ᐅᖓᓗᒃᑯᑦ ᑐᖓᓕᐊᓐᓂ ᑭᖑᓪᓕᐸᐅᓕᕐᑐᒥᓪᓗ ᑐᓴᕐᑎᓯᒍᑎᖃᕐᐳᑦ ᐱᓇᓱᐊᕋᑦᓴᓄᑦ ᑐᑦᓯᕋᐅᑎᓕᐅᕐᓂᒧᑦ 2015-2016 ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓄᑦ.

ᑰᑦᔪᐊᖅ, ᓄᓇᕕᒃ-ᑏᓯᒻᐱᕆ 15, 2014… ᐅᖓᓗᒃ ᑮᓇᐅᔭᖃᕐᑎᓯᒍᑏᑦ, ᑲᑐᑦᔮᒍᑦᓱᓂ ᐊᐅᓚᑕᐅᑦᓱᓂ ᒪᑭᕝᕕᒧᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ ᑐᖓᓕᐊᓐᓂ ᐱᕕᑦᓴᖃᕐᑎᓯᕗᖅ ᐱᓇᓱᐊᕋᑦᓴᓄᑦ ᑐᑦᓯᕋᐅᑎᓕᐅᕐᓂᒥᒃ ᔭᓄᐊᕆ 5-ᒥ ᔭᓄᐊᕆ 30-ᒧᑦ, 2015-ᒥ.

ᑖᓐᓇ ᑐᓴᕐᑎᓯᒍᑎᐅᔪᖅ ᐱᕕᑦᓴᖃᕐᑎᓯᓚᖓᕗᖅ ᐱᓇᓱᐊᕋᑦᓴᐅᔪᓂᒃ ᐊᐅᓚᑦᓯᔨᓂᒃ ᓯᕗᓪᓕᒥ ᑐᑦᓯᕋᐅᑎᓕᐅᕐᓂᖃᑦᑎᓗᒍ ᐱᕕᑦᓴᖃᓚᐅᔪᙱᑐᓂᒃ ᑮᓇᐅᔭᓂᒃ ᑐᑦᓯᕋᐅᑎᓕᐅᕐᓂᒥᒃ. ᑖᓐᓇ ᑐᓴᕐᑎᓯᒍᑎᐅᓱᖓᕐᑐᖅ 2015-2016-ᒥ ᑮᓇᐅᔭᕐᑐᓇᒧᑦ, ᑐᙵᕕᖃᓚᖓᑦᓱᑎᓪᓗ ᐅᖓᓗᒃᑯᑦ ᓄᑖᒍᑦᓱᑎᒃ ᒪᓕᒐᖏᓐᓂᒃ ᑐᙵᕕᒋᒋᐊᓕᖏᓐᓂᓗ.

ᐱᒻᒪᕇᑦ ᑐᓴᕋᑦᓭᑦ ᐃᓚᖃᕐᐳᑦ ᐅᑯᓂᖓ:

  • ᑖᓐᓇ ᑐᓴᕐᑎᓯᒍᑎᒃ ᑐᕌᖓᕗᖅ ᓄᑖᓄᑦ ᐱᓇᓱᐊᕋᑦᓴᐅᔪᓄᑦ ᑭᓯᐊᓂ (ᑌᒃᑯᓄᖓ ᑐᑦᓯᕋᐅᑎᓕᐅᓚᐅᔪᑦᔭᖏᑦᑐᓄᑦ ᐅᑭᐊᑦᓴᒥ) ᐱᓇᓱᐊᕋᑦᓴᐅᔪᓄᓪᓗ ᐃᒣᒋᐊᖁᔨᒍᑎᐅᓯᒪᔪᓄᑦ ᐅᖓᓗᒃᑯᑦ ᐱᓇᓱᑦᑎᖏᓐᓄᑦ ᒪᓂᔭᐅᒋᐊᓪᓚᕋᔭᕐᑎᓗᒋᑦ.
  • ᐱᓇᓱᐊᕋᑦᓴᓄᑦ ᑕᑕᕐᓴᒐᐃᑦ ᒪᓂᔭᐅᒋᐊᖃᕐᐳᑦ ᔭᓄᐊᕆ 30, 2015-ᒍᓚᐅᕐᑎᓇᒍ.
  • ᐱᓇᓱᐊᕋᑦᓭᑦ ᑮᓇᐅᔭᓂᒃ ᑐᑦᓯᕋᐅᑎᐅᓯᒪᔪᑦ ᐅᖓᓗᒃᑯᓄᑦ ᐱᒋᐊᕐᑎᑕᐅᕐᖃᔭᑦᔭᖏᑦᑐᑦ ᑮᓇᐅᔭᖃᕐᑎᓯᒍᑎᐅᓚᖓᓗᑎᒃ ᐊᖏᕐᑕᐅᖏᓐᓂᓕᒫᖏᓐᓂ.
  • ᐱᓇᓱᐊᕋᑦᓴᓂᒃ ᕿᒥᕐᕈᓂᖃᓛᕐᑐᖅ ᒫᑦᔨ 2015 ᐱᓇᓱᐊᕈᓯᖏᑦᑕ ᓯᕗᓪᓕᐹᖓᓂ.
  • ᐱᓇᓱᐊᕋᑦᓭᑦ ᓯᕕᑐᓂᖃᕈᓐᓇᓕᕐᑐᑦ ᐊᕐᕌᒍᒥ ᐊᑕᐅᓯᕐᒥ ᐅᖓᑖᓄᓪᓗ ᑭᓯᐊᓂ ᐅᖓᑖᓅᒋᐊᓪᓚᕕᖃᕋᑎᒃ ᐊᕐᕌᒍᓂ ᐱᖓᓱᓂ. ᑖᒪᓐᓇ ᐱᕕᖃᕐᑎᓯᒍᑎᐅᓚᖓᕗᖅ ᐊᖏᕈᑕᐅᓯᒪᔪᓂᒃ ᐱᓇᓱᐊᕋᑦᓴᐅᔪᓂᒃ, ᐱᓗᐊᕐᑎᓗᒋᑦ ᐋᖓᔮᓐᓇᑑᑉ ᐃᒥᐊᓘᓪᓗ ᐊᑐᕐᓂᓗᑦᑕᐅᓂᖓᓂᒃ. ᐱᓇᓱᐊᕋᑦᓴᓄᑦ ᑐᑦᓯᕋᐅᑏᑦ ᑐᙵᕕᖃᕆᐊᖃᕐᖁᑦ ᐅᖓᓗᒃᑯᑦ ᒪᓕᒐᖏᓐᓂᒃ ᐊᑐᐃᓐᓇᐅᑎᑕᐅᔪᓂᒃ ᐅᖓᓗᒃᑯᑦ ᖃᕆᑕᐅᔭᒃᑯᑦ ᓄᐃᑕᑎᑦᓯᕕᖓᑎᒍᑦ.
  • ᐱᓇᓱᐊᕋᑦᓄᑦ ᑕᑕᑦᓴᒉᑦ ᖃᕆᑕᐅᔭᒃᑯᑦ ᐊᓪᓚᓯᒪᒍᑎᐅᒋᐊᓖᑦ ᒪᓂᔭᐅᓗᑎᓪᓗ ᖃᕆᑕᐅᔭᒃᑯᑦ.

ᐅᖓᓗᒃᑯᑦ ᑮᓇᐅᔭᖃᕐᑎᓯᒍᑏᑦ 2006-ᒥ ᓄᐃᓯᒪᕗᖅ ᓴᓇᕐᕈᑎᒃ ᐊᖏᖃᑎᒌᒍᑎᑎᒍᑦ ᑮᓇᐅᔭᖃᕐᑎᓯᒍᑎᐅᑦᓱᑎᒃ ᑯᐯᒃᑯᑦ ᑲᕙᒪᖓᓄᑦ ᐊᐅᓚᑕᐅᓚᖓᔪᓂᒃ ᒪᑭᕝᕕᒧᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ. ᐅᖓᓗᒃᑯᑦ ᑎᒥᙳᑎᑕᐅᓯᒪᕗᑦ ᑮᓇᐅᔭᓂᒃ ᐊᑐᐃᓐᓇᐅᑎᑦᓯᓚᖓᑎᓪᓗᒋᑦ ᐱᓇᓱᐊᕋᑦᓴᐅᔪᓄᑦ ᐱᓂᕐᓗᑌᓕᒪᒍᑎᑦᓴᐅᓚᖓᔪᓄᑦ ᐃᑯᓪᓚᑎᑦᓯᓂᕐᒧᓗ ᐱᓂᕐᓗᓂᕐᒥᒃ, ᑫᓪᓗᑐᐃᓂᕐᒥᒃ ᐊᑦᑕᓀᑦᑐᓯᐊᓂᒃ ᖃᓄᐃᙱᓯᐊᕐᑐᓂᓪᓗ ᓄᓇᓕᖃᕐᓂᒧᑦ ᐊᐅᓚᑦᔭᕆᐊᒍᑎᖃᕐᓱᑎᒃ ᐃᓗᕐᕈᓯᕐᑎᒍᑦ ᖃᓄᐃᓕᒋᐊᕈᑎᐅᔪᓂᒃ, ᐱᐅᓯᐅᒥᑎᑦᓯᓂᕐᒧᑦ ᐃᓅᖃᑎᒌᑦ ᐊᕙᑎᖓᓂᒃ ᓄᓇᕕᒻᒥ ᐊᒻᒪᓗ ᐃᑲᔪᕐᓯᒪᓂᕐᒧᑦ ᐱᓂᕐᓗᑕᐅᓯᒪᔪᓂᒃ ᐱᐅᓯᐅᒥᑎᑦᓯᓂᕐᒧᓗ ᐃᓄᐃᑦ ᑎᒍᔭᐅᒪᔪᑦ ᐱᓇᓱᐊᕐᓂᖏᓐᓂᒃ.

ᐅᑯᐊ ᓇᓗᓀᕐᓯᒍᑎᐅᕗᑦ ᐅᖓᓗᒃ ᑮᓇᐅᔭᖃᕐᑎᓯᒍᑏᑦ ᓯᕗᓪᓕᐅᔨᒋᐊᓕᖏᓐᓂᒃ (ᐱᒻᒪᕆᐅᓂᖏᑦ ᑐᙵᕕᒋᑦᓱᒋᑦ) ᑐᑦᓯᕋᐅᑎᓕᐅᕐᑐᑦ ᐃᑉᐱᒋᒋᐊᓕᖏᑦ ᑮᓇᐅᔭᖃᕐᑎᑕᐅᓚᖓᒍᒪᒍᑎᒃ:

  1. ᐃᑯᓪᓚᐅᒥᑎᑦᓯᓂᖅ ᐱᑑᒪᒐᐅᑉ(ᒉᑦ) ᐊᑐᕐᓂᓗᑦᑕᐅᓂᖓᓂᒃ ᐊᒻᒪᓗ ᐊᔪᕆᓐᓂᕈᒍᑎᒥᒃ(ᓂᒃ)
  2. ᓯᕗᕐᖏᓂᓯᒪᓂᖅ ᐋᓐᓂᑎᕆᓂᕐᒥᒃ ᐊᓯᖏᓐᓂᓗ ᐱᓂᕐᓗᖓᒍᑎᓂᒃ (ᐃᓄᒻᒪᕆᓐᓂ ᐊᒻᒪᓗFᐅᕝᕙᓘᓐᓃᑦ ᐃᓅᓱᑦᑐᓂᒃ)
  3. ᑫᓗᐊᓂᖅ ᐃᓅᖃᑎᓄᑦ ᐃᓚᒋᓕᐅᑎᓂᕐᒥᒃ ᐅᕝᕙᓘᓐᓂ̂ᑦ ᐃᓚᒋᓕᐅᑎᒋᐊᓪᓛᓂᕐᒥᒃ (ᓯᕗᕐᖏᓂᓯᒪᓂᖅ ᐱᓂᕐᓗᖓᓂᕐᒥᒃ ᐅᕝᕙᓘᓐᓃᑦ ᐱᓂᕐᓗᖓᒋᐊᓪᓚᓂᕐᒥᒃ)
  4. ᑲᒪᑦᓯᐊᓂᖅ ᐋᓐᓂᐊᒍᑎᓕᓐᓂᒃ ᐊᒻᒪᓗFᐅᕝᕙᓘᓐᓂ̂ᑦ ᐃᓱᒪᒃᑯᑦ ᐃᓱᕐᕆᓯᐊᕐᓂᒥᒃ
  5. ᐃᑲᔪᕐᓯᓂᖅ ᐱᓂᕐᓗᑕᐅᓯᒪᔪᓂᒃ ᐱᓂᕐᓗᖓᒍᑎᓄᑦ ᐊᒻᒪᓗ ᐋᓐᓂᑎᕆᐅᑎᓄᑦ
  6. ᓴᓇᓂᖅ ᐱᐊᕋᕆᔭᓂᒃ ᐱᕈᕐᓭᒋᐅᕐᓴᒍᑎᓂᒃ ᐊᒻᒪᓗFᐅᕝᕙᓘᓐᓃᑦ ᑫᓪᓗᑐᕐᓂᖅ ᐊᑦᑕᓇᙱᑐᓂᒃ ᐃᓚᒌᖃᕐᓂᒥᒃ ᐊᒻᒪᓗFᐅᕝᕙᓘᓐᓂ̂ᑦ ᓄᓇᓕᓐᓂ ᐊᕙᑎᖃᕐᓂᒥᒃ
  7. ᓯᕗᕐᖏᓂᓯᒪᓂᖅ ᐃᓕᓐᓂᐊᕕᒻᒥ ᓄᕐᙯᓇᕐᓂᒥᒃ ᐊᒻᒪᓗFᐅᕝᕙᓘᓐᓃᑦ ᑫᓪᓗᐊᓂᖅ ᐃᓕᓐᓂᐊᓂᒃᑯᑦ ᐅᕝᕙᓘᓐᓃᑦ ᓇᒻᒥᓂᖅ ᐱᕙᓪᓕᐊᓂᒃᑯᑦ ᐱᔪᓐᓇᓯᒍᑎᑦᓴᓂᒃ
  8. ᑫᓪᓗᑐᕐᓂᖅ ᓴᖑᒍᑎᑦᓴᓂᒃ ᐊᒻᒪᓗ ᐊᓯᐊᒎᕈᑎᓂᒃ ᐊᒻᒪᓗ ᓴᖑᑎᑕᐅᒍᑎᓂᒃ ᐱᓂᕐᓗᖓᔪᓂᒃ

ᑕᑕᕐᓴᒉᑦ ᑐᑦᓯᕋᐅᑎᓕᐅᕐᓂᒧᑦ, ᒪᓕᒉᑦ ᐊᓯᖏᓪᓗ ᐊᓪᓚᓯᒪᔪᐃᑦ ᐊᑐᐃᓐᓇᐅᕗᑦ ᒪᑭᕝᕕᑯᑦ ᖃᕆᑕᐅᔭᒃᑯᑦ ᓄᐃᑕᑎᑦᓯᒍᑎᖓᑎᒍᑦ ᐅᕙᓂ ᓇᕐᓃᓗᑎᑦ “ᒫᓐᓇᐅᔪᖅ”-ᒥᒃ ᑌᒪ ᓇᕐᓃᓂᐊᓕᕐᒥᒐᕕᑦ “ᐅᖓᓗᒃ ᑮᓇᐅᔭᖃᕐᑎᓯᒍᑏᑦ”-ᒥᒃ.

* * ᖃᐅᔨᒪᒋᑦ ᑮᓇᐅᔭᐃᑦ ᐊᒥᐊᒃᑰᓯᒪᔪᑦ 2015F2016-ᒥ ᐊᑐᕐᑕᐅᓛᕐᒪᑕ ᑐᑦᓯᕋᐅᑎᓕᐊᒍᓯᒪᔪᓄᑦ ᑐᖓᓕᐊᓐᓂ ᑕᐃᒣᒻᒪᑦ ᐱᓇᓱᐊᕋᑦᓴᐅᔪᑦ ᐊᒥᓲᖏᑐᑦ ᑮᓇᐅᔭᖃᕐᑎᓯᒍᑎᐅᓛᕆᐊᖏᑦ ᓯᕗᓪᓕᐅᓚᐅᔪᒻᒪᓂᑦ.

ᑐᑭᓯᒋᐊᓪᓚᒍᒪᕈᕕᑦ:
ᓯᐊᔭ ᐃᐊᕈ, ᐅᖓᓗᒃᑯᑦ ᑐᑭᒧᐊᑦᑎᓯᔨᖓ
819-964-2925 ᓇᓗᓀᒃᑯᑕᖓ: 302

ᐅᕝᕙᓘᓐᓃᑦ ᒍᐃᓕᐊᒻ ᑕᑰᓇ, ᑐᓴᐅᒪᖃᑎᒌᑦᑎᓯᓂᕐᒥᒃ ᑐᓴᕋᑦᓴᓂᐊᕐᓂᒧᐊᓕᖓᔪᓂᓪᓗ ᑐᑭᒧᐊᑦᑎᓯᔨ
wtagoona@makivik.org
819-964-2925

ᒪᑭᕝᕕᑯᑦ ᑎᒥᐅᕗᖅ ᐱᕙᓪᓕᐊᑎᑦᓯᓂᕐᒥᒃ ᑐᕌᒐᖃᕐᓱᓂ ᐊᐅᓚᑦᓯᓂᕐᒥᒃ ᐃᓗᕐᕈᓯᓕᕆᓂᕐᒧᑦ ᑮᓇᐅᔭᖁᑎᖏᓐᓂᒃ ᓄᓇᕕᒻᒥᐅᑦ ᐃᓄᐃᑦ ᓄᐃᑕᐅᓯᒪᔪᓂᒃ ᔦᒻᔅ ᐯ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᑯᑦ ᐱᓇᓱᒐᑦᓴᖏᑦ ᐃᓚᖃᕐᐳᑦ ᐊᐅᓚᑦᓯᓂᕐᒥᒃ ᕿᑐᕐᖏᐅᑎᑦᓯᓂᕐᒥᓗ ᑖᒃᑯᓂᖓ ᑮᓇᐅᔭᖁᑎᐅᔪᓂᒃ ᑫᓪᓗᑐᐃᓂᕐᒥᓗ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᒥᒃ.