ᓯᓵᓯᐱ ᓄᑖᒐᓚᐅᖏᓐᓇᓱᓂ ᓄᓇᓕᒃ ᕿᑦᑌᖓᔮᕐᑑᓱᓂ ᐅᓪᓗᒥᒧᑦ ᓱᓕ ᐃᓄᒋᐊᑦᓯᕙᓪᓕᐊᓱᓂ ᑌᒪᙵᑦ ᐃᓄᖏᑦ ᓄᑦᑎᓚᐅᔪᑎᓪᓗᒋᓂᑦ ᒣᓚᓯᒃᑯᓂᑦ 1980-81-ᖑᑎᓪᓗᒍ. ᐃᓄᖏᑦᑕ ᐅᓄᒋᐊᓐᓂᖏᑦ 3,800-ᖏᓐᓃᑐᑦ ᐊᓪᓓᑦ ᑯᔩᑦ, ᐃᓄᑐᐃᓐᓇᖏᑦ 150-ᓃᒐᓚᑦᑎᓗᒋᑦ, ᐊᒻᒪᓗ 300 ᓄᓇᖃᖅᑳᓯᒪᔪᑦᓴᔭᐅᙱᑐᐃᑦ ᑖᕙᓂᒥᐅᖑᒻᒥᔪᑦ ᓇᒻᒥᓂᖅ ᑐᑭᑖᕐᓯᒪᒍᓇᕐᑐᑦ ᐱᓇᓱᐊᒐᖃᕆᐊᒥᒃ ᓄᓇᓯᒪᒋᐊᒥᓪᓗ ᑕᕐᕋᒥᐅᓂ. ᓯᕗᓕᕐᑎᖓ ᑲᑎᒪᔨᖏᓪᓗ ᓂᕈᐊᕐᑕᐅᓲᑦ ᐃᑲᔪᓚᖓᑎᓪᓗᒋᑦ ᐊᐅᓚᑦᓯᔨᐅᓂᕐᒥᒃ ᑯᔩᒃᑯᓂᒃ ᓄᓇᖃᖅᑳᓯᒪᔪᑦ ᐊᓪᓚᕕᖓᓂ ᓯᓵᓯᐱᒥ.
ᓄᓇᓕᐅᓪᓕ ᓄᓇᓕᙳᒋᐊᙵᓯᒪᓂᖓ, ᑭᖑᒧᖔᖅ ᑕᑯᒋᐊᕐᑕᐅᒍᓂ, ᑌᑦᓱᒪᓂᒧᑦ ᐅᑭᐅᑦ 100-ᒋᐊᓪᓓᑦ ᐊᒥᓱᒐᓓᑦ ᐅᑎᕆᐊᕐᕕᒋᓗᒋᑦ, ᑌᑦᓱᒪᓂ ᐊᓪᓚᖏᑦ ᑯᔩᑦ ᐱᐅᓯᖃᕐᐸᑐᕕᓃᑦ ᑕᕝᕙᓂᑦᓭᓇᖅ ᓄᓇᓯᒪᕙᑦᔭᒐᑎᓱᓕ ᖃᓂᑕᖓᓃᑦᑐᒥᒃ ᕿᑭᕐᑕᒥᒃ ᑲᑎᑦᑕᕕᖃᓲᕕᓂᐅᕗᑦ. ᑖᓐᓇ ᕿᑭᕐᑕᖅ, ᐊᑦᓯᔭᐅᕋᑕᕐᓂᐊᓱᓂ ᒣᓚᓯᒃᑯᑦ-ᒥᒃ, ᓄᓇᒋᔭᐅᕙᓪᓕᐊᓕᓚᐅᕐᑐᕕᓂᐅᕗᖅ ᑯᔩᒃᑯᓄᑦ ᐊᓪᓚᓄᑦ. ᑌᒪᓗ ᓂᐅᕕᕐᕕᐅᑉ ᖃᑦᓴᓐ ᐯ ᑲᒻᐸᓂᒃᑯᓄᑦ ᓄᐃᑕᐅᓂᖓ 1803-ᖑᑎᓪᓗᒍ ᐃᑲᔪᕐᓯᔪᕕᓂᐅᕗᖅ ᓄᓇᑖᕆᔭᐅᓪᓚᕆᕙᓪᓕᐊᓕᕐᓂᖓᓂᒃ. 1852-ᒥ, ᐊᖕᓕᑲᒃᑯᑦ ᑐᒃᓯᐊᕕᖓᓂᒃ ᐱᒋᐊᕐᑎᑕᐅᔪᖃᓕᓚᐅᕐᓂᕆᕗᖅ ᑭᖑᓪᓕᖃᕐᒥᑎᓪᓗᒍ 1907-ᐅᑎᓪᓗᒍ ᐊᖕᓕᑲᒃᑯᑦ ᐱᒋᐊᕐᑎᑕᖓᓂᒃ ᐃᓕᓐᓂᐊᕕᒻᒥᒃ ᐊᒻᒪᓗ ᑲᑕᓗᒃᑭᑯᑦ (ᐃᕐᓯᕋᕐᔪᐊᑯᑦ) ᐱᒋᐊᕐᑎᑕᖓᓂᒃ ᐃᓕᓐᓂᐊᕕᐅᒻᒥᔪᒥᒃ ᐱᒋᐊᕐᑎᑕᐅᔪᖃᕐᒥᑎᓪᓗᒍ 1927-ᐅᓕᕐᑎᓗᒍ. ᐃᓄᒋᐊᑦᓯᓕᐅᒥᔪᕕᓂᖅ ᓄᓇᓕᖓ 750-ᓃᒐᓚᑦᑐᕕᓂᐅᑦᓱᑎᒃ 1940-ᐅᑎᓪᓗᒍ 2,000-ᒐᓚᓐᓄᑦ ᐅᓄᕐᓯᓯᒪᓕᕐᑐᕕᓂᐅᒻᒥᓱᑎᒃ 1980-ᐅᓕᕐᒪᑦ, ᑌᑦᓱᒪᓂᓗ ᓅᑕᐅᔪᕕᓂᐅᑦᓱᑎᒃ ᐅᓪᓗᒥᐅᓕᕐᑐᖅ ᓄᓇᒋᓕᕐᑕᖓᓄᑦ.
ᒣᓚᓯᒃᑯᑦ ᓅᑕᐅᓚᐅᕐᑐᕕᓃᑦ ᑎᒥᖁᑎᖓ, ᑎᒥᐅᔪᙳᑎᑕᕕᓂᐅᑦᓱᓂ ᐊᖏᖃᑎᒌᒐᓱᐊᕐᓂᖃᕈᑎᐅᖅᑳᓱᓂ ᑯᔩᒃᑯᓄᑦ ᑯᐯᒃ ᑲᕙᒪᖓᓄᓪᓗ ᔦᒻᔅ ᐯᒥ ᐃᑯᒪᓕᐅᕐᓂᒧᑦ ᐱᓇᓱᐊᕐᑕᐅᔪᖃᕐᑎᓗᒍ ᐃᓄᖏᑦᑕ ᓅᑦᑎᑕᐅᓂᖏᓐᓂᒃ ᐊᒻᒪᓗ ᓄᓇᓕᖓᑕ ᐱᖁᑎᒋᓕᕐᑕᖏᑦᑕ ᓴᓇᔭᐅᓂᖏᓐᓂᒃ ᑲᒪᒋᔭᖃᓪᓚᕆᑦᑐᕕᓂᐅᕗᖅ.
ᓚ ᑯᕌᓐᑦ ᑰᖓᑕ ᑰᓐᓂᐊᑕᐅᓂᖓᓄᑦ ᐊᐅᓚᑦᔭᑕᖏᑦᑕ ᐅᓗᑦᔭᐅᒐᔭᕐᑐᐃᑦ ᓄᓀᑦ ᓇᓗᓇᕈᓐᓀᓯᒪᓂᑯᖏᓐᓄᑦ ᐊᒻᒪᓗ ᐊᓪᓓᑦ ᑯᔩᑦ ᕿᑭᕐᑕᒥᑦ ᓄᓇᒧᑦ ᓅᒍᒪᓕᕐᓂᕆᓯᒪᔭᖏᑦ ᓄᑦᑎᑎᐅᕐᖃᓚᕿᒍᑕᐅᓐᓂᖁᑦ. ᓄᑦᑎᑎᕐᓂᖏᓐᓂ ᐃᓪᓗᐃᑦ 200-ᐃᑦ ᐅᖓᑖᓃᑦᑐᑦ ᓅᑕᕕᓃᑦ ᓄᑕᐅᓯᓕᕐᑕᐅᓱᑎᓗ ᑌᑲᓂ ᓄᓇᒋᓯᔭᖓᓂ. ᐊᒻᒪᓗᑦᑕᐅᖅ, 100-ᓃᑲᓴᑦᑐᓂᒃ ᓄᑖᓂᒃ ᐃᓪᓗᓕᐅᓚᕿᔪᕕᓂᐅᑦᓱᑎᒃ ᑭᖑᓂᖓᒍᓪᓗ ᐊᒥᓲᓂᕐᓴᓚᕆᓐᓂᒃ ᐃᓪᓗᓕᐅᕐᓯᒪᓕᕐᓱᑎᒃ. ᐊᓯᖏᑦᑕᐅ ᐃᓪᓗᔪᐊᑦ ᓄᓇᓕᐅᑉ ᐊᑐᕋᑦᓴᔭᖏᑦ ᓴᓇᔭᐅᓯᒪᓕᕐᖁᑦ, ᓄᓇᓕᒻᒥᓗ ᐱᒍᑦᔨᕖᑦ ᐃᓂᓪᓚᑕᐅᓯᒪᓕᕐᓱᑎᒃ ᐊᒻᒪᓗ ᖄᖏᕐᓂᑯᓕᐅᕋᓱᐊᕐᓂᒧᑦ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒧᐊᖓᔪᐃᑦ ᐱᒋᐊᕐᑎᑕᐅᓯᒪᓕᕐᓱᑎᒃ ᑕᕝᕙᓂ ᓱᑲᑦᑐᒥᒃ-ᐱᕈᕐᐸᓕᐊᔪᒥᒃ ᓄᓇᓕᒻᒥ.
ᓯᓵᓯᐱ ᐊᓪᓓᑦ ᓄᓇᒋᑦᓱᓂᐅᒃ ᐅᖓᓯᓐᓂᐹᒦᑦᑐᖅ ᐊᕐᖁᑎᑐᐃᓐᓇᑯᑦ ᓇᐅᑐᐃᓐᓇᓄᑦ ᑎᑭᑕᐅᒍᓐᓇᑑᑦᓱᓂ.
