭᐅᓂᐊᓕᕐᑎᓗᒍ ᐃᓪᓗᐃᑦ ᐃᓱᕐᕉᑎᖏᓐᓄᓗ ᒪᙯᒍᑎᓄᓪᓗ ᐃᑲᔪᕐᓯᒪᐅᑎᓕᐊᖑᓯᒪᔪᕐᓄᑦ, ᑕᒪᓐᓇ ᖃᓄᕐᑑᕆᐊᕈᑎᐅᓂᖃᕐᒪᑦ ᓄᓇᕕᒻᒥ ᐃᓅᒐᓱᐊᕈᑏᑦ ᐊᑭᑐᔫᓗᐊᕐᓂᖏᓐᓄᑦ. ᑖᓐᓇᐅᓂᖓ ᑐᕌᖓᓂᖃᕐᑎᑕᐅᕗᖅ ᐃᖏᕐᕋᐅᑎᓄᑦ ᐱᐅᒃᑯᑎᓄᓪᓗ ᒪᙯᒍᑎᐅᓲᓄᑦ, ᐃᖃᓗᓐᓂᐊᕈᑎᐅᓲᓄᓪᓗ, ᒥᑭᒋᐊᕐᓂᐊᓲᓄᓪᓗ ᐊᒻᒪᓗ ᓄᐊᑦᓯᓂᐅᓲᓄᑦ. ᓂᕆᐅᒋᔭᐅᕗᖅ ᑕᒪᓐᓇ ᖃᔭᓕᐅᕐᓂᖅ ᑲᔪᖏᕐᓭᕈᑎᐅᓂᐊᕐᑎᓗᒍ ᐱᐅᓯᑐᖃᕐᑎᒍᑦ ᓱᓇᓱᐊᕐᓂᓴᐅᔪᖃᕋᔭᕐᑎᓗᒍ, ᓂᕿᑦᓴᓯᐅᕐᓂᒥᓪᓗ ᐃᑲᔪᕐᓯᒋᐊᕈᑕᐅᓂᖃᕐᓗᓂ ᐊᒻᒪᓗ ᖃᔭᓕᐅᕈᓯᕐᒥ ᓄᓇᓕᓐᓂ ᐱᕙᓪᓕᐊᑎᑦᓯᒍᑕᐅᓗᓂ. ᓄᓇᓕᓐᓂ ᖃᔭᕐᓯᔪᖃᕐᐸᑦ ᓄᓇᓖᑦ ᒪᙯᑦᑎᖏᑦᑕ ᓴᐳᒻᒥᔨᖏᑦᑎᒍᑦ ᐱᔪᓐᓇᑎᑕᐅᓂᐊᓕᕐᑐᖅ 30% ᐳᓴᓐᑎᓂᒃ ᓂᐅᕕᓕᕐᒥᒍᓂ ᐊᑭᑭᓐᓂᓴᐅᑎᑦᓯᒍᑕᐅᒐᔭᕐᑐᒥᒃ ᐅᓄᕐᓂᐹᖃᕈᓐᓇᓂᐊᕐᑎᓗᒍ $500-ᓂᒃ, ᑌᒪᑦᓭᓇᖅ ᑌᒣᓕᔭᐅᓲᖑᒻᒥᒪᑕ ᖃᒧᑏᑦ, ᑲᓕᒉᓪᓗ ᐊᒻᒪᓗ ᓯᑯᓄᑦ ᐃᑰᑌᑦ.

ᑲᑎᕕᒃᑯᑦ ᐊᐅᓚᑦᓯᓂᖃᓲᖑᒻᒪᑕ ᐱᖓᓲᔪᕐᑐᐃᓂᒃ ᖃᓄᕐᑑᕆᐊᕈᑎᓂᒃ ᐃᑯᓪᓚᐅᒥᑎᑦᓯᒋᐊᕈᑕᐅᓲᓂᒃ ᓄᓇᕕᒻᒥᐅᑦ ᐃᓅᒐᓱᐊᕈᑎᖏᑦᑕ ᐊᑭᑐᓗᐊᓲᖑᓂᖏᓐᓄᑦ. ᒪᑯᐊᖑᓲᓂᒃ:

1. ᐃᓄᒻᒪᕆᓐᓂᒃ ᐃᑲᔫᑏᑦ ᑐᕌᖓᓂᖃᕐᑎᑕᐅᓲᖑᒻᒪᑕ ᐃᑯᓪᓚᐅᒥᑎᑦᓯᒋᐊᕈᑎᐅᑦᓱᒃᑎ ᑮᓇᐅᔭᑎᒍᑦ ᒪᑭᑕᒐᓱᐊᕈᑎᒋᔭᐅᓲᓂᒃ ᐃᓄᒻᒪᕆᓐᓄᑦ ᒪᕐᕈᕕᑦᑐᒥᒃ ᐊᕐᕌᒍᑕᒫᑦ ᐃᑲᔪᕐᓯᔭᐅᒍᑎᑖᕐᑎᑕᐅᑦᓱᑎᒃ $875-ᓂᒃ ᐃᓚᐅᔪᐃᑦ ᑖᒃᑯᓄᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᓐᓄᑦ (ᐊᖏᖃᑎᒌᓐᓂᒧᑦ) ᓄᓇᓯᒪᕕᖃᕐᑐᓄᑦ ᓄᓇᕕᒻᒥ ᐅᑭᐅᓕᓐᓄᑦ 60-ᓂᒃ ᐅᖓᑖᓄᓪᓗ.

2) ᖃᖓᑦᑕᐅᑏᑦ ᐊᑭᑭᓪᓕᒋᐊᕐᑕᐅᒪᒍᑎᖏᑦᑕ ᐃᑲᔪᕐᓯᒪᐅᑎᖏᑦ ᐊᑭᑭᓪᓕᒋᐊᕐᑎᓯᒍᑎᐅᓯᒪᓲᖑᒻᒥᔪᑦ ᓄᓇᕕᒻᒥᐅᓕᒫᓄᑦ ᐊᐅᓚᓂᖃᓕᑐᐊᕐᒪᑕ ᓄᓇᓖᑦ ᐊᓯᖏᓐᓄᑦ ᐅᕝᕙᓘᓐᓃᑦ ᑯᐯᒃ ᓯᕿᓂᖓᓄᑦ, ᐊᒻᒪᓗ ᐊᖏᖃᑎᒌᓐᓂᒧᑦ ᐃᓚᐅᔪᐃᑦ ᓄᓇᕕᐅᑉ ᓯᓚᑖᓂ ᓄᓇᓯᒪᕕᖃᑐᐊᕐᒪᑕ ᓄᓇᕕᒻᒧ ᐅᑎᓕᑐᐊᕐᒪᑕ.

3) ᓂᕿᑐᐃᓐᓇᓂᒃ ᓄᓇᓕᓐᓂ ᓴᐳᒻᒥᒍᑎᓄᑦ ᐃᑲᔪᕐᓯᒪᐅᑏᑦ ᑐᕌᖓᓂᖃᕐᑎᑕᐅᓲᖑᕗᑦ ᓂᕿᑐᐃᓐᓇᖃᕐᓂᓴᐅᑎᑦᓯᒐᓱᐊᕈᑕᐅᑦᓱᑎᒃ ᐊᑐᓂᑦ ᓄᓇᓕᓐᓂᒃ ᐊᑭᑭᓪᓕᒋᐊᕐᑎᓯᓂᒃᑯᑦ ᑕᒪᑦᓱᒧᖓ ᐃᓕᖓᔪᓂᒃ ᓂᐅᕕᐊᑦᓴᐅᓲᓂᒃ ᐃᖏᕐᕋᐅᑎᒋᔭᐅᓲᓂᓪᓗ.

4) ᐃᓪᓗᐃᑦ ᐃᓱᕐᕉᑎᖏᓐᓄᑦ ᐊᒻᒪᓗ ᒪᙯᒍᑏᑦ ᐱᐅᒃᑯᑎᖏᓐᓄᑦ ᐃᑲᔪᕐᓯᒪᐅᑏᑦ ᐃᑲᔪᕐᓯᒍᑎᐅᓲᖑᕗᑦ ᐊᑭᑐᔪᒻᒪᕆᐅᓲᓂᒃ ᐃᓪᓗᐃᑦ ᐃᓱᕐᕉᑎᖏᓐᓂᒃ ᐱᐅᒃᑯᑎᓚᑳᖏᓐᓂᓗ ᑕᒪᒃᑯᓂᖓᓗ ᓂᕿᑦᓴᓯᐅᕈᑏᑦ ᐃᖏᕐᕋᐅᑎᖏᓐᓄᑦ ᐱᐅᒃᑯᑎᖏᓐᓄᓗ.

5) ᓂᕿᓄᑦ ᐊᒻᒪᓗ ᐊᓯᖏᓐᓄᑦ ᐱᔭᐅᒋᐊᖃᓪᓚᕆᑦᑐᓄᑦ ᐃᑲᔪᕐᓯᒪᐅᑏᑦ ᐊᑭᑭᓪᓕᒋᐊᕐᑎᓯᒍᑕᐅᓲᖑᕗᑦ ᓄᓇᕕᒻᒥᐅᓕᒫᓄᑦ 20 ᐊᒻᒪᓗ 40% ᐳᓴᓐᑎᓄᑦ 1500-ᓂᒃ ᐅᓄᕐᓂᓕᓐᓄᑦ ᓂᐅᕕᐊᑦᓴᐅᓲᓄᑦ ᒪᑯᓂᖓ ᓂᕿᓂᒃ, ᑎᒥᒥᒃ ᐅᕝᕙᕈᑎᓂᒃ, ᐃᓪᓗᒥᐅᑕᕐᓂᒃ, ᐊᓐᓄᕌᓂᒃ ᐊᒻᒪᓗ ᑲᒥᓐᓂᒃ, ᒪᑯᓂᖓᓗ ᐅᓪᓕᑐᐃᑦ ᐊᑐᕆᐊᖃᓲᖏᓐᓂᒃ, ᓂᐅᕕᕐᑕᐅᓲᓂᒃ ᓄᓇᕕᐅᑉ ᓂᐅᕕᕐᓂᐊᕕᖏᓐᓂ.

6) ᐅᕐᓱᐊᓗᒻᒧᑦ ᐃᑲᔪᕐᓯᒪᐅᑏᑦ ᓴᐳᒻᒥᒍᑎᐅᓂᖃᓲᖑᕗᑦ ᓂᕿᑦᓴᓯᐅᕐᑎᓂᒃ ᓄᓇᓕᐊᕈᓐᓇᐅᑎᒋᔭᐅᑦᓱᑎᒃ ᐆᒪᔪᕐᓂᐊᕕᐅᓲᓄᓪᓗ ᐃᖃᓗᓐᓂᐊᕕᐅᓲᓄᓪᓗ.

ᓄᓇᕕᒻᒥ ᐃᓅᒐᓱᐊᕈᑎᓄᑦ ᐃᑲᔪᕐᓯᒪᐅᑏᑦ ᐊᑭᓕᕐᑕᐅᓲᖑᕗᑦ ᑯᐯᒃ ᑲᕙᒪᖓᓄᑦ ᒪᓕᑦᓱᒋᑦ ᐊᖏᖃᑎᒌᒍᑎᐅᓯᒪᔪᑦ ᐊᑎᓕᐅᕐᑕᐅᓯᒪᔪᓂᒃ ᑲᑎᕕᒃᑯᓄᓪᓗ ᒪᑭᕝᕕᑯᓄᓪᓗ. ᑐᑭᓯᒋᐊᓪᓚᕈᒪᔪᖃᕐᐸᑦ ᑖᒃᑯᓄᖓ ᐱᖓᓲᔪᕐᑐᓄᑦ ᓄᓇᕕᒻᒥ ᐃᓅᒐᓱᐊᕈᑏᑦ ᐃᑯᓪᓚᐅᒥᔭᐅᒋᐊᕈᑎᒋᓲᖏᓐᓄᑦ, ᑕᑯᒋᐊᕈᓐᓇᐳᑎᑦ ᖃᕆᑕᐅᔭᒃᑯᑦ ᐅᕙᓃᑦᑐᓂᒃ http://www.krg.ca/en/cost-of-living-program.

-30-

ᑐᑭᓯᓂᐊᕐᕕᓭᑦ: 

ᔭᓐ-ᐱᓕᑉ ᑐᐳᐊ
ᑐᓴᐅᒪᖃᑎᒌᑦᑎᓯᓂᕐᒥᒃ ᑐᑭᒧᐊᕐᑎᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ
ᐅᖄᓚᐅᑎᖓ: 819-964-2961 ext: 2219
media@krg.ca | www.krg.ca

ᒍᐃᓕᐊᒻ ᑕᒍᕐᓈᖅ
ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ 819-964-2925
wtagoona@makivik.org

ᑲᑎᕕᒃᑯᑦ ᓇᐅᓕᒫᑦᓯᐊᓄᑦ ᐃᓄᓐᓄᑦ ᑎᒥᖁᑎᒋᔭᐅᕗᖅ ᓄᐃᑕᐅᓯᒪᑦᓱᓂ 1978-ᒥ, ᐊᑖᒍᕐᓱᓂ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᐅᑉ. ᑖᓐᓇ ᑎᒥᐅᔪᖅ ᐊᐅᓚᑦᓯᕕᖃᓲᖑᕗᖅ ᑯᐯᒃ ᑕᕐᕋᓕᒫᑲᓴᖓᓂᒃ 55 ᐃᑳᖓᔫᑉ ᑕᕐᕋᖓᓃᑦᑐᒥᒃ ᒪᑯᓄᖓ ᒥᓂᓯᐹᓕᑎᓕᕆᓂᕐᒧᐊᖓᔪᓄᑦ, ᐃᖏᕐᕋᐅᑎᓕᕆᓂᕐᒧᑦ, ᐊᕙᑎᓕᕆᓂᕐᒧᑦ, ᐳᓖᓯᓕᕆᓂᕐᒧᑦ, ᐱᓇᓱᒐᑦᓴᓕᕆᓂᕐᒧᑦ, ᐱᓇᓱᒐᕐᒥᒃ ᐱᒋᐅᕐᓭᓂᕐᒧᑦ, ᓂᕿᑖᕈᑎᑖᕐᑕᓂᕐᒧᑦ, ᐯᕆᑦᓯᕕᓕᕆᓂᕐᒧᑦ, ᓄᑕᐅᓯᓕᕈᓐᓇᓂᑐᓂᒃ ᐱᕕᑦᓴᓕᕆᓂᕐᒧᑦ, ᓄᓇᐅᑉ ᐊᑐᕐᑕᐅᓂᖓᓂᒃ ᐸᕐᓀᓂᓕᕆᓂᕐᒧᑦ, ᐃᓄᓕᒫᓂᒃ ᐊᑦᑕᓇᕐᑐᒥᑦᑎᓯᑦᑌᓕᓂᕐᒧᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᓕᕆᓂᕐᒧᑦ. 

ᒪᑭᕝᕕᑯᑦ ᐱᕙᓪᓕᐊᑎᑦᓯᒐᓱᐊᕐᑎᐅᓂᕐᒥᒃ ᑎᒥᐅᔫᒍᑎᖃᕐᐳᖅ ᑎᓕᔭᐅᒪᓂᖃᕐᓱᓂ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓂᒃ ᐊᑖᒍᕐᑎᓗᒋᑦ ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑕ. ᒪᑭᕝᕕᑯᑦ ᐊᑐᕐᓂᖃᓲᖑᒻᒪᑕ ᑖᒃᑯᓂᖓ ᑮᓇᐅᔭᓂᒃ ᐊᐅᓚᑦᓯᔨᐅᓂᕐᒥᒃ ᐅᑎᕐᑐᓴᓕᐅᕐᓂᒥᓪᓗ ᑫᓪᓗᑐᐃᓂᕐᒥᓗ ᑮᓇᐅᔭᑎᒍᑦ ᐱᕈᕐᐸᓕᐊᒐᓱᐊᕐᓂᒥᒃ ᐃᑲᔪᕐᓯᓂᕐᒥᑎᒍᑦ ᓄᐃᑦᓯᓂᒃᑯᑦ ᐃᓄᓐᓄᑦ ᐊᐅᓚᑕᐅᓂᖃᕐᑐᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᒻᒥᔪᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᕐᒥᒃ, ᐱᔪᓐᓇᓯᐊᕐᓂᒥᓪᓗ, ᐊᑦᓱᔫᑎᑦᓯᑌᓕᓂᕐᒥᓗ ᐊᒻᒪᓗ ᐃᓄᐃᑦ ᓄᓇᓕᓐᓂ ᐃᓕᓐᓂᐊᓂᖏᓐᓂᒃ

ᐊᕗᖓᓕᐅᒥᑎᑦᓯᒋᐊᕈᑏᑦ ᐊᖏᖃᑎᒌᒍᑎᐅᓯᒪᔪᓂᒃ ᓄᓇᕕᒻᒥ ᐃᓅᒐᓱᐊᕈᑎᓄᑦ ᐃᑯᓪᓚᐅᒥᑎᑦᓯᒋᐊᕐᓂᒧᑦ ᐊᒻᒪᓗ ᐃᑲᔪᕐᓯᒪᐅᑎᓅᓕᖓᑦᓱᑎᒃ ᐃᓪᓗᐃᑦ ᐃᓱᕐᕆᐅᑎᖏᓐᓄᑦ ᐊᒻᒪᓗ ᒪᙯᒍᑏᑦ ᐱᐅᒃᑯᑎᖏᓐᓄᑦ